1. Yehowa apushaa naminyi pabitale mudimo, na, aumutumaa bwa kukita kinyi?

YEHOWA mmufubi apushaa muloo mu byakwete kukita. (Mis. 135:6; Yo. 5:17) Bwa kupa bipangwa byaye bi na binangu mushindo wabidya kupusha disanka mu byabakwete kukita, Yehowa mmwibape mudimo wibuwa wa kukita. Bu kileshesho, baadi mufube na mwana’aye mu kupanga kwa bintu. (Badika Beena-Kolose 1:15, 16.) Bible kwete kwitulungula shi, kumpala kwa’ye kufika pa nsenga, Yesu baadi pepi n’Efile Mukulu bu “mufubi ê sha kalolo.”​—Mye. 8:30, EEM.

2. Nkinyi akilesha shi bipangwa bya mu kikudi abikalaa nsaa yooso na mudimo wi na muulo na wa muloo?

² Kubanga ku mbangilo mpa na kunfudiilo, Bible e na bileshesho abilesha shi Yehowa baadi apa baana baaye ba mu kikudi mudimo wa kukita. Kunyima kwa Adame na Eeve kukita mulwisho na kubingibwa mu Mparadiiso mubaabadi abashala, Efile Mukulu batudile “baa-kerubime dya kutunduka nguba kwa lupango lwa Edene, na mwele wa ndimi ya kaalo bwa kulam’eshinda ku mutshi wa muwa.” (Kib. 3:24) Mukanda wa Bifumbulwe 22:6, (EEM) aulesha dingi shi Yehowa “batumine mwikeilu ê mwanda wa kulêsha bafubi bê byabya abitungu kufika binobino.”

3. Mushindo kinyi ubaadi Yesu mulonde kileshesho kya Nshaye pabaadi pano pa nsenga?

³ Pabaadi pano pa nsenga bu muntu mupwidikye, Yesu baadi musangeele kufuba mudimo ubaabadi bamupe kwi Yehowa bwa kukita. Na mu kulonda kileshesho kya Nshaye, Yesu baadi mupe balongi baaye mudimo wi na muulo ukata. Bwa kwibakwasha bwabadya kulombasha kalolo mudimo ubaabadi na kya kukita, bambile shi: “Mbinyibinyi, nenulungula shi, ooso ankumiina, akitshi naamu myanda yankitshi; akakitshi mpaa na ikile bukata, mwanda nende kwi Yaaya.” (Yo. 14:12) Bwa kulesha shi mmudimo ubaadi na kya kukitshika bukidi, Yesu baadi mupatuule shi: “Pa kukii kaanya, watudi nao ngwa kulombasha mifubo ya yawa bantumine. Bufuku tabudi pepi bisha kumona muntu mwa kufubila.”​—Yo. 9:4, Kilombeeno kipya.

4-6. (a) Bwakinyi twi balombene kwikala na lutumbu bwa bibaadi Nowa na Moyiise balombashe kalolo mudimo wa Yehowa? (b) Midimo yooso ayipaa Efile Mukulu bafubi baaye i mu kwipushena na mwanda kinyi?

⁴ Kumpala kwa Yesu kufika pa nsenga, Yehowa baadi mupe bantu mudimo wa muloo wa kufuba. Sunga shi Adame na Eeve tabaabadi balombashe kalolo mudimo ubaabadi bebape, bantu bebungi babaadi balombashe bibaadi bibatekye Efile Mukulu. (Kib. 1:28) Nowa baadi mupete malango pabitale mushindo wa kukita bwato bwa kupasha myuwa ku Mpeshi a kabutu. Baadi mulombashe kalolo byoso bibaadi Yehowa mumutekye bwa kukita. Twi na muwa lelo mwanda baadi mulombashe kalolo bibaadi bimutekye Yehowa bwa kukita!​—Kib. 6:14-16, 22; 2 Mp. 2:5.

⁵ Moyiise baadi mupete malango alombane bwa kwibaka ntempelo na kulumbuula mudimo wa butshiite-mwakwidi. Baadi mulombashe byoso bibaabadi bamutekye bwa kukita kwi Yehowa. (Efi. 39:32; 40:12-16) Mpaa na bu lelo, tukwete kupeta bukwashi abukatukila mu kulombasha kwaye kwa mudimo ubaabadi bamupe. Mu mushindo kinyi? Mpoolo mutumibwa apatuula shi myanda ibaadi ayakwila Mwiya, ibaadi kifwanyi kya myanda ibuwa ibaadi na kya kufika.”​—Eb. 9:1-5, 9; 10:1.

⁶ Bu bikwete kwenda na kulombana mpàngo ya Yehowa, bafubi baaye bakwete kupeta midimo ilekenelekene. Sunga mbyabya, mudimo wabadi bapwe kukita ukwete kutungunuka na kutumbisha Yehowa na kutwadila bantu basha lukumiino myabi. Bi mumune na bibaadi bikete Yesu, byooso bibaadi mukite kumpala kwa kufika pano pa nsenga na bibaakitshine kunyima pabaadi pano pa nsega. (Yo. 4:34; 17:4) Mu mushindo umune, mudimo wabadi betupe lelo kwi Yehowa ukwete kumutumbisha. (Mat. 5:16; Badika 1 Beena-Kodinto 15:58.) Bwakinyi atwamba byabya?

7, 8. (a) Lesha midimo i beena Kidishitu lelo na kinemo kya kukita? (b) Twi balombene kukita kinyi pabitale bukunkushi bwa Yehowa?

⁷ We mulombene kukaanya po’obe kuuka shi Yehowa atekye bantu bakutwe kupwidika bwabadya kwikala na kinemo kya kufuba naaye pamune. (1 Kod. 3:9) Baaba bakwete kwipaana mu kwibaka kwa Mashibo a bikongeno na a ma filiale bakwete kukwatshishena midimo ya maasa nka bu ibaadi ikite Nowa na Moyiise. Byabya, sunga nsaa yokwete kufuba bwa kulumbuula Nshibo ya Bufumu mbalo yoodi sunga kwibaka kwa biro byetu bikata bu byabakwete kwibaka mu Warwick, mu New York, sangeela kinemo kyobe kya kufuba mu wawa mushindo. (Tala byabidi mu kifwatulo ki kumbangilo.) Nyi mudimo wiselele. Bwa misango ibungi, abatekaa beena Kidishitu bwabadya kwipana mu programe a kwibaka a mu kikudi. Uno ngwikale nyi mudimo autumbisha Yehowa na autwadila bantu myabi. (Bik 13:47-49) Ndumbulwilo a Yehowa kwete kutusha bukunkushi bwibuwa bwa kulombasha uno mudimo. Bino abilesha shi ingi nsaa twi balombene kupeta mudimo upya autungu kulombasha.

⁸ Bafubi ba Yehowa baasha bulamate be na muloo wa kukookyela bukunkushi bwa teokrasi nsaa yooso. (Badika Beena-Ebreeyi 13:7, 17.) Twi balombene kukutwa kupusha kumbangilo bwakinyi  abitungu kulombasha kalolo mudimo wetu mu mushindo kampanda. Kadi, atuukaa kalolo shi su tubafubu mu bu umune na kushintuluka kukwete kutusha Yehowa, atupetaa bipeta bibuwa.

9. Nkileshesho kinyi kibuwa pabitale mufubo kikwete kuleka bakulu ba tukongye?

⁹ Lukalo lukata lwa kulombasha kikyebe ky’eshimba dya Yehowa lukwete kumwenekyela mu mushindo aukunkusha bakulu kakongye. (2 Kod. 1:24; 1 Tes. 5:12, 13) Bakwete kulesha kwipaana kwabo pa kufuba ngofu na kulonda matabula a kushintuluka kooso kulombene kutuuka. Abatumikaa na lwishinko looso na mishindo ipya ya kufuba nayo pabitale mudimo wetu wa kulungula Bufumu bw’Efile Mukulu bupwe kutudiibwa. Sunga shi kumbangilo, bangi balungudi mbalombene kupeta lutato pabitale mushindo wa kulungula mukandu wibuwa ku telefone, ku bukunkula bwa mema sunga mu ma mbalo e bantu bebungi, taakukitaa mafuku e bungi kushi’bo kupeta bipeta bibuwa. Bu kileshesho, ba mbala-mashinda bananka mu Allemagne abaadi baate kitshibilo kya kulungula mu mbalo ya busunga yabashy’abalungulaa misango ibungi. Michael akula shi: “Bu bibaatudi bakite mafuku e bungi kushi kukita uno mushindo wa kufuba, tubaadi babangye kwinyongola ku mashimba. Yehowa bamwene byatubaadi atupusha, betukwashile bwatudya kulungula yawa namashika. Tubaadi na muloo p’atwe kulonda bukunkushi bwatubapetele mu Mudimo wetu wa Bufumu na kukulupila mwi Yehowa bwa kwitukwasha!” We na ingi mishindo ya kulungula mukandu wibuwa yoodi mulombene kusangula bwa kutuusha bu kamonyi mbalo yoodi su?

10. Nkushintuluka kinyi mu ndumbulwilo kukitshikye munda mwa bipwa bishale?

¹⁰ Ingi nsaa kwi kushintuluka kwa myanda akukitshika mu ndumbulwilo. Mu bipwa bibashaala, mbabungye angi ma filiale mbalo imune. Sunga byekala shi kwakwa kushintuluka akutekye bakwetu abafubanga mwanka bwabadya kushintuula ingi myanda, kukwete kumwenaka bipeta bibuwa. (Mul. 7:8) Muloo kinyi bwa baaba bafubi beelambule wa kukita mudimo ukata mu myanda ya bafubi ba Yehowa!

11-13. Nkalakasho kinyi ipete bangi pa mwanda wa kushintuluka kwa myanda akukitshika mu ndumbulwilo?

¹¹ Twi balombene kulonga myanda ibungi kwi baaba bakwetu babadi basangye mu angi ma filiale. Bangi mbafube mu ma Betele a eumbo dyabo munda mwa mafuku e bungi. Abatekyele ungi mulume na mukashi aaye babaadi abafubu mu Betele mu Mexique e na bantu bapeela bwabadya nkafuba mu Betele a Amérique central e na bantu misango 30 kukila yawa abaabadi. Rogelio akula shi: “Kuleka kifuko na bakuuku kubaadi akumupa kinyongwa kwishimba.” Ungi mukwetu abetamina bu Juan abaabadi batekye bwa kukatuka mu Mexique, akula shi: “Bi nka bu kutandikwa dya kabidi; abitungu kukimba bakuuku bapya. Abitekye kwiubidisheena na myanda ipya na mushindo aunangushena bantu.”

¹² Bena Betele ba mu bingi bibudji bya mu Mputu babaabadi batekye bwa kwenda mu filiale a mu Allemagne abaadi bapete nkalakasho. Muntu eese asangalaa kumona myengye mulombene kumona shi bibaadi lutato bwa bakwetu ba mu Suise kuleka myengye i bula ayikalaa pepi nabo. Na bangi bakwetu ba mu Autriche babaadi balekye nshalelo e buwa abaabadi naaye.

¹³ Bwa baaba bakwete kwenda mu bingi bibundji, abitungu kwiubidishena na nshalelo mupya, kufuba na bakwetu balume na bakashi babashyambadile kuuka na kwiubishena na midimo ipya. Abintu dingi kwiubidishena na kakongye kapya na kutuuka mu bulungudi mu teritoire mupya, pangi mpa na mu lungi ludimi. Kushintuula nshalelo mu uno mushindo nkulombene kwikala bukopo. Sunga mbyabya, bena Betele bebungi bakwete kukumiina kwakwa kushintuluka. Bwakinyi abakuminaa kukita byabya?

14, 15. (a) Mushindo kinyi ukwete kulesha bantu bebungi shi bakwete kusangeela kinemo kya kufuba na Yehowa, mbalo yooso yabadi balombene kwikala? (b) Mu mushindo kinyi wabadi bu kileshesho kwatudi atwe booso?

¹⁴ Ungi mukwetu abetamina bu Grethel akula shi: “Naadi mukumiine kwakwa kushintuluka  mwanda kubaadi bu mushindo wandi mulombene kulesha Yehowa shi, kifulo kyandi nakyo bwaye nkikile kula kibundi, nshibo sunga kwikala na kingi kinemo.” Mukwetu Dayska akula shi: “Patentekyesha shi Yehowa nyi antumu, nakuminaa na disanka dyooso.” Ungi mukwetu André na Gabriela babaadi bakumiine uno mwada abakula shi: “Kufuba byabya kubaadi bu ungi mushindo wa kutumikila Yehowa p’atwe kutuula ku lupese nkalo yetu’twe banabene. Tubaadi bamone shi, ‘nsaa ayishintuula ndumbulwilo a Yehowa myanda, abitungu kwiyikookyela na muloo ooso.’”

¹⁵ Pa mwanda wa kusanga angi ma filiale, bangi bena Betele mbebatume bwa kufuba mu mudimo wa bu mbala-mashinda. Bino mbifikile bena Betele bebungi pabaabadi babungye filiale a mu Danemark, a mu Norvège na a mu Suède bwa kukita biro bya filiale umune bya mu Scandinavie. Florian na Anja bangi ba kwabadi abakula shi: “Tatukwete kumona mudimo wetu upya bu lukalakasho nya, kadi tukwete kwiumona bu muloo. Bwetu’twe, nyi mmwanda wa disanka pa’atwe kufubishibwa na Yehowa mu mushindo ooso wa mudimo watudi balombene kufuba. Twi balombene kwakula na kushinkamisha kooso shi, tukwete kupeta myabi ya Yehowa!” Sunga byekala shi bebungi munkatshi mwetu ntambalombene kupetekyelwa na kwakwa kushintuluka, ta twi mbalombene kwambula kileshehso kya baaba bakwetu balume na bakashi beelambule bwa kutuula myanda ya Bufumu pa mbalo ya kumpala su? (Yesh. 6:8) Yehowa elelaa booso bakwete kusangeela kinemo kya kufuba naaye, mbalo yooso yabadi balombene kwikala mwabi.

16. (a) Mukanda wa Beena-Galate 6:4 awitulungula bwa kukita kinyi? (b) Mmudimo kinyi ukile midimo yooso ulombene muntu kukita?

¹⁶ Bu byatudi bantu bakutwe kupwidika, twi balombene kwipwandikisha na bangi. Kadi, Eyi dy’Efile Mukulu dikwete kwitulungula bwatudya kunangwila penda ku byatudi balombene kukita. (Badika Beena-Galate 6:4.) Bebungi ba kwatudi ta be na mashito mu ndumbulwilo nya. Dingi, nta ngooso a kwatudi mulombene kufuba bu mbala-mashinda, bu misionere sunga bu mwina Betele. Eyendo, ino midimo i buwa kukita! Kadi ta twi balombene kuluba shi mudimo wi na muulo  ukata nguno winao ooso a kwatudi. Wa kwikala bafubi pamune na Yehowa mu mudimo wa kulungula mukandu wibuwa. Kino nyi nkinemo kikata kyatudi nakyo!

17. Nkinyi akitungu kutungunuka na kwikala kwanka pakii ndumbulwilo a Satana, kadi, bwakinyi byabya ntambilombene kwitubofusha ku mashimba?

¹⁷ Bu bikyabitungunuka kwikala ndumbulwilo a Satana, tatwikalaa nka na mushindo wa kutumikila Yehowa bu byatukumiina nya. Nkulombene kwikala myanda yatushi balombe kwimika bu mashito a kifuko kyetu, maladi sunga ingi nkalakasho. Kadi, tatwi balombene kubofula kwishimba pa mwanda wa byabya nya. Tokumanga kwata na muulo upela mushindo oodi nao wa kufuba pamune n’Efile Mukulu bwa kuutusha bu kamonyi bw’eshina dyaaye na kuukisha Bufumu bwaye nsaa yooso. Mwanda wi na muulo ukata ngwa shi, okwete kukita kyakya kyodi mulombene kukita bwa Yehowa, na’shi okwete kuteka bwashi Yehowa akwashe bakwetu beena Kidishitu bwabadya kukita bibungi kukila byatudi balombene kukita. Tentekyesha shi, muntu ooso kwete kutumbisha eshina dya Yehowa e na muulo ku meso kwaye!

18. Nkinyi kyatudi balombene kutuula pa mbalo ya kabidi, na bwakinyi?

¹⁸ Sunga twekala bantu babofule na bakutwe kupwidika, Yehowa asangalaa bwatudya kufuba naaye. Mmuloo kinyi watudi balombene kwikala nao bwa kusangeela kinemo kyetu kya kufuba pamune n’Efile Mukulu mu ano mafuku a ku nfudiilo! Byabya, abitungu tubande kutuula kumongo nkalo yetu’twe banabene, bu byatuuku shi mu nsenga ipya, Yehowa aketupa “muwa wa binyibinyi,” watukyebe nkasangeela na muwa wa losoo mu kufukama na mu kwiyikeela.​—1 Tim. 6:18, 19.

19. Yehowa mmulee bwa kwitukitshina kinyi mu mafuku e kumpala?

¹⁹ Banda kwipwandikisha bu’be e pa kibelo kya nsenga ipya, nangushena bu bibaadi Moyiise mulungule beena Isalele kumpala kwa’bo kutwela mu Nsenga Ipya shi: “Yehowa Efile Mukulu oobe akwelela mwabi mu byooso byokitshi.” (Miy. 30:9) Kunyima kwa Armangodone Yehowa akyebe kupa baaba babaadi abafubu naaye na kishima nsenga ibaadi mwibalee. Akupu, atukyebe kutuula binangu byetu ku mudimo upya​—wa kwikasha nsenga mpaladiiso e buwa!