AKIPELELA BANTU KUKUMINA: Muyile myanda yabadi balongye ano mafuku, galaksi etu mulombene kwikala na midiyala 100 ya ma planete. Mwanda univere e bukata ngofu, bantu bebungi abeyipusha shi, ‘Mupangi sha bukome booso mulombene kutala myanda ikwete kukita tubantu twi mu ka planete kapela?’

AKILONGYESHA EYI DY’EFILE MUKULU: Efile Mukulu ta mwitupe Bible bisumanga, na tamukutwe kwitatshisha bwetu nya. Anka, Yehowa kwete kwitushinkamisha shi: “Nakakupa elango. Dingi meso ande aakekala podi.”​—Misambo 32:8, EEM.

Tubande kwakula bwa Hagaare, mwana mukashi mwina Ejiipitu baadi na muwa mu siekele a 20 Eb.Y.K. Hagaare baadi mukutwe kanemo kwi nfumwaye, Saraayi. Ndjo Saarayi nkumwisha milongo, na Hagaare bayile mu kabaaka. Bu bibaadi Hagaare mukite kilubilo, Efile Mukulu baadi mukutwe kwitatshisha bwaye su? Bible amba shi: “Mwikeyilu wa Yehowa nkumusangana.” Wawa mwikeyilu ubaadi ukankamikye Hagaare pa kumulungula shi: “Yehowa bapusha kudila koobe.” Hagaare nkulungula Yehowa shi: ‘Obe we Efile Mukulu amonaa.’​—Kibangilo 16:4-13.

Yawa ‘Efile Mukulu amonaa’ kwete nkumona n’oobe namu. Bu kileshesho, Nyina bana sha kifulo etatshishaa ngofu bwa mwan’aye e pa mbidi, mwanda uno mwana mukinga e na lukalo ngofu lwa bukwashi bwa baledi baye. Mu mushindo umune, Efile Mukulu kwete kwitatshisha ngofu bwetu nsaa yatudi babofule na yatudi mu mpombo. Yehowa amba shi: “Ami ne kunundu a byooso na eselele; nashalaa pamune na mufwambushibwe na e mu mpombo, bwa kunyingisha be mu malwa na bapombolokye.”​—Yeeshaya 57:15.

Kadi we kwiyipusha shi: ‘Mushindo kinyi ukwete Yehowa kuntala? Kwete kutala penda mpala yande, sunga shi kwete kutala munda mwande na kupusha kyandi mwikale su?’