1, 2. (a) “Nfumu a ikalaika” nnanyi na mbwakinyi uno mwasu ngumulombeene? (Tala kifwatulo ki ku mbangilo kwa mwisambo.) (b) Bwakinyi twi na lukalo lwa’shi Yehowa etukunkushe?

NFUMU SOBHUZA II a mu Swanziland baadi mukite bipwa 61 ku bufumu. Uno mmwanda wa kukanya lelo uno pa kumona nfumu apu bipwa bi bungi bwi byabya. Mumune na abitukanyisha bungi bwa bipwa bibapwile Nfumu Sobhuza ku bufumu, kwi ungi nfumu sha-bufumu bushii bulombeene kufudiila bu abifudiilaa bwa baana ba bantu. Byabya, Bible amwitamina bu “Nfumu a ikalaika.” (1 Tim. 1:17) Mufundji a misambo ayitamina uno Nfumu mwishina dyaaye p’akula shi: “Yehowa Nfumu mafuku oso mpâ na kwikalaika.”​—Mis. 10:16, EEM.

² Bula bwa bufumu bw’Efile Mukulu mbwilekeene ngofu na bula bwa bufumu bwa baana ba bantu. Byabya, mushindo aukunkushaa Yehowa ndjo awitutakula bwa kwifubwila pepi naaye. Nfumu umune baadi mukunkushe Isaleele a kala munda mwa bipwa 40 baadi mutumbishe Efile Mukulu na bino bishima: “Yehowa nyi sha lusa na kifulo, shakwatâ nsungu bukidi, muûle ndâ na bumuntu. Yehowa mmutûle lupuna-nsulu lwê mwiyilu, ê nyi Nfumu a bipangwa byoso.” (Mis. 103:8, 19, EEM) Yehowa ta mpenda Nfumu etu nya aye nyi Nsheetu​—sha kifulo, Yaya e mwiyilu. Bino abibwesha ino nkonko ibidi: “Yehowa eleshaa shi Nsha-baana mu mushindo kinyi? Kubanga pabatombokyele bantu mu Edene, mushindo kinyi uleshe Yehowa  bufumu bwaye? Myaluulo ya ku ino nkonko ayikyebe kwitutakula mu kwifubwila pepi na Yehowa na bwa kumulangwila na mashimba etu ooso.

3. Mba nnanyi bakumpala abatwelele mu kifuko kya Yehowa kya be mwiyilu na be pa nsenga? Mba nnanyi babaabapangile bu “baana” b’Efile Mukulu?

³ Yehowa baadi na muloo ukata pabapangile Mwan’aaye eleka! Efile Mukulu tabaadi a mwata na muulo upeela nya. Anka, baadi mumufule bu Mwana aaye na aye nkumwata bwashi amukwashe mu kupanga kwa bingi bipangwa bipwidikye. (Kol. 1:15-17) Abo nkupanga mpa na binunu na binunu bya miikeyilu. Bu byabebalesha mu Bible bu “beena mufubo abakitshi akikyeb’eshimba dyaaye,” ba miikeyilu bakwete kufubila Efile Mukulu na muloo ooso, na aye naamu kwete kwibapa kinemo nsaa y’ebetamina bu “baana” baaye. Abo be mu kifuko kya be mwiyilu na be pa nsenga.​—Mis. 103:20-22; Yob. 38:7.

4. Mushindo kinyi utwele bantu mu kifuko ky’Efile Mukulu kya be mwiyilu na be pa nsenga?

⁴ Pabaadi mupangye eyilu na nsenga, Yehowa baadi mutamishe kifuko kya be mwiyilu na be pa nsenga. Kunyima kwa kupanga nsenga bu mbalo ibuwa, mbalo ilombeene kukwasha bantu, baadi musangeele mudimo waaye pabapangile mulume na mukashi ba kumpala, Adame na Eeva, kwifwanyiko Dyaaye. (Kib. 1:26-28) Bu bibaadi mupangye Adame, baadi akulupila’shi akyebe kumukookyela. Bu byadi Nsha-baana, Yehowa baadi mutuushe malongyesha aaye ooso na kifulo na kalolo. Takwi nsaa sunga imune ibaadi mukunkushe bantu mu mushindo awibakutshisha kwikala bulungantu nya.​—Badika Kibangilo 2:15-17.

5. Mushindo kinyi ubaadi ulombeene nsenga kuula na bantu?

⁵ Mu kwilekena na banfumu ba baana ba bantu, Yehowa e na muloo wa kwabila ingi midimo yaaye kwi bantu baaye, e baata bu bantu ba mu kifuko kyaaye. Bu kileshesho, bapeele Adame matalwa kunundu kwa bipangwa byooso, aye nkumupa mpa na mudimo ukata ukile buwa wa kuudika nyema mashina. (Kib. 1:26; 2:19, 20) Efile Mukulu tabaadi mupangye binunu bya bantu bapwidikye balombeene kuula pa nsenga nya. Anka, baatshile kitshibilo kya kupangila Adame mukwashi mupwidikye​—Eeva. (Kib. 2:21, 22) Akupu, aye nkupa mulume na mukashi mushindo wabadya kuusha nsenga na baana baabo. Kushii kalema, bantu abaadi balombeene kuusha kapeela kapeela lupango lwa Mpaladiiso mpa na abiwulu nsenga ishima. Pamune na miikeyilu i mwiyilu, abaadi bakumbeene kulangwila Yehowa bwa looso bu bantu be mu kifuko kya be mwiyilu na be pa nsenga. Wawa mmwanda wi buwa bwi kashaa! Bino abilesha kalolo kifulo kya Yehowa kya bu Nsha-baana.

6. (a) Mushindo kinyi ubabangile buntomboshi mu kifuko ky’Efile Mukulu? (b) Bwakinyi buntomboshi tabubaadi abulesha shi Yehowa tee kapu?

⁶ Bi malwa, Adame na Eeva abapelele kwikala na Yehowa bu Nfumu aabo. Abalondele Satana, ungi mwana a mu kikudi a Efile Mukulu batombokyele. (Kib. 3:1-6) Kukutwa kwikala ku bukunkushi bw’Efile Mukulu nkwibatwadile abo na baana baabo mitanyo, makyenga, na lufu. (Kib. 3:16-19; Lom. 5:12) Efile Mukulu ta mmupete dingi bantu baasha kukookyela pa nsenga nya. Bino abilesha shi baadi mukutwe kapu, sunga shi bukome bwaye bwa kukunkusha bantu be pa nsenga bubaadi butshimbe? Nya! Balesheshe bi matalwa aaye pa kutuusha mulume na mukashi mu lupango lwa Edene, na bwakupela’shi tabalukiilanga, batuudile bakerubime pa kibelo kya lupango. (Kib. 3:23, 24) Anka paapa, Efile Mukulu balesheshe kifulo kyaaye kya bu nsha-baana pabaadi mushinkamishe shi, alombasha mpàngo yaaye ya kwikala na kifuko kya be mwiyilu na be pa nsenga baana baaye ba mu kikudi mpa na bantu be pa nsenga. Balayile “kekulu” akafudiisha Satana na kupudisha myanda yooso ayifiki ku mulwisho wa Adame.​—Badika Kibangilo 3:15.

7, 8. (a) Mushindo kinyi ubaadi ulwile myanda mu mafuku a Nowa? (b) Mpàngo kinyi ibaatshile Yehowa bwa kusuula nsenga bwa kukalwila kifuko kya bantu?

 ⁷ Mu bipwa nkama bibalondele, bangi bantu abaatshile kitshibilo kya kushaala balulame ku meso kwa Yehowa. Munkatshi mwabo mubaadi Abele na Enoka. Byabya, bantu bebungi abaadi bapele Yehowa bu Nshaabo na bu Nfumu aabo. Mu mafuku a Nowa, nsenga ibaadi “yuule na bukitekite.” (Kib. 6:11) Bino abilesha shi Yehowa te na dingi matalwa ku myanda ya mu nsenga su? Myanda ya kala ayilesha byanka naminyi?

⁸ Banda kutala mwanda wa Nowa. Yehowa baadi mumupe binangu bi buwa pabitale mushindo wa kwibaka bwato bukata bubaadi bulombeene kupaasha Nowa na kifuko kyaaye. Efile Mukulu baadi muleshe dingi kifulo kyaaye kikata kwi kifuko kyaaye kya bantu pabaadi mutume Nowa bu “mulambukishi a kululama.” (2 Mp. 2:5, NW) Kushii mpaka mukandu wa Nowa ubaadi wa kwibatakula mu kwilanga na kwibadimusha pabitale kabutu kabaadi kumpala, anka ta kwi muntu bamuteemeshe. Munda mwa bipwa makumi, Nowa na kifuko kyaye abaadi bashale munkatshi mwa bantu bantomboshi na bantu abakitshi myanda i butete. Yehowa bu byadi Nsha-baana etatshishaa bwabo, baadi mukalwile na mwele mwabi kwi baaba bantu 8 baasha kululama. Pabaadi mufwishe Mpeshi a kabutu mu nsenga ishima, Yehowa balesheshe shi e na matalwa kunundu kwa baaba bantu baashy’etombo mpa na kwa miikeyilu ibatombokyele. Eyendo Yehowa balesheshe shi e na bukome.​—Kib. 7:17-24.

9. Yehowa baadi mupe bantu mushindo wa kukita kinyi dingi kunyima kwa Mpeshi a kabutu?

⁹ Nsaa nka ibaadi Nowa na kifuko kyaabo batuule lwà lwabo lwa ku mpala mu nsenga itooshibwe na kupuwa kapapi ke buwa, mashimba aabo abaadi aule na lutumbu kwi Yehowa baadi mwibalame na mwibakalwile. Mususa umune Nowa nkwibaka kilambwilo aye nkutuusha milambu ya kulangwila Yehowa. Efile Mukulu nkwelela Nowa na kifuko kyaaye mwabi na nkwibatumina eyi shi, “etandênei nufwime pa nsenga poso.” (Kib. 8:20–9:1, EEM) Uno mususa dingi, bantu abaadi na mushindo wa kwibunga mu lulangwilo na kuusha nsenga.

10. (a) Kunyima kwa Mpeshi a kabutu, mbalo kinyi na mushindo kinyi ubabangile bantu kutombokyela Yehowa? (b) Yehowa bakitshine kinyi bwakumona’shi akikyeb’eshimba dyaaye kikwete kukitshikya?

¹⁰ Byabya, Mpeshi a kabutu tabaadi mukaashe kukutwa kwa kupwidika nya, na bantu abaadi bashaale abatungunuka na binangu bifwame bya Satana na bya miikyelu intomboshi. Mafuku apeela kunyima bantu ababangile kutombokyela Yehowa. Bu kileshesho, Nemerode mwikulu a Nowa baadi mutombokyele bukunkushi bwa Yehowa. Nemerode abamulesha bu “mpibwe mukata mutombokyele Yehowa.” Baadi mwibakye mpata ikata, bu bi lupata lwa Babele na aye kushaala mwanka bu nfumu “mwiumbo dya Sineare.” (Kib. 10:8-12, NW) Nfumu a ikalaika baatshile kitshibilo kinyi pabitale uno nfumu ntomboshi na byooso bibaadi akitshi bwa kukutshisha mpàngo y’Efile Mukulu ya ‘kuusha nsenga’? Efile Mukulu baadi mufutakashe ndimi ya bantu, aye nkupalakasha bantu booso abalondele Nemerode ‘pa nsenga ishima.’ Abayile na lulangwilo lwabo lwa madimi na bukunkushi bwa baana ba bantu.​—Kib. 11:1-9.

11. Mushindo kinyi ubaadi Yehowa muleshe kululama kwaye kwi kuuku aaye Abrahame?

¹¹ Sunga mbibaadi bebungi abalangwila b’efile ba madimi kunyima kwa Mpeshi a kabutu, bangi balume baasha kululama abatungunukile na kutumbisha Yehowa. Umune a kwabadi nyi Abrahame, muntu baadi mukokyele aye nkukumiina kukatuka mu lupata lwabo lwibuwa lwa Ure nkwenda mu kushaala mu tushibo twa mapema munda mwa bipwa bi bungi. (Kib. 11:31; Eb. 11:8, 9) Munda mwa bipwa byooso bibaadi Abrahame ende na kushaala mu ma mbalo elekeene, baadi mwifunyishwe nka na banfumu ba baana ba bantu, bebungi ba kwabadi abaadi bashaale mu mpata ifunyishwe na bimano bikata.  Anka Yehowa baadi mulame Abrahame na kifuko kyaaye. Pabitale bulami bwa Yehowa bu nsha-baana, mufundji a misambo bambile shi: “[Efile Mukulu] tabaalekyele muntu su ngumune eebapombesha; baanyookyele banfumu pa mwanda wabo.” (Mis. 105:14, 15) Bwa kulesha kululama kwaye kwi kuuku aaye, Yehowa balayile Abrahame shi: “Banfumu abatuukila koodi.”​—Kib. 17:6; Ja. 2:23.

12. Mushindo kinyi ubaadi Yehowa muleshe bukome bwaye mu Ejiipitu, na bino bibaadi bikwashe bantu baaye naminyi?

¹² Efile Mukulu balungwile dingi Isaake mwana a Abrahame mpa na Yaakobo mwikulu aaye pabitale mulayilo waaye wa kwibeelela mwabi, mulayilo utale kutuusha banfumu munkatshi mwa baana baabo. (Kib. 26:3-5; 35:11) Byabya, kumpala kwa kutuusha banfumu, baana ba Yaakobo abekeele bapika mu Ejiipitu. Bino abilesha shi Yehowa t’akalombasha mulayilo waaye sunga shi te na dingi matalwa pa nsenga su? Nya! Pa nsaa ilombane, Yehowa baadi muleshe bukome bwaye bwa bu Efile Mukulu na aye nkulesha bufumu bwaye kwi Faraone muntu baadi na mutwe wi bukopo. Beena Isaleele abaadi mu bupika abaadi batuule lukumiino lwabo kwi Yehowa, aye baadi mwibapaashe mu mushindo ukata kukiila ku Kalunga Kamonga. Eyendo, Yehowa baadi nka Nfumu a Eyilu na Nsenga, bu bibaadi Nsha-baana etatshishaa bwabo, baadi muleshe bukome bwaye bukata bwa kulama bantu baaye.​—Badika Efilu 14:13, 14.

13, 14. (a) Mu loono, beena Isaleele abakwile kinyi pabitale bukunkushi bwa Yehowa (b) Yehowa baadi mulee Daavide kinyi pabitale bufumu?

¹³ Mususa umune kunyima kwa kukita kipaso bwa kwibatuusha mu Ejiipitu, beena Isaleele abayimbile loono lwa kutshokola bwa kutumbisha Yehowa. Lwalwa loono alusanganyibwa mu mukanda wa Efilu shapitre 15, mpa na ano mayi e mu verse 18: ‘Yehowa akabikala mafuku oso mpâ na kw’ikalaika.’ Eyendo Yehowa bekeele Nfumu a mwilo upya. (Miy. 33:5) Byabya, bantu tababaadi abakumiina shi Yehowa ekale Nfumu aabo. Bipwa pepi 400 kunyima kwa’bo kutuuka mu Ejiipitu, abatekyele Efile Mukulu bwashi ebatuudile nfumu e nka bi banfumu ba miilo ya ba mpangano ibaadi pepi nabo. (1 Sam. 8:5) Sunga mbyabya, Yehowa baadi nka Nfumu, bibaadi bimwenekye mu bufumu bwa Daavide, nfumu a kabidi a Isaleele.

¹⁴ Daavide baadi mufwiishe mushete wa kilombeno ku Yeelusaleme. Mu ino nsaa ya muloo, beena Leevi abayimbile loono lwa ntumbo lubaadi  na bishima bibuwa abisanganyibwa mu mukanda wa 1 Myanda 16:31 shi: “Lungulayi baa maumbo shi: ‘Yehowa ngi Nfumu!’” Twi kwiyipusha shi, ‘bu bi Yehowa nyi Nfumu a ikalayika, mushindo kinyi ubekeele bu Nfumu mu yaaya nsaa?’ Yehowa beekele Nfumu nsaa ibaadi muleshe bukunkushi bwaye sunga pabaadi mutuule muntu mulombeene kulesha mpala yaaye bwa kupudisha mwanda kampanda. Uno mushindo wa bukunkushi bwa Yehowa wi na kipatulwilo kikata. Kumpala kwa lufu lwa Daavide, Yehowa bamulayile shi bufumu bwaye abutungunuka kushii nfudiilo, aye nkumulungula shi: “Nakasangula mwana umune a ku bâna bobe ba kutanda byadya kukupyana bu nfumu. Nakashindabasha matalwa a bufumu bwê.” (2 Sam. 7:12, 13, EEM) Uno mulayilo ubalombeene nsaa ibamwekyele yawa “mwana” a Daavide kunyima kwa bipwa bikile 1 000. Yawa mwana nnanyi, na nsaa kinyi ibekeele bu Nfumu?

15, 16. Nsaa kinyi ibaabadi basangule Yesu bwashi ekale Nfumu, na pabaadi pa nsenga, mpàngo kinyi ibaadi Yesu mwate pabitale bufumu bwaye?

¹⁵ Mu kipwa kya 29 kunyima kwa Yesu Kidishitu (K.Y.K.), Yowano mubatshishi babangile kulungula bantu shi, “Bufumu bwa mwiyilu tabudi pepi.” (Mat. 3:2) Yowano pabaadi mubatshishe Yesu, Yehowa bamushingile mwimu bwadya kwikala bu Mesiya baadi mulayibwe na bwashi akekale Nfumu a Bufumu bw’Efile Mukulu. Yehowa balesheshe kifulo kya bu nsha-baana kwi Yesu mu bino bishima: “Uno Mmwan’ande a-kifulo, nee na muloo pa mwanda we.”​—Mat. 3:17.

¹⁶ Nsaa ibaadi akitshi mudimo waaye, Yesu baadi atumbisha Nshaaye. (Yo. 17:4) Bakitshine bino nsaa ibaadi alungula pabitale Bufumu bw’Efile Mukulu. (Luk. 4:43) Baadi mpa na mulongyeshe balondji baaye bwabadya kuteka bwa’shi Bufumu bufikye. (Mat. 6:10) Bu Nfumu-Musangudibwe, Yesu baadi na kya kulungula beshikwanyi naaye shi: “Bufumu bw’Efile Mukulu bwi munkatshi mwenu.” (Luk. 17:21) Kunyima kwa mafuku, kyolwa kya muladilo wa lufu lwaye, Yesu baadi mukite ‘kilombeeno kya bufumu’ na balondji baaye. Paapa baadi mupe bangi balondji baaye baasha kululama mushindo wabadya kwikala naaye bu banfumu mu Bufumu bw’Efile Mukulu.​—Badika Luka 22:28-30.

17. Mu mushindo kinyi ubabangile Yesu kumunana mu kipwa kya 33, kadi bibaadi abitungu shi atengyele kinyi?

¹⁷ Yesu akabanga kumunana bu Nfumu a Bufumu bw’Efile Mukulu mu mafuku kinyi? Taakakitshi byabya mususa umune nya. Kyolwa kibalondele, abayipayile Yesu na, balondji baaye nkupalakana. (Yo. 16:32) Byabya, pabaadi mafuku aende na kukila, Yehowa baadi nka nfumu. Mwifuku dya kasatu baadi mubuushe Mwana aaye ku lufu, na mwifuku dya Pentekote a mu kipwa kya 33 K.Y.K., Yesu bekeele bu nfumu a mu kikudi kunundu kwa beena Kidishitu, bakwabo bashingwe mwimu. (Kol. 1:13) Anka, Yesu baadi mulombeene kutengyela kwata bufumu booso pa nsenga bu ‘kekulu’ kabaabadi balee. Yehowa balungwile Mwan’aaye shi: “Shikama ku ilume yande naatuulu balwishi boobe buu kyaashiino kya ngwa yoobe.”​—Mis. 110:1.

18, 19. Kinyi akitungu shi tukite, na mmwanda kinyi watukyebe kulonga mu mwisambo aulondo?

¹⁸ Munda mwa bipwa binunu bantu na miikeyilu mbatombokyele bufumu bwa Yehowa. Kashaa Yehowa ta mulekye bukunkushi bwaye nya; kwete nka kukunkusha. Bu Nsha-baana a kifulo, baadi mulame bantu baasha kululama bu Nowa, Abrahame na Daavide. Kyatudya kukita nkino, abitungu tukokyele Nfumu etu na kwifubwila pepi naaye.

¹⁹ Kadi binobino twi balombeene kwiyipusha shi: Mushindo kinyi wikale Yehowa bu Nfumu mu ano mafuku etu? Mushindo kinyi watudi balombeene kulesha shi twi balamate ku Bufumu bwa Yehowa na kwikala bu baana bapwidikye mu kifuko kyaaye kya be mwiyilu na be pa nsenga? Nsaa y’atutekye shi Bufumu bw’Efile Mukulu bufikye abilesha kinyi? Ino nkonko atukyebe kwiyaluula mu mwisambo aulondo.