1, 2. Nkinyi kibaadi kikwashe Batemwe ba Yehowa 230 bwa kupanda mu lwendo lubabadi abende ku nfudiilo kwa Ngoshi yakabidi ya Nsenga ishima?

BU BIBAADI guvernema a ba Nazi pepi na kupona ku nfudiilo kwa Ngoshi yakabidi ya Nsenga ishima, abaadi baate kitshibilo kya kwipa bantu nkama abaadi bashaale mu nkano ya ba Nazi. Abatshile mpàngo ya kutuusha beena lukanu ba ku Sachsenhausen bwa kwenda nabo ku mbalo ayimenaa batoo bwa badya kwibatwesha mwanka bwashi bakebeele mu mbuu. Bantu abaudikile ino mpàngo bu lwendo lwa lufu.

² Beena lukano binunu makumi asatu na bisatu abaakatukile mu nkano ya ba Nazi ya ku Sachsenhausen mubabadi abebakyengesha abo nkwibatambusha lwa ngwa munda mwa bilometre 250 mpa na ku Lübeck lupata lwi ku bukunkula bwa meema mu Allemagne. Munkatshi mwabo mubaadi Batemwe ba Yehowa 230 ba mu maumbo asamombo babaabadi abatambuka nabo pamune. Booso abaadi bapwe kubofula pa mwanda wa maladi na kukutwa kwa bya kudya. Mushindo kinyi ubaadi bakwetu bapande mu luno lwendo lwa lufu? Mukwetu umune a kwabadi bambile bino shi: “Tubaadi atwinyingishena ku muntu na muntu bwatudya kutungunuka na lwendo. Nsaa yooso Yehowa baadi atuusha ‘bukome bushii bwa kupwandjikisha nabo kintu,’” kifulo kibaadi munkatshi mwabo kibaadi kibakwashe bwa kupanda ku luno lufu.—2 Kod. 4:7.

3. Bwakinyi twi na lukalo lwa kwinyingishena?

³ Lelo uno, tatwi mu lwendo lwa ku lufu nya, anka tukwete kupeta nkalakasho ibungi. Kunyima kwa kutuula Bufumu bw’Efile Mukulu mu 1914, abaadi babingye Satana mwiyilu na bamutuula peepi na nsenga, mmwikale na “nsungu, mushinguule’shi kubaamushaadila mafuku apeela.” (Bif. 12:7-9, 12) Bu bi uno ndumbulwilo kwete kwisesela ku Armagedone, Satana akitshi mwaye mooso bwa kwitutompa na kwitutuma mu kukita myanda i bubi bwa kwitubofusha mu kikudi. Na dingi kwete kwitufwishila twinyongoshi twa mu nshalelo a kwifuku  n’efuku. (Yob. 14:1; Mul. 2:23) Ingi nsaa ino nkalakasho yooso ngilombeene kwitubofusha mu mushindo watudi balombeene kupwandikisha shi sunga twakita naminyi, ta kwi mushindo wa kwiyipudisha nya. Tubande kutaluula kino kileshesho kya ungi mukwetu baadi mukwashe bantu bebungi mu kikudi munda mwa bipwa makumi. Nsaa ibanunupile, aye na mukashi aaye ababangile kukumba ngofu na abo nkubanga kubofula ku mashimba. Anka bu yawa mukwetu, muntu ooso a kwatudi e na lukalo lwa “bukome bushii bwa kupwandjikisha nabo kintu” bwa kwi Yehowa mpa na kwinyingishena na bangi.

4. Su abitungu shi tunyingishe bangi, elango kinyi dya Mpoolo mutumibwa dyatudi balombeene kutentekyesha?

⁴ Su abitungu shi tunyingishe bangi, twi na kya kutentekyesha ano mayi a Mpoolo mutumiibwa abaadi mulungule beena Kidishitu ba ku Ebreeyi shi: “Twikwasheeneeyi ku muntu na muntu bwa kwinyingisheena mu kifulo na mu mifubo iibuuwa. Tatupungilanga kufika mu biikongeeno byeetu, bu bibaabanga bangi kyaakya kyuubishi, anka twinyingisheeneeyi ku mashimba, nkibinkibi pano paanumono’shi efuku dya Mwanaana dibeeseesela peepi.” (Eb. 10:24, 25) Mmushindo kinyi watudi balombeene kulonda malango e mu ano mayi e na muulo ukata?

5. ‘Kwikwasheena ku muntu na muntu’ akulesha kinyi, na abitungu tukite kinyi bwa koobesha?

⁵ ‘Kwikwashena ku muntu na muntu’ akulesha “kutaluula nkalo ya bangi na kunangushena pa mwanda wabo.” Twi balombeene kuuka nkalo ya bangi bantu su miisambo yetu nabo ngimeene penda mu kwibasema lubilolubilo ku Nshibo ya Bufumu, sunga shi tukwete kwisamba nabo anka tumyanda twi na muulo upeela su? Ta mbyabya nya. Eyendo shi, twi na kya kwikala badimukye bwa kutala nka penda ‘myanda yeetu’twe banabeene’ na kushii ‘kutwela mu myanda îshi itutale.’ (1 Tes. 4:11; 1 Tim. 5:13, EEM) Byabya, kumpala kwa kunyingisha bakwetu, abitungu tubande kwibauka kalolo—nshalelo aabo, ngikashi yaabo, bi kipwano kyabo n’Efile Mukulu, bukome bwabo, na kubofula kwabo. Be na lukalo lwa kwitumona bu bakuuku baabo na kwibashinkamiisha shi twi bebafule. Bino abitungu shi tukishe nsaa ibungi nabo—ta nka penda nsaa yabadi na nkalakasho na nsaa yabadi babofule nya, kadi nsaa yooso.—Lom. 12:13.

6. Nkinyi kilombeene kupa bakulu mushindo wa ‘kukwasha’ baaba booso babakwete kukunkusha?

⁶ Bakulu mu tukongye mbebatekye bwa ‘kulama mikooko y’Efile Mukulu yabadi bebape,’ mbalombeene kwibikita na muloo ooso na kwilambula. (1 Mp. 5:1-3) Mushindo kinyi wabadi balombeene kulombasha mufubo wabo wa kukunkusha su tambaukye mikooko yabo kalolo mu mufubo wabo wa kulama? (Badika Myeele 27:23.) Su bakulu abo banabeene be pepi na beena Kidishitu nabo na kwibatembela, mikooko ayikala na muloo wa kuteka bukwashi nsaa yabadi nabo lukalo. Bakwetu balume na bakashi abakumiina dingi kulungula bakulu byabapusha mu mashimba aabo, myanda yabo ibatale, bino abibapa mushindo wa ‘kukwasha’ baaba bantu muyiile nkalo yabo na abatuusha bukwashi bwabadi nabo lukalo.

7. Mushindo kinyi watudi balombeene kumona bishima bya muntu ‘aakula mufudiile’?

⁷ Nsaa ibaadi mufundjile beena kakongye ka Tesalonika, Mpoolo bambile shi: “Nukwashe bafudîle.” (Badika 1 Beena-Tesalonika 5:14, EEM.) “Be na mô” mbafudîle mu mushindo kampanda, na mbabofule ku mashimba. Mukanda wa Myeele 24:10 awamba shi: “Su obofula efuku dya mpombo, byabya bukome bwobe mbupeela!” Muntu mubofule ngofu mmulombeene kwikala ‘aakula mufudiile.’ (Yob. 6:2, 3) Nsaa ‘yatukwasha’ baaba bantu, twi balombeene kulamiina shi, myanda yaabakula ta ngilombeene kwikala anka ya binyibinyi ayilesha bi mu mashimba aabo nya. Rachelle baadi na nyinaye baadi mubofule ngofu na twinyongoshi, baadi muukye uno mwanda ku bintu bitabamwene. Rachelle amba shi: “Nsaa ibungi Maman akumiinaa kwakula mwanda nka na kwidiladila. Mu yaaya nsaa yooso, naadi mubangye kutentekyesha shi, Maman mmuntu a kipaso kinyi binyibinyi—e na kifulo, muloo, na kalolo. Ndjo ami nkusangana shi, bantu babofule abaakulaa  bintu bibungi byabashii balombeene kupatuula. Bintu bibubi bilombeene muntu kukita nyi nkwibaalwisha bishima na bikitshino byabo bibubi.” Mukanda wa Myeele 19:11 aulesha shi: “Kinangu akipeeyaa muntu lwishinko, dingi apete nkumo paalenguula kukayiibwa.”

8. Twi na lukalo lwa kinyi bwa ‘kuleesha’ muntu kifulo, na mbwakinyi?

⁸ Mushindo kinyi watudi balombeene ‘kukwasha’ muntu mubofule mwanda wa mulwisho ubaadi mukite? Aku namu, tababaadi bapwe kumunyoka pa mwanda wa kilubilo kyaye, mmulombeene kutungunuka na kwikalakasha bwa byabya bibaadi mukite. Pabitale bantu ba mu Kakongye ka ku Kodinto abaadi bapwe kwilanga Mpoolo bebafundjiile bino: “Kumiinayi kumufwila lusa pamutwe pa ku mukitshiina ungi mwanda, dingi musambeeyi, tala apeta kinyongwa kikile bukata. Ngi mwanda kinyi, neenutekye’shi numuleeshe kifulo.” (2 Kod. 2:7, 8) Kishima “numuleeshe” akipatuula “kumulesha” sunga “kumushinkamiisha.” Mukwetu ta mulombeene kuuka shi twi bamufule na atumukalwila su tatukwete kwibileesha mu ngakwilo na mu bikitshino byetu. Uno mukwetu e na lukalo lwa kumona mwikeelo wetu na bikitshino byetu.

9. ‘Kwinyingisheena mu kifulo na mu mifubo iibuuwa’ akupatuula kinyi?

⁹ Mpoolo baadi mufunde shi: “Twikwasheeneeyi ku muntu na muntu, bwa kwinyingisheena mu kifulo na mu mifubo iibuuwa.” Twi na kya kunyingisha beena Kidishitu netu bwa kulesha kifulo na kwipaana ku midimo ibuwa. Nsaa i kaalo akakyebe kushima, twi balombeene kwela imo nteete bwa kukamisha mwidiidi. (2 Tim. 1:6) Bu bi nteete ayikamishaa mwidiidi, atwe namu twi balombeene kunyingisha bakwetu bwashi baleshe kifulo kyabo bw’Efile Mukulu na bwa bakwabo. Mushindo wibuwa wa kukita bino nyi nkutumbula bakwetu bwashi bakite myanda ibuwa.

10, 11. (a) Nnanyi a kwatudi e na lukalo lwa lutumbu? (b) Tuusha kileshesho akilesha mushindo wi kutumbula muntu ekalanga mupwe kutwela ‘mwishinda dibi,’ nkulombeene kumukwasha.

¹⁰ Byatwikala babofule sunga banyingye, muntu ooso a kwatudi e na lukalo lwashi bamutumbule. Ungi mukulu mu kakongye bafundjile shi: “Yaya tabaadi antumbula efuku su ndimune sunga kundungula shi naadi nakitshi bintu bibuwa. Byabya, ami nkukula na kwimona bu’mi shii na kinemo. . . . Sunga mbitandji na bipwa 50 lelo  uno, nkwete kusangala ngofu apanshinkamiisha bakuuku bande shi, nkwete kulombasha kalolo mufubo wande wa bu mukulu mu kakongye. . . . Myanda yandi mumone ami nabeene ngindongyeshe mushindo wandi mulombeene kunyingisha bangi, na nkwete kukita bukopo bwa koobesha.” Bantu booso be na lukalo lwa lutumbu—sunga bekala ba mbala-mashinda, bakulu, na bano booso babofule.—Lom. 12:10.

¹¹ Nsaa i ‘baaba abakunkushwa na kikudi ki selele, abaludika muntu na kupopêla,’ na kutuusha elango adilesha kifulo na lutumbu, mbalombeene kutakula muntu bakitshi bubi bwa kubanga kukituula myanda ibuwa. (Gal. 6:1) Bino bibaadi bikwashe ungi mukwetu mukashi abetanyina bu Miriam. Alesha bino: “Naadi mukile kingi kipungo ki bukopo bukile nsaa ibaadi bangi balole bande bapele bya binyibinyi na batuuka mu kakongye, aku namu mu aa mafuku, yaya baadi mukumbe maladi a mase aapalakana mu mutwe abetamina bu hémorragie cérébrale. Naadi mukalakashwe ngofu. Ndjo ami nkubanga kukimba mushindo wa kupudisha lwalwa lukalakasho, anka paapa, ami nkubanga kutuuka na ungi nsongwalume shii Temwe.” Uno mwanda ubaadi utakule uno mukwetu mu kwimona shi, Yehowa ta mulombeene kumufula dingi nya, na emona bu’ye taadi pepi na kukatuka mu bya binyibinyi. Nsaa ibaadi ungi mukulu mu kakongye mumutentekyeshe pabitale bibaadi afubila Yehowa na kululama kooso, binangu byaye bibaadi bifukame. Baadi mupe bakulu mushindo wabadya kumushinkamiisha bi kifulo kyaye bwa Yehowa. Pabakitshine byabya, kifulo kyaye bwa Yehowa kibaadi kinyingye. Aye nkutshiba kipwano kibaadi pankatshi paaye na yawa nsongwalume shii Temwe na aye nkutungunuka na kufubila Yehowa.

12. Nkinyi kilombeene kukitshika su atupwandikisha bakwetu na bangi bantu, atwibaakula myanda i bubi sunga kwibatopeka?

¹² Abitungu tudimukye nsaa yatukyebe kunyingisha mukwetu bwashi ekale na kisumi mu mudimo w’Efile Mukulu. Tatwikalanga atumupwandikisha na bangi bwa kumulesha shi aye takwete kukita bibungi mwanda talondo byatumulungula nya, sunga kumulesha bu shii kapu. Kukita bino nkulombeene kumutakula bwashi akite bibuwa penda bwa kapindji kapeela, kadi bipeta byadi mulombeene kutuusha ta mbya mafuku e bungi nya. Mushindo wibuwa wa kukankamika mukwetu, nyi nsaa yatumutumbula na kumukwasha bwashi ashinguule shi, kifulo kyatudi nakyo bw’Efile Mukulu ndjo akitutakula mu kukita bibuwa mu mudimo waaye.—Badika Beena-Fidipe 2:1-4.

13. Bwa kunyingisha bangi abitungu kinyi? (Tala kifwatulo ki ku mbangilo kwa mwisambo.)

¹³ Twi na kya ‘kwinyingishena ku muntu na muntu bikishekishe pano patumono shi efuku tadidi pepi.’ Kunyingisha bangi akulesha kwibatakula bwabadya kutungunuka na kwenda kumpala mu mufubo wabakwete kukitshiina Efile Mukulu. Twi balombeene kupwandikisha kutakula bantu mu kifulo na mu mifubo ibuwa na kwela nteete mu kaalo bwashi katembe, kunyingisha bangi namu twi balombeene kwikupwandikisha na kushisakanya nteete bwashi katungunukye na kutemba ngofu. Bwa kunyingisha abitungu kukankamika na kusaamba muntu mubofule kwishimba. Patudi na mushindo wa kunyingisha muntu mubofule, abitungu twikale na ngakwilo ebuwa a kalolo. (Mye. 12:18) Na dingi, abitungu ‘twikale na kupusha kwa bukidi’ na ‘beyeeshe mu kwakula.’ (Ja. 1:19) Su atuteemesha na lusa looso, twi  balombeene kutundula mwanda wi nawo mwina Kidishitu netu na kwakula kintu kilombeene kumukwasha bwashi anyingiile.

14. Mushindo kinyi ubaabadi bakwashe ungi mukwetu baadi mubofule?

¹⁴ Tubande kutala mushindo ubaadi ungi mukulu sha lusa mukwashe mukwetu shibaadi alungula dingi mukandu wi buwa munda mwa bipwa bibungi. Pabaadi yawa mukulu amuteemesha, bamwene shi yawa mukwetu mulume ki nka na kifulo kikata bwa Yehowa. Yawa mukwetu babangile kulonga miisambo ya mu Kitenta kya Mulami na aye nkukita mwaye mooso bwa kubanga kutwela mu bisangilo byooso. Byabya, bikitshino bya bangi beena kakongye bibaadi bimupe nsungu na kumubofusha. Yawa mukulu baadi mumuteemeshe na lusa looso kushii kumutopeka na aye nkulesha yawa mukwetu kifulo kyadi nakyo bwaye na ba mu kifuko kyaaye. Kapeelakapeela, yawa mukwetu nkushinguula shi baadi atadiila myanda ibaadi mumone kala ayimukutshisha kufubila Efile Mukulu na kifulo kyooso. Yawa mukulu nkuteka yawa mukwetu bwashi ende naaye mu mudimo wa bulungudi. Ku bukwashi bwa yawa mukulu, yawa mukwetu nkubanguula mudimo waye na aye nkulombasha myanda itekibwe bwa kwikala mukulu mu kakongye.

15. Nkinyi kyatulongyela kwi Yehowa pabitale kunyingisha kwa muntu e mu twinyongoshi?

¹⁵ Muntu mupwe kubofula ta mulombeene kunyinga mususa umune sunga kukumiina bukwashi bwabamupa nya. Abitungu tutungunukye na kumukwasha. Mpoolo bambile shi: “Kankamikayi babofule ku mashimba . . . ikalayi na lwishinko kwi booso.” (1 Tes. 5:14) Pamutwe pa kupela kwibanyingisha, tutungunukyeyi na ‘kwibakankamika’ nka byatubaadi atwibakankamika na kwibanyingisha. Kala, Yehowa baadi na lwishinko kwi bafubi baaye abaadi babofule ku mashimba ingi nsaa. Bu kileshesho, Efile Mukulu baadi muleshe Eliya kalolo, aye nkuteemesha bi mwishimba dyaaye. Yehowa nkupa mutemuki byabya bibaadi nabyo lukalo bwa kukita mudimo waye. (1 Bf. 19:1-18) Yehowa baadi mufwile Daavide lusa na kalolo kooso mwanda baadi mwilangye kwishimba. (Mis. 51:7, 17) Efile Mukulu baadi mukwashe mufundji a Musambo wa 73 baadi mulekye Kumufubila. (Mis. 73:13, 16, 17) Yehowa e na lusa na kalolo bikishekishe nsaa yatudi na myanda ayitukalakasha na patudi babofule ku mashimba. (Efi. 34:6) Lusa lwaye ‘ndupya kunamashika ooso,’ na ‘tandufudiile.’ (Kwi. 3:22, 23) Yehowa etutekye shi tulonde kileshesho kyaye na tukitshine baaba bafudiile myanda na kalolo kooso.

16, 17. Bu bi nfudiilo ikwete kwifubwila pepi, abitungu twikale na kitshibilo kinyi, na bwakinyi?

¹⁶ Mu beena lukano 33 000 babaabadi bakatukye nabo ku Sachsenhausen kubafwile bantu binunu. Byabya, muntu ooso a ku Batemwe ba Yehowa 230 abaadi bakatukye mu nkano ya ba Nazi baakafikile na muwa. Kunyingishibwa na bukwashi bubabadi bapete kwi bangi bibaadi bibakwashe bwa kwalula lwalwa lwendo lwa lufu alo nkwikala bu lwa kipandjilo.

¹⁷ Lelo uno twi mu “dyady’eshinda adifishanaa ku muuwa.” (Mat. 7:14) Kubashaala mafuku apeela balangwidi ba Yehowa booso abekala abatambuka mu bu umune mu ndumbulwilo mupya a kululama. (2 Mp. 3:13) Twateyi kitshibilo kya kwikwashena bwa kutwela mwishinda adifishanaa ku muwa wa looso.