1. Bansongwalume na bansongwakashi beena Kidishitu be na mushindo wibuwa wa kukita kinyi?

TWI mu kipungo kimune ki buwa bukile. Kubanga kala, takwekeele midiyo ya bantu ba miilo yooso be bungi bino bakwete kufika mu lulangwilo lwa binyibinyi nya. (Bif. 7:9, 10) Bansongwalume na bansongwakashi bebungi bakwete kupeta muloo wibungi nsaa yabakwete kukwasha bangi bwa kupusha bya binyibinyi bya mu Bible abipa bantu muuwa. (Bif. 22:17) Bangi bansongwalume na bansongwakashi bakwete kulonga Bible na bantu, abebakwasha bwabadya kwikala na nshalelo ebuwa mu muwa wabo. Bangi namu bakwete kwenda mu kulungula mukandu wibuwa mu ma mbalo abesamba lungi ludimi. (Mis. 110:3; Yesh. 52:7) Mushindo kinyi oodi mulombeene kwipaana ngofu mu uno mudimo ukwete kukita bantu ba Yehowa?

2. Kileshesho kya Timotee akitulesha naminyi’shi Yehowa e na lukalo lwa kupa bansongwalume na bansongwakashi mashito? (Tala kifwatulo ki ku mbangilo kwa mwisambo.)

² Pokii mukinga, we mukumbeene kwata bitshibilo bilombeene nkupa mishindo ibuwa ya kufubila Efile Mukulu. Bu kileshesho, Timotee a mu Listre baadi mwate kitshibilo ki buwa kibaadi kimukwashe bwa kukita mudimo wa bu misionere pabaadi pangi kii ku mbangilo kwa bipwa 20. (Bik. 16:1-3) Abimweneka’shi myeshi ipeela kunyima, kubebwele kubingwabingwa kukata kubaadi kutakule Mpoolo  mutumibwa bwa kukatuka mu kakongye ka ku Tesalonika kabaadi kakii kapya, Mpoolo baadi mupe nsongwalume Timotee mudimo wa kwalukiila mu Tesalonika bwa kunyingisha bakwabo. (Bik. 17:5-15; 1 Tes. 3:1, 2, 6) We mulombeene kupwandikisha bibapushiishe Timotee pabapetele dyadya eyi su?

3. Nkitshibilo kinyi kikile bukata kyodi mulombeene kwata mu muwa oobe, na nsaa kinyi ayitungu’shi wekyate?

³ Pokii nsongwalume sunga nsongwakashi, yaaya ndjo nsaa yodya kwata bitshibilo bi na muulo ukata. Anka kitshibilo kimune kikile bingi—nkitshibilo kyobe kya kufubila Yehowa. Nsaa kinyi ayitungu shi wate kyakya kitshibilo? Yehowa amba shi: “Tentekyesha Mukupangye mafuku a ku bukinga boobe.” (Mul. 12:1) Mushindo umune wibuwa wa “kutentekyesha” Yehowa nkumufubila ngofu. (Miy. 10:12) Kitshibilo ki na muulo ukile bukata koodi nkya kufubila Efile Mukulu n’eshimba dyoobe dyooso. Akikyebe nkukwasha ngofu mu muwa oobe ooso.—Mis. 71:5.

4. Kukaasha kufubila Yehowa mbitshibilo kinyi bingi bitale mushindo oobe wa kufubila Efile Mukulu?

⁴ Eyendo shi, ta nkapenda kitshibilo kyobe kya kufubila Yehowa ndjo kilombene nkukwasha mu mafuku oobe e kumpala. Bu kileshesho we mulombeene kwiyipusha pabitale muntu odya kwiyibakishena naaye na pabitale mushindo odya kwikala na nshalelo ebuwa. Bino nyi mbitshibilo bi na muulo byodya kwata, kadi bi buwa su waata kitshibilo kya kufubila Yehowa ngofu. (Miy. 30:19, 20) Bwakinyi? Mwanda bino bitshibilo byooso mbipushene. Kitshibilo kyodi mulombeene kwata pabitale dibaka nkilombeene kulwisha sunga kulumbuula mushindo oobe wa kufubila Efile Mukulu. (Tala byabidi bipushene na Luuka 14:16-20.) Ku lungi lupese, kitshibilo kyoodi mulombeene kwata bwa kufubila Efile Mukulu kii nkukwasha pabitale kusangula kwa muntu a kutwela naaye mu dibaka sunga mudimo wa kufuba. Byabya, banda kwata kitshibilo ki na muulo ukata mu muwa oobe.—Fid. 1:10.

5, 6. Mushindo kinyi wi kileshesho kya Yuichiro akilesha shi kwata bitshibilo bibuwa nkulombeene kupa muntu mishindo ibungi ya kufubila Yehowa?

⁵ Su boopu kusangula kufubila Efile Mukulu, we mukumbeene kuuka shi nkinyi kyakumiina shi okite, akupu waate kitshibilo kya kumona mushindo odya kumufubila. Ungi mukwetu a mu Japon bafundjile shi: “Panaadi na bipwa 14, naadi mwende mu kulungula mukandu wibuwa na ungi mukulu a mu kakongye baadi mumone shi ntshikwete kusangeela mudimo wa bulungudi. Bandungwile na kanemo kooso shi: ‘Yuichiro enda ku nshibo. Oshaale onangusheene kalolo pabitale bikukitshiine Yehowa.’ Nayiile nakita nka byabya. Natungunukile na kunangushena mpa na kwela nteko munda mwa mafuku. Binangu byande bibabangile kwenda na kushintuluka. Mu mafuku apeela, nasangeene shi ne na lukalo lwa kufubila Yehowa. Naadi na muloo wa kubadika myanda ya ba misionere, ami nkubanga kunangushena pabitale mushindo wa kufubila Efile mukulu ngofu.”

⁶ Yuichiro atungunuka na kwamba shi: “Nabangile kwata bitshibilo bilombeene kunkwasha bwa kwenda mu kufubila Yehowa mu dingi eumbo. Bu kileshesho, naatshile kitshibilo kya kulonga Anglais. Panakatukile ku kalasa, naatshile kitshibilo kya kufuba nsaa ipeela bwa kulongyesha Anglais na kukita mudimo wa bu mbala-mashinda. Panalombeeshe bipwa 20, nabangile kulonga ludimi lwa betamina bu Mongole ami nkwenda mu kutala kisaka kya balungudi abesamba ludimi lwa Mongole. Kunyima kwa bipwa bibidi, mu 2007, nayiile ku Mongolie. Panayiile mu mudimo wa bulungudi na bangi ba mbala-mashinda namwene shi bantu bebungi bakwete kukimba bya binyibinyi, naadi na lukalo lwa kushaala kwanka bwa kwibakwasha. Nalukiile mu Japon bwa kwilumbuula. Ne mubangye kufuba bu mbala-mashinda mu Mongolie kubanga mu mweshi wa Kananka 2008. Nshalelo ta mubofule kuno nya. Anka bantu bakwete kutambula mukandu wibuwa, nadingi ne na mushindo wa kwibakwasha bwashi befubwile pepi na Yehowa. Napusha’shi ne mwate kitshibilo ki na muulo ukata mu muwa wande.”

7. Mbitshibilo kinyi abitungu shi twiatshile, na Moyiise mwitulekyele kileshesho kinyi?

 ⁷ Muntu ooso e na kya kwata kitshibilo pabitale nshalelo aaye a bu Temwe a Yehowa. (Yos. 24:15) Tatwi balombeene kwinulungula su abitungu kutwela mu dibaka sunga muntu anudya kwiyibakishena naaye sunga pabitale kusangula kwa mudimo nya. Anukumiina kusangula mudimo awinutekye kulonga penda myanda ipeela su? Beneenu bansongwalume na bansongwakashi bee mu bibundji bi bantu balanda; bangi namu be mu bibundji bi na bupeta. Mu nsenga ishima nwibelekeene bikata pabitale bu muntu bwenu, bukome, kuuka kwa myanda, bintu abinusankisha na lukumiino. Pangi nwi belekeene ngofu bu bibaadi bansongwalume na bansongwakashi beena Ebreeyi mu Ejiipitu a kala belekeene na Moyiise. Moyiise baadi na mushindo wa kwikala mwibalasa dya nfumu aku naamu bangi abaadi bu bapika beena Ebreeyi. (Efi. 1:13, 14; Bik. 7:21, 22) Anka bu byanudi’nwe, abo abaadi mu kipungo ki buwa. (Efi. 19:4-6) Muntu ooso baadi na kya kusangula kilombeene akita na muwa waaye. Moyiise baatshile kitshibilo ki buwa.​—Badika Beena-Ebreeyi 11:24-27.

8. Mbalo kinyi yoodi mulombeene kupeta bukwashi bwa kwata bitshibilo bibuwa?

⁸ Yehowa akukwasha bwa kwata bitshibilo bi buwa ku bukinga boobe. Kwete kutuusha malango ku bukwashi bwa mayi a kulonda alombeene nkukwasha mu myanda yoobe. (Mis. 32:8) Na dingi baledi boobe beena Kidishitu na bakulu mu kakongye mbalombeene nkukwasha bwa kunangwila ku mushindo wa kutumikila ano mayi a kulonda. (Mye. 1:8, 9) Tubande kutala mayi a kata a kulonda asatu alombeene nkukwasha bwa kwata bitshibilo bibuwa bikumbeene nkukwasha mu mafuku oobe e kumpala.

9. (a) Mushindo kinyi witupe Yehowa kinemo pakwitupa bulungantu bwa kwisangwila? (b) ‘Kubanga kukimba Bufumu’ akwitupa bukwashi kinyi?

⁹ Bandayi kukimba Bufumu na bululame bw’Efile Mukulu. (Badika Mateo 6:19-21, 24-26, 31-34.) Yehowa mwitupe kinemo kya kwikala na bulungantu bwa kwisangwila. Ta mmutekye bungi bwa nsaa ya ku bukinga boobe yodya kutuusha mu mudimo wa bulungudi bwa Bufumu. Anka Yesu mwitupe eyi dya kulonda aditutakula mu kubanda kukimba Bufumu. Mushindo otumikila by’akula aukyebe nkukwasha bwa kulesha kifulo kyobe bw’Efile Mukulu, mushindo okwete kwitashisha bwa benoobe, na mushindo okwete kusangeela lukulupilo loobe lwa muwa wa losoo. Nsaa yokwete kunangwila pabitale dibaka na kusangula mudimo wa kukita, banda kutala su kitshibilo kyokyebe kwata ki nkutushisha nkalakasho pabitale bintu bya ku mbidi sunga nkupa katshintshi mu mudimo wa Bufumu bw’Efile Mukulu na bululame bwaye.

10. Nkinyi kibaadi kipe Yesu muloo, na mbitshibilo kinyi abikyebe nkwinupa muloo?

¹⁰ Petayi muloo wa kukwasha bangi. (Badika Bikitshino 20:20, 21, 24, 35.) Yesu mmwitulongyeshe na kalolo kooso dino eyi dikata dya mu nshaleelo. Baadi na muloo mwanda bakitshine akikyebe eshimba dya Nshaaye pamutwe pa kukita akikyeb’eshimba dyaaye. Yesu baadi na muloo wa kumona bantu beyishe kwabatambula mukandu wibuwa. (Luk. 10:21; Yo. 4:34) Pangi tanubapetele muloo wa kukwasha bangi. Su nubatuulu bitshibilo bikata bya mu nshalelo enu ku mayi a kulonda abalongyeeshe Yesu, anukyebe kupeta muloo mpa na kusankisha eshimba dya Yehowa.​—Mye. 27:11.

11. Bwakinyi Baruke baadi mushimishe muloo waaye, na elango kinyi dibaadi Yehowa mumupe?

¹¹ Muloo wetu ukata aufiki mu kufubila Yehowa. (Mye. 16:20) Abimweneka shi Baruke sekretere a Yeelemiya baadi mwilwankane uno mwanda. Mu angi mafuku, tabaadi asangeela kufubila Yehowa nya. Yehowa bamulungwile shi: “Obe naamu, okwete kukyeba kukita myanda ikata. Twelanga nyi kyaakya kinangu! Mwanda nafikisha malwa pa bintu byoso, anka obe nakwelela mwabi wa kwikala na muwa kooso kwende.” (Yel. 45:3, 4) Anupwandikisha naminyi? Nkinyi kibadya kusankisha Baruke—nkukimba myanda ikata su nkupanda ku kabutu ka  Yeelusaleme bu mufubi a Efile Mukulu sha kululama?​—Ja. 1:12.

12. Nkitshibilo kinyi kibaatshile Ramiro kimukwashe bwa kwikala na muloo mu nshaleelo aaye?

¹² Ramiro ungi mukwetu baadi mupete muloo wa kukwasha bangi amba shi: “Ne mutuukile mu kifuko kilanda mu kibundji kya mu Myengye ya mu Inde. Pabaadi tuutu ande mwambe shi anfutshile makuta a kulonga ku kilongyelo kikata, wawa ubaadi bu mwabi ukata. Kadi mu aa mafuku naadi naakatuka mu kubatshishibwa bu Temwe a Yehowa, naadi mupete ungi mudimo—ungi mbala-mashinda bangatshile bwashi twende mu kulungula mukandu wibuwa mu kabundji kapeela. Nayiile kwanka, ami nkulonga bya kutshiba nyene, na nkukita kashibo ka kutshibanga nyene bwa kupeta ekuta dya kwikwasha. Patubaabanga kulongyesha bantu Bible, bantu bebungi abakuminyine. Kunyima, nabangile kutwela mu kakongye kapya ka ludimi lwetu. Binobino nkwete kukita mudimo wa nsaa yooso takudi bipwa ekumi. Takwi ungi mudimo ulombeene kumpa muloo wi bu uno wankwete kupeta nsaa yankwasha bantu bwa kulonga mukandu wibuwa mu ludimi lwabo.”

13. Bwakinyi ku bukinga ndjo kipungo kyodya kufubila Yehowa n’eshimba dyoobe dyooso?

¹³ Petayi muloo wa kufubila Yehowa ku bukinga bwenu. (Badika Mulungudi 12:1.) Twe na kya kwamba shi abitungu opete mudimo wi buwa kunyima ndjo obangye kufubila Yehowa nya. Ku bukinga ndjo kodi mulombeene kubanga kufubila Yehowa ngofu. Bansongwalume na bansongwakashi bebungi be na mashito apeela mu bifuko byabo na be na bukome bwa koobesha kukita mudimo wi bukopo. Okyebe kukitshina Yehowa kinyi ku bukinga boobe? Pangi we na lukalo lwa kwikala mbala-mashinda. We mulombeene kwikala na lukalo lwa kwenda mu kulungula mu mbalo yabesamba lungi ludimi. Sunga pangi okwete kumona mushindo odya kufuba ngofu mu kakongye kenu. Sunga wekala na kitshibilo ki naminyi bwa kukita mudimo w’Efile Mukulu, we nka na lukalo lwa kwikala na nshaleelo e buwa. Okumiina kupeta malongyesha a mushindo kinyi? Nkinyi kyokyebe kusangula?

14. Abitungu shi wekale mudimukye pabitale kinyi nsaa yokwete kukimba mudimo?

¹⁴ Mayi asatu a kulonda e mu Bible abaatukatuka mu kutaluula ngalombeene nkukwasha bwa kutaluula mudimo okyebe kukita. Kushii mpaka bakata boobe ba ku kalasa abauku myanda kampanda pabitale mbalo yodya kupeta mudimo. Sunga’shi nkulombeene kwikala mbalo yabakwete kukimba bantu ba kukita mudimo mbalo yoodi mushaale sunga mbalo yodya kwenda mu kufuba. Bangi mbalombeene nkukwasha, anka dimuka. Bantu bashii bafule Yehowa mbalombeene kutwesha kifulo kya myanda ya uno ndumbulwilo mwishimba dyoobe. (1 Yo. 2:15-17) Su nubabanga kutala byabya byabenulesha kwi uno ndumbulwilo, mbibofule bwanudya kwidimba mu mashimba enu.​—Badika Myeele 14:15; Yel. 17:9.

15, 16. Mbananyi balombeene nkukwasha pabitale kusangula kwa mudimo wa kufuba?

¹⁵ Su boopu kuuka mudimo wa kukita, abitungu wekale na binangu bi buwa. (Mye. 1:5) Nnanyi mulombeene nkukwasha bwa kutala mudimo wa kufuba muyiile abyamba mayi a mu Bible? Teemesha abyamba bantu bafule Yehowa, bakufule, abakuuku na abauku myanda yoobe kalolo. Mbalombeene nkukwasha bwashi otaluule bukome boobe na binangu byobe. Pangi byabakulungula mbilombeene nkukwasha bwa kwela dingi binangu pabitale mpàngo yoodi nayo. We na mwabi ukata su baledi boobe mbafule Yehowa! Na dingi, bakulu ba mu kakongye kenu mbantu banyingye mu kikudi balombeene nkukunkusha. We mulombeene dingi kwisamba na ba mbala-mashinda na bakunkushi ba bifunda. Bwakinyi mbaate kitshibilo kya kukita mudimo wa nsaa yooso? Mushindo kinyi ubaababangile kukita mudimo wa bu mbala-mashinda, na mmushindo kinyi ubaabadi abekwasha? Mmuloo kinyi wabakwete kupeta mu mudimo wabo?​—Mye. 15:22.

¹⁶ Baaba abakuuku kalolo mbalombeene nkupa malango e buwa. Bu kileshesho, banda kunangushena su okyebe kuleka kalasa bwa kubanga mudimo wa bu mbala-mashinda mwanda tokumiina mudimo wi bukopo wa ku kalasa. Bantu bakufule mbalombeene kutaluula binangu byoobe na nkukwasha bwa kumona’shi kalasa nkalombeene nkukwasha bwa kunyingiila na kulonga kushii kuleka kalasa, eyikashi dyoodi nadyo lukalo bwa kufubila Yehowa ngofu.​—Mis. 141:5; Mye. 6:6-10.

17. Abitungu tushikwe kwata bitshibilo kinyi?

¹⁷ Mufubi ooso a Yehowa mulombeene kufumankana na nkalakasho ya mu kikudi—myanda ilombeene kumupambusha kwi Yehowa. (1 Kod. 15:33; Kol. 2:8) Kadi kwi midimo ilombeene kufwisha masaku a mu kikudi kukila ingi. Bangi bantu ba mbalo yanudi “mbalwishe lukumiino lwabo” kunyima kwa kusangula mudimo kampanda su? (1 Tim. 1:19, Kilombeno kipya) Bi buwa kupela mudimo ulombeene kulwisha kipwano kyoobe n’Efile Mukulu.​—Mye. 22:3.

18, 19. Su muntu kampanda apusha shi te na muloo wa kufubila Yehowa, abitungu akite kinyi?

¹⁸ Su we mwate kitshibilo kya kufubila Yehowa mwishimba dyoobe, sangeela mishindo yoodi nayo ya kufubila Efile Mukulu ku bukinga boobe. Ata bitshibilo bilombeene nkukwasha bwa kusangeela kufubila Yehowa mu kino kipungo ki buwa.​—Mis. 148:12, 13.

¹⁹ Na dingi, we mulombeene kukita kinyi su opusha shi twe na lukalo lwa kufubila Yehowa? Tokookanga kunyingisha lukumiino loobe. Kunyima kwa Mpoolo mutumibwa kulesha bibaadi akitshi bwa kwikala na nshalelo abakumiina kwi Efile Mukulu, bafundjile shi: “Su mu mwanda kampanda nwekala na bingi binangu, Efile Mukulu eenupatulwila byooso. Patukyaabatengyela, byaatshiile pano patudi, tutambukyeeyi mwishinda dimune.” (Fid. 3:15, 16) Tungunuka na kutaluula bi kifulo ky’Efile Mukulu na malango aaye e buwa. Kukila ungi muntu ooso, Yehowa ndjo akyebe nkukwasha bwa kwata bitshibilo bi buwa ku bukinga boobe.