1, 2. Mushindo kinyi ukwete Yehowa kwisamba na bafubi baaye?

KUBANGA kala, bantu mbapete bukunkushi bwa Yehowa mu mishindo ilekenelekene. Kwi bangi, Efile Mukulu baadi mwisambe nabo ku bukwashi bwa ba mwikeyilu, ku bimonwa sunga bilotwa, bwa kwibalesha myanda ayikyebe kukitshika mu mafuku e kumpala. Yehowa baadi dingi mwibape midimo kampanda. (Mb. 7:89; Ez. 1:1; Dan. 2:19) Ingi nsaa Efile Mukulu baadi asangula bantu bwa kulesha mpala yaaye na kutuusha bukunkushi bwaye. Sunga mbibaabadi abapete bukunkushi bwa Yehowa mu mishindo ilekenelekene, baaba abaadi abalondo malango aye abaadi abapete mwabi.

² Lelo uno, Yehowa kwete kukunkusha bantu baaye ku bukwashi bwa Bible, na kakongye. (Bik. 9:31; 15:28; 2 Tim. 3:16, 17) Malango aafiki kwadi, tukwete kwiapusha kalolo nka bu’shi, “matwi eetu aapusha eyi adyakula ku mongo kwetu shi: ‘Talayi eshinda, edilamateyi.’” (Yesh. 30:21) Eyendo, Yesu’nyi kwete kwitulungula eyi dya Yehowa p’akunkusha kakongye ka Yehowa ku bukwashi bwa ‘mpika a kishima na mupatulukye.’ (Mat. 24:45) Abitungu twate buno bukunkushi na ano malango na muulo wibungi, mwanda atukapete muwa wa looso su tubeakokyela.​—Eb. 5:9.

3. Nkinyi kikumbene kwitukutshishwa kulonda bukunkushi bwa Yehowa? (Tala kifwatulo ki ku mbangilo kwa mwisambo.)

³ Satana Diabulu e na mpàngo ya kutshimbisha bukome bwa  malango aetupa muwa na aatukila kwi Yehowa. Na dingi, ‘eshimba dyetu dilamalama’ ndilombene kwitutuma bwa kupela kulonda bukunkushi bwa Yehowa. (Yel. 17:9) Byabya, tubande kutala mushindo watudi bakumbene kukambila myanda ikumbene kwitukutshishwa bwa kuteemesha eyi dy’Efile Mukulu. Tutaluule dingi mushindo wi kwisamba kalolo na Yehowa akukyebe kulama kipwano kyetu naye sunga twekala mu nshalelo e naminyi.

4. Mushindo kinyi ukwete Satana kupambusha binangu bya bantu?

⁴ Satana kwete kutompa kupambusha binangu bya bantu pa kupalakasha malongyesha na myanda ya madimi. (Badika 1 Yowano 5:19.) Mikanda, ma Jurnale, bisashi, televizio, na Internet bikwete kupalakasha myanda pa nsenga ishima. Sunga byekala shi bino bintu abilesha ingi myanda ibuwa, misusa ibungi bikwete kutumbisha ngikashi ikutwene na miiya ya Yehowa. (Yel. 2:13) Bu kileshesho, ma Jurnale na ma filme mbilombene kulesha kulala kwa mulume na mulume sunga mukashi na mukashi bu kwibuwa, na bantu bebungi abomono shi akyamba Bible pabitale kulala kwa mulume na mulume sunga mukashi na mukashi nkikile bukopo.​—1 Kod. 6:9, 10.

5. Mmushindo kinyi watudi balombene kupela kukakiibwa ku lupapi lwa myanda ya Satana?

⁵ Mushindo kinyi ukumbene baaba bafule bululame bwa Yehowa kupela kukakiibwa mu luno lupapi lwa myanda ya Satana? Mmushindo kinyi wabadya kwabuula buwa na bubi? Anka ‘pabafubila eyi dy’Efile Mukulu.’ (Mis. 119:9) Eyi dy’Efile Mukulu di na malango ebuwa aetukwasha bwa kwabuula myanda y’eyendo na ya madimi. (Mye. 23:23) Pabaadi atemuna mayi a mu Bifundwe, Yesu bakwile shi: ‘Muntu e na muwa . . . ku kishima kyooso akituuku mukanwa mwa Yehowa.’ (Mat. 4:4) Abitungu tulongye bwa kutumikila miiya ya mu Bible mu nshalelo eetu. Bu kileshesho, bipwa bibungi kumpala kwashi Moyiise afunde miiya ya Yehowa pabitale lukyebanokyebano, nsongalume Yosefe baadi mupushe shi, dino eyikashi dibubi ku meso kw’Efile Mukulu. Na dingi, baadi amono kulala na mukashi a Potifare bu kukutwa kwa kukokyela Yehowa. (Badika Kibangilo 39:7-9.) Sunga mbibaadi mukashi a Potifare amusendeela bwa kulala naye munda mwa kipungo kampanda, Yosefe basangwile bwa kupusha eyi dya Yehowa pamutwe pa kupusha eyi dyaye. Kintu ki na muulo bwa kwabuula kibubi na kibuwa nyi nkuteemesha eyi dya Yehowa na kupela kuteemesha myanda ya Satana.

6, 7. Nkinyi kyatudya kukita bwa kukambila elango dya Satana dishi buwa?

⁶ Nsenga ngiwule na malongyesha a madimi a bipwilo na pa mwanda wa byabya, bantu bebungi abamono shi kukimba bwa kuuka lulangwilo lwa binyibinyi nyi nkukisha kwa nsaa. Kadi, su atukumiina kupusha eyi dya Yehowa, etukwasha bwashi twiukye bya binyibinyi. Abitungu twate kitshibilo kya kuuka yawa atudi bakumbene kuteemesha. Bu byabidi shi, bibukopo bwa kuteemesha mayi abidi mususa umune,  abitungu ‘twiukye eyi dya Yesu’ na tumuteemeshe. Nnaye abadi batuule kwi Yehowa bwa kutala mikooko yaye.​—Badika Yowano 10:3-5.

⁷ Yesu baadi mwakule shi: “Teeyi matwi ku byanupusha.” (Mak. 4:24) Elango dya Yehowa adipushika kalolo na ndilulame, kadi abitungu tutee matwi na kwiditeemesha pa kulumbuula eshimba dyetu bwashi dikuumiine dyadya elango. Su tatwi badimukye, twi balombene kutee matwi ku elango dya Satana dishi buwa pamutwe pa kuteemesha elango dya kifulo dya Yehowa. Tatukumanga kulekyela ngono, ma video, maasha abalesha ku televizio, mikanda, bakuuku, balambukishi, sunga bantu abamweka bu bapatulukye abakunkusha muwa wetu.​—Kol. 2:8.

8. (a) Mushindo kinyi ukumbene eshimba dyetu kwitwikasha bu kinunwa kya bitompwanga bya Satana? (b) Nkinyi kikumbene kwitufwila su tatwibatee matwi ku myanda yabetudimusha?

⁸ Satana awuku shi, tatwi bapwidikye na, akyebe shi tulamate ngofu ku kino kinangu. Nsaa ayitutompo Satana mu uno mushindo, mbilombene kwikala bukopo bwashi tushaale balulame ku meso kwa Yehowa. (Yo. 8:44-47) Mushindo kinyi watudi bakumbene kukambila kino kitompwanga? Banda kutala muntu abanga kwata kyubishi kya kusangeela myanda ya pano na, ku nfudiilo bakitshi mwanda washy’elelanga binangu shi ebya kwiukita. (Lom. 7:15) Nkinyi kimufishe ku uno mwanda wibubi? Kushi mpaka, uno muntu babangile ku kapelakapela kukutwa kuteemesha eyi dya Yehowa. Pakupela kuteemesha myanda ibaadi eshimba dyaye adimudimusha pabitale bibaadi akitshi sunga kupela kwiyibasuka. Bu kileshesho, baadi pangi mulekye kwela nteko, kulungula mukandu wibuwa, sunga kutwela mu bisangilo. Ndyo aye nkupona mu kateo ka malaka aaye na nkukita mwanda ubaadi awuku shi wibubi. Twi balombene kusuuka ano masaku nsaa yatushala batee matwi ku myanda yabetulungula na kwilanga musango umune. Su atuteemesha eyi dyooso dya Yehowa, atukyebe kusuuka kinangu kyooso kya bantu basumbule lukumiino.​—Mye. 11:9.

9. Bwakinyi kushinguula nangunagu ibubi ayo ikyayibanga mwishimba dyetu kwibuwa?

⁹ Kushinguula mukumbo awo ukyaubanga, nkulombene kupaasha muwa wa muntu. Mu mushindo umune, twi balombene kusuuka masaku patushinguula bukidibukidi myanda ilombene kwitutwesha mu kitompwanga. Nsaa yatushinguula nangunangu ibubi mwishimba dyetu, abitungu twiyikatushe mususa umune​—Kumpala kwa shi ‘Satana etukwate byatudya kukitanga muyiile akikyebe eshimba dyê.’ (2 Tim. 2:26, EEM) Nkinyi akitungu shi tukite su tubamono shi binangu na nkalo yetu  abitutakula bwa kwenda kula na myanda ayitutekye Yehowa? Kushi kunyengakana, abitumgu twalukiile kwadi na kwiyisha kooso, tuteemeshe elango dyaye, na kumuteemesha n’eshimba dyooso. (Yesh. 44:22) Abitungu twiukye shi, kwata kitshibilo kibubi nkulombene kwitutwadila twinyongoshi na makyenga ashyaapu mu uno ndumbulwilo a myanda. Mbikile buwa ngofu bwa’twe kupela kupambuka pa kukita myanda bukidibukidi bwashi ano malwa taetufwilanga!

10, 11. (a) Mushindo kinyi wa kushinguula kwitatula? (b) Ndilongyesha kinyi dyatupete pabitale buntomboshi bwa Koree, Datane, na Abirame?

¹⁰ Abitungu twiukye shi, eshimba dyetu ndikumbene kwitupambusha. Kukutwa kwa kupwidika kwi na bukome mu nshalelo eetu! Twate kileshesho kya kwitatula na lwabi. Tubande kutala mushindo ukumbene ino ngikashi kulwisha mushindo watupusha eyi dya Yehowa na kwitutwesha mwishinda dibubi. Muntu sha kwitatula amonaa bu’ye mukile bangi bantu. Mmulombene kumona shi e na matalwa a kukita nka kyakya kyakumiina na kumona shi ungi muntu ta mulombene kumulesha kyakukita. Byabya mmulombene kumona shi, e kunundu kwelango na bukunkushi bwabamupa kwi bangi bena Kidishitu, bakulu, sunga mu ndumbulwilo a Efile Mukulu. Yawa muntu bashiki matwi kwiyi dya Yehowa.

¹¹ Pabaadi bena Isaleele mu kabaaka, Koree, Datane, na Abirame abatombokyele bukunkushi bwa Moyiise na Aarone. Mwanda wa kwitatula kwabo, bano bantomboshi abatshile mpàngo ya kulangwila Yehowa mwabakumiina. Yehowa baadi mukite kinyi? Baadi mwibayipe. (Mb. 26:8-10) Uno mwanda awitupa dilongyesha dikata! Kutombokyela Yehowa akutwala ku masaku. Tatwilwankananga shi “kwitatula akuponeshaa muntu.”​—Mye. 16:18; Yesh. 13:11.

12, 13. (a) Tuusha kileshesho akilesha mushindo ulombene lwabi kufwisha masaku. (b) Pushisha mushindo ulombene lwabi kutama lubilolubilo su tatwibelukatushe.

¹² Lwabi lwi masaku. Muntu sha lwabi akitaa myanda mwakumiina na kutupilwa miiya ya mu mwikeelo wibuwa. Abo abaapu kapasha nsudi yaye, Naamane mukata a kilwilo kya Sirii bapeele mutemuki Elisee byabuntu. Kadi Elisee baadi mupele kwibyata. Anka Gekazi mufubi a Elisee, baadi mwabile bino bintu. Abanga kwakula mwishimba dyaye shi: “Mwishina dy’Efile Mukulu, na mulondo lubilo bwa kwimwata kantu.” Kushi kulungula Elisee, Gekazi balondele Naamane na kumudimba bwashi amupe “kìloò makumi asamombo ya kyamo ky’ebàkanyi na bilamba bibidi bya kushintuula.” Nkinyi kibaadi kikitshikile Gekazi mwanda wa byabya bibaadi mukite na wa kudimbiila mutemuki a Yehowa? Nsudi ya Naamane ibaadi imukwate!​—2 Bf. 5:20-27.

¹³ Lwabi ndulombene kubanga ku kapelakapela, na su muntu tamukimbe bya kwilukatusha, ndulombene kutama bukidibukidi mwadi na kumuponesha. Kileshesho kya Akane ki mu Bible akilesha bukome bwa lwabi. Tala mushindo ubaadi mutamishe lwabi lwaye. Bambile shi: “Naadi mumone mu bipawulwe kikotshi kya shineare kibuwa bushi na bukwabo, siikele nkama ibidi ya kyamo kyebàkanyi na kikano kya oòlò kya bushito bwa siikele makumi ataano; ne mwibilakile, dingi nee mwibyate.” Pamutwe pa kukatusha malaka ebubi, Akane baadi mulakile bino bintu, ebiiba na kwibifya mu kashibo kaye k’epema. Nsaa ibaadi mulwisho wa Akane utuukye patooka, Yooshwa bamulwingwile shi Yehowa akyebe kumumwesha malwa. Akane na kifuko kyaye abaadi bebayipe na mabwe dyadya efuku. (Yos. 7:11, 21, 24, 25) Muntu ooso a kwatudi mmulombene kupeta lwabi. Byabya “twilameeyi ku lwabi.” (Luk. 12:15) Su ingi nsaa tukwete kupeta kinangu kibubi sunga kunangushena kukita myanda ibubi, abitungu tulame binangu byetu ngofu na tatulekanga malaka  ebubi etufisha mu kukita mulwisho.​—Badika Jaake 1:14, 15.

14. Nkinyi akitungu kukita su twi na binangu bya kwitatula na bya lwabi?

¹⁴ Kwitatula na lwabi mbilombene kwitutwadila masaku. Kunangwila pa bipeta bikumbene kutuukila ku eshinda dibudi akukyebe kwitukwasha bwa kupela kutadiila nangunangu ibubi bwashi ishimishe eyi dya Yehowa. (Miy. 32:29) Mu Bible, Efile Mukulu a binyibinyi kwete kwitulungula kibuwa kya kukita na kwitulesha myabi yatudi balombene kupeta su tubakitshi bibuwa mpa na makyenga atudi balombene kupeta su tubakitshi bibubi. Su eshimba dyetu dikwete kwitutakula bwa kutala kintu kibubi mwanda wa kwimona sunga lwabi, bibuwa kunangushena ku masaku akumbene kwitufwila! Abitungu tutaluule kikumbene kwitufwishila kilubilo kyetu, kufwishila bantu batudi bafule, na bikishekishe kipwano kyetu na Yehowa.

15. Nkinyi kyatulongyela ku kileshesho kya Yesu kya kwisamba na Yehowa?

¹⁵ Yehowa akumiina shi twikale na nshalelo ebuwa. (Mis. 1:1-3) Kwete kwitupa malango ebuwa nsaa yatudi nao lukalo. (Badika Beena-Ebreeyi 4:16.) Sunga mbibaadi muntu mupwidikye, Yesu baadi na kyubishi kya kwisamba na Yehowa, na kumuteka na kishima. Yehowa baadi kwete kumukwasha na kumukunkusha mu mushindo ulongame. Batumine ba mikeyilu bwa kumukankamika, bamupeele kikudi kyaye kiseelele bwa kumukwasha, na kumukunkusha bwa kusangula batumibwa 12. Eyi dya Yehowa dibaadi dipushikye mwiyilu bwa kulesha shi baadi mukumiine Yesu. (Mat. 3:17; 17:5; Mak. 1:12, 13; Luk. 6:12, 13; Yo. 12:28) Anka bu Yesu, abitungu twikale atutekye Efile Mukulu na kishima, nteko ayikatukila mwishimba. (Mis. 62:7, 8; Eb. 5:7) Ku bukwashi bwa nteko, twibalombene kwikala atwisamba na Yehowa na kwikala na nshalelo atumbisha eshina dyaaye.

16. Mushindo kinyi awitukwasha Yehowa bwa kupusha eyi dyaye?

¹⁶ Sunga byekala shi, Yehowa kwete kwitupa elango bisumanga, aye takwete kwitutakula bwa kwiditumikila pa bukopo nya. Abitungu tumutekye kikudi kyaye kiseleele, naa’ye akyebe kwitupa kyanka na kalolo kooso. (Badika Luuka 11:10-13.) Anka bi na muulo ukata bwashi, ‘tudimukye muyiile byatuteemesha.’ (Luk. 8:18) Bu kileshesho, su tubatekye Yehowa bwashi etukwashe tulekye eyikashi kampanda dibubi, aku namu atutungunuka na kutala pornografi, nyi mbulamalama. Abitungu twikale mu mbalo na mu nshalelo i kikudi kya Yehowa, bu mu bisangilo bya kakongye. Bafubi ba Yehowa bebungi mbasuukye masaku pa kuteemesha Yehowa mu bisangilo byetu. Pa mwanda wa byabya, mbafikye mu kutundula malaka ebubi mu mashimba aabo na kwiakatusha.​—Mis. 73:12-17; 143:10.

17. Bwakinyi kwikulupila kwi bubi?

¹⁷ Banda kutala kileshesho kya Daavide nfumu a kala a mu Isaleele. Pabaadi kii mukinga, baadi mutshokole Golyate kipambe kya beena Filistina. Kunyima, Daavide baadi mufikye musalayi, nfumu, mulami, na mukunkushi a mwilo. Kadi pabaadi mwikulupile, eshimba dyaye dibamudimbile na aye nkukita mulwisho ukata na Betsabee, akupu nkwipayisha mpa na muluma’ye Uriya. Pabaabadi bamunyokye, Daavide baadi mukumiine kilubilo kyaye na kwiyisha kooso na kwalushuula kipwano kyaye na Yehowa.​—Mis. 51:4, 6, 10, 11.

18. Nkinyi kikumbene kwitukwasha bwa kutungunuka na kuteemesha eyi dya Yehowa?

¹⁸ Tuteemesheyi elango dyatupete mu 1 Beena-Kodinto 10:12 na kuleka kwikulupila. Bu byatushi bakumbene ‘kwiludika,’ byabya twi balombene kufika mu kuteemesha eyi dya Yehowa sunga dya Mwishikwanyi naye. (Yel. 10:23) Tutungunukyeyi na kwela nteko na kishima kyooso, kulonda bukunkushi bwa kikudi kiseleele, na kuteemesha eyi dya Yehowa nsaa yooso.