1. Nkinyi ki na mbalo i pa bwayo mu lulangwilo lwetu?

TOBOMWENE eshina Yehowa difunde ku kimano kya nshibo ikata sunga ku bintu byabatulaa mu ma musée? Kushi mpaka bibaadi bikusankishe na bikukanyishe. Eyendo eshina dy’Efile Mukulu di na mbalo i pabwayo mu lulangwilo lwetu​—atwe Tumonyi twa Yehowa! Mu nsenga ishima, takwi kingi kisaka kya bantu lelo uno kikwete kufuba n’eshina dy’Efile Mukulu bu’twe nya. Kadi, atuuku shi mwabi wa kwikala n’eshina dy’Efile Mukulu awitutungu myanda kampanda.

2. Mwabi wetu wa kwikala n’eshina dy’Efile Mukulu awitutungu myanda kinyi?

² Ta mpenda kufuba n’eshina dy’Efile Mukulu akukitshi bwashi Yehowa etukumiine. Abitungu twikale na nshalelo mwipusheene na miiya yaye ya kululama. Nyi bwakinyi Bible etutentekyesha shi abitungu bafubi ba Yehowa “bekumbe bubi.” (Mis. 34:14) Mutumibwa Mpoolo baadi muleshe uno mwiya kalolo shi: “Yawa ooso atemuna eshina dya Yehowa afutaale bubi.” (Badika 2 Timotee 2:19.) Bu byatudi Batemwe baye, atuukibwa bu bantu abetaminwa  mwishina dya Yehowa. Kadi mushindo kinyi watudya kufutaala bubi?

3, 4. Verse kinyi baadi mukemeshe bantu abapatuula myanda i mu Bible, na mbwakinyi?

³ Tubande kutaluula nshalelo ibaadi itakule Mpoolo mu kufunda mayi e mu 2 Timotee 2:19. Uno verse akwila pabitale “kitako kinyingye kibakwe kwi Efile Mukulu” na alesha bishima bibidi bifundwe panka. Kishima kyakumpala akyamba shi “Yehowa auku bantu baye” akikatukila mu mukanda wa Mbadiko 16:5. (Tala mwisambo wa kumpala.) Kishima kyakabidi akyamba shi “Yawa ooso atemuna eshina dya Yehowa afutaale bubi,” kibaadi kikemeshe bantu abapatuula Bible. Bwakinyi?

⁴ Bishima bya Mpoolo abilesha shi baadi atemuna mayi a mu ungi mukanda. Kadi, abimweka shi takwi verse mu Bifundwe bya kina Ebreeyi mwipushene na bishima bya Mpoolo. Byabya, nkinyi kibaadi Mpoolo muleshe nsaa ibakwile shi: “Yawa ooso ayitanyina eshina dya Yehowa afutaale bubi”? Mususa umune kumpala kwa kwakula bino bishima, Mpoolo baadi mutemune mayi e mu mukanda wa Mbadiko shapitre 16, aesambila pabitale buntomboshi bwa Koree. Na dingi, kishima kyakabidi nkikumbene kwikala mu kwipushena na myanda itale bwabwa buntomboshi su?

5-7. Myanda kinyi ya mu mafuku a Moyiise ayikwasha bwa kuuka nshalelo ibaadi Mpoolo mufunde mu mayi e mu 2 Timotee 2:19? (Tala kifwatulo ki kumbangilo kwa mwisambo.)

⁵ Bible amba shi Datane na Abirame, bana ba Elyabe, abaadi balonde Koree na kukunkusha bantu bwashi batombokyele Moyiise na Aarone. (Mb. 16:1-5) Abaadi bakutwe kunemeka Moyiise na kupela kukokyela matalwa abaadi amupe Efile Mukulu. Bano bantomboshi abatungunukile na kwikala munkatshi mwa mwilo wa Yehowa, abaadi abatuula nshalelo a mu kikudi a basha lukumiino mu masaku. Pabafikile efuku dya shi Yehowa aleshe kwilekena kwi pankatshi pa bafubi baye basha kululama na baaba bantomboshi, baadi mutushe mwiya upushikye kalolo.

⁶ Bible amba shi: “Yehowa balungwile Moyiise shi: ‘Lungula kakongye kende kula na mbalo i peepi na kishalelo kya Koree, Datane na Abirame.”’ Moyiise bebwele bwa kwenda mu kutala Datane na Abirame, bakulu ba Isaleele babamulondele. Balungwile kakongye shi: ‘byabya endayi kula na mashibo a bano bantu babi, tanukumanga kintu kyabo su nkimune, tala nwashimina anwe namu pamwanda wa milwisho yabo yooso.’ Byabya babayile kula na mbalo i peepi na kishalelo kya Koree, Datane, na Abirame.” (Mb. 16:23-27) Paapa Yehowa bayipayile bantomboshi booso. Kadi balangwidi basha kululama​—abaadi bafutaale bubi pa’bo kwenda kula—​abashele na muwa.

⁷ Yehowa amona bi mu mashimba! Amonaa kululama kwa baaba bamulamate. Kadi, bafubi baye basha bulamate abaadi na kya kwata kitshibilo, kya kwenda kula na bantu babi. Byabya abilesha shi Mpoolo baadi esambila pabitale myanda i mu mukanda wa Mbadiko 16:5, 23-27 pabaadi mufunde shi: “Yawa ooso atemuna eshina dya Yehowa afutaale bubi.” Yawa ngakwilo mwipusheene na bishima bya Mpoolo abyamba shi: “Yehowa auku bantu baye.”​—2 Tim. 2:19.

8. Bwakinyi kutemuna penda eshina dya Yehowa sunga kwikala mu kakongye ka beena Kidishitu ta nkukumbane?

⁸ Pakulesha yaaya myanda ya mu mafuku a Moyiise, Mpoolo baadi adimusha Timotee bwa kwata kitshibilo kya kulama kipwano kyaye kibuwa na Yehowa. Na dingi, kwikala penda mu kakongye ka beena Kidishitu ta nkukumbane nya, anka bu bibaadi shi tabibaadi bikumbane penda kutemuna eshina dya Yehowa mu mafuku a Moyiise. Abitungu bafubi basha bulamate baate kitshibilo kya “kufutaala bubi.” Bino  bibaadi abipushisha kinyi kwi Timotee? Na ndilongyesha kinyi dikumbeene bafubi ba Yehowa kupeta lelo uno kukiila ku elango dya Mpoolo?

9. Mushindo kinyi ubaadi “mpaka mu myanda ishi kapu” itweshe kafutakanyi mu kakongye ka beena Kidishitu ba kumpala?

⁹ Eyi dy’Efile Mukulu dikwete kutusha malango apushikye pabitale mishindo ya myanda ibubi ayitungu shi beena Kidishitu balekye sunga kusuuka. Bu kileshesho, patutala myanda i mu 2 Timotee 2:19, atusangana Mpoolo alungula Timotee bwashi “tabekalanga abekutwena pabitale bipatulwilo bya bishima” na bwa “kwilamûna ku mîsambo ya bisumanga.” (Badika 2 Timotee 2:14, 16, 23, EEM.) Bangi beena Kidishitu abaadi abakwatshishena ndambukisho ya bantu basumbule lukumiino. Bangi namu abaadi abatwesha misambo ibaadi ayifwisha tuleo mu kakongye. Sunga byekala shi byabya binangu tabibaadi abitukila mususa umune mu bifundwe, anka bibaadi abyabuula. Bibaadi abitanda tuleo na kwikutwena pabitale bishima, na kwitusha bangi mu kikudi. Ngi bwakinyi, Mpoolo baadi mukankamikye bwa “kuleka mpaka mu myanda ishi kapu.”

10. Nkinyi akitungu kukita nsaa yatufumankana na bantu basumbule lukumiino?

¹⁰ Lelo uno, bafubi ba Yehowa tabakwete kufumankana na bantu basumbule lukumiino misusa ibungi mu kakongye nya. Kadi, nsaa yatudi kumpala kwa malongyesha a madimi, sunga ekala aatukila mbalo kinyi, abitugu twate kitshibilo kya kwiasuuka. Kwelesha mpaka na bantu basumbule lukumiino, bikale kwisamba nabo mpala na mpala, mu mesage, sunga mu ungi mushindo nyi nkukutwa kwa binangu. Sunga byekala shi atukyebe kumukwasha, uno mwisambo tawipushena na ano malango aatukila mu Bifundwe abatukatuka mu kwisambila nya. Pamutwe pa byabya, bu byatudi bafubi ba Yehowa, atukyebe mu mishindo yooso kusuuka na kwilamuna kwi bantu basumbule lukumiino.

11. Nkinyi kikumbene kutanda ‘mpaka mu myanda ishi kapu’ na mushindo kinyi ulombene bakulu beena Kidishitu kutuusha kileshesho kibuwa?

¹¹ Kukatusha bantu basumbule lukumiino, kwi ingi myanda ikumbene kulwisha butaale mu kakongye. Bu kileshesho, kwikala na mweneno ilekenelekene pabitale kukisha kwa kapapi nkulombene kutanda “mpaka mu myanda ishi kapu.” Eyendo, nsaa i bantu abakisha kapapi mu mushindo awipa miiya ya Yehowa ya kululama, tabitungu shi bakulu beena Kidishitu baputa meso ku ino myanda nkapenda bwa kupela kwikakeena nya. (Mis. 11:5; Ef. 5:3-5) Kadi, bakulu be na kya kwikala badimukye bwa kupela kutusha yabo mweneno. Bakwete kulamata ngofu ku dino elango dibaabadi bape bakuku shi: “Lamayi mikooko y’Efile Mukulu yabadi benupe, . . . tanwikalanga na bufumu bwa kumuna baaba babadi benupe kulama, anka ikalayi kileshesho kibuwa kwi kakongye.”​—1 Mp. 5:2, 3; badika 2 Beena-Kodinto 1:24.

12, 13. (a) Tumonyi twa Yehowa ntwate kitshibilo kinyi pabitale kusangula mishindo ya kukisha kapapi, na mmiiya ya mu Bible kinyi itale uno mwanda? (b) Mushindo kinyi wi miiya yabadi baleshe mu paragrafe 12 ayitala myanda ilekenelekene itale muntu nabeene?

¹² Pabitale bintu bya kukisha nabyo kapapi, ndumbulwilo eetu takwete kutaluula ma filme, maasha a ku video, mikanda, sungwa ngono bwa kwitwelela miiya pabitale yatudi balombene kupela nya. Bwakinyi takwete kukita byabya? Bible kwete kukankamika muntu ooso bwa kupeta “kyubishi kya kushinguula myanda ibuwa na ibubi.” (Eb. 5:14) Bifundwe bikwete kutuusha mayi a kulonda akumbeene kukwasha mwina Kidishitu nsaa yakyebe kusangula maasha kampanda. Mu nshalelo yooso ya muwa wetu, abitungu twate kitshibilo kya “kushinguula byabya abisangasha Mwanana.” (Ef. 5:10) Bible alongyesha shi bamfumu ba bifuko  be na matalwa, byabya mbalombene kupela mishindo kampanda ya kukisha kapapi mu bifuko byabo. *​—1 Kod. 11:3; Ef. 6:1-4.

¹³ Miiya ya mu Bible ibatumono kunundu tangitale nka penda mishindo ya kukisha kapapi nya. Mweneno ilekenelekene pabitale nfwadilo na mushindo wa kutshibisha nyene, bukome bwa mbidi na byakudya, na ingi myanda ya muntu nabeene ngikumbeene dingi kutanda tuleo. Byabya, su tabipaa mwiya kampanda wi mu Bible, bafubi ba Yehowa abelama bwa kupela kwikakena bwa yaaya myanda, mwanda “mufubi a Mwanana te na kya kubwelabwela nya, anka penda kwakula kalolo na bantu booso.”​—2 Tim. 2:24.

14. Nkileshesho kinyi kibaadi Mpoolo mufube nakyo bwa kulesha shi abitungu kusuuka ba kuuku bebubi?

¹⁴ Mu ungi mushindo kinyi ukumbene bano “abatemuna eshina dya Yehowa kufutaale bubi”? Mpa kupela kushala pamune na bantu bakwete kukita myanda ibubi. Pabapwile kwakula bwa “kitako kinyingye kibakwe kwi Efile Mukulu, Mpoolo baadi mutuushe kingi kileshesho. Baadi mwakule shi: “mu nshibo ikata tamwikalaa nka penda malonga a ôlo na a adishâ, ooo, amwikala namu angi a mitshi na a ema, angi nga kufuba nao p’efuku dinême angi namu nga kufuba nao kwifuku n’efuku.” (2 Tim. 2:20, 21) Akupu adimusha beene Kidishitu bwa “kwitoosha” na kwilamuna ku malonga abafubaa nawo bwa mifubo ya “bisumanga.”

15, 16. Nkinyi kyatudi bakumbene kulongyela ku kileshesho kya “nshibo ikata”?

¹⁵ Nkinyi akipatuula kino kileshesho? Mpoolo kwete kupwandikisha kakongye ka beena Kidishitu na “nshibo ikata,” na bantu be mu kakongye na “malonga,” sunga bintu bya mu nshibo. Mu nshibo, angi malonga ngalombene kukwata butshafu sunga kulwila. Sha nshibo mmulombene kukumba ano malonga kula na ebuwa, afubaa nawo bwa kuteeka.

 ¹⁶ Mu mushindo umune, bafubi ba Yehowa lelo uno, bu byabakwete kwitatshisha bwa kwikala na nshalelo ebuwa, abitungu balekye kipwano na bantu be mu kakongye bakwete kutungunuka na kubepuula miiya ya Yehowa. (Badika 1 Beena-Kodinto 15:33.) Su atukitshi byabya bwa baaba be mu kakongye, tomono shi abitungu “kwilamuuna” ngofu na baaba be pasha pa kakongye, bebungi ba kwabadi ‘mbasha kifulo kya mfwalanga, batombokyele bebatande, bashi belame, ba nsangakanyi, basha bukyelo, bashikwe buwa, ba nsesa, bafule miloo ya mbidi, bashi bakumiine Efile Mukulu!​—2 Tim. 3:1-5.

17. Mushindo kinyi ubaadi basha bulamate bakite myanda bukidibukidi bwa kusuuka myanda ibubi?

¹⁷ Bible kwete kutemuna kitshibilo kibaadi beena Isaleele baate nsaa ibaabadi bebalungule bwa “kwenda kula na mbalo i pepi na kishalelo kya Koree, Datane, Abirame.” Mwisambo aulesha shi “babayile mususa umune kula.” (Mb. 16:24, 27) Tababaadi banyengakane nya. Bifundwe abilesha dingi shi abaadi bebikite bukidibukidi. Mwanda “babayile kula . . . ku mpese yooso.” Basha bulamate tababadya kupeta masaku nya. Kukokyela kwabo takubaadi kwa kipindji sunga kwa mashimba abidi. Abaadi balamate kwi Yehowa na kusuuka myanda ibubi. Malongyesha kinyi atupetela ku kino kileshesho?

18. Nkinangu kinyi kyatupete mu mayi a Mpoolo nsaa yadimusha Timotee bwa “kusuuka ndakalaka ya ku bu nsongwa”?

¹⁸ Nsaa yatukyebe kulama kipwano kyetu na Yehowa, abitungu tukite myanda bukidibukidi na kitshibilo kyooso. Kino kinangu atwikipete mu mayi a Mpoolo abaadi mudimushe Timotee bwa “kusuuka ndakalaka ya ku bu nsongwa.” (2 Tim. 2:22) Mu aa mafuku, Timotee tabaadi mupwe kukula, mwikale pangi na bipwa 30. Anka ndakalaka ya ku bu nsongwa tayitshimbaa mwanda wa bipwa bi na muntu nya. Nsaa ibaadi Timotee apusha ino ndakalaka ya mbidi, baadi “eyisuuku.” Mu angi mayi Timotee baadi na kya “kufutaala bubi.” Yesu baadi muleshe mwanda wi bino pabimbile shi: “Su eyiso dyoobe dyatunga nkuponesha, editukule wedisumbule kula noobe.” (Mat. 18:9) Lelo uno, beena Kidishitu bakwete kutumikila dino elango abata kitshibilo kya kukambila masaku a mu kikudi, kushi kunyengakana su nkapeela.

19. Mushindo kinyi ukwete kwata bangi kitshibilo kya kwilama abo banabeene ku masaku a mu kikudi?

¹⁹ Bangi abaadi na nkalakasho ya kukwatshika malofu kumpala kwa’bo kufika Batemwe mbate kitshibilo kya kuleka kukwatshika malofu. Bangi namu mbapele mishindo kampanda ya kukisha kapapi ishy’ayimweka bu ibubi kadi ikumbene kwibabofusha ngofu. (Mis. 101:3) Bu kileshesho, kumpala kwa kufika Temwe, ungi mukwetu mulume baadi mu kisaka kya bantu abaadi abashi masha ebubi. Kadi kunyima kwa kulonga bya binyibinyi, balekyele kusha mpa na mu ma fete a Batemwe bwa kupela kwibwesha malaka ebubi sunga binangu bibaadi nabyo kala. Eyendo, Beena Kidishitu ta mbebatekye bwa kupela kutoma malofu, kusha masha, sunga kukita ingi myanda yabamono bu ishi bubi nya. Anka atwe booso mbetutekye bwa kwata kitshibilo na kukita myanda na binangu bwa kwikalwila atwe banabene ku masaku a mu kikudi.

20. Sunga shi ta mbibofule bwa “kufutaala bubi,” kinyi akitupa lukulupilo na kwitunyingisha?

²⁰ Mwabi wa kwikala n’eshina dy’Efile Mukulu aufiki na mashito pamunenka. Abitungu “tufutaale bubi” na “kwikumba bubi.” (Mis. 34:14) Eyendo, kukita byabya ta nkubofule nya. Kadi kuuka shi Yehowa akyebe kutungunuka na kufula “bantu baye” na baaba balamate ku mashinda aye a kululama akwitunyingisha.​—2 Tim. 2:19; badika 2 Myanda 16:9a.