Lufu nyi mwanda umune wi bubi. Bantu bebungi t’abakuminaa kwakula wanka. Anka lelo na malooba twi bakumbeene kufumankana nalo. Na, munungi wa lufu wi busungu bukile autapaa kwishimba ngofu.

Takwi kintu su nkimune kilombeene kwitukwasha bwa kwilumbuula pabitale lufu lwa muledi, lwa mukashi sunga lwa mwana. Uno mwanda wi bukopo ngulombeene kufika mu nsaa yoshy’ouku sunga kushaala mwishimba bwa looso. Sunga byekala naminyi, takwi muntu mulombeene kusuuka lufu nya, na ku nfudiilo alutwalaa mpombo ikile bungi.

Antonio, sha nshaaye abaabadi basange kwi mootoka apatuula shi: “Bi nka bu’shi muntu kampanda bashiki kiibi kya ku nshibo yoobe akupu bende na nfungula. Twe mulombeene kwalukiila koobe su mbwa kapindji kapeela. Boshaala nka penda na binangu byobe. Uno nyi mwanda upya. Sunga okita naminyi bwa kwiupela—bu byaumweneka bukopo—takwi kintu kyodya kukita nya.”

Pabaadi mufumankane na mwanda wi bino, Dorothy baadi mukashi kilele pabaadi na bipwa 47 baadi mukite mwaye mooso bwa kupeta myaluulo. Sunga bibaadi alongyesha baana shi, atutungunukaa na kwikala na muwa kunyima kwa lufu, tabaadi apwandikisha shi lufu nyi nfudiilo a byooso nya. Anka tabaadi na myaluulo ibuwa. Baadi mwipushe ungi mwina kipwilo kya ba Anglikane shi: “Nkinyi akitufwilaa p’atufu?” Bamwalulwile shi: “Takwi muntu auku, tubande kutengyela atukyebe kumona.”

Abitungu nka’shi “tutengyele bwa kumona” su? Kwi mushindo wa kuuka su lufu nyi nfudiilo a byooso?