MIISAMBO YA MBANGILO | EFILE MUKULU ETATSHISHAA BOOBE SU?
Efile mukulu etatshishaa boobe su?
“Ami mulanda, muntu musaabuulwe, Yehowa antentekyeshe.” *—DAAVIDE A MU ISALEELE, SIEKELE 11 EB.Y.K.
“Bisamba byooso bi bu ekopola adipono ku mbeketshi.”—YEESHAYA 40:15
Bibaadi buwa bwa Daavide kuteka Yehowa bwashi etatshishe bw’aye su? Efile Mukulu kwete kwitatshisha boobe su? Bantu bebungi abapelaa kukumiina shi Efile Mukulu sha bukome booso etatshishaa bwabo. Bwakinyi?
Mwanda wa shi Efile Mukulu e kunundu ngofu kwa bingi bipangwa byooso. Bu byaadi kunundu ngofu, bisamba byooso “bi bu ekopola adipono ku mbeketshi, Bushito bwabyo bwi bu lufuufi lwi pa kipimo.” (Yeeshaya 40:15) Ungi mufundi shakuminaa mwi Mupangi baadi mufikye mu kwakula shi: “Kukumina shi kwi Efile Mukulu e kunundu kwa bintu byooso kwete kwitatshisha bwa myanda yoobe ta nkukumbane nya.”
Ku lungi lupese, bangi bantu abamonaa shi bikitshino byabo bibubi ndjo bikwete kukita shi Efile Mukulu tekalakashanga bwabo. Bu kileshesho, Jim ungi muntu e na bipwa 50 amba shi: “Naadi natekye na kisumi kyooso bwashi nekale na butaale na butontshi bwa mbidi, kadi nsungu yande ibaadi ayalukiila. Ku nfudiilo a byooso, nambile shi ne muntu ebubi ngofu na Efile Mukulu te bya kunkwasha.”
Efile Mukulu e kula neetu ngofu mu mushindo wa shi akutwa kwitumona? Mushindo kinyi wakwete kupusha menemene pabitale bipangwa byaye bishi bipwidikye? Su Efile Mukulu tamukite bwashi tumwiwukye, muntu su ngumune ta mulombene kwakula kalolo bw’Efile Mukulu na kwaluula yaya nkonko. Anka, Eyi dy’Efile Mukulu difundibwe ku bukwashi bwa kikudi ki selele bwa bantu—Bible—kwete kwitushinkamiisha shi Efile Mukulu ta muntu e neetu kula na shikwete kwitatshisha bwa bantu. Bible amba shi: “sunga’ye te kula na muntu ooso a kwatudi.” (Bikitshino 17:27) Mu ino miisambo inanka ayilondo, atukyebe kutaluula akitulungula Efile Mukulu pabitale mushindo wakwete kwitatshisha bwa bantu na mushindo wadi mwitatshishe bwa bantu be byodi.
^ par. 3 Misambo 40:17, NWT; Yehowa nyi eshina dy’Efile Mukulu bu byadidi mu Bible.