Efile Mukulu besambile na bantu. Baadi afubu na kikudi kyaye kiselele sunga bukome bwaye bwa kwela binangu byaye mwi banfundji ba Bible. (2 Mpyeele 1:20, 21) Twi kuuka bya binyibinyi pabitale Efile Mukulu p’atwe kubadika Bible.​—Badika Yowano 17:17; 2 Timotee 3:16.

Efile Mukulu eelesha misango ibungi aye nabeene mu Bible. Emuleesha bwakinyi bapangile bantu, kyakebakitshiina na nshaleelo akumiina’shi bekale naaye. (Bikitshino 17:24-27) Yehowa akumiina’shi tuukye bya binyibinyi pabimutale.​—Badika 1 Timotee 2:3, 4.

Yehowa nyi Efile Mukulu a binyibinyi, akupu batumine Mwan’aye Yesu bwa kulongyesha bantu bya binyibinyi. Nyi bwakinyi bantu bafule bya binbyibinyi babaadi bakakiibwe kwi Yesu. (Yowano 18:37) Efile Mukulu akumiina baaba bantu bu balangwidi baaye.​—Badika Yowano 4:23, 24.

Satana Dyabulu mmulubishe bantu bebungi bwa kuuka Efile Mukulu p’aye kupalakasha malongyesha a madimi pabitale Efile Mukulu. (2 Beena-Kodinto 4:3, 4) Bantu bashi bafule myanda ibuwa bakwete kulubishibwa na aa malongyesha a madimi. (Beena-Looma 1:25) Anka, midiyo ya bantu be na mashimba alulame bakwete kupeta bya binyibinyi pabitale Efile Mukulu p’abo kulonga Bible.​—Badika Bikitshino 17:11.