1, 2. (a) Ndibaka dya nanyi adikala dya muloo mwiyilu? (b) Nkonko kinyi y’atukyebe kutaluula?

MISUSA ibungi abitungaa kukisha nsaa ibungi bwa kwilumbuula bwa dibaka. Kadi atukyebe kutuula binangu byetu ku dibaka dilekeene na mabaka ooso—dibaka dya nfumu. Banda kwela binangu! Kasha baabanga kwidilumbuula takudi bipwa pepi na 2 000. Binobino, nsaa ibefubwila pepi ngofu bwashi mulume ebungye pamune na mukashi aaye. Mwibalasa dya Nfumu amukekala ngono ya muloo, na kibumbu kya be mwiyilu akikyebe kuyimba n’eyi di bukopo shi: ‘Aleluuya! Mwanda Yehowa Efile Mukulu eetu sha-bukome booso baaleesha bufumu bwaye. Tusangaleeyi, tusepeeleeyi, na tumupeeyi ntumbo, mwanda kipindji ky’ebambo [dibaka] dya Mwana a mukooko kibafiki. Mukashi aaye beelumbuula.’​—Bif. 19:6, 7.

² “Mwana a mukooko” sha dibaka adikyebe kupa bantu muloo mwiyilu nyi Yesu Kidishitu. (Yo. 1:29) Mushindo kinyi waadi mufwale bwa dibaka? Mukashi aaye nnanyi? Mushindo kinyi waadi mwilumbuule bwa dibaka? Nsaa  kinyi ayikitshika dibaka? Dino dibaka adikyebe kwikala dya muloo mwiyilu, kadi baaba be na lukuluupilo lwa kwikala na muwa pa nsenga abekala na wawa muloo su? Twi na lukalo lukata lwa kupeta myaluulo ku ino nkonko, nsaa y’atutaluula Misambo 45.

3, 4. (a) Mufundji a misambo aakula naminyi pabitale bilamba bifwale mulume bwa dibaka, na nkinyi akikumbasha ku muloo waaye? (b) “Baana bakashi ba banfumu” na “be pepi” naaye abasangala pamune na mulume mba nanyi?

³ Badika Misambo 45:9, 10. Mulume Yesu Kidishitu, mmufwale bilamba bya bufumu bya ntumbo. Mushindo waadi mufwale ngulongame ngofu nka bu “bintu bya mapembwe bya muulo ukata,” bu miire na kaase, bibaadi ku bintu biiselele bibaabatumikanga nabyo mu Isaleele bwa kushinga muntu mwimu.​—Efi. 30:23-25.

⁴ Ngono ya mwiyilu ayiulu mwibalasa ayikumbasha ku muloo wi nawo Mulume bu byauku shi kipindji kya dibaka dyaaye takidi pepi. Muloo waye wi mpa na kwi baaba “be pepi naaye,” kipindji kya ndumbulwilo a Efile Mukulu ki mwiyilu, mwamwa mwi “baana bakashi ba banfumu,” miikeyilu i selele. Mwanda wa muloo ukata pa kupusha mayi aatuukila mwiyilu aamba shi: “Tusangaleeyi, tusepeeleeyi . . . mwanda kipindji ky’ebambo [dibaka] dya Mwana a mukooko kibafiki”!

5. “Mukashi a Mwana a mukooko” naanyi?

⁵ Badika Misambo 45:11, 12. Tubatundula mulume, kadi mukashi aaye nnanyi? Ta mmukashi ebu bi bakashi booso nya, aye nyi nkisaka kya beena kakongye kabakwete kukunkusha kwi Yesu Kidishitu. (Badika Beena-Efèeze 5:23, 24.) Abekala mu Bufumu bwa Mesiya. (Luk. 12:32) Bano beena Kidishitu 144 000 bashingwe mwimu ‘abalondo Mwana a mukooko mbalo yooso yende.’ (Bif. 14:1-4) Abekala bu “mukashi a Mwana a mukooko,” na kushaala naaye mwiyilu.​—Bif. 21:9; Yo. 14:2, 3.

6. Bwakinyi abetamina bashingwe mwimu bu “mwana mukashi a nfumu”, na bwakinyi abebatekye bwa ‘kuluba bantu baabo’?

⁶ Mukashi abakyebe kwibakila t’abamwitamina penda shi “mwan’ande mukashi” nya, kadi abamwitamina bu “mwana mukashi a nfumu.” (Mis. 45:14) Kadi “nfumu” nnanyi? Nyi Yehowa. Mmukumiine beena Kidishitu bashingwe mwimu bu “baana” baaye. (Lom. 8:15-17) Bu byabakyebe kwikala bu mukashi a mwiyilu, bashingwe mwimu mbebalungule bwashi ‘bapunganye mwilo waabo na kifuko kyabo kya [ku mbidi]. Be na kya kwikala ‘abeele binangu byabo ku myanda ya mwiyilu, kushi ku ya pano pa nsenga.’​—Kol. 3:1-4.

7. (a) Kidishitu kwete kulumbuula mukashi akyebe kwibakila naminyi? (b) Mukashi amono mulume akyebe kumwibakila bu nnanyi?

⁷ Munda mwa bipwa nkama na nkama, Kidishitu kwete alumbuula mukashi aye bwabadya nkeyibakishena mwiyilu. Mpoolo mutumiibwa baadi mupushishe shi Kidishitu ‘bafudile kakongye mpâ na kupâna mûwa wê pa mwanda wâkyo. Bakitshîne byabya mwanda wa kwikasha kipwilo bu kilombêne kwikala ky’Efile Mukulu, kunyima kwa kwikitôsha na mema na mukandu ubekitwadîle. Bakyebele kwilumbulwila ê namwinyi kipwilo mu buwa bwâkyo boso, ki selelê kishi na matope.’ (Ef. 5:25-27, EEM) Mpoolo balungwile bashingwe mwimu ba mu Kodinto a kala shi: “Nenupushiisha mukao umune na w’Efile Mukulu, ne mwinutweshe kwibambo [dibaka] dya mulume umune bwa kwinulesha kwi Kidishitu bu kamame shii mulwishiibwe.” (2 Kod. 11:2) Mulume Nfumu Yesu Kidishitu asangeela “buwa” bwa mu kikudi bwa mukashi aakyebe kwibakila. Na mukashi namu amukumiina bu “mwanana” aaye na ‘akunama kumpala kwaye’ bu e kwi mulume akyebe kumwibakila.

8. Bwakinyi mbikumbane pabalesha shi mukashi “mwilengyeshe”?

⁸ Badika Misambo 45:14, 15a. Mukashi e na “kineemo [mulongame]” bwa dibaka dya Nfumu. Mu Bifumbulwe 21:2, mukashi abamupwandikisha na lupata, Yeelusaleme mupya na “mwilumbulwile mulume aaye.” Luno lupata lwa mwiyilu lwi na ‘ntumbo y’Efile Mukulu’ na ebaakanyi dyalo dibaadi “dya kupwandikisha n’ebwe dya muulo wi bukopo, bu ebwe dikile kuneema.” (Bif. 21:10, 11) Buwa bwa Yeelusaleme mupya mbebuleshe mu mukanda wa Bifumbulwe. (Bif. 21:18-21) Kushii mpaka mufundji a misambo alesha shi mukashi “mwilengyeshe”! Mu byooso, dibaka dya Nfumu adikitshika mwiyilu.

9. “Nfumu” abatwadila mukashi nanyi? Mukashi mufwale naminyi?

⁹ Mukashi abende naaye kwi mulume aaye​—Mesiya Nfumu. Mmupwe kubanga kumulumbuula, ‘amutoosha pa kumutumpa na mema na ku bukwashi bw’eyi.’ Aye e ‘selele kushii kato.’ (Ef. 5:26, 27) Mukashi aaye e na kya kufwala kalolo bwa dyadya dibaka. Byabya ndjo byaadi. Na dingi, e na “nkandjo ilengyeshe na oòlo,” na “abafiki n’ê mu kumulubula kwi nfumu mmufwale bilamba byolwé na bukalamwino.” Bwa dibaka dya Mwana a mukooko, “abamupa matalwa a kufwala bilamba bineeme na biiselele, mwanda byabya nyi bikitshino bilulame bya be selele.”​—Bif. 19:8.

10. Nkipindji kinyi akikyebe kukitshika dibaka dya Mwana a mukooko?

¹⁰ Badika Bifumbulwe 19:7. Nsaa kinyi ayikitshika dibaka dya Mwana a mukooko? Sunga “mukashi aaye belumbuula” bwa dibaka, bifundwe abilondo t’abilesha shi dibaka ndipwe kubanga nya. Anka abilesha kalolo bi kipindji kya nfudiilo kya mpombo ikata. (Bif. 19:11-21) Bino abilesha shi dibaka adikitshika kumpala kwa mulume-Nfumu kutshokola ngoshi yooso su? Nya. Kimonwa ki mu mukanda wa Bifumbulwe ta mbekifunde kilondeene muyiile byakikitshika nya. Mu Misambo 45 mbaleshe shi, Nfumu Yesu Kidishitu asomeka lupete lwaye na ‘ende mu kutshokola’ beshikwanyi kunyima ndjo dibaka dya nfumu dikitshikye.​—Mis. 45:4, 5.

11. Kidishitu akakitshi kinyi kumpala kwa kukita dibaka?

¹¹ Byabya twi balombeene kulamiina shi, myanda ayikyebe kukitshika bino: Kya kumpala, abakyebe kutshibila “ndumba mukata” nyi nkwamba shi Babilone mukata, nsangilo a bipwilo byooso bya madimi kiimu. (Bif. 17:1, 5, 16, 17; 19:1, 2) Akupu, Kidishitu atshibila ndumbulwilo mubi a Satana pa nsenga kiimu ky’Efile Mukulu, mu kumubutula ku Armagedone, “ngoshi y’efuku dikata dy’Efile Mukulu.” (Bif. 16:14-16; 19:19-21) Ku nfudiilo, yawa Nfumu akatshokola ngoshi yooso mu kwela kwa Satana na bademo baaye mu lupongo, abekala nka bu bafwe.​—Bif. 20:1-3.

12, 13. (a) Dibaka dya Mwana a mukooko adikitshika nsaa kinyi? (b) Mwiyilu mba nanyi abasangeela dibaka dya Mwana a mukooko?

¹² Mu mafuku a nfudiilo, beena Kidishitu bashingwe mwimu abashaala balulame mpa na ku lufu mu kwikala kwa Kidishitu, abasanguka bwa kwenda mwiyilu. Ingi nsaa kunyima kwa kabutu ka Babilone mukata, kadi kumpala kwa Armagedone, Kidishitu apudisha kubunga kwa bantu booso 144 000 bashingwe mwimu bwa kwikala naaye mwiyilu. (1 Tes. 4:16, 17) Byabya, kunyima kwa ngoshi ya Armagedone, dibaka dya Mwana a mukooko adikitshika. Dyadya dibaka adiikala mwanda wa muloo ukata! Mukanda wa Bifumbulwe 19:9 awamba shi: “Baasha mwabi mbayitanyinwe ku madyo a ebambo [dibaka] dya Mwana a mukooko.” Eyendo, bantu 144 000 kasaka ka mukashi abekala na muloo. Nfumu mulume aabo asangala pa kwikala na bantu booso baamunana nabo bwa ‘kudya na kutoma ku mesa aaye mu Bufumu bwaaye.’ (Luk. 22:18, 28-30) Byabya,  kusangeela dibaka dya Mwana a mukooko takwikala penda kwi Mulume na mukashi aaye nya.

¹³ Anka bu bibatukatuka mu kumona, kibumbu kya bantu akiyimbi mwiyilu, akibungu mayi bwa kuyimba shi: “Tusangaleeyi, tusepeeleyi na tumupeeyi ntumbo [Yehowa] mwanda kipindji ky’ebambo [dibaka] dya Mwana a mukooko kibafiki mukashi aaye belumbuula.” (Bif. 19:6, 7) Twi kwamba naminyi pabitale bafubi ba Yehowa be pa nsenga? Abekala naamu na wawa muloo su?

14. Mu Misambo 45, mba nnayi bekale bu “bansongwakashi baaloole” ba mukashi?

¹⁴ Badika Misambo 45:13, 15b, 16, EEM. Mutemuki Zakarii baadi mutemukye shi mu mafuku a nfudiilo, bantu ba miilo abekala na muloo wa kwibunga na bashingwe mwimu bakii na muwa pa nsenga. Bafundjile shi: “Bantu ekumi ba mu bisamba abyakula ndimi ilekeenelekeene, abeelamika kwi mwina Yuuda umune, bakwate ku lwembe lwa kilamba kyaaye pa kumulungula shi: ‘Atukyebe kwenda noobe mwanda tubapusha shi Efile Mukulu e neenu.’” (Za. 8:23) Mu Misambo 45:13 bano “bantu ekumi” ba mu kifwanyi abebetamina bu “nsongwakashi a mu Tiire” na bu “baneeme ba mu mwilo.” Abafiki kwi bashingwe mwimu bakii pa nsenga na bya buntu, na abakitshi mwabo mooso bwashi Yehowa ebakumiine na bapete bukwashi bwa mu kikudi. Kubanga mu 1935 bashingwe mwimu ‘mbalambukishe bantu midiyo bululame.’ (Dan. 12:3) Bano bakwabo na beena Kidishitu bashingwe mwimu mbatooshe nshaleelo aabo, bwashi tekalanga mulwishibwe na lulangwilo lwa madimi. Bano baloole ba mukashi “bashy’aukile balume” mbalambule muwa waabo kwi Yehowa na mbeyikashe bu bafubi baasha kululama ba Mulume, Nfumu Yesu Kidishitu.

15. Mushindo kinyi wi “bansongwakashi baaloole” ba mukashi mbafube pamune na bashingwe mwimu bakii pa nsenga?

 ¹⁵ Bashingwe mwimu bakii pa nsenga be na lutumbu lukata kwi “bansongwakashi baaloole” ba mukashi pa mwanda wa katshintshi kaabo mu mudimo wa kulungula “mukandu wibuwa wa Bufumu” pa nsenga ishima. (Mat. 24:14) Ta nkapenda “kikudi na mukashi-mwibakilwe abamba shi, ‘Fika!’” mpa na baaba abapusha abamba namu shi: “Fika!” (Bif. 22:17) Eyendo “ingi mikooko” ngipushe bashingwe mwimu abamba shi: “Fika!” na mbesangye pamune na mukashi bwa kwela musaase kwi bantu be pa nsenga shi: “Fika!”​—Yo. 10:16.

16. Yehowa mmupe ingi mikooko kingi kinemo kinyi?

¹⁶ Bashingwe mwimu bakii pa nsenga na bakwabo be na muloo wa kuuka shi Yehowa, Nshaaye na Mulume mmupe ino ingi mikooko i pa nsenga kineemo kya kwibunga nabo ku musangeelo wa dibaka dya Mwana a mukooko. Bibaadi bitemukibwe shi “bansongwakashi baaloole” ba mukashi “abebakunkusha na kwibatwesha mwibalasa dyê, munkatshi mwa . . . muloo na kusangala.” Eyendo, ingi mikooko i na lukulupilo lwa kwikala na muuwa wa losoo pa nsenga, abekala na muloo pamune na be mwiyilu mu nsaa ya dibaka dya Mwana a mukoo adikitshika mwiyilu. Mukanda wa Bifumbulwe aulesha bano be mu “kibumbu kikile bukata kya bantu” bu ‘bemane kumpala kwa lupuna-nsulu na kwa Mwana a mukooko.’ Bakwete kufubila Yehowa mudimo wi selele mwibalasa dya pa nsenga dya ntempelo a mu kikudi.​—Bif. 7:9, 15.

17, 18. Mushindo kinyi wi dibaka dya Mwana a mukooko adikatwala myabi, na Kidishitu akekala nfumu a ba nnanyi mu bipwa byaaye Kinunu bya kumunana?

¹⁷ Badika Misambo 45:17, EEM. “Bansongwakashi baaloole” ba mukashi a mwiyilu a Kidishitu abekala na kya kusangala ngofu nsaa yabamono dibaka adituusha myabi ibungi mu ndumbulwilo mupya. Nfumu Yesu Kidishitu akyebe kutuula binangu byaaye kwi be pa nsenga bwa kubuusha ‘ba mashaaye,’ abekala bu “baana” baaye pa nsenga. (Yo. 5:25-29; Eb. 11:35) Munkatshi mwabo akyebe kwibeekasha bu “bakunkushi.” Kushii mpaka, Kidishitu akyebe kutuula bangi munkatshi mwa bakulu baasha kululama lelo bwabadya kukunkusha myanda mu ndumbulwilo mupya.​—Yesh. 32:1.

¹⁸ Mu bipwa kinunu bya kumunana kwaaye, Kidishitu akekala nshaaye na bantu be bungi. Byabya, bantu booso be pa nsenga abapete muwa wa losoo abakyebe kwiupeta mwanda wa lukumiino lwabo ku mulambu wa nkuulo wa Yesu. (Yo. 3:16) Kidishitu akyebe kwikala “Yaya a looso” kwabadi.​—Yesh. 9:6, 7.

19, 20. Mushindo kinyi wi myanda ibuwa i mu Misambo 45 ngitale beena Kidishitu ba binyibinyi lelo uno?

¹⁹ Badika Misambo 45:2, 18, EEM. Kushii mpaka, myanda i mu Misambo 45 ngitale beena Kidishitu booso. Bashingwe mwimu bakii pa nsenga abasangeela lukulupilo lwabo lwa kwibunga pamune mwiyilu na bakwabo mpa na pamune na Mulume aabo, Yesu Kidishitu. Ingi mikooko naamu i na lukalo lukata lwa kulamata ngofu kwi Nfumu aabo sha ntumbo na i na lutumbu bwa kinemo kyabadi nakyo kya kufuba pamune na bakwabo na mukashi aaye be pa nsenga. Kunyima kwa dibaka dyaaye, Kidishitu na baaba bakakunkusha nabo abakyebe kwelela bantu be pa nsenga myabi ikile bungi.​—Bif. 7:17; 21:1-4.

²⁰ Bu byatukwete kutengyela kulombana kwa “myanda ibuwa” itale Bufumu bwa Mesiya ta twi na kya kwipaana mu ‘kuukisha eshina dyaaye’ su? Twikaleyi munkatshi mwa baaba ‘abakatumbisha Nfumu bwa ikalaika.’