Efile Mukulu akalekyeela bantu batungunukye na kumuna bakwabo na kulwisha nshalelo aabo mu mafuku e kumpala su? Nya, nka bu bibatukatuka mu kumona, akyebe kubanga na kwimika bipungo bya makyenga na kubingwabingwa. Mupangi a bantu na senga akyebe oukye shi kyakya kipungo takidi peepi. Etukwasha naminyi bwatudya kuuka kyakya kipungo kina muulo?

Tubande kutala kino kileshesho: Su okyebe kwenda mu lwendo na mootoka, we kukimba bwa kuuka mbalo ywende ku Internet, kutala karte ka nsenga, sunga shi bakusolele eshinda. Nsaa yomono bintu bipusheene na bitundwilo byabakupeele, oshinkamisha mwishimba dyoobe shi toodi peepi na kufika. Mu mushindo umune, Efile Mukulu mmwitupe Eyi dyaye, aditupatulwila myanda ikata ya mu nsenga ishima. Nsaa yatumono ino myanda i bu bitundwilo bya mbalo ywende, atushinkamisha kalolo shi twi mu kipungo kya peepi na nfudiilo.

Bible akula shi ndumbulwilo a bantu afiki mu kipungo kilekeene na bingi, mafuku e bukopo aaketutwala ku nfudiilo. Kyakya kipungo ki na kya kukwatshibwa na myanda ibidi ayikakitshika pamune bu myanda ayikwata nsenga ishima na ingi nshalelo ilekeene na bingi bipungo bya bantu. Tubande kutaluula imune ya ku myanda yabadi baleeshe mu Eyi dy’Efile Mukulu.

1. KULWILA KWA MYANDA MU NSENGA ISHIMA Butemuki bwabadi bafunde mu Mateo shapitre 24 abuleesha mulongo wa myanda ya pa nsenga ayilombasha kitundwilo kimune. Kyakya kitundwilo akilesha “nfudiilo a bya pano” na kwitukunkusha ku nsaa ‘ayikafiki nfudiilo.’ (Verse 3, 14) Mu yaaya myanda ayikafiki mwi ngoshi ikata, bipupa bya nsala, kutshinkatshinka kwa nsenga mu kipindji na kikwabo, kufwima kwa bantu basha balondo miiya, bashi na kifulo na kwitatshisha kwa bakata ba bipwilo bwabadya kupambusha bantu. (Verse 6-26) Ino myanda ikwete kukitshika takudi bipwa nkama. Anka, pakwete kwenda na kwifubwila nfudiilo, ayikyebe kumweneka yooso mu kipungo kimune kibukopo. Ayikyebe kukitshika pamune na ino myanda ya kudimusha ayilondo.

2. MWIKEELO WA BANTU Bible akula shi “mafuku a ku nfudiilo”—kipungo kya mafuku aakafisha ku nfudiilo—aakyebe kwikala na kulwishibwa kwa myanda na mwikeelo wi bubi wa bantu. Akula shi: “Bantu abakeekala betale anka’bo banabeene, bapape mashimba bwa bupeta, basha-kwilungula, bapeeshi ba myanda y’Efile Mukulu, batombokyele bebatande, bashi na lutumbu, bapeeshi ba bintu bya kishila, bashi lusa, ba sha mashimba apape, basha twipu, bashi beelame, bafule kupombesheena, balwishi ba myanda i buwa, ba sha kiipuko, ba sha bukyelo, bafwe meeso bwa kwileesha, bafule miloo ya mbidi, bashi bakumiine Efile Mukulu.” (2 Timotee 3:1-4) Eyendo, mwikeelo wi bubi wa bantu nta mwanda upya nya, kadi, nka penda mu “mafuku a ku nfudiilo” dyo amukyebe kupalakana ngofu byabya bikitshino mu mushindo wabakeetamina aa mafuku bu “bipungo bi bukopo.” Twe mumone shi bantu bebungi tabadi na wawa mwikeelo su?

3. NSENGA IKWETE KULWISHIBWA Bible akula shi Efile Mukulu akyebe “kulwisha baaba abalwisha nsenga.” (Bifumbulwe 11:18, Kilombeno kipya) Bantu abalwisha nsenga mu mushindo kinyi? Kipungo kibaadi kipande Nowa mbekileeshe mu mushindo umune shi: “Nsenga ibaadi ilwishikye ku meeso kw’Efile Mukulu; ibaadi yuule na bukitekite. Efile Mukulu nkutala nsenga, aye nkwiyisangana ilwishikye.” Byabya Efile Mukulu baambile bwa bantu babi shi: “Ntandi pa kwibatuuta.” (Kibangilo 6:11-13) Okwete kumona bitundwilo abileesha shi nsenga ikwete kwenda na kuula na bu ntomboshi? Na dingi, bantu babafiki mu kitenta kyabashafikile dingi: Tabadi na mushindo wa kulwisha nsenga pa kushimisha bantu booso be pa nsenga. Be na ma mputu ku maboko. Na bakwete kulwisha nsenga mu ungi mushindo. Bintu abikwasha bwa kupeta kapapi kebuwa pa nsenga—lupapi lwatukwete  kuyooka, nyema na mitshi na mema akata—bikwete kulwishibwa mwanda wa kufuba kwibubi kwa bantu.

Eyipushe shi: ‘Mu bipwa lukama bishaale, bantu abekalanga sunga na mushindo wa kwiyipaa abo banabeene?’ Kadi binobino bantu bakwete kufuba na ino mishindo pa kupwa ma mputu na bintu abilwisha ma mbalo a kushaala. Mushindo ubende teknoloji kumpala ubaapu kukila ngobesha ya bantu ya kwibipusha na kwimika masaku aatukila kwanka. Byabya, mu mafuku aakafiki bantu tabakeekala na matalwa a kukunkusha nsenga nya. Efile Mukulu mmulee’shi kumpala kwa’shi bantu bayipee bintu byooso pa nsenga, akeboo bwa kutuuta baaba booso abalwisha nsenga.

4. MUDIMO WA BULUNGUDI MU NSENGA ISHIMA Kingi kintu kya mu kitundwilo kya nfudiilo abaadi batemukye shi akukakitshika mudimo ukata ushabandile kukitshika dingi: “Uno mukandu wi buwa wa Bufumu aukalungulwa pa nsenga yooso yishaadibwe, bwa kulesha bu-kamonyi kwi maumbo oso na kunyima nfudiilo ayikafiki.” (Mateo 24:14, Kilombeno kipya 2009) Uno mudimo wa kulungula wi na kya kwilekeena na kulambukisha kwa bipwilo bibungi kukitshikye munda mwa bipwa nkama. Mu mafuku a ku nfudiilo, abitungu mukandu umune ulungulwe ngofu, nyi “mukandu wi buwa wa Bufumu.” Oshinguula kisaka kya balangwidi kikwete kulungula uno mukandu? Na bingi bisaka abimweneka bu bikwete kulungula uno mukandu, bikwete kulungula mbalo yabidi su bikwete kupalakasha uno mukandu wi buwa “bwa kuleesha bu kamonyi kwi maumbo ooso”?

Site eetu a Internet a www.pr418.com ashimika dingi kasele pa “uno mukandu wi buwa wa Bufumu.” Uno site a Internet e na mikanda ayipatuula wawa mukandu mu ndimi ikile pa 700. Ouku bangi bantu batuushe site a Internet ashimika kasele pa mukandu wibuwa wa Bufumu mu nsenga ishima su? Mafuku e bungi kumpala kwa’shi Internet ekale kwanka, babaadi abauku Batemwe ba Yehowa bwa kwitatshisha kwabo bwa kupalakasha mukandu wibuwa wa Bufumu bw’Efile Mukulu. Kubanga mu 1939, ku kipusu kya jurnale a Kitenta kya Mulami kubabangile kutuuka mwaku “Akilungula Bufumu bwa Yehowa.” Ungi mukanda awakulaa myanda ya bipwilo ubaadi uleeshe shi mudimo wa bulungudi wa Batemwe ba Yehowa “ukwete kunyiisha kupalakana na bantu abeupete kushi lutato.” Buno bulungudi mbwimeene pa mukandu wibuwa wa’shi “nfudiilo tayidi peepi” na kufika ku bukwashi bwa Bufumu bw’Efile Mukulu.

We mumone bino bitundwilo byooso binanka bya kudimusha bya mu Bible byabadi baleeshe mu uno mwisambo kw’abilombana mu mafuku a muwa oobe su? Munda mwa bipwa bikile pa lukama, uno jurnale kwete kuwukisha bantu  abamubadika myanda ayikitshika mu nsenga bwa kwibakwasha bwa’shi batundule abo banabeene shi nfudiilo tayidi peepi. Byabya, bangi bantu abeele mpaka, na kwakula shi myanda yabadi baleeshe mwanka ngya bantu na ngilombeene kushintuluka. Abaakula shi kasha myanda ya kwisamba yenda kumpala, myanda ya mu nsenga ikwete kwenda nka na kulwila. Kushi mpaka, byabya mbitundwilo abileesha shi twi ku nfudiilo kwa kipungo ki pabwakyo mu mafuku a bantu.

Basha binangu balongye ngofu abamono shi tubeseesela peepi na kushintuluka kukata pano pa nsenga. Bu kileshesho, mu 2014, jurnale a (Bulletin des savants atomistes (angl.) baadi mudimushe beena Conseil de sécurité des Nations unies pabitale myanda ituule myuwa ya bantu mu masaku. Baaba beena siyanse abakwile shi: “Patutala kalolo ino myanda ya masaku abitutakula mu kwakula shi masaku a myanda ya teknoloji akwete kukamina ngofu.” Bantu bebungi bakwete kwenda na kushinkamisha shi twi mu kipungo kikile bukopo kya mu mafuku a bantu. Bafundji ba uno jurnale na bantu bebungi abamubadikaa abashinkamisha kalolo shi kino kipungo ki pa bwakyo nkya mafuku a ku nfudiilo na’shi nfudiilo tayidi peepi. Kadi, pamutwe pa kwikala na moo wa mafuku aafiki, we mulombeene kwikala na muloo pabitale nfudiilo. Bwakinyi? Mwanda we bya kupanda payikafiki!