SHALAYI BAPASUKIE!

Buntomboshi mu mianda ya politike—Bible akula kinyi?

TEEMESHA MU

Kukuete kukitshika etombo mu mianda ya politike, bino abinyongosha bantu mu nsenga ishima.

Mu Mexique kuipayibua kua bantu bafikie ku 39 bekele batushe mashina bua’shi bebasangule bu bakunkushi, mpa na etombo dibungi mu mianda ya politike bikele biluishe ngofu kipungo kia ma élection kia mu kipua kia 2023-2024.
Mu mafuku ashale, mu Europe muikele mukitshikie etombo dibungi mu mianda ya politike, mpa na biabekele batompe kuipaa prémier ministre a mu Slovaquie muifuku dia 15/5/2024.
Mu États-Unis bekele bakalakashue ngofu, nsaa yabekele batompe kuipaa Donald Trump baadi bu président muifuku dia 13/7/2024.

Buakinyi kui buntomboshi bui bino mu mianda ya politike? Abukapu su? Bible akula kinyi?

Kuiabulushena mu mianda ya politike babaadi bapue kuikutemuka

Bible baadi mupue kutemuka’shi mu ano mafuku etu, abetamina bu “mafuku a ku nfudiilo,” bantu bebungi abekala na muikelo aufuisha etombo na kukutua kua kuipushena.

“Mu mafuku a ku nfudiilo akukekala bipungo bibukopo. Muanda bantu abakekala . . . bashi na lutumbu, bakutue lulamato, . . . bashi na kikudi kia butaale, . . . ba ntomboshi, . . . basha mapala abidi, basha mutue wi bukopo, baule ndaa na kuitatula.”—2 Timote 3:1-4.

Bible baadi mutemukie dingi’shi mianda bu, bantu abatombokiela mbulamatadi n’etombo mu mianda ya politike ayikala kuanka mu kino kipungo. (Luka 21:9, mayi e kuushi ku’esaki) Anka, buntomboshi mu mianda ya politike, na kuiabulushena t’abikala kuanka bua looso nya.

Nfudiilo a buntomboshi mu mianda ya polike

Bible apatuua’shi Efile Mukulu akakatusha mbulamatadi ya bana ba bantu buadia kutuula mbulamatadi aaye a muiyilu.

“Efile Mukulu e muiyilu akatûlu bungi bufumu . . . abukafingakasha na kufudiisha [angi] mafumu oso abebubadidiile, anka penda abo nyi abukekadidîla ikalaika.”—Ndanyele 2:44, EEM.

Bufumu bu’Efile Mukulu abukabungu bantu na kuikasha nsenga ishima mu butaale.

Yesu Nkidishitu Nfumu a buno bufumu, abamuitamina bu “Nfumu a butaale,” na akakitshi bia’shi kuikale “butaale bushii mpwilo.”—Yeeshaya 9:6, 7.
Sunga binobino, bantu abakunkushibua na buno Bufumu bakuete kulonga mushindo wa kuikala mu butaale. Pa muanda wa biabia Bible amba’shi: “Abakasooso myeele yaabo ya ngoshi bua kupwa nkasu, dingi na milùmbù yabo bakite myeele. Takwi kisamba dimo akitombwela kimo kisamba mwele, taabayiyi dimo bya kulwa ngoshi.”—Yeeshaya 2:3, 4.

Bua kulonga bibungi, tala muisambo awamba’shi: “Que fera le royaume de Dieu?” na otale video amba’shi: Bufumu bu’Efile Mukulu nkinyi?