Bible etulungula shi nfudiilo ayileesha kabutu, akula shi: “Akwikala mpombo ikata, byaishyekeele dimo byatshiile ku mbangilo a bya pano nyaa na ku binobino . . . Su aa mafuku tangapeeleshiibwe, muntu su ngumune tabaady’akwikala kwanka na muwa.” (Mateo 24:21, 22) Anka Efile Mukulu etulaa shi bantu bebungi abakapanda, akula shi: “Bya pano abikidi, . . . anka yawa akitshi akikyebe Efile Mukulu akekala na muwa bwa looso.”—1 Yowano 2:17.

Nkinyi akitungu shi okite su okumiina nkapanda ku nfudiilo kwa uno ndumbulwilo na ‘kwikala na muwa bwa looso’? Abitungu obangye kulonga bintu sunga kwilumbuula mu ungi mushindo wa ku mbidi? Nya. Bible etudimusha ngofu bwa kukita myanda i na muulo. Akula’shi: “Peekale byooso byabya na kya kubutuka, abitungu nwikale bantu ba kipaso kinyi? Ikalayi bantu ba mwikeelo wa kalolo na kineemo ky’Efile, anwe batengyele na abakosomosha kufika kw’efuku dya Yehowa.” (2 Mpyeele 3:10-12) Muyile byabileesha, mu bintu “byooso byabya” bi na kya kubutulwa, mwi ba nfumu ba uno ndumbulwilo mulwile na bantu booso abakwatshisheena mafumu aabo pamutwe pa Bufumu bw’Efile Mukulu. Bino abileesha shi, su twalumbuula bintu bya ku mbidi, bino bintu tabiketupaasha ku kabutu nya.

Eyendo, bwa’shi tupande abitungu twikale bepaane kwi Yehowa Efile Mukulu na tulongye bya kwikala na mwikeelo na bikitshiino abimusankisha. (Sofonii 2:3) Pamutwe pa kulonda bantu bebungi bash’abamono bitundwilo abileesha shi twi mu kipungo ki bukopo, abitungu ‘twikale atutengyela kufika kw’Efuku dya Yehowa.’ Batemwe ba Yehowa mbalombeene nkuleesha ku bukwashi bwa Bible kipaso kyodi mulombeene kupanda ku efuku dya nfudiilo.