Bible kwete kwitulugula patooka akikyebe kukita Yehowa na mwana’ye, Yesu Kidishitu, pabitale makyenga abadi bafwishe kwi Satana Diabulu. Bible amba shi: “Ngi pa mwanda kinyi mwan’Efile Mukulu [Yesu] beelesheeshe bwa kutuuta mifubo ya kafilefile.” (1 Yowano 3:8) Uno ndumbulwilo a myanda muule na lwabi, mushikwa, na bikitshino bibubi akyebe kubutudibwa. Pabitale “mfumu e pano pa nsenga”​—Satana Diabulu—​Yesu mulee shi “abingibwa binobino.” (Yowano 12:31) Abakyebe kutuula ndumbulwilo mupya ebuwa, shii ku bukitshishi bwa Satana, na ino nsenga ayikyebe kwikala mu butaale.​—2 Mpyeele 3:13.

Nkinyi akikyebe kukitshikila bano basha mutwe wi bukopo abapele kushintuula mashinda aabo na abatungunuka na kukita myanda ibubi? Banda kunangushena pabitale uno mulayilo aunyingisha wa shi: “Bantu balulame na bashi na matope nyi abakashâla pa nsenga. Bakitshi ba bibubi na bashi na kishima, abakebakâsha panka na kwibabinga.” (Myeele 2:21, 22) Bukitshishi bwa bantu bebubi abukyebe kukatushibwa. Mu yawa nshalelo a kufukama, bantu basha kukokyela abakyebe kupososhibwa kapelakapela ku kukutwa kupwidika kubabadi bapyane.​—Beena-Looma 6:17, 18; 8:21.

Mu yawa ndumbulwilo mupya, mushindo kinyi aukyebe Efile Mukulu kukatusha myanda ibubi? Ta mpakwibakatwisha bulungantu bwa kwisangwila myanda na kukita bantu bu robo nya. Pamutwe pa byabya, akyebe kulongyesha bantu basha kukokyela mashinda aye, na kwibakwasha bwa kukatuka ku binangu na bikitshino bibubi.

Nkinyi akikyebe Efile Mukulu kukita na makyenga akwete kupulukila bantu? Baadi mulee shi Bufumu bwaye abubanga kumunana pa nsenga binobino. Nfumu a buno Bufumu abadi basangule kwi Efile Mukulu nyi Yesu Kidishitu, e na bukome bwa kupasha mikumbo. (Mateo 14:14) Yesu e na dingi bukome bwa kukunkusha makome a ku bupangilo. (Maako 4:35-41) Nyi bwakinyi, makyenga aatukila ku “nsaa na myanda yabasha batengyela” abikashimina. (Mulungudi 9:11) Mu Bufumu bwa Kidishitu, masaku taakafwila bantu.​—Myeele 1:33.

Kinyi kyabakakitshina midiyo ya bantu bashi na mwanda abaadi bafwe? Mafuku apeela kumpala kwa kubusha kuuku aye lazare ku lufu, Yesu bambile shi: “Ami ne kusanguka, ne muwa.” (Yowano 11:25) Oolo, Yesu e na bukome bwa kubusha sunga kwalushula bantu bapwe kufwa ku muwa!

Su kino kinangu kya kushaala mu ndumbulwilo mushi myanda ibubi ayikitshikila bantu akikusankisha, bwakinyi kupela kwata kitshibilo kya kulonga Bible bwa kuuka bibungi pabitale Efile Mukulu a binyibinyi na mpàngo yaye? Batemwe ba Yehowa be mu mbalo yoodi be na muloo wa nkukwasha bwa kupeta kyakya kyukilo. Atukutekye na muloo ooso bwa kwimonena nabo mu mbalo yoodi sunga kufundjila baaba batuushe uno jurnale.