1. Twi na mushindo wa kukita kinyi bu byatudi bapangibwe kwifwanyiko dy’Efile Mukulu?

BANTU abakulaa pabitale mwana mwifwane nshaaye shi: “Uno mwana e nka bi nshaaye.” Eyendo shi, baana bebungi abefwanaa baledi baabo ngofu. Anka mwana ooso ekalaa n’eyikashi kampanda dya nshaaye na dya nyinaaye. Yehowa, Nsheetu e mwiyilu, ndjo Nsulo ya muwa. (Mis. 36:10) Atwe baana baaye, twi bamwifwane mu mishindo ibungi. Bu byatudi bapangibwe kwifwanyiko dyaaye, twi na mushindo wa kunangushena, kwata bitshibilo na kudya bukuuku na bantu mpa na kwibulama.​—Kib. 1:26.

2. Bukuuku bwetu na Yehowa mbwimene pa kinyi?

² Yehowa mulombeene kwikala bu Kuuku etu e buwa. Bwabwa bukuuku mbwimeene pa kifulo ki nakyo Efile Mukulu bwetu na pa lukumiino lwatudi nalo kwadi mpa na kwi Mwana aaye. Yesu bambile shi: “Mwanda Efile Mukulu mmufule baa pano bikile, mu kipaso kyadi mupaane Mwan’aye eeleka, bwa’shi muntu ooso amukumiina tashiminanga, anka aikale na muuwa wa iikalaika.” (Yo. 3:16) Kwi bileshesho bi bungi bya bantu babaadi mu kipwano ki buwa na Yehowa. Tubande kutala bileshesho bibidi.

3, 4. Bukuuku bwa Abrahame na Yehowa na bukuuku bwa Yehowa na beena Isaleele mbwilekeene ku kinyi?

³ Yehowa baadi mwitamine nkambwa’aye na beena Isaleele shi “Abrahame kuukw’ande.” (Yesh. 41:8) Mu mukanda wa 2 Myanda 20:7 abetamina Abrahame dingi bu kuuku a Efile Mukulu. Nkinyi kibaadi kikwashe bwashi Abrahame ekale mu bukuuku bwi byabya na Mupangi aaye? Ndukumiino lwa Abrahame.​—Kib. 15:6; badika Jaake 2:21-23.

⁴ Bekulu ba Abrahame, beena Isaleele, kumbangilo abaadi na Yehowa bu Nshaabo na bu Kuuku aabo. Anka, bi malwa mwanda abashimiishe bwabwa bukuuku n’Efile Mukulu. Bwakinyi? Pa mwanda wa kukutwa kutuula lukumiino mu milayilo ya Yehowa.

5, 6. (a) Mushindo kinyi wikale Yehowa bu Kuuku oobe? (b) Nkonko kinyi ayitungu shi twiyele?

⁵ Su okwete kulonga myanda itale Yehowa lukumiino loobe kwadi alunyingi, na kifulo kyoobe bwaye akitama. Tentekyesha mafuku obotundwile shi Efile Mukulu Mmuntu a binyibinyi, muntu oodi mulombeene kwikala naaye mu kipwano kikata. Boodi mulongye dingi shi atwe booso twi batandikye mu milwisho pa mwanda wa kukutwa kwa kukookyela kwa Adame. We mupushe shi bantu booso ta be mu kufukama n’Efile Mukulu nya. (Kol. 1:21) Akupu we mufumbule shi Nsheetu a kifulo e mwiyilu te kula netu nya etatshishaa bwetu. Nsaa ibaatulongyele pabitale mulambu wa nkuulo wa Yesu waadi mwitupe na kulesha lukumiino ku wanka, twi babangye kudya bukuuku n’Efile Mukulu.

⁶ Binobino p’atutentekyesha byanka, twi balombeene kwiyipusha shi: ‘Bukuuku bwande n’Efile Mukulu bukwete kwenda kumpala su? Lukumiino lwande kwi Yehowa na kifulo kyandi nakyo bwaaye bikwete kutama efuku dyooso su?’ Gideone, ngungi muntu a kala baadi mu kipwano ki buwa na Yehowa. Binobino tubande kutala kileshesho kyaaye ki buwa na twi kilamiine.

7-9. (a) Gideone bakitshine kintu kinyi kikata, na nkipeta kinyi kibapetele? (Tala kifwatulo ki ku mbangilo kwa mwisambo.) (b) Mushindo kinyi watudi balombeene kunyingisha bakuuku bwetu n’Efile Mukulu?

⁷ Gideone nsushi baadi afubila Yehowa mu mafuku e bukopo kunyima kwa beena Isaleele kutwela mu Nsenga ya Mulayilo. Mukanda wa Bansushi shapitre 6 aulesha shi, mwikeyilu a Yehowa bafikile mu kutala Gideone ku Ofra. Mu aa mafuku, beena Madyane babaadi pepi na beena Isaleele babaadi abebakalakasha ngofu. Pa wawa mwanda, Gideone baadi apuula ntete mu kyengyelo, bwa kumona bya kufwamisha ntete i buwa mwanda mu mapya, bekwiyinyenga. Aye pa kumona mwikeyilu ubamutuukila na kumwitamina bu “kiimankinda kya ngoshi,” Gideone baadi eyipusha su Yehowa, aye bapashishe beena Isaleele mu Ejiipitu, akyebe kwibakwasha binyibinyi mu yaaya nsaa. Mwikeyilu pabaadi akula bwa Mupangi, banyingiishe Gideone pa kumulungula shi, mu binyibinyi Yehowa amukwasha.

⁸ Gideone baadi eyipusha shi, ‘mbiikunyi byapaasha Isaleele kwi beena Madyane.’ Bapetele lwalulo mususa umune, Yehowa bamulungwile shi: “Neekala noobe, byaabya otshokola beena Madyane booso pamune.” (Bans. 6:11-16) Kushii mpaka bu bibaadi eyipusha mushindo wabikitshika, Gideone bakimbile kitundwilo. Lamiina shi, mu uno mwisambo takubaadi lukonko su ndumune nya kadi Gideone bamwene shi Yehowa Mmuntu a binyibinyi.

⁹ Kintu kibaadi kikitshikye kunyima kibanyingiishe lukumiino lwa Gideone na kumwikasha pepi n’Efile Mukulu. Gideone balumbulwile kya kudya ekipa mwikeyilu. Pabamwene bya kudya abipi kaalo nsaa ibebikumine mukombo wa mwikeyilu, Gideone batundwile shi mwikeyilu baadi alesha mpala ya Yehowa. Gideone bakwile n’eyi di bukopo shi: “Aa! Nfumu Yehowa, byabya naamono mwikeyilu wa Yehowa mpala na mpala.” (Bans. 6:17-22) Uno mwanda ubaadi ulwishe kipwano kibaadi pankatshi pa Gideone  n’Efile Mukulu su? Nya! Kubakitshikile kingi kintu. Gideone bafikile mu kwiuka Yehowa mu mushindo ubepushishe mu kufukama n’Efile Mukulu. Atwiuku bino kwishina dibaadi Gideone mupe kilambwilo kibayibakile pa yaaya mbalo—shi: “Yehowa mbutaale.” Abilesha mu kina Ebreeyi shi: “Yehowa-shalome.” (Badika Bansushi 6:23, 24.) Nsaa y’atunangwila ku byabakwete kwitukitshina kwi Yehowa efuku dyooso, atushinguula shi aye nyi Nkuuku e buwa. Kwela nteko efuku dyooso kwi Efile Mukulu akwitukwasha bwatudya kwipusha bu be mu kufukama kukata na kunyingisha bukuuku bwetu naaye.

10. Bipushene na mayi e mu Misambo 15:3, 5, nkinyi akitutekye Yehowa bwashi twikale bakuuku baye?

¹⁰ Byabya, kwi myanda ayitungu shi tukite bwashi Yehowa ekale Kuuku etu. Anka bu byabidi mu Misambo 15, Daavide bayimbile pabitale akitungu shi tukite bwa ‘kutwela mu nshibo ya Yehowa,’ abilesha kwikala bakuuku b’Efile Mukulu. (Mis. 15:1) Tubandeyi kutuula binangu ku myanda ibidi ayitungu shi tukite​—kupela kudimbiila bantu myanda na kwikala baasha kululama mu byooso byatukitshi. Pabitale ino myanda Daavide bakwile bwa baaba abatwele mu nshibo ya Yehowa shi: “Aye t’adimbiilaa bantu myanda n’edimi dyaaye. . . . T’akuminaa kutambula matwelo mwanda wa kuponesha muntu shi musoole mwanda.”​—Mis. 15:3, 5, NW.

11. Bwakinyi abitungu tushikwe kudimbiila bantu myanda?

¹¹ Mu ungi musambo, Daavide baadi mutuushe dino elango: “Lama ludimi loobe ku bubi.” (Mis. 34:14) Su twakutwa kukookyela dino elango dya mu Bible atukutwa kwikala mu kipwano na Nsheetu a kululama e mwiyilu. Kudimbiila bantu myanda ndimune dya ku ngikashi ya Satana mwishikwanyi mukata a Yehowa. Kishima “Diabulu” akituukila ku mwaku wa mu kina Greeke aulesha shi “adimbiilaa bantu.” Nsaa yatudi badimukye ku byatwakula bwa bangi bantu, abitukwasha bwa kulama kipwano ki bukopo na Yehowa. Bikishekishe pabitale mweneno atudi naaye bwa bano bakwete kukunkusha kakongye.—Badika Beena-Ebreeyi 13:17; Yuude 8.

12, 13. (a) Bwakinyi abitungu shi twikale na kululama mu myanda yooso? (b) Nkipeta kinyi kyatupete pa mwanda wa kululama kwetu?

¹² Bafubi ba Yehowa abaukiibwa mwanda wa kululama kwabo. Mpoolo mutumibwa bafundjile shi: “Ikalai anwitutekyela mwanda twi bashinkamishe shi twi na mashimba atooka, na lukalo lwa kukita myanda ya kalolo nguba ooso.” (Eb. 13:18) Pa mwanda wa kwikala na kitshibilo kya “kukita myanda ya kalolo nguba ooso,” nyi bwakinyi atupelaa kudya makuta a bakwetu beena Kidishitu. Bu kileshesho su bakwete kwitufubila mudimo, abitungu shi twikale badimukye bwashi tabekalanga abakyengye na twibafute nka muyiile byatwikele bepushene nabo. Bu byatudi beena Kidishitu, atukitshinaa bakwetu abetufubila mudimo na bangi booso myanda na kululama. Su mbetwate ku mudimo kwi mwina Kidishitu netu, abitungu twikale badimukye bwashi tatwikalanga atumutekye bwashi etukitshine bilekeene na bangi beena mufubo netu.

¹³ Pa nsenga bantu bakwete kwakulanga myanda ibuwa pabitale kululama kwa Batemwe ba Yehowa. Bu kileshesho, ungi mukata a sosiete mukata a kwibaka batundwile shi Batemwe ba Yehowa abakitaa nka kyakya kyabadi bambe. Bambile shi: “Anwikalaa nka balamate ku kyanudi bambe bwa kukita.” (Mis. 15:4) Uno mwikelo awitukwasha bwa kulama bukuuku bwetu na Yehowa. Na dingi autumbisha Nshetu e mwiyilu sha kifulo.

14, 15. Mu mudimo wetu wa bulungudi, mushindo kinyi watudi balombeene kukwasha bangi bwabadya kwikala bakuuku ba Yehowa?

¹⁴ Sunga mbalombeene kukumiina shi Efile Mukulu e kwanka, bantu bebungi batufumankanaa nabo mu mudimo wa bulungudi t’abamumonaa bu Kuuku ebuwa nya. Mushindo kinyi watudi balombeene kwibakwasha? Banda kutala ano malango abaadi Yesu mupe balondji  baaye 70 nsaa ibaadi mwibatume bubidi-bubidi mu mudimo wa bulungudi. Bebalungwile shi: “Mu nshibo kampanda mwanutwele bangaayi kwamba’shi: ‘Kufukama kwikale mu ino nshibo.’ Su mwekala muntu sha kufukama, byabya mwabi wenu wa kufukama awikala mwadi; bisumanga awinwalukiila.” (Luk. 10:5, 6) Twi balombeene kukaka bantu ku bya binyibinyi nsaa yatwisamba nabo bu bakuuku. Pabitale bantu abapele kwituteemesha, kwisamba nabo na mayi a kalolo nkulombeene kukaasha mushikwa mwabadi na kwitutambula dingi efuku.

¹⁵ Su tubafumankana na bantu be mu lulangwilo lwa madimi sunga bakwete kulonda bipikwa bishii mu Bible, atutungunuka na kwikala na mayi a kalolo kwabadi na binangu bya kufukama. Mu bisangilo byetu atukuukilaa na muloo ooso baaba bakwete kukalakashwa na myanda i bubi ya uno ndumbulwilo na abakumiina kulonga myanda itale Efile Mukulu atukwete kulangwila. Miisambo ayamba shi: “Bible kwete kushintuula bantu” i na bileshesho bi bungi bi buwa.

16. Mushindo kinyi watudi balombeene kwikala bu bakuuku ba Yehowa na bu bantu abafubu “pamune” naaye?

¹⁶ Bantu abafubu pamune abanyingishaa bukuuku bwabo. Booso belambule kwi Yehowa be na kinemo kya kwikala bu bakuuku baaye na bu bantu abafubu “pamune” naaye. (Badika 1 Beena-Kodinto 3:9, EEM.) Eyendo, nsaa y’atufubu mudimo wa bulungudi na wa kwikasha bantu balondji, atupete binangu bi bungi pabitale ngikashi ibuwa ya Nsheetu e mwiyilu. Atumono mushindo wi kikudi kiselele akitukwasha bwa kwikala na mushindo wa koobesha mudimo wetu wa kulungula mukandu wi buwa.

17. Mushindo kinyi wi bidibwa bya mu kikudi byatupetaa ku bikongeno byetu bya distrike na bya kifunda abilesha shi Yehowa Nkuuku etu e buwa?

¹⁷ Atwikala pepi ngofu na Yehowa nsaa y’atufubu mudimo wa kwikasha bantu bu balondji. Bu kileshesho atumono mushindo wi Yehowa kwete kukita bwashi beshikwanyi netu tabemikanga mudimo wetu. Banda kutentekyesha bipwa bishaale. Ta twi bamone kalolo mushindo ukwete kwitukunkusha Efile Mukulu su? Twi na muloo wa kupeta bidibwa bya mu kikudi bikile bungi. Programe a bikongengo byetu bya distrike na bya kifunda alesha binangu bya kifulo bi nabyo Nshetu pabitale nkalo yetu na myanda yatudi nayo. Kingi kifuko kibaadi kifunde bwa kulesha lutumbu bwa kikongeno shi: “Miisambo ibetukumu ku mashimba ngofu. Tubapusha shi Yehowa mmwitufule ngofu na akumiina shi toobeshe myanda yetu.” Kunyima kwa kutwela mu kikongeno ky’efuku dimune mu Irelande, ungi mulume na mukashi ba mu Allemagne abalesheshe lutumbu lwabo bwa mushindo wabekalanga bebakuukile na kwibalama, shi: “Kadi lutumbu lwetu lukata alwende kwi Yehowa na Nfumu Yesu Kidishitu. Abo abekalanga betwitamine bwatudya kwikala mu uno mwilo wi mu bu umune. Tatukwete penda kwisamba pabitale  bu umune nya anka tukwete kwibumona efuku dyooso. Myanda ibatumono mu kikongeno ky’efuku dimune kya mu Dublin ayikyebe kwitutentekyesha kinemo kikata kyatudi nakyo kya kufubila Efile Mukulu pamune nenu.”

18. Abitungu shi twiyipushe kinyi pabitale kwisamba na Yehowa?

¹⁸ Bukuuku abunyingaa nsaa yakudi miisambo. Lelo uno bantu bakwete kwisamba ku bukwashi bwa Internet na mu kwitumishenanga ma mesaje. Anka, twi balombeene kwibipwandikisha na miisambo yetu na Yehowa Kuuku etu ebuwa su? Eyendo shi aye “Apushaa nteko.” (Mis 65:3) Kadi, mmisusa bungi kinyi y’atwateyaa nsaa ya kwisamba naaye?

19. Su ta mbibofule bwashi tuleshe Yehowa bi mu mashimba etu mu luteko, mbukwashi kinyi bwatudi nabo?

¹⁹ Bangi bafubi b’Efile Mukulu tabamonaa shi mbibofule bwa kufungula mashimba aabo na kulesha bi mu binangu byabo nya. Anka, byabya ndjo abikumiina Yehowa shi tukite nsaa yatwele nteko kwadi. (Mis 119:145; Kwi. 3:41) Sunga twamona shi kwi bishima abitwikeela bukopo bwa kwakula, bukwashi bwi kwanka. Mpoolo baadi mufundjile beena Kidishitu ba mu Looma shi: ‘Atwe t’atwiûku kuteka mu kipaso kilombêne. Anka kikudi kiselele ki nabêne, akitutekyela kwi Efile Mukulu na kukuma [kwitenda] mu kipaso kishya kwakulwa na bishima. Anka Efile Mukulu, yawa atalûlâ mu mashimba etu eûkâ kyakya ky’abakyebe kuteka kwi kikudi kiselele. Byabya kikudi kiselele akitekyelâ beena Kidishitu anka muîle abikyebe Efile Mukulu.’ (Lom. 8:26, 27, EEM) Kunangwila ku bishima bi mu mikanda ya mu Bible bu Yoobo, Misambo, na Myeele akwitukwasha bwa kulungula Yehowa myanda i mu mashimba etu.

20, 21. Mushindo kinyi awitunyingisha mayi a Mpoolo e mu mukanda wa Beena-Fidipe 4:6, 7?

²⁰ Patudi kumpala kwa lukalasho kampanda, bi buwa tuteeemeshe elango dibaadi Mpoolo mupe beena Fidipe ku bukwashi bwa kikudi kiselele shi: “Tanwikalanga mashimba kwiyilu pa kintu su nkimune, anka nguba ooso, mu nteko, mu kwiyaaya, na mu ntumbu, uukishaayi Efile Mukulu nkalo yeenu.” Yaaya miisambo yatwisamba na Kuuku etu e buwa ayitusamba na kwitunyingisha mwanda Mpoolo bambile dingi shi: “Na butaale bw’Efile Mukulu, abo bukile binangu byooso, abulama mashimba enu na binangu byenu munda mwa Yesu Kidishitu.” (Fid. 4:6, 7) Twikaleyi atusangeela “butaale bw’Efile Mukulu” bukata abo abulama mashimba na binangu byetu binyibinyi.

²¹ Nteko ayitukwasha bwa kwikala mu bukuuku na Yehowa. Byabya, ‘tutekyeeyi kushii kupungila.” (1 Tes. 5:17) Uno mwisambo witukwashe bwa kunyingisha bukuuku bwetu bwi buwa n’Efile Mukulu mpa na kitshibilo kyetu kya kukita kyooso kyetutekye. Na dingi, twateyi nsaa ya kunangwila ku myabi yatukwete kupeta mwanda Yehowa binyibinyi nyi Nsheetu, Efile Mukulu etu na Kuuku etu.