1, 2. Yesu baadi muleeshe kifulo kikata bwa bantu naminyi?

MWANA mbedi’Efile Mukulu baadi kileshesho kikata na kya kumpala kya kinangu kya Yehowa. Baadi na kinangu ki bu muntu, baadi bu ‘mufubi sha kalolo’ a Efile Mukulu munda mwa mafuku e bungi. Banda kutala muloo ubaadi nao ku lupese lwa Nshaye “pabatûdile eyilu” na “pabatshibile kwadya kutûla bibangilo bya nsenga.” Byabya, sunga bibaadi asangeela byabya bintu byooso bishi na muwa, Mwana mbedi’Efile Mukulu baadi ‘asepeela na bantu booso abaadi panka.’ (Mye. 8:22-31, EEM) Kushi mpaka, Yesu baadi muleeshe kifulo kikata bwa bantu pabaadi mwiyilu.

² Kunyima, baadi muleeshe lulamato na kifulo kwi Nshaye pa kufula bikata bana ba “bantu,” Mwana Mbedi’Efile Mukulu “beeyishiishe” na kwituula mu mulongo umune na bantu. Baadi mukumiine dingi kwipaana bwa “kukuula mwilo wa bantu.” (Fid. 2:5-8; Mat. 20:28) Baadi na kifulo kikata bwa bana ba bantu! Pabaadi Yesu pa nsenga, Efile Mukulu bamupeele bukome bwa kukita bilengyeleshe abileesha shi mmufule bantu. Byabya, bibaadi bikite Yesu abileesha bintu bibuwa byakakitshiina bantu binobino pakakunkusha nsenga yooso.

3. Nkinyi kyatukyebe kutaluula binobino?

 ³ Yesu bafikile dingi pa nsenga bwa “kulungula mukandu wibuwa wa Bufumu bw’Efile Mukulu.” (Luk. 4:43) Baadi auku shi Bufumu bw’Efile Mukulu bubaadi na kya kwikasha eshina dya Nshaye dya kishila na kupwa myanda yooso ibubi ikwate bantu. Anka bu bibaadi alambukisha, baadi mukite bilengyeleshi. Bino bibaadi abileesha by’akakitshina bantu booso. Bwakinyi bina muulo? Mwanda abitupa lukulupilo bwa mafuku aakafiki. Tubande kutaluula binanka bya ku bilengyeleshi bya Yesu.

4. Leesha bibakitshine muntu sha nsudi pa bafumankeene na Yesu.

⁴ Yesu baadi muntu e buwa mu mudimo waye, pa baadi peepi na kupwa mudimo waye mu Galileeya, baadi mufumankane na muntu e na maladi a nsudi mu kingi kibundji. (Mak. 1:39, 40) Binobino Yesu baadi na muntu sha wawa mukumbo wibukopo ku mpala kwaye. Luuka baadi munganga baleesheshe wawa mukumbo wibuko wa yawa muntu bu “kifwi” sunga bu nsudi. (Luk. 5:12) “Pa kumona Yesu beeyeele mpala paashi, aye nkumuteka’shi: ‘Mwanaana, su okumiina, we mulombeene kumpaasha.’” Yawa muntu baadi ashinkamisha shi Yesu e na bukome bwa kumapasha, anka baadi eyipusha shi; Yesu akumiina kwibikita su? Yesu baadya kwaluula ku lukalo lwaye lwa kwishimba naminyi? Yesu beelele binangu kinyi bwa yawa muntu baadi na maladi? Baadya kukita bu Bafadisee baabadi na mweneno e bubi bwa bantu babaadi abakumbu aa maladi? Su noobe, boodya kukita kinyi?

5. Bwakinyi Yesu bambile shi “Nankumiina!” pabapaashishe muntu sha nsudi?

⁵ Abimweneka’shi yawa muntu sha nsudi baadi apusha buufu bwa kwela musase’shi: “Ntshi-mutooshibwe! Ntshi-mutooshibwe!” bu bibaadi abileesha miiya ya Moyiise. Yesu tabaadi mufiite munda nya. Pamutwe pa byabya, baadi mutale muntu namwinyi na lukalo lubaadi nalo. (Lv. 13:43-46) T’atushinguula kalolo bibaadi binangu bya Yesu nya, kadi atuuku kibaadi mwishimba dyaye. Pa mwanda wa lusa, Yesu baadi mukite kilengyeleshi. Baadi moole eyaasa dyaye, aye nkuma yawa muntu sha nsudi, n’eyi adileesha bukome na kalolo, Yesu bambile’shi: “Nakumiina, ikala mupashiibwe.” Nka paapa, “kifwi [nsudi] nkumukatuka.” (Luk. 5:13) Eyendo, bukome bwa Yehowa bubaadi bumwenekye—kushi nka penda bwa’shi Kidishitu akite kyakya kilengyeleshi nya, kadi na bwa’shi Yesu aleeshe byadi mufule bantu.—Luk. 5:17.

6. Nkinyi akitusankisha pabitale bilengyeleshi bya Yesu, na nkinyi kyabileesha?

⁶ Bukome bw’Efile Mukulu bubaakwashishe Yesu Kidishitu bwa kukita bilengyeleshi bilekeene. Baadi mupaashe nsudi, ingi mikumbo ya bipaso byooso na bilema byooso bibaadi na bantu. Bible etulungula’shi: ‘Bibumbu bya bantu bibaadi abikeme pa kumona tumaama tubaadi atwakula, baa-sha-bikopo abafiki bakumbane, abasumpikita abatambuka balulame na ba mpofu babaadi bamone dimo.’ (Mat. 15:31) Bwa kupaasha bano bantu Yesu tabaadi na lukalo lwa muntu a kumupa bipindji bya mbidi na kwibalamika byanka nya. Baadi mupaashe nka byabya bipindji bya mbidi bibaadi bilemane! Na baadi apaasha bantu nka mu kapindji kapeela, ingi misango aye e kubula. (Yo. 4:46-54) Bino bileshesho abileesha kinyi? Abituleesha’shi, bu bitaadi Nfumu mwiyilu, Yesu te nka penda na bukome nya, kadi, e na lukalo lwa kukatusha mikumbo yooso bwa looso. Kulonga mushindo ubaadi Yesu akitshiina bantu myanda akwitushinkamisha’shi mu  ndumbulwilo mupya, buno butemuki bwa mu Bible abukalombana: “Apushiisha mulanda na mubofule lusa.” (Mis. 72:13) Oolo, Yesu akalombasha akikyebe eshimba dyaye bwa kukwasha bantu be mu kinyongwa.

7, 8. Yesu bakitshiine kinyi pabakatukile mu Galileeya bwa kwenda mu Yudeeya?

⁷ Myeshi ipeela kunyima kwaye kupaasha muntu sha nsudi, Yesu bakatukile mu Galileeya enda ku Yuudeya mu kulambukisha na kulungula mukandu wibuwa wa Bufumu bw’Efile Mukulu. Pabafikile mwanka bantu binunu na binunu babaadi abateemesha mukandu wa Yesu babaadi basankile bwa kifulo kibaadi mwibaleeshe. Abimweneka’shi baadi akumiina kulungula mukandu wibuwa kwi balanda, bwa kwibaukisha bulungantu bwa be mu bupika, na bwa kubuka batapikye ku mashimba.—Yesh. 61:1, 2; Luk. 4:18-21.

⁸ Mu mweshi wa Nisane, Yesu bayiile ku Yeelusaleme mu kukita kidibwa kya lukilo bwa kukookyela ku mwiya wa Nshaye. Mu kibundji mubaadi bantu bebungi babafikile mu kukita kino kidiibwa ki pabwakyo. Ku lupese lwa kunundu kwa ntempelo kubaadi kishiba kya meema kibaabadi abetanyina bu Betesata, pabakidile kwanka Yesu bafumankeene na muntu akumbu.

9, 10. (a) Bwakinyi bantu babaadi abende ku kishiba kya Betesata? (b) Nkinyi kibakitshiine Yesu ku dyadya eshiba, na bino abitulongyesha kinyi? (Tala kifwatulo ki kumbangilo.)

⁹ Kisaka kikata kya bantu abakumbu na balemane kibaadi kiibungye ku Betesata. Bwakinyi? Mwanda babaadi abashinguula shi su muntu atwela mu kyakya kishiba nsaa ayifunduula meema, e bya kupanda mu kilengyeleshi. Banda kunangusheena kwilwileena kubaadi kwanka mwanda wa bantu bakile bungi bashimishe lukulupilo, be na kinyongwa, abakumiina kupashibwa. Byabya, bwakinyi Yesu aye muntu mupwidikye shi na kalema baadi mwende kwanka? Pa mwanda wa lusa, Yesu baadi mwisesele peepi na muntu babangile kukumba kala kumpala kwa’shi Yesu atandikwe pa nsenga.—Badika Yowano 5:5-9.

¹⁰ Banda kupwandikisha bibapushishe yawa muntu sha maladi nsaa ibafikile Yesu amwipusha’shi: Okumiina kupanda? Yawa muntu balulwile nka musango umune. Baadi na lukalo lwa kupaashibwa anka tabaadi na mushindo, mwanda tabaadi na muntu a kumukwata bwa kumutwesha mwishiba nya. Nyi Yesu nkumutumina eyi dya kukita kintu kyashi na mushindo wa kukita,—kutulula lusala lwaye na kutambuka. Kwiyi dya Yesu, yawa muntu baatshile lusala lwaye na nkubanga kutambuka. Kino kilengyeleshi ki bu mwesheshe wa myanda ayitukankamika ayiketukitshina Yesu mu nsenga ipya! Na dingi akileesha kifulo kya Yesu bwa bantu. Baadi akimbi baaba be mu lukalo. Kileshesho kya Yesu nkilombeene kwitutakula bwa kutungunuka na kukimba bantu be mu teritware eetu bakalakashwe na myanda ibukopo ikwete kukitshika mu uno ndumbulwilo.

11. Mukanda wa Maako 5:25-34 auleesha’shi Yesu baadi mufule bantu abakumbu naminyi?

¹¹ Badika Maako 5:25-34. Ungi mwana mukashi baadi na mukumbo wibuufu munda mwa bipwa 12. Mukumbo waye ubaadi aumukutshishwa myanda ibungi mu muwa waye, mpa na kulangwila. Sunga mbibaadi “mufwambukye bikata kwi ba minganga bebungi, na kupaana dingi kooso kabaadi nako,” maladi aye abaadi aende na kukaamina. Kadi dingi efuku, yawa mwana mukashi baatshile ingi mpàngo i bya kumupaasha. Bakimbile bya kwiseesela peepi na Yesu. Batwelele mu kisaka  kya bantu akuma ku lwembe lwa kilamba kya Yesu. (Lv. 15:19, 25) Yesu bapushiishe shi bukome bubamutuuku, aye nkwipusha’shi: “Nnanyi bakumu bilamba byande?” Pa mwanda wa “moo na kisuuso” mwana mukashi “nkufika mu kwiyela ku ngwa ya Yesu, nkumulungula byooso patooka.” P’aye kushinguula’shi Nshaye Yehowa apaasha yawa mwana mukashi, Yesu baadi mumukitshiine myanda na kalolo, aye nkumulungula’shi: “Mwana’nde mukashi, lukumiino lwobe lubakupaasha; nda mu butaale, bopanda ku busungu bwobe.”

12. (a) Muyile myanda ibatulongo, Yesu mmuntu e naminyi? (b) Nkileshesho kinyi kitulekyele Yesu?

¹² Yesu baadi na kalolo! Atumono’shi baadi etuulu pa mbalo ya baaba booso abakumbu. Satana akyebe kwituleesha’shi Yesu ta mwitufule na tatwi na muulo. Ku bilengyeleshi byaye, Yesu baadi muleeshe patooka’shi etatshishaa bwetu na bwa myanda ayitukwata. Nyi Nfumu sha lusa na Tshite mwakwidi mukata epanundu ebuwa! (Eb. 4:15) Ta mbibofule bwa’shi tutundule abipusha bantu abakumbu mukumbo wibukopo, bikishekishe su tatwabandile kwiukumba. Twi kumona mu binangu bibaadi Yesu mwituule pa mbalo ya bantu abakumbu aku namu aye t’akumbile efuku su ndimune. Tulondeyi kileshesho kya Yesu pa kukitshina bangi bibuwa muyile ngobesha yeetu.—1 Mp. 3:8.

13. Lusangukilo lwa Lazaare aluleesha kinyi pabitale Yesu?

¹³ Yesu baadi mukalakashwe ngofu bwa makyenga a bangi. Pabamwene bibaadi abididi bangi pa lufu lwa kuuku’aye Lazaare, “bibamutapile kwishimba, enyongola bikata.” Bapushile byabya munda mwa kapindi, anka baadi auku shi abuusha Lazaare mu kapindi kapeela.  (Badika Yowano 11:33-36.) Yesu tabaadi na buufu bwa kuleesha bibaadi apusha nya. Bantu babaadi abatala babamwene lusa lubapushiishe Yesu bwa Lazaare na kifuko kyaye. Yesu baadi muleeshe lusa p’aye kutumika na bukome bw’Efile Mukulu bwa kusangula kuuku’aye Lazaare ku lufu!—Yo. 11:43, 44.

14, 15. (a) Nkinyi akileesha shi Yehowa e na lukalo lwa kushimisha makyenga e mwi bantu? (b) Kishima nyembo akileesha kinyi?

¹⁴ Mu Bible, abaleesha Yesu bu “kifwatulo kya [Mupangi]” nabeene. (Eb. 1:3) Byabya, ku bilengyeleshi bibaadi mukite, Yesu baadi mushinkamishe shi Nshaye e na lukalo lwa kushimisha makyenga na mikumbo i mwi bantu. Lwalwa lukalo alumwenekyela mu myanda ipeela ya nsangukilo i mu Bible. Yesu akula shi: “Akufiki nguba aabapusha eyi dyaye kwi booso balaale mu nyembo . . . abeemutuuku.”—Yo. 5:28, 29.

¹⁵ Yesu baadi mufube na kishima “nyembo” bwa kuleesha bantu booso bafwe babadi balombeene kutentekyesha. Bino mbilombane mwanda be mu binangu by’Efile Mukulu. Efile Mukulu sha bukome booso nyi bapangile bintu byooso na mmukumbeene kutentekyesha bibaadi bantu booso bafwe, mpa na bumuntu bwabo. (Yesh. 40:26) Abileesha shi Yehowa na Mwana’aye ta balombeene penda kutentekyesha nya, kadi, abakumiina kukita byabya. Kusanguka kwa Lazaare na kwa bangi bantu kwi mu Bible akuleesha abikyebe nkakitshika mu nsenga ipya.

16. Beena Kidishitu bebungi abakeekala na kinemo kinyi?

¹⁶ Su tubalama bwina Kidishitu bwetu, atukeekala na kinemo kya nkatuusha bu kamonyi bwa kilengyeleshi kikata kishyabandile kukitshika—kya kupanda ku mpombo ikata. Kunyima kwa ngoshi ya Harmagedone, akukalombana bingi bilengyeleshi, bu kwalusha bantu mbidi ipwidikye. (Yesh. 33:24; 35:5, 6; Bif. 21:4) Banda kumona mu binangu abikasumbula bantu manete aabo, mikombo yabo, mitshi ya kutambuka nayo, ma nkwasa a bisheetshi na byamo abikwasha ba nshikwe bwa kupusha. Nyi bwakinyi Yehowa akyebe kwikasha bantu abakapanda ku Harmangedone na mbidi ipwidikye. Abo naamu abakeekala na mufubo wa kukita. Abakafubu bwa kwaluula nsenga yooso mpaladiiso.​—Mis. 115:16.

17, 18. (a) Bwakinyi Yesu baadi akitshi bilengyeleshi? (b) Abitungu tukite kinyi bwa kutwela mu nsenga ipya?

¹⁷ Mushindo ubaadi Yesu mupaashe bantu aunyingisha “kibumbu kikata” lelo uno, mwanda awibapa lukulupilo lwa kupashiibwa ku myanda yooso i bubi. (Bif. 7:9) Abileesha dingi kifulo kikata kya Mwana mbedi’Efile Mukulu bwa bantu. (Yo. 10:11; 15:12, 13) Lusa lubaadi na Yesu aluleesha abipushaa Yehowa bwa mufubi aaye ooso.​—Yo. 5:19.

¹⁸ Nsenga ishima ikwete kwidila mwanda wa makyenga na lufu. (Lom. 8:22) Twi na lukalo na nsenga ipya, amukekala bantu na mbidi ipwidikye bu byabadi bebilee. Mukanda wa Malakii 4:2, (Biible bifundwe biiselele) awitupa kabingilo bwatudya kukulupila shi bantu abakapashibwa abakyebe kwenda na ‘kwitumba bu twana twa ngombe twabadiisha kalolo.’ Byabya, twikaleeyi na lutumbu na lukumiino lunyingye mwi Efile Mukulu na mu milayilo yaaye bwa’shi bitukwashe bwatudya kulombasha myanda itekibwe bwa kutwela mu nsenga ipya. Kuuka’shi bilengyeleshi bibakitshine Yesu pabaadi pa nsenga bi bu mwesheshe wa myabi ya looso ayikapete bantu mu bufumu bwa Mesiya akwitunyingisha ngofu!