“Ikalayi anwele binangu byenu ku myanda ya mwiyilu”
“Ikalayi anwele binangu byenu ku myanda ya mwiyilu, kushi ku ya pano pa nsenga.”—KOL. 3:2, EEM.
1, 2. (a) Nkinyi akilesha shi kakongye ka mu Kolose ka mu bipwa lukama bya kumpala kabaadi mu masaku? (b) Malango kinyi abaabadi bape bakwetu ba mu Kolose bwa kwibakwasha bwa kushala banyingye?
BENA Kidishitu ba mu Kakongye ka mu Kolose abaadi mu masaku! Bangi bena kakongye abaadi abatwesha kwiabuula pa kulamata ngofu ku Miiya ya Moyiise. Bangi namu abaadi abakwatshishena ndambukisho ya filozofi ya ba Ascète, bantu abaadi abakyengyesha mbidi yaabo bikishekishe. Bwa kupela shi tala malongyesha a madimi apalakana, Mpoolo mutumiibwa baadi mufunde bwa kunyingisha beena Kolose pa’aye kwibadimusha shi: “Dimukayi, muntu tenukwatanga mu muteo ku mîsambo ya bisumanga aitûku ku binangu bya bantu. Byabya binangu ta mbitûkile kwi Kidishitu, ooo, mbitûkye ku bipikwa bya bantu bya bikudi bya pa nsenga.”—Kol. 2:8, EEM.
2 Su baaba bena Kidishitu bashingwe mwimu abaadya kutuula binangu byabo ku “bikudi bya pano nsenga,” babaadi balombene kutapa mongo ku mpàngo ya kipandilo kya Yehowa. (Kol. 2:20-23) Bwa kwibakwasha bwabadya kulama kipwano kyabo kibuwa n’Efile Mukulu, Mpoolo baadi mwibanyingishe shi: “Ikalyi anwele binangu byenu ku myanda ya mwiyilu, kushi ku ya pano pa nsenga.” (Kol. 3:2, EEM) Oolo, bakwetu bena Kidishitu babaadi balombene kutuula mu binangu byabo lukulupilo lwa kupeta bupyanyi bush’abulwika ‘bwabadi bebalumbulwile mwiyilu.’—Kol. 1:4, 5.
3. (a) Beena Kidishitu bashingwe mwimu, bakwete kutungunuka na kutuula mu binangu lukulupilo kinyi? (b) Nkonko kinyi yatukyebe kutaluula mu uno mwisambo?
3 Lelo, bena Kidishitu bashingwe mwimu abelaa naamu binangu byabo ku Bufumu bw’Efile Mukulu bwa mwiyilu na ku lukulupilo lwabo lwa kwikala “bampyanyi b’Efile Mukulu pamune na Kidishitu.” (Lom. 8:14-17) Kadi, twi kwamba naminyi bwa baaba be na lukulupilo lwa kwikala na muwa pa nsenga? Ano mayi a Mpoolo ngalombene kwibatala mu mushindo kinyi? Mu mushindo kinyi ulombene “ingi mikooko” kutunguka na kwela binangu byabo ku “myanda ya mwiyilu”? (Yo. 10:16) Na dingi, mushindo kinyi ulombene ooso a kwatudi kupeta bukwashi ku bileshesho bya baaba bantu ba kala baasha bulamate bu Abrahame na Moyiise babaadi bafumankane na nkalakasho kadi, batunguka na kutuula binangu byabo ku myanda ya mwiyilu?
AKILESHA KWELA BINANGU BYETU KU MYANDA YA MWIYILU
4. Mushindo kinyi ulombene ingi mikooko kutungunuka na kwela binangu ku myanda ya mwiyilu?
4 Sunga byekala shi ingi mikooko tayi na lukupilo lwa mwiyilu, ikwete kutunguka na kutuula mu binagu myanda ya mwiyilu. Mu mushindo kinyi? P’abo kutuula Yehowa na myanda ya Bufumu pa mbalo ya kumpala mu muwa wabo. (Luk. 10:25-27) Pa mwanda wa byabya, tukwete kutala Kidishitu bu kileshesho kyetu. (1 Mp. 2:21) Nka bu bakwetu ba mu bipwa lukama bya kumpala, tukwete kufumankana na binangu bibubi, malongyesha a filozofi na binangu bya kukimba bintu bibungi bya mu uno ndumbulwilo a Satana. (Badika 2 Beena-Kodinto 10:5.) Bu byatukwete kulonda kileshesho kya Kidishitu, abitungu twikala badimukye bwatudya kwilama ku myanda ilombene kulwisha bwina Kidishitu bwetu.
5. Mushindo kinyi watudi balombene kutaluula binangu byetu pabitale kukimba kwa bintu bya kumbidi?
5 Binagu bya pa nsegna bya kukimba bintu bya ku mbidi, mbitwele mu muwa wetu su? Bintu byatudi bafule nyi bilombeme kwikala mu binangu byetu na mu bikitshino byetu. Yesu bambile shi: “Pe kamono koobe, papa ngi pe eshimba dyobe.” (Mat. 6:21) Bwatudya kuuka kyakya ki mwishimba dyetu, abitungu kwitaluula kalolo atwe banabene nsaa na nsaa. Eyipushe obe nabene shi: ‘Naakishaa nsaa bungi kinyi bwa kwela binangu ku myanda ya makuta?’ Myanda itale busunga sunga kukimba kwikala na nshalelo e buwa, nyi abyataa nsaa ibungi su? Su, n’etatshishaa bwandya kwikala na kipwano kibuwa na Yehowa?’ (Mat. 6:22) Yesu baadi muleshe shi baaba bakwete kutuula pa mbalo ya kumpala kukimba ‘kwibumbila bupeta pa nsega’, bakwete kutuula nshalelo aabo a mu kikudi mu masaku.—Mat. 6:19, 20, 24.
6. Mushindo kinyi watudi balombene kukabila binangu bibubi bya ku mbidi?
6 Mbidi yetu ikutwe kupwidika ayitutumaa mu kukita myanda ibuwa mu eetu mweneno. (Badika Beena-Looma 7:21-25.) Kushi kikudi ky’Efile Mukulu kikwete kwitukwasha mu nshalelo eetu, tubaadya kupona mu “myanda ya mu mufito.” Mu yaya myanda mmulombene kwikala bikitshino bu “budyedye sunga buntomi . . . lukyebanobano sunga miloo ibubi.” (Lom. 13:12, 13) Bwatudya kobesha ngoshi ya “myanda ya pa nsenga”—myanda ayisankishaa mbidi—abitungu tutungunukye na kwela binangu byetu ku myanda ya mwiyilu. Abitungu kwitatshisha. Nyi bwakinyi Mpoolo mutumiibwa akula shi: “Nafwambusha mbidi yande na kwiyitonta.” (1 Kod. 9:27) Kushi mpaka, ta mbibofule bwatudya kushaala atwe banabene banyingye mu lubilo lwa mu kikudi! Tubande kutaluula bileshesho bya bantu babidi ba kala baasha kululama babaadi ‘basangashe Efile Mukulu.’—Eb. 11:6.
ABRAHAME ‘BAADI NA LUKUMIINO MWI YEHOWA’
7, 8. (a) Abrahame na Sara abaadi bafumankane na nkalakasho kinyi? (b) Abrahame baadi mutuule binangu byaye ku mwanda kinyi?
7 Pabaadi Yehowa mulungule Abrahame bwa kukatuka na ba mu nshibo yaaye bwa kwenda mu nsega ya Kanaana, baadi mukumiine n’eshimba dyooso. Pa mwanda wa lukumiino lwa Abrahame na kukookyela kwaye, Yehowa baadi mukite kilombeno naaye na kwakula shi: “Nakwikasha mwilo ukata, dingi nakusampa.” (Kib. 12:2) Byabya kunyima kwa bipwa, Abrahame na mukash’aye Sara abaadi nka bashale kushi kutanda. Yehowa baadi mulube mulayilo ubadi mulee Abrahame su? Na dingi, nshalelo a mu kanaana baadi bukopo. Abrahame na kifuko kyaye abaadi balekye nshibo yaabo na kifuko kyabo mu Ure, kibundji kya bupeta mu Mesopotami. Abaadi batambukye bilometre 1 600 bwa kufika ku Kanaana kubaabadi bashale mu tushibo twa mapema, kukalakashibwa na nsala mpa na kufumankana na bantu bebubi. (Kib. 12:5, 10; 13:18; 14:10-16) Kushi mpaka, tababaadi na binangu bya kwalukiila mu kibundji kibuwa kya Ure nya!—Badika Beena-Ebreeyi 11:8-12, 15.
8 Pamutwe wa kutuula “myanda ya pano pa nsenga” pa mbalo ya kumpala, Abrahame baadi ‘mutuule lukumiino mwi Yehowa.’ (Kib. 15:6) Oolo, baadi mutule binangu byaye ku myanda ya mwiyilu pa’aye kunangwila ku milayilo y’Efile Mukulu. Pa mwanda wa lukumiino lubaadi nalo Abrahame, Efile Mukulu Sha Bukome booso baadi mumutukile na kumulungula shi: “‘Bandjil’eyilu, badika nyenyeene su we mulombene kwiyibadika.’ Akupu, aye nkumulungula’shi: ‘Ngi abikala beekulu boobe.’” (Kib. 15:5) Bibaadi bimunyingishe byabya! Misango yooso ibaadi amono nyenyeene mwiyilu, baadi atentekyesha mulayilo ubaadi umupe Yehowa wa kufwimisha twikulu twaye. Pabaadi palombane nsaa ibaadi yakule Efile Mukulu, Abrahame baadi mupete mwana nka bu bibaadi mumulee.—Kib. 21:1, 2.
9. Mushindo kinyi ulombene kwitukwasha kileshesho kya Abrahame bwa kutungunuka na kwipaana mu mufubo w’Efile Mukulu?
9 Atwe naamu, tukwete kutengyela kulombana kwa milayilo y’Efile Mukulu nka bu bibaadi Abrahame. (2 Mp. 3:13) Su tatukwete kutungunuka na kwela binangu byetu ku myanda ya mwiyilu, twibalombene kumona kulombana kwa yaya milayilo bu kukwete kuyisha, na byabya mbilombene kwitukookyesha mu midimo yetu ya mu kikudi. Bu kileshesho, tobopwile kwisumina ingi miloo bwa kwikala mba-mashinda sunga mu ungi mufubo wa nsaa yooso? Su mbyabya, we mulombene lutumbu. Kadi bwa binobino? Tetenkyesha shi Abrahame baadi mutungunukye na kutuula mu binangu byaye “kibalo ki na mashibo anyingye.” (Eb. 11:10) Baadi ‘mukumiine mwi Efile Mukulu, nyi aye nkubadikwa bu mululame.’—Lom. 4:3.
MOYIISE BAMWENE ‘YAWA SHYAMWEKÂ’
10. Moyiise baadi na nshalelo e naminyi ku busongwalume?
10 Ungi muntu baadi mutungunukye na kutuula binangu byaye ku myanda ya mwiyilu nyi Moyiise. Kubanga ku bunsongwalume bwaye, baadi “mulambukishwe muîle kiûkilo kyooso kya bena Eshipitu.” Takubaadi kulongyeshibwa bi kungi kooso nya. Sunga byekala’shi Ejiipitu nyi baadi kibundji ki na bukome mu aa mafuku, Moyiise baadi mushale ku nshibo ya Faraone. Eyendo, “bi bâdi akitshi na bi bâdi âkula bibamwikêshe bu muntu e na matalwa,” mwanda wa bwabwa bulambukishi bubaadi mupete. (Bik. 7:22, EEM) Banda kupwandikisha bidaadi mulombene kwikala! Sunga mbyabya, Moyiise baadi eele binangu ku myanda i na muulo ukata—kukita akikyeb’eshimba dy’Efile Mukulu.
11, 12. Moyiise baadi mwate malongyesha kinyi na muulo ukata, na mushindo kinyi wa twibiuku?
11 Kumpala pabaadi mwana, eyendo shi Moyiise abaadi bamulongyeshe kwi Yakobo pabitale Efile Mukulu a bena Ebreeyi. Moyiise baadi amono shi kiukilo kya Yehowa nkikile bungi bupeta booso bubaadi mulombene kupeta. Baadi mushimishe kinemo kyaye na byooso bibaadya’kufika bu bibaadi mushale mu nshibo ya Faraone. (Badika Beena-Ebreeyi 11:24-27.) Kushi mpaka, bulambukishi bwa mu kikudi bubapetele na lukumiino lwaye lubaadi mutuule mwi Yehowa bibaadi bimukwashe bwa kutuula binagu byaye ku myanda ya mwiyilu.
12 Moyiise baadi mupete malongyesha e na muulo abaadi mu mafuku aaye, kadi, baadi mufubishe kyukilo kibaadi mupete bwa kwikala muntu mukata mu Ejiipitu, kukiibwa kwi bantu bebungi, sunga kwikala na bupeta su? Nya. Tabaadi mukite byabya, “baapelele kwitanyinwa bu mwana a mwana mukashi a Faraone, basangwile kupombeshwa pamune na mwilo w’Efile Mukulu, pamutwe wa kusepeela kapindji kapeela mu milwisho.” Eyendo, malongyesha a mu kikudi abaadi akwashe Moyiise bwa kuyisha mpàngo ya Yehowa kumpala.
13, 14. (a) Nkinyi kibaadi kikwashe Moyiise bwa kulombasha mudimo ubaadi na kya kumupa Yehowa? (b) Nka bu Moyiise, nkinyi kyatudi balombene kukita?
13 Moyiise baadi akumiina kufubila Yehowa na mwilo Waye. Pabaadi mulombashe bipwa 40, bamwene shi kipindji kibalombana bwa kukwasha mwilo w’Efile Mukulu bwaudya kutuuka mu bupika mu Ejiipitu. (Bik. 7:23-25) Kadi, kumpala kwa’shi Yehowa amupe wawa mudimo, Moyiise baadi na kya kulombasha ingi myanda. Baadi na kya kwikala na ngikashi bu kwiyisha, lwishinko, kalolo na kwikanda. (Mye. 15:33) Moyiise baadi na lukalo na malongyesha abaadi na kya kumulumbuula bwa kukabila nkalakasho na bitompwanga bibaadi abimutengyela. Bipwa 40 bibaadi mukishe bu mu mulami a mikooko, bibaadi na kya kumukwasha bwa kulombasha ino ngikashi.
14 Bibaadi Moyiise mulongye pabaadi mulami a mikooko, bibaadi bimukwashe su? Oolo! Eyi dy’Efile Mukulu adyamba shi Moyiise bafikile, “muntu mwiyishe bikata, bishii muntu su ngumune pa nsenga.” (Mb. 12:3) Baadi muleshe kwiyisha kubaadi kumukwashe bwa kwikala na lwishinko kwi bantu ba mishindo ilekeene na nkalakasho yaabo. (Efi. 18:26) Nka bu Moyiise, abitungu tuleshe ngikashi ya mu kikudi ayikyebe nketukwasha bwa kukila ku “pombo ikata” bwa kutwela mu nsegna ipya ya kululama y’Efile Mukulu. (Bif. 7:14) Tukwete kwipushena na bantu booso, sunga na baaba bakwete kufiita munda nsaa yooso su? Abitungu tulonde elango di mu bishima bya Mpyeele bibaadi mufundile beena Kidishitu naaye shi: “Dingayi bantu booso, fulayi bakwenu.”—1 Mp. 2:17.
IKALAYI ANWELE BINANGU BYENU KU MYANDA YA MWIYILU
15, 16. (a) Bwakinyi bi na muulo bwashi tulame binangu byetu bituule ku myanda ya mu kikudi? (b) Bwakinyi bi na muulo bwashi beena Kidishitu balame mwikelo wibuwa?
15 Twi mu “bipungo bi bukopo.” (2 Tim. 3:1) Byabya, bwatudya kushala bapasukye mu kikudi, abitungu kutungunuka na kwela binangu byetu ku myanda ibuwa. (1 Tes. 5:6-9) Tubande kutaluula mushindo watudi balombene kukita byabya mu myanda isatu ya mu nshalelo eetu.
16 Mwikelo wetu: Mpyele baadi auku kalolo muulo wa kwikala na bikitshino bibuwa. Bakwile shi: “Mwikêlo wenu wikale wibuwa munkatshi mwa bashii bakumîne, byabya . . . abakashingûla bi buwa bwa bikitshino byenu, bakatumbishe Efile Mukulu.” (1 Mp. 2:12) Mbalo yooso yatudi balombene kwikala, ku nshibo, ku kalasa, nsaa yatukwete kwasha, sunga mu bulungudi, abitungu tukite mwetu mooso bwashi mwikelo wetu utumbishe Efile Mukulu. Eyendo, bu byatudi bantu bakutwe kupwidika, atukitaa bilubilo. (Lom. 3:23) Kadi patutungunuka na “kulwa ngoshi ilongame ya lukumiino,” twibalombene kukambila mbidi yetu ikutwe kupwidika.—1 Tim. 6:12.
17. Mushindo kinyi watudi balombene kwikala na binangu bu bya Kidishitu? (Tala kifwatulo ki kumbangilo kwa mwisambo.)
17 Kinangu kyetu: Kwikala na kinangu kibuwa akutambuka pamune na kulama mwikelo wibuwa. Mpoolo mutumibwa bambile shi: “Ikalayi na kinangu bu kino ky’abádi n’akyo kwi Kidishitu Yesu.” (Fid. 2:5) Yesu baadi na kinangu kinyi? Baadi mwiyishe. Kwiyisha kubaadi kumutume bwa kwipana ngofu mu mufubo waye. Kulungula bangi pabitale mukandu wibuwa wa Bufumu bw’Efile Mukulu ndjo mwanda ubaadi mu binangu byaye ngofu. (Mak. 1:38; 13:10) Yesu baadi amono Eyi dy’Efile Mukulu bu di na matalwa ooso. (Yo. 7:16; 8:28) Baadi mwipane mu kulonga kwa Bifundwe biselele mu mushindo ubaadi mulombene kwibitemuna, kwibikalwila na kwibipushiisha. Su twi na kwiyisha na kwikala na kisumi mu mudimo wetu wa bulungudi na kulonga pa bwetu Bible, atukyebe kwikala na binangu bu bya Kidishitu.
Kulunguala mukandu wibuwa wa Bufufmu bw’Efile Mukulu kubaadi pa mbalo ya kumpala mu binagu bya Yesu (Tala paragraafe a 17)
18. Mu mushindo kinyi wi na muulo ukata watudi bakumbene kukwatshishena mudimo wa Yehowa?
18 Kukwatshishena: Yehowa baadi mwate mpango ya’shi: “mwishina dya Yesu booso bakuname—mwiyilu na pa nsenga.” (Fid. 2:9-11) Sunga mbyadi na ntumbo, na kwiyisha kooso Yesu akyebe kukokyela ku akikyebe eshimba dya Nshaye, n’atwe namu abitungu tukokyele. (1 Kod. 15:28) Mushindo kinyi? P’atukwatshishena n’eshimba dyetu dyooso mudimo wabadi betulongyeshe bwa kukita kubanga binobino, wa “kwikasha miilo yooso bu balongi.” (Mat. 28:19) Na dingi atukumiina ‘kukitshina bantu booso myanda ibuwa,’ kukitshina bekungishanyi netu na bakwetu.—Gal. 6:10.
19. Nkinyi kyatudi balombene kwikala na kitshibilo kya kukita?
19 Twi na lutumbu lukata bu bikwete Yehowa kwitutentekyesha bwa kutungunuka na kwela binangu ku myanda ya mwiyilu! Byabya, abitungu ‘tusûkye na mufwaka lwalwa lubilo alwitutungwa kusûka.’ (Eb. 12:1, EEM) Tufubeyi atwe booso ‘n’eshimba dimune bu’twe abafubila Yehowa,’ na Nshetu e mwiyilu akyebe kwitupa efuto bwa kwitatshisha kwetu.—Kol. 3:23, 24.