Mu kipwa kya 33 K.Y.K., Yesu baadi mufwe, babukile ku bafwe, akupu akamina mwiyilu. Mafuku ebungi kunyima, Yesu baadi mupete matalwa a kumunana bu Nfumu. (Danyele 7:13, 14) Mu mafuku e kumpala, Yesu akyebe kufuba bu Nfumu bwa kutwesha butaale pa nsenga na kukaasha bulanda.​—Badika Misambo 72:7, 8, 13.

Yesu akakitshi myanda ibuwa pakafubu bu Mukunkushi a bantu. Akyebe kutumika na bukome bwabadi bamupe kwi Nshaaye bwa kwalusha bantu mu kupwidika. Abakyebe kwikala na muwa pa nsenga kushi kununupa sunga kufwa.​—Badika Yowano 5:26-29; 1 Beena-Kodinto 15:25, 26.

Ano mafuku Yesu kwete kukunkusha mudimo wa kulungula mukandu wibuwa wabakwete kukita kwi balondji baaye b’eyendo pa nsenga ishima. Bakwete nkatembela bantu bwa kwibalesha akyamba Bible pabitale Bufumu bw’Efile Mukulu. Yesu bambile shi akyebe kutungunuka na kukwatshishena mudimo wa balongi baaye mpa na pabakabutula ma guvernema ooso kwi Bufumu bw’Efile Mukulu.​—Badika Mateo 24:14; 28:19, 20.

Ku bukwashi bwa kakongye ka beena Kidishitu, Yesu kwete kukunkusha bantu bwabadya kwikala na nshalelo ebuwa. Atungunuka na kwibakunkusha mpa na apakabutudibwa uno ndumbulwilo mubi a myanda bwa kutwela mu ndumbulwilo mupya a Efile Mukulu.​—Badika 2 Mpyeele 3:7, 13; Bifumbulwe 7:17.