Pabapangile bantu, Efile Mukulu baadi akumiina shi bekale na muwa wa looso pa nsenga kushii kukumba sunga kufwa. Anka, mulume a kumpala Adame, bakutshile kukokyela Mupangi aye na nkushimisha lukulupilo lwa muwa wa looso. Bu byatudi bana ba Adame, twi bapyane lufu kwadi. (Beena-Looma 5:8, 12; 6:23) Yehowa, Efile Mukulu a binyibinyi batumine Mwana aaye Yesu pa nsenga bwashi afwe na afute kyakya kibaabadi bashimishe kwi Adame.​—Badika Yowano 3:16.

Lufu lwa Yesu ndwitupe lukulupilo lwa kulekyelwa kwa milwisho na kwikala na muwa wa looso. Bible etulesha mushindo aukyebe kwikala muwa pa nsenga nsaa yatushy’atununupa dingi, kukumba, sunga kufwa.​—Badika Yeeshaya 25:8; 33:24; Bifumbulwe 21:4, 5.

Kyolwa kya muladilo wa lufu lwaye, Yesu balungwile balondji baaye bwashi bekale abatentekyesha lufu lwaye mu kisangilo kishi na bipikwa bikilekile. Kutentekyesha kwa lufu lwa Yesu mu wawa mushindo ku kipwa kyooso akwitukwasha bwa kumona mushindo wi Yehowa na Yesu mbafule bantu.​—Badika Luuka 22:19, 20; 1 Yowano 4:9, 10.

Kino kipwa Kitentekyesho kya lufu lwa Yesu akikitshika mu Dimune dya 14 dya mweshi wa Kananka kunyima kwa nguba kupona. Atukwitamina bwa kwibunga na Batemwe ba Yehowa ba mbalo yoodi.​—Badika Beena-Looma 1:11, 12.