AKIPELELA BANGI KUKUMINA: Bantu bebungi abele meshi shi Efile Mukulu amonaa bantu nkapenda bu basha milwisho​—bebutete na bashi mukumbene kwitatshisha bwabo. Kendra, baadi na twinyongoshi na baadi etopeka ngofu mwanda tabaadi na mushindo wa kutumikilla miiya y’Efile Mukulu mu kipaso kilombane. Ndyo, amba shi, “Naadi mwimikye kwela nteko.”

AKILONGYESHA EYI DY’EFILE MUKULU: “Yehowa t’atatalaa nka penda bilubilo byoobe kadi auku kyodi binyibinyi.” Bible amba shi: “Ashingûla kyakya kibetubumbile n’akyo. Eûku shi, atwe twibatûkile ku nsenga. Na dingi T’etumweshâ malwa “muîle myanda yatudi basôle.” Kadi kwete kwitufwila lusa nsaa yatwilanga ku mashimba.​—Misambo 103:10, 14, EEM.

Twate kileshesho kya Daavide, nfumu a bena Isaleele atudi batemune mu mwisambo wa kumpala wa ku ino miisambo. Mu luteko lubaadi mwele kwi Efile Mukulu, Daavide bakwile shi: “Naadi penda ku mbangilo, meso oobe nkumona. Bipindji byande byooso bibaadi bifundjibwe mu mukanda oobe . . . Efile Mukulu, ntaluule, oshinguule bi eshimba dyande.” (Misambo 139:16, 23, NWT) Oolo, Daavide baadi mushinkamishe shi, sunga mbibaadi mukite mulwisho​—wibubi ngofu—​Yehowa baadi mukumbene kushinguula bi mwishimba dyaye.

Yehowa kwete kukutemesha kalolo kukila muntu ooso. Bible amba shi: “Bantu abamonaa nka penda bi ku meso, anka Yehowa amonaa mpa na bi mwishimba.” (1 Samwele 16:7) Efile Mukulu awuku kyokitshinaa myanda kampanda​—mushindo wi ngikashi yoodi mupyane kwi baledi boobe, mushindo oodi mukule, mbalo yoodi mukule, na bumuntu boobe abikitshi bwashi wekale kyakya kyoodi. Kwete kumona na kwata na muulo kyokwete kwitatshisha bwa kwikala, sunga byekala shi okitaa bilubilo.

Kadi, mushindo kinyi ukwete Yehowa kupusha ‘kyoodi menemene’ bwa nkusamba?