AKIPELELA BANTU KUKUMINA: Nsaa yabadi babofule ngofu, bangi bantu abamonaa shi kuteka Efile Mukulu bwa kwibasamba na kwibakwasha bwa kupwa myanda yabo takwi na muulo. Ungi mwana mukashi abetamina bu Raquel, amba shi: “Pantala bungi bwa bantu be mu nsenga​—na myanda yabakwete kufumankana nayo, namono shi yande tayi na muulo bwashi ntekye bukwashi kwi Efile Mukulu.”

AKILONGYESHA EYI DY’EFILE MUKULU: Efile Mukulu mmupwe kukwasha bantu na kwibasamba mu mushindo amweka patooka. Muntu ooso e pa nsenga mmupyane mulwisho​—kukutwa kwa kwikala na bukome bwa kutumikila miiya y’Efile Mukulu mu mushindo upwidikye. Kadi, “Efile Mukulu mmwitufule, aye nkutuma Mwan’aye bu mulambu wa kushimisha nawo milwisho yeetu.” (1 Yowano 4:10) Ku bukwashi bwa mulambu wa lufu lwa Yesu, Efile Mukulu akitshi bwashi tupete kufwidibwa kwa lusa bwa milwisho yetu, kondo k’eshimba katooka, na lukulupilo lwa muwa wa looso mu ndumbulwilo mupya a kufukama. * Uno mulambu mbeutushe penda bwa booso, su nyi nkileshesho kya shi Efile Mukulu kwete kwitatshisha boobe?

Twate kileshesho kya Mpoolo mutumibwa. Mulambu wa Yesu ubaadi umukume kwishimba ngofu, afunda shi: “Muwa wandi nawo binobino mu mbidi yande, ne nawo bwa lukumiino lwande mwi Mwan’Efile Mukulu mumfule, aye mwipane bwa mwanda wande.” (Beena-Galate 2:20) Eyendo, Yesu bafwile kumpala kwashi Mpoolo afikye mwina Kidishitu. Kadi, Mpoolo baadi amono mulambu wa Yesu bu kyabuntu kyaye kyabadi bamupe kwi Efile Mukulu.

Mulambu wa lufu lwa Yesu nyi nkyabuntu kyobe kyabadi bakupe kwi Efile Mukulu. Kyakya kyabuntu akilesha shi we na muulo kwi Efile Mukulu. Nkikumbene nkupa “kusambibwa kwa looso na lukulupilo lwa kishima,” na byabya ‘abikunyingisha mu kyooso kyokitshi na mu kyooso kyokula mu myanda ibuwa.’​—2 Beena-Tesalonike 2:16, 17.

Kadi, Yesu batushishe muwa waye bu mulambu takudi bipwa 2 000. Nkinyi akilesha shi Efile Mukulu kwete nkukaka kwadi lelo uno?