1, 2. Bwakinyi mbilombane bwashi Yehowa epwandjikishe na mulami?

YEHOWA aye nabeene epwandikisha na mulami. (Ez. 34:11-14) Bino mbilombane mwanda abitukwasha bwa tudya kuuka Yehowa kalolo. Mulami a kifulo akitaa mwaye mooso bwa kupasha mikooko yaaye na bwa kwiyilama kalolo. Eyitwala mu bipya bii bisooswa na ku nsulo ya meema (Mis. 23:1, 2); eyilama bufuku na kaanya (Luk. 2:8); eyikalwila ku nyema i bukyelo (1 Sam. 17:34, 35); asemuna yaaya ibakatuka mu kutandjikwa (Yesh. 40:11); akimbi yaaya ibaashimina, na kubuka yaaya itapikye.—Ez. 34:16.

² Bu bibaadi bafubi ba Yehowa ba kala abaadi baubiile midimo ya kumuna na kudima mafuba, abaadi bapushe kalolo bwakinyi Yehowa Efile Mukulu epwadjikisha na mulami a mikooko sha kifulo. Abaadi abauku shi bwashi mikooko ikale bibuwa, abitungu kwiyibamba na kwiyilama kalolo. Bi mumune na bantu pabitale myanda ya mu kikudi. (Mak. 6:34) Su tambalamibwe na kukunkushibwa kalolo mu kikudi, abakyebe kukyenga. Abekala babofule mu kikudi na kukita myanda ishi ilombane—anka abipalakanaa “mikooko ishii na mulami.” (1 Bf. 22:17) Kadi, Yehowa kwete kukumbasha nkalo ya bafubi baaye na kifulo kyooso.

3. Nkinyi kyatukyebe kulonga mu uno mwisambo?

³ Kwipwandjikisha kwa Yehowa na mulami kwi na muulo ukata mpa na ano mafuku eetu. Yehowa kwete kutungunuka na kudiisha bafubi baaye be bu mikooko. Tubande kutala mushindo wa kwete kukunkusha mikooko yaaye na kulombasha nkalo yaayo mu ano mafuku eetu. Atukyebe kutala dingi mushindo autungu shi mikooko ikite pabitale mushindo ukwete Yehowa kwitatshisha bwayo.

4. Mudimo kinyi wi nawo Yesu pabitale kulombasha nkalo ya mikooko ya Yehowa?

⁴ Yehowa mmusangule Yesu bwa kwikala Nfumu a kakongye ka beena Kidishitu. (Ef. 1:22, 23) Bu byadi “mulami a mikooko ebuwa,” Yesu alesha bii mpàngo ya Nshaye, ngikashi Yaaye, na mushindo wakwete kwitatshisha bwa bafubi baaye. Yesu baadi mpa na ‘mupaane muwa waaye bwa mikooko yaaye.’ (Yo. 10:11, 15) Mulambu wa nkuulo ya Yesu nyi mbukwashi bukata kwi bantu! (Mat. 20:28) Nyi bwakinyi, Yehowa akumina shi ‘muntu ooso akumiina mwadi [Yesu] tashiminanga, anka ekale na muuwa wa iikalaika.’—Yo. 3:16, Kilombeno kipya.

5, 6. (a) Mba nnanyi babadi basangule kwi Yesu bwa kudiisha mikooko, na abitungu’shi mikooko ikite kinyi bwashi ino mpàngo ibakwashe? (b) Mwanda kinyi awitutumu bwa kukumina kukokyela bakulu mu kakongye?

⁵ Mushindo kinyi ulombeene mikooko y’Efile Mukulu kwambula kileshesho kya Mulami Ebuwa, Yesu Kidishitu? Yesu baakwile shi: “Mikooko yande aiteemesha eyi dyande, neeyuuku, n’ayo naamu aindondo.” (Yo. 10:27) Kuteemesha kalolo eyi dya Mulami ebuwa, nkulonda bukunkushi bwaye mu myanda yooso. Bino abilesha dingi kukokyela mayi a balami baadi musangule bwashi bekale muushi mwaye. Yesu baadi muleshe shi batumibwa na balondji baaye, abakatungunuka na mudimo ubaabangile. Bibaadi abitungu shi ‘balongyeshe’ na ‘kudiisha baana ba mikooko ya Yesu.’ (Mat. 28:20; badika Yowano 21:15-17.) Pabaadi apapalakana mukandu wibuwa, bungi bwa balongi bubaadi abwende na kukaamina, Yesu baadi mukite bwashi balume banyingye mu kikudi bekale abakunkusha kakongye.—Ef. 4:11, 12.

⁶ Pabesambile na bakulu ba mu kakongye ka Efeeze, Mpoolo mutumibwa baadi muleshe shi kikudi kiselele kibaadi kibasangule bu balami ‘bwa kulama kakongye k’Efile Mukulu.’ (Bik. 20:28) Bi mumune na bakulu lelo uno, mwanda abo namu’nyi mbasangudibwe muyiile abitekye mayi a Bifundwe, afundjibwe ku bukwashi bwa kikudi kiselele. Byabya, nsaa yatukokyela bakulu, atulesha shi tukwete kukokyela Yehowa na Yesu, abo Balami bakata. (Luk. 10:16) Eyendo shi, uno mwanda nyi awitutumu bwa kwikala na lukalo lwa kukokyela bakulu. Kadi, kwi ingi myanda ayilesha shi kukita byabya mmwanda wa kinangu.

7. Mushindo kinyi ukwete nkukwasha bakulu bwa kulama kipwano kibuwa na Yehowa?

⁷ Pabakwete kukunkusha bakwabo beena Kidishito, bakulu abanyingisha bantu ku mashimba na kutuusha malango aatukila mu Bifundwe sunga mu miiya ya Bifundwe. Akibatakula bwa kukita bino ta mbwa kwibatumina mayi a kulonda mu muwa wabo nya. (2 Kod. 1:24) Kadi, bakwete kupa bakwabo beena Kidishitu bukunkushi bwa mu Bifundwe bwa kwibakwasha bwabadya kwata bitshibilo bibuwa na kunyingisha bangi bwashi kufukama kwikale mu kakongye na bwashi myanda ikitshikye mu mulongo. (1 Kod. 14:33, 40) Bakulu bakwete ‘kulama miuwa yetu’ mwanda bakwete kukwasha mwina kakongye ooso bwadya kulama kipwano ki buwa na Yehowa. Byabya nsaa yooso yabamono mukwetu mulume sunga mukashi taadi pepi, sunga shi e “mu kito,” abamukwasha kushi kunyengakana. (Gal. 6:1, 2; Yu. 22) Pa uno mwanda ndjo bwakinyi abitungu ‘kukokyela baaba abetukunkusha.’—Badika Beena-Ebreeyi 13:17.

8. Mushindo kinyi ukwete kukalwila bakulu lombe lw’Efile Mukulu?

⁸ Mpoolo mutumibwa, aye mulami ebuwa a mu kikudi, baadi mufundjile bakwabo ba mu Kolose shi: “Dimukaayi, tala muntu su ngumune eenukwata ku kateo ka binangu byaaye, na madimi aatuukila ku byubishi bya bantu, ku bintu bya pano, bishii bya Kidiishito.” (Kol. 2:8) Ano mayi abaadi mwibadimushe nawo aalesha ungi mwanda awitutumu bwa kulonda malango aetupa bakulu muyiile abyamba Bifundwe. Bakwete kukalwila lombe lw’Efile Mukulu paabo  kudimusha bakwabo balume na bakashi pabitale bantu booso balombeene kulwisha lukumiino lwabo. Mpyeele mutumibwa baadi mudimushe bakwabo pabitale “batemuki ba madimi” na “balambukishi ba madimi” abaadi abatompo ‘kuponesha bantu babofule’ mu kukita myanda ibubi. (2 Mp. 2:1, 14) Lelo namu’nyi, bakulu be na kya kudimusha bakwabo mu wawa mushindo p’abamono shi abitungu kwibadimusha. Bu byabadi beena Kidishitu banyingye mu kikudi, abauku na mbafumankane na myanda ibungi. Na dingi, kumpala kwa’bo kusangudibwa, mbaleshe shi abauku Bifundwe kalolo na shi mbalombeene kulongyesha kalolo. (1 Tim. 3:2; Tt. 1:9) Bu byabadi banyingye mu kikudi, be na mweneno ebuwa a myanda, na be na binangu abifiki mu Bifundwe, mbalombeene kobesha kukunkusha lombe lw’Efile Mukulu kalolo.

9. Mushindo kinyi ukwete Yesu kukunkusha na kudiisha kakongye ka beena Kidishitu lelo uno?

⁹ Ku bukwashi bwa ndumbulwilo aaye, Yehowa kwete kutusha bidibwa bibungi bya mu kikudi bwa kupa bakwetu beena Kidishitu be mu nsenga ishima. Malango e bungi a mu Bifundwe bakwete kwitupa anka ku bukwashi bwa mikanda. Na dingi, ingi nsaa ndumbulwilo etukunkusha kukidila kwi bakulu ba kakongye, pangi ku bukwashi bwa mikanda sunga angi mayi etutumina na bakunkushi ba kifunda sunga ba distrike. Mu uno mushindo, mikooko ayipete bukunkushi bwi buwa.

10. Mbushito kinyi bwi na balami ba mikooko pabitale yaaya yende kula na lombe?

¹⁰ Twi kwamba shi bakulu be na mudimo  wa kukalwila, kubuka na kulama beena kakongye mu kikudi, bikishekishe baaba batapikye ku mashimba sunga abakumbu mu kikudi. (Badika Jaake 5:14, 15.) Bangi ba ku bano beena kakongye mbakumbeene kwikala bapwe kwenda kula na kakongye sunga kuleka midimo ya mu kikudi. Yaaya nsaa, mukulu e na kabambo e na kya kukita mwaye mooso bwa kupeta mukooko ooso ushimine na kwiusendeela bwashi walukye mu kikutu, mu kakongye su? Eyendo e na kya kwibikita! Yesu baadi muleshe shi: “Nsheenu ee mwiyilu akyebe’shi sunga ngumune a ku bano bapeela tashiminanga.”—Mat. 18:12-14.

11. Bwakinyi bangi abamona’shi bi bukopo bwa kulonda bukunkushi bwa bakulu?

¹¹ Yehowa na Yesu Mbalami bapwidikye. Bakulu babadi bape bushito bwa kukunkusha kakongye ta be byabya nya. Uno mwanda ngulombeene kufwisha bangi bwabadya kumona shi bi bukopo kulonda bukunkushi bwa bakulu. Mbalombeene kwamba shi: ‘Mbantu bakutwe kupwidika anka byatudi. Bwakinyi abitungu shi, tulonde malango aabo?’ Eyendo, bakulu mbantu bakutwe kupwidika. Kadi, abitungu twikale na mweneno ebuwa pabitale bilema na kubofula kwabo.

12, 13. (a) Twi kwamba kinyi pabitale bilubilo bya bangi bantu babadi bape mashito kwi Yehowa? (b) Bwakinyi Yehowa mmufundjishe mu Bible bilubilo bya bantu babaadi mupe mashito?

¹² Bifundwe abilesha shi bantu babaadi Yehowa mutumikye nabo mu mafuku a kala babaadi na bilema. Bu kileshesho, Daavide baadi musangulwe bwa kwikala nfumu na mukunkushi a Isaleele. Sunga mbyabya, baadi mupone mu bitompwanga, aye kutambuka lusandji na nkupongoola mase. (2 Sam. 12:7-9) Twate dingi kileshesho kya Mpyele mutumibwa. Sunga mbibaadi mupeebwe bushito bukata bwa kukunkusha kakongye ka beena Kidishitu mu mafuku a batumibwa, baadi mukite ingi myanda ishi ilulame. (Mat. 16:18, 19; Yo. 13:38; 18:27; Gal. 2:11-14) Kukaasha penda Yesu, ta kwi muntu su ngumune mupwidikye kasha Adame na Eeva baakutwa kupwidika.

¹³ Bwakinyi Yehowa baadi mutume bantu abafundjile Bible bwashi bafunde bilubilo bya bantu babaadi mupe mashito akata? Ungi mwanda ubaadi umutume bwa kukita byabya, nyi mbwa kulesha shi mukumbeene kutumika na bantu bashi bapwidikye bwa kukunkusha mwilo waaye. Na dingi, akitaa nka byabya. Byabya, tatwi balombeene kumona shi bu byabadi na bilubilo twi na kya kupela kwibakokyela sunga kuwunauna pabitale matalwa aabo. Yehowa akyebe shi tunemekye baaba bakwetu na kwibakokyela.—Badika Efilu 16:2, 8.

14, 15. Mushindo ubaadi Yehowa mwisambe na bafubi baaye ba kala awitulongyesha kinyi?

¹⁴ Kukokyela baaba bakwete kukunkusha kakongye lelo kwi na muulo ukata. Banda kupwandjikisha mushindo ubaadi Yehowa esamba na bafubi baaye ba kala mu bipungo bi bukopo. Pabaadi mwilo wa Isaleele utuukye mu Ejiipitu, Efile Mukulu baadi mwibatumine mayi kukidila kwi Moyiise na Aarone. Bwa kupela kufwa pa kipupa ky’ekumi, beena Isaleele abaadi na kya kukokyela mayi atale kidiibwa kya dyadya efuku na kushinga ku ntempa ya biibi byaabo mase a mukooko ubaabadi bayipe. Bwa kwibatumina ano mayi, Efile Mukulu tabaadi mwisambe nabo n’eyi adifiki mwiyilu nya. Bibaadi abitungu shi bateemeshe akyamba bakulu ba mu Isaleele, aku namu abo abaadi bapete ano mayii kwi Moyiise. (Efi. 12:1-7, 21-23, 29) Mu aa mafuku, Moyiise na bakulu ba mu Isaleele abaadi batumikye bu baakwidi bwa kutwala mayi a Yehowa kwi mwilo. Bakulu beena Kidishitu bakwete kukita mudimo wi byabya lelo uno.

¹⁵ Pangi, ingi myanda i mu Bible ayilesha mushindo ubaadi Yehowa mutumine bafubi baaye mayi akumbeene kwibapaasha pa kukidila kwi bantu na mikeyilu ayikufwila mu binangu. Mu ino myanda yooso, Efile Mukulu baadi mumone shi bibaadi abitungu kupa  bantu angi matalwa aaye. Bantu babaadi baakule mwiyi dyaaye, na abaadi balungule mwilo waaye akitungu kukita bwa kupanda mu mafuku a mpombo. Tatumono shi Yehowa mukumbeene kukita myanda i byabya mu nsaa ya Armagedone su? Sunga mbyabya, bakulu booso lelo uno babadi bape mashito bwa kulesha mpala ya Yehowa sunga ndumbulwilo aaye be na kya kudimuka bwashi tabatumikanga bi bubi na matalwa abadi bebape.

16. “Eyi” kinyi aditungu shi tuteemeshe?

¹⁶ Bafubi ba Yehowa ‘ndombe lumunenka’ abakukunkushiibwa na “mulami umune,” Yesu Kidishitu. (Yo. 10:16) Yesu baadi muleshe shi ekala na balongi baaye “mafuku ooso, nyaa na ku nfudiilo a bya-pano.” (Mat. 28:20) Bu byadi Nfumu mwiyilu, myanda yooso ayikafwisha kusambishibwa kwa uno ndumbulwilo a Satana i mu maasa aaye. Bwashi tushaale bebungye mu lombe lw’Efile Mukulu mwatudya kupanda, abitungu tuteemeshe ‘eyi di kumongo kwetu,’ aditulesha eshinda dya kulonda. Dino “eyi” ndisangishe mayi aakula kikudi ky’Efile Mukulu mu Bible mpa na byooso abitulungula Yehowa na Yesu ku bukwashi bwa baaba babadi basangule bu balami be muushi mwa Mulami mukata.—Badika Yeeshaya 30:21; Bifumbulwe 3:22.

17, 18. (a) Lombe lw’Efile Mukulu lwi mu masaku kinyi, kadi mushindo kinyi watudi balombeene kupanda? (b) Nkinyi kyatukyebe kutaluula mu mwisambo aulondo?

¹⁷ Satana mmuleshiibwe bu kwete kutambuka “bu ntambwe e bukyelo kwete kukimba aady’a kudya.” (1 Mp. 5:8) Nka bu nyema a bukyelo na a mapya, Satana kwete nka kubembeela lombe lw’Efile Mukulu, atengyela mushindo wadya kutupikila ooso shii mudimukye sunga alubu eshinda. Nyi bwakinyi abitungu twikale pepi na lombe na pepi na Yehowa “mulami a mikooko naa a myuuwa [yeetu].” (1 Mp. 2:25) Pabitale baaba abakapanda ku mpombo ikata, mukanda wa Bifumbulwe 7:17 awamba shi: “Mukooko wana [Yesu] . . . awikala mulami aabo, awibashindikila ku nsulo ya meema a-muuwa. Efile naamu akumuna mpolo yooso ku meeso aabo.” Kwi kwikala ungi mulayilo ukile uno buwa su?

¹⁸ Kunyima kwa kumona mudimo ukata wa bakulu mu kakongye wa bu balami be mushi mwa Kidishitu, bibuwa twiyele luno lukonko: Mushindo kinyi ukumbeene bano balume basangudibwe kumona’shi bakwete kukitshina mikooko ya Kidishitu myanda mu mushindo ulombane? Lukonko alukapete lwalulo mu mwisambo aulondo.