Kya kumpala banda kupusha ano mayi a binyibinyi: Efile Mukulu kwete kumona makyenga ooso e mu nsenga lelo uno, na e na mpàngo ya kwimika ano makyenga. (Misambo 72:13, 14) Mu Bible Eyi dyaye, Efile Mukulu mmulee’shi akapa baaba booso “baabapombesha kiikiisho.” Nguba kinyi? Mu “nguba a kwisokola [sunga kumweka] kwa Nfumu Yesu, payiki mwiyilu na miikeeyilu ya bukome . . . bwa kwiobwela kwi bashyaabawuku Efile Mukulu, naa bashyaabakookyela mukandu wibuwa wa Nfumwetu Yesu.” (2 Beena-Tesalonika 1:7, 8) Kuno kwisokola kwa Yesu akukakitshika mu mafuku aafiki abayitanyina mu Bible bu “ngoshi y’efuku dikata dy’Efile Mukulu Sha bukome booso,” abeyitanyina dingi bu Armagedone.​—Bifumbulwe 16:14, 16.

Mu ngoshi i mu mafuku e kumpala, Efile Mukulu takafubu na bantu nya, akafubu na Mwan’aye, Yesu Kidishitu, na bingi bipangwa bya mu kikudi bi na bukome bwa kulwisha bantu babi. Ano makome a mwiyilu aakyebe kufudiisha makyenga ooso.​—Yeeshaya 11:4; Bifumbulwe 19:11-16.

Mpa nka na lelo uno, mweneno a Efile Mukulu pabitale ngoshi ta mushintulukye nya. Kwete kumona ngoshi bu mushindo umune wa kufudiisha makyenga na bu ntomboshi. Nka bu bibaabidi mu mafuku a kala, nka penda Efile Mukulu aye nabeene ngi e na matalwa a kutshiba Nsaa ya kulwa yaya ngoshi na bantu balombeene kwiyilwa. Nka bu bibatukatuka mu kumona, Efile Mukulu mmupwe kutshiba’shi ngoshi ayikafudiisha buntomboshi na kupaasha bantu abakyengyeshibwa ikii kumpala na’shi abakeyilu kwi  Mwan’aye, Yesu Kidishitu. Bino abileesha’shi ngoshi yabakwete kulwa pa nsenga kano kabidi Efile Mukulu ta mwiyikumine nya, sunga beyilwa bwa kabingilo akamweneka bu kebuwa.

Twate kileshesho: Bana ba muntu umune tutu na mwina ababanga kulwa ngoshi mafuku e nshabo mmutuukye. Babalekyesha kulwa kapindji bwa kwisamba na nshabo ku telefone. Mwina a muntu alungula nshaye’shi tutu’aye banganga kumukupila, tutu’aye namu akula’shi mwina’aye banganga kumoolomona. Booso bwabo abeedidi kwi nshabo, ooso a kwabadi akulupila’shi nshabo akidi ku lupese lwaye. Kunyima kwa kwibateemesha booso, nshabo bebalungula’shi lekayi ngoshi nuntengyele na pa ngaluka bwa’shi ntshibe kilumbu. Bana babatengyela kapindji. Kunyima bababanga dingi kulwa ngoshi. Nsaa ayifiki shabo, takidi ku lupese lwa mwana su ngumune na ebanyooko booso mwanda ta mbamukookyele nya.

Lelo uno, bisamba bya bantu bakwete kwilwisheena ngoshi bakwete kuteka Efile Mukulu bwa kwibakwatshisheena. Anka Efile Mukulu takwatshisheena lupese su ndumune mu ngoshi ya ano mafuku nya. Kadi, mu Bible Eyi dyaye, kwete kwitulungula patooka’shi: “Tanwalwishanga muntu bubi pa bubi,” na “Tanwiobwelanga anwe baanabeene.” (Beena-Looma 12:17, 19) Na dingi, mmulungule bantu booso’shi abitungu ‘kumutengyela na lwishinko’ bwa byakakitshi ku Armagedone. (Misambo 37:7, EEM) Nsaa ayipele bantu kutengyela Efile Mukulu na kwiyiila abo banabeene mu ngoshi, amono yaaya ngoshi bu bantu abekitshiina myanda na kwitatula bwa kukyengesha bangi, nyi bwakinyi tabimusankisha nya. Pa mwanda wa byabya, Efile Mukulu akaleesha nsungu yaaye ku Armagedone bwa kupudisha kwikakeena kwi munkatshi mwa bantu bwa looso p’aye ‘kwimika ngoshi nyaa na kufudiile nsenga.’ (Misambo 46:9; Yeeshaya 34:2) Nyi bwakinyi Armagedone nyi ngoshi ayikemika ngoshi yooso i pa nsenga.

Kufudiisha ngoshi ngumune wa ku myabi ya Bufumu bw’Efile Mukulu. Yesu baadi mwisambile bwabwa Bufumu mu luteko lwaye aluukibwa kalolo’shi: “Bufumu boobe bufikye, kyokyebe kikitshikye pa nsenga, mumune na mwiyilu.” (Mateo 6:10) Bufumu bw’Efile Mukulu t’abukapudisha penda ngoshi yooso nya, abukashimisha nsulo ya ngoshi na buntomboshi. * (Misambo 37:9, 10, 14, 15) Banda kwela binangu kapeela bwa bikwete kukulupila balongi ba Yesu myabi ayikafwisha Bufumu bw’Efile Mukulu.​—2 Mpyeele 3:13.

Abitungu tutengyele Bufumu bw’Efile Mukulu munda mwa mafuku bungi kinyi bwashi bufudiishe makyenga ooso, kikiso na butomboshi? Kulombana kwa matemuki a mu Bible akuleesha’shi twi mu “mafuku a nfudiilo” a uno ndumbulwilo. (2 Timotee 3:1-5) * Bufumu bw’Efile Mukulu abukyebe kufudiisha binobino ano mafuku a nfudiilo na ngoshi ya Armagedone.

Nka bu byatubamono ku mpala, baaba abakabutudiibwa ku ino ngoshi, nka baaba “bashyaa baakookyela mukandu wibuwa wa Nfumwetu Yesu.” (2 Beena-Tesalonike 1:8) Anka tentekyesha’shi Efile Mukulu t’asangalaa kumona lufu lwa muntu e buwa sunga e bubi nya. (Ezekyele 33:11) Bu byabidi’shi Efile Mukulu “takumiina’shi kushimine muntu su ngumune” ku ino ngoshi ya nfudiilo, mmulekyeele mukandu wibuwa pabitale Nfumwetu Yesu bwaudya “kulungulwa pa nsenga yoso yishaadibwe” kumpala kwa nfudiilo kufika. (2 Mpyeele 3:8, 9; Mateo 24:14, Kilombeno kipya 2014, 1 Timotee 2:3, 4) Ku bukwashi bwa uno mudimo wa bulungudi aukitshi Batemwe ba Yehowa mu nsenga ishima, bantu lelo uno be na mushindo wa kuuka Efile Mukulu, wa kukookyela mukandu wibuwa pabitale Yesu na kushaala bakulupile efuku dishadikala dingi ngoshi kwanka.