Betanii baadi ka kibundji ke kula kwa bilometre 3 na Yeelusaleme. (Yowano 11:18) Kubaadi kukitshikye mwanda ukata mwanka mbingo ipeela kumpala kwa lufu lwa Yesu. Lazaare, umune a ku bakuuku ba Yesu ba p’eshimba, baadi mukumbe mukumbo wi bukopo aye nkufwa.

Yesu pabapushiishe wawa mwanda bwa mususa wa kumpala, balungwile balondji baaye shi Lazaare mmulaale na’shi akyebe kwenda akamubuushe. (Yowano 11:11) Anka balondji ba Yesu tababaadi bapushe kalolo kibaadi ebalungula nya, ndjo Yesu nkwibapatulwila shi: “Lazaare baafu.”​—Yowano 11:14.

Mafuku ananka kunyima kwa’bo kumushiika, Yesu bafikile ku Betanii na bakimbile mushindo wa kunyingisha Maata mukwabo na Lazaare. Maata bamulungwile shi: “Su bodya kwikala panka, mukwetu tabadya kufwa nya.” (Yowano 11:17, 21) Yesu bamwalulwile shi: “Ami nee kusanguka, nee muuwa, ankumiina sunga afwa ekala na muuwa.”​—Yowano 11:25.

Bwa kulesha shi aa mayi abaadi a binyibinyi, Yesu befubwile pepi na mashaama aye nkwakula n’eyi di bukopo shi: “Lazaare, tuuka!” (Yowano 11:43) Bantu abaadi paapa abakanyine pakumona mufwe batuuku.

Yesu baadi mubuushe bantu babidi kumpala. Ungi mususa babuushile nsongwakashi bafwile​—mwana mukashi a Yayiluse. Kumpala kwashi Yesu amubuushe ku lufu, bambile shi mmulaale.​—Luuka 8:52.

Lamiina’shi pabitale lufu lwa Lazaare na lwa nsongwakashi a Yayiluse baadi mupwandikishe lufu na tulo. Kupwandikisha bino nkulombane. Bwakinyi? Muntu mulaale taukaa kintu anka bi muntu kwete kwikisha mwanda wa busungu kampanda sunga dikyenga kampanda. (Mulungudi 9:5; tala kashibo ke ku lupese akamba shi  “Lufu lwi nka bu tulo twi bukopo.”) Balondji ba kumpala ba Yesu abaadi na mpushisho ebuwa pabitale bafwe. Ungi mukanda (Encyclopedia of Religion and Ethics.) aulesha shi:  “Balondji ba Yesu abaadi abauku shi lufu ntulo, na mashaama bu mbalo ya kwikisha . . . bwa booso bafwe mu lukumiino.” *

Abitunyingisha pakuuka shi bafwe mbalaale mu mashama tabakwete kukyenga nya. Kuuka kwa akikitshikaa paatufu akwitukwasha bwatusha kutshiina lufu.

Kadi nsaa yatulaala tulo twi buwa bufuku, nnanyi akuminaa kulala bwa losoo? Ndukulupilo kinyi lwatudi nalo bwa bafwe balaale mu mashaama abakapete dingi muwa—bu Lazaare na nsongwakashi a Yayiluse?

Pabaadi pepi na kufwa, Yoobo baadi mwele luno lukonko shi: “Su muntu baafu, mmulombêne kwikala dingi na mûwa su?”—Yoobo 14:14, EEM.

Pabaadi asamba n’Efile Mukulu Sha-bukome booso, Yoobo balulwile ku lwalwa lukonko shi: “Okanyitamina, nkakwitabe, mwanda okâbila kummona’mi kipangwa kyobe.” (Yoobo 14:15, EEM) Yoobo baadi mushinguule shi Yehowa e na lukalo lukata lw’efuku Dyakabuusha bafubi Baaye baasha kululama ku lufu. Yoobo baadi akulupila kintu kishii kilombeene kukitshika su? Nya.

Kubusha kwa bafwe kubakitshine Yesu akushinkamisha shi Efile Mukulu bapeele Yesu matalwa e kunundu kwa lufu. Byabya, Bible amba shi, binobino Yesu e na “nfungula ya lufu.” (Bifumbulwe 1:18) Byabya Yesu akashitula biibi bya mashama, nka bu bibatumine eyi bwashi bakaashe ebwe dibaadi ku mashama a Lazaare.

Bible akula misusa i bungi pabitale uno mulayilo wa lusangukilo. Mwikeyilu badi mushinkamiishe mutemuki Danyele shi: ‘Okeekala na diikisha, naa okeebwo bwa kupeta bwobe bwedi ku mfudiilw’amafuku.’ (Danyele 12:13) Yesu balungwile Baasaduseo, bakata ba beena Yuuda bashibaadi abakumiina mulayilo wa lusangukilo shi: “Anutupakana mwanda taanushinguula sunga mikanda iiselele, sunga bukome bw’Efile Mukulu.” (Mateo 22:23, 29) Mpoolo mutumibwa bambile shi: “Nee na lukulupilo mwi Efile Mukulu . . . shi akwikala kusanguka kwa balulame na kwa bashii balulame.”—Bikitshino 24:15.

Luno lusangukilo lwa balulame na bashii balulame alukakitshika mu mafuku kinyi? Mwikeyilu balungwile Danyele muntu sha kululama shi akabuuku “ku mfudiilw’amafuku.” Maata dingi baadi mukumiine shi mukwabo Lazaare “asanguka nguba a kusanguka mwifuku dya nfudiilo.”—Yowano 11:24.

Bible alesha kwipushena kwi pankatshi pa “efuku dya nfudiilo” na Bufumu bwa Kidishitu. Mpoolo bafundjile shi: “Mwanda [Kidishitu] e na kya kudya bufumu, nyaa na paakatuudila [Efile Mukulu] beshikwanyi-nee booso muushi mwa ngwa yaaye. Mwishikwanyi a nfudiilo akabutulwa ndufu.” (1 Beena-Kodinto 15:25, 26) Kino nyi nkishinkamisho kikata akitulesha bwakinyi twi na kya kuteka shi Bufumu bw’Efile Mukulu bufikye na akikyeb’Efile Mukulu kikitshikye pa nsenga. *

Anka bu bibaukanga Yoobo, Efile Mukulu e na lukalo lwa kubuusha bafwe. Apakalombana dyadya efuku, lufu talukeekala dingi kwanka. T’akukekala muntu su ngumune akeyipusha shi, ‘Lufu nyi nfudiilo a byooso su?’