1. Nduteko kinyi lwende nkumo lwatukyebe kwakwila binobino?

MIDIYO ya bantu ayiuku luno luteko lwende nkumo lwabetanyina bu Yay’etu e mwiyilu. Yesu bakitshine luno luteko bwa kulongyesha balongi baye byabadya kuteka. Mmyanda kinyi ibaadi mutemune mu luno luteko? Na bwakinyi luno luteko lwi na muulo kwatudi lelo uno?

2. Yesu mmwitulongyeshe myanda kinyi isatu i na muulo yatudya kuteka?

² Yesu bakwile’shi: “Byabya tekaayi bino: ‘Yay’etu ee mwiyilu, eshina dyoobe dyende ntumbo. Bufumu bwobe bufikye. Kyookyebe kikitshikye pa nsenga, mumune na mwiyilu.’” (Badika Mateo 6:9-13.) Bwakinyi Yesu baadi mwitulongyeshe bwa kuteka ino myanda isatu?—Tala Kikumbashilo 20.

3. Nkinyi kyatukalongo pabitale Bufumu bw’Efile Mukulu?

³ Tupwile kulonga’shi eshina dy’Efile Mukulu mbu Yehowa. Na twi bakule dingi pabitale kikyebe ky’eshimba dy’Efile Mukulu bwa bantu na bwa nsenga. Kadi, Yesu baadi akyebe kwamba kinyi pabakwile’shi: “Bufumu bwobe bufikye?” Atukalongo akipushisha Bufumu bw’Efile Mukulu, kyabukakitshi, na mushindo wabukekasha eshina dy’Efile Mukulu bu di selele.

4. Bufumu bw’Efile Mukulu nkinyi, na Nfumu abo nnanyi?

⁴ Yehowa mmutuule mbulamatadi a mwiyilu na asangula Yesu bwa kwikala bu Nfumu. Bible ayitanyina uno mbulamatadi bu Bufumu bw’Efile Mukulu. Yesu  nyi “Mfumu a booso bamunane, Mfumu a booso babikale.” (1 Timote 6:15, Kilombeeno kipya 2014) Yesu e na bukome bwa kukita myanda ibuwa ngofu kukila booso bakwete kumunana, na e na bukome bwibungi kukila bana ba bantu booso babikale.

5. Bufumu bw’Efile Mukulu abubangila kumunana kwikunyi? Akupu bufikye kunyi?

⁵ Mafuku makumi ananka kunyima kwa kusanguka, Yesu bayiile mwiyilu. Kushi mpaka, Yehowa bamutudile bu Nfumu a buno Bufumu. (Bikitshino 2:33) Bufumu bw’Efile Mukulu abukamunana kubanga mwiyilu na pa nsenga. (Kibafumbwilwe 11:15) Nyi bwakinyi, Bible etanyina Bufumu bw’Efile Mukulu bu “Bufumu bwa mwiyilu.”​—2 Timote 4:18, Kilombeeno kya 2014.

6, 7. Nkinyi kikashe Yesu bu Nfumu mukile ba nfumu ba bana ba bantu?

⁶ Bible amba’shi Yesu mmukile ba nfumu booso ba bana ba bantu mwanda “aye buupenka ngi shii kufwa.” (1 Timote 6:16) Banfumu booso ba bana ba bantu bakwete kufwa, anka Yesu te kufwa nya. Biya byooso abitukitshina Yesu abishaala kwanka ikalaika.

⁷ Butemuki bwa mu Bible abwamba’shi Yesu akekala Nfumu sha kululama na sha lusa: “Kikudi kya Yehowa akiikala mwadi: kikudi kya binangu naa kya kapatupatu, kikudi ky’elango naa kya bukome, kikudi kya kuuka na kya kutshiina Yehowa. Kutshiina kwa Yehowa akwikala mwadi. Taatshibi kiimu muyiile kwaye kumona, Taakula muyiile akipusha matwi aaye. Ayimusha bee mu malwa na bululame.” (Yeeshaya 11:2-4) T’okumiina namu kwikala na Nfumu e byabya su?

8. Nkinyi akilesha’shi Yesu t’akamunana bupenka?

⁸ Efile Mukulu mmusangule bangi bantu bwa kumunana na Yesu mu mbulamatadi a mwiyilu. Kileshesho, mutumibwa Mpoolo balungwile Timotee’shi: “Su twamona  mpombo naaye, atukabikala pamune naaye.” (2 Timote 2:12) Mbantu bungi kinyi abakamunana na Yesu?

9. Mbantu bungi kinyi abakamunana na Yesu? Nsaa kinyi ibaabangile Efile Mukulu kwibasangula?

⁹ Nka bu byatudi balongye mu Shapitre a 7, Abaadi baleshe mutumibwa Yowano kimonwa, aye nkumona Yesu mmushaale bu Nfumu mwiyilu na bangi ba nfumu 144 000. Bantu 144 000 mbananyi? Yowano apatuula’shi, ‘be n’eshina dyaye [Yesu] n’eshina dya Nshaye, difunde pa mapala aabo.’ Akupu akumbasha’shi: “Baabano nyi baaba abalondo Mwana a mukooko [alesha, Yesu] kooso kwende. Baabano babawudilwe munkatshi mwa bantu.” (Badika Kibafumbwilwe 14:1, 4, Kilombeeno kipya 2014.) Bantu 144 000 nyi mbeena Kidishitu basha lulamato babadi basangule kwi Efile Mukulu bwa ‘kumunana pa nsenga’ na Yesu. Nsaa ayifu umune a kwabadi, abamubuusha bwa kwenda mwiyilu. (Kibafumbwilwe 5:10, Kilombeeno kipya 2014) Kubanga mu siekele a kumpala, Yehowa babangile kusangula beena Kidishitu basha lulamato bwa kulombasha kasaka ka ba nfumu 144 000.

10. Bwakinyi kusangula Yesu na bantu 144 000 bwashi betukunkushe mmwanda aulesha kifulo kya Yehowa?

¹⁰ P’aye kusangula bantu bwa kumunana na Yesu, Yehowa mmuleshe’shi mwitufule. Yesu akekala mukunkushi ebuwa mwanda etupushishaa. Auku kubofula kwetu na byatukwete kukyenga. Mpoolo baadi muleshe abipushaa Yesu pa mwanda wetu, amba’shi mmulombeene “kufwambuka netu mu kubofula kwetu.” Na’shi “mmutompwe mu myanda yooso pamune netu.” (Beena-Ebelu 4:15; 5:8) Bano bantu 144 000 namu abauku kubofula kwetu. Mbakyengyeshibwe pa mwanda wa kukutwa kupwidika na mikumbo. Byabya twi balombeene kushinkamisha’shi Yesu na bantu 144 000 abaketupushiisha na kwitukwasha ku nkalakashi yetu.

11. Bwakinyi Yesu balongyeshe balondji baye bwa kuteka’shi kikyebe ky’eshimba dy’Efile Mukulu kikitshikye mwiyilu?

¹¹ Yesu balongyeshe balondji baye bwa kuteka’shi kikyebe ky’eshimba dy’Efile Mukulu kikitshikye mwiyilu. Bwakinyi? Atwikalanga balongye mu Shapitre 3 shi Satana Diabulu baadi mutombokyele Yehowa. Kunyima, Yehowa nkutadiila Satana na ba miikeyilu abayitanyinwa bu ba demo bwa kushaala mwiyilu bwa kapindi kapeela. Ngi bwakinyi, ta mbooso be mwiyilu baabadi abakitshi kikyebe ky’eshimba dy’Efile Mukulu nya. Mu Shapitre 10, atukalongo bibungi pabitale Satana na ba demo.

12. Mmyanda kinyi ibidi ikata yabadi bapatuule mu Kibafumbwilwe12:10?

¹² Bible alesha’shi kunyima kwabo kutuula Yesu bu Nfumu a Bufumu bw’Efile Mukulu, baadi mulwe ngoshi na Satana. (Badika Kibafumbwilwe 12:7-10.) Verse 10 apatuula myanda ibidi ikata; Bufumu bw’Efile Mukulu bubabanga kumunana na Yesu bu Nfumu aabo, na abasumbula Satana pa nsenga. Nka bu byatukebimona, ino myanda tayibapwile kukitshika.

13. Nkinyi kibaadi kikitshikye mwiyilu nsaa ibaabasumbwile Satana pa nsenga?

¹³ Bible alesha disanka dibaadi na ba miikeyilu basha lulamato kunyima kwabo kusumbula Satana na ba demo baye pa nsenga. Bible amba’shi: “Sepeelayi, anwe eyilu na anwe be na kishalelo kyeenu mwanka!” (Kibafumbwilwe 12:12) Binobino mwiyilu mwi kufukama na buumune mwanda muntu ooso kwete kukita kikyebe ky’eshimba dy’Efile Mukulu.

14. Nkinyi kikwete kumweneka mwanda mbasumbule Satana pa nsenga?

 ¹⁴ Nshalelo mmwilekeene bikata pa nsenga. Myanda ibukopo ikwete kufwila bantu “Mwanda Kafilefile [Diabulu] bafiki,” na “mukwatshikye nsungu, mushinguule’shi kubaamushadila mafuku apeela.” (Kibafumbwilwe 12:12) Satana e na nsungu ibungi mwanda mbamusumbule pa nsenga na auku’shi abamubutula binobino. Kwete kukita mwaye mooso bwa kufwisha mpombo, kwidila, na makyenga pa nsenga yooso.

15. Nkinyi akikyeb’Efile Mukulu pabitale nsenga?

¹⁵ Kikyebe ky’eshimba dy’Efile Mukulu pabitale nsenga ta nkyalulukye nya. Akyebe’shi bantu bapwidikye bashaale ikalaika mu mpaladiisu pa nsenga. (Misambo 37:29) Mushindo kinyi aukebikitshi Bufumu bw’Efile Mukulu?

16, 17. Butemuki bwi mu Ndanyele 2:44 abwitulungula kinyi pabitale Bufumu bw’Efile Mukulu?

¹⁶ Butemuki bwi mu mukanda wa Ndanyele 2:44, (EEM) abwamba’shi: ‘Mu mafuku a baaba ba nfumu, Efile e mwiyilu akatuulu bungi Bufumu, busha abukalwishîbwa. Bwabwa Bufumu t’abukapono mu masa a ungi mwilo, ooo. Abukafingakasha na kufudîsha mafumu oso [a bantu]. Anka pend’abo nyi abukekadidîla losoo.’ Buno butemuki abwitulongyesha kinyi pabitale Bufumu bw’Efile Mukulu?

¹⁷ Kya kumpala, abwitulongyesha’shi Bufumu bw’Efile Mukulu abubanga kumunana mu ‘mafuku a baaba ba nfumu.’ Bino abilesha’shi Bufumu bw’Efile Mukulu, abubanga kumunana nsaa i ingi mbulamatadi ikwete kumunana pa nsenga. Kya kabidi, abwitulungula’shi Bufumu bw’Efile Mukulu abushaala ikakaika na t’abakebukatusha kwi ungi mbulamatadi nya. Na kya kasatu, akwikala ngoshi pankatshi pa Bufumu bw’Efile Mukulu na mbulamatadi ya pa nsenga. Bufumu bw’Efile Mukulu abukatshokola na nka penda abo ngi abukamunana  pa nsenga yooso. Byabya, bantu abakekala na mbulamatadi ebuwa bukile abashamwene kashaa!

18. Ngoshi ya nfudiilo pankatshi pa Bufumu bw’Efile Mukulu na mbulamatadi ya bantu abeyitanyina naminyi?

¹⁸ Nkinyi akikakitshika kumpala kwashi Bufumu bw’Efile Mukulu bukatushe mbulamatadi ya pa nsenga? Kumpala kwashi ngoshi ya nfudiilo yabeyitanyina bu Armagedone ibangye, ba demo abakalubisha ‘banfumu ba pa senga yishadiibwe yoso yishima, bwa kwibakoonga pa mwanda wa ngoshi ya dino efuku dikata di’Efile Mukulu Sha bukome booso.’ Oolo, mbulamatadi ya bantu ayikalwa ngoshi na Bufumu bw’Efile Mukulu.​—Kibafumbwilwe 16:14, 16, Kilombeeno kipya 2014. Tala Kikumbashilo 10.

19, 20. Bwakinyi twi na lukalo lwa’shi Bufumu bw’Efile bumunane pa nsenga?

¹⁹ Bwakinyi twi na lukalo na Bufumu bw’Efile Mukulu? Kwi tubingilo tusatu. Ka kumpala, twi basha milwisho, byabya tukwete kukumba na kufwa. Anka Bible amba’shi mu Bufumu bw’Efile Mukulu atukashaala bwa ikalaika. Na dingi, Mukanda wa Yowano 3:16 awamba’shi: “Efile Mukulu mmufule ba pano bikile, mu kipaso kyadi mupaane Mwan’aye eeleka, bwa’shi muntu oso amukumiina tashiminanga, anka ayikale na muuwa wa ikalaika.”

²⁰ Ka kabidi; twi na lukalo na Bufumu bw’Efile Mukulu mwanda twi befunyishwe na bantu babi. Bebungi bakwete kudimba, kwiba na be na mwikelo wibubi. Tatwi na kya kukita bwa kukatusha ino myanda nya, anka Efile Mukulu. Bantu abatungunuka na kukita myanda ibubi abakabutulwa ku Armagedone. (Badika Misambo 37:10.) Ka kasatu, twi na lukalo na Bufumu bw’Efile Mukulu mwanda mbulamatadi ya bantu ta yina bukome kadi, i na kifita na kutshiba kwa milomo. Tayikwete  kukwasha bantu bwa kukookyela Efile Mukulu nya. Bible amba’shi ‘bantu mbatonte ben’abó na kwibamwesha malwa.’​—Mulungudi 8:9, EEM.

21. Bufumu abukakitshi kikyebe ky’eshimba dy’Efile Mukulu pa nsenga naminyi?

²¹ Kunyima kwa ngoshi ya Armagedone, Bufumu bw’Efile Mukulu abukakitshi kikyebe ky’eshimba dyaye pa nsenga. Kileshesho, abukakatusha Satana na ba demo baye. (Kibafumbwilwe 20:1-3) Eyendo, muntu su ngumune takakumbu sunga kufwa nya. Mwanda wa nkuulo, bantu booso basha lulamato abakashaala ikalaika mu mpaladiisu pa nsenga. (Kibafumbwilwe 22:1-3) Bufumu bw’Efile Mukulu abukekasha eshina dyaye selele. Bino abipatuula kinyi? Abipatuula’shi nsaa ayibanga mbulamatadi a Efile Mukulu kumunana pa nsenga, bantu booso abakatumbisha eshina dyaye.​—Tala Kikumbashilo 21.

22. Mmushindo kinyi w’atuuku shi Yesu tabaadi mufikye bu Nfumu pabaadi pa nsenga sunga mususa umune aye kyasanguka?

²² Yesu balongyeshe balongi baye bwa kuteka’shi: “Bufumu bwobe bufikye.” Kushi mpaka, uno mbulamatadi a Efile Mukulu baadi na kya kufika mu mafuku aafiki. Kumpala, Yehowa baadi mulombeene kutuula mbulamatadi aye na kwikasha Yesu bu Nfumu. Yesu bekeele bu Nfumu  nkaye kyalukiila mwiyilu su? Nya, baadi na kya kwindila. Mafuku apeela kunyima kwa kusanguka kwaye, Mpyeele na Mpoolo abaadi bapushishe kalolo shi, butemuki bwi mu Misambo 110:1, (EEM) mbutale Yesu. Mu buno butemuki, Yehowa amba’shi: “Shâla ku mboko yande ibalume, ami nakatûlu beshikwanyi n’obé mûshi mwa ngwa yoobe.” (Bikitshino 2:32-35; Beena-Ebelu 10:12, 13) Yesu baadi mulombeene kwindila mpa na nsaa kinyi bwashi Yehowa amutuule bu Nfumu?

23. (a) Nsaa kinyi ibabangile Yesu kumunana bu Nfumu a mbulamatadi a Efile Mukulu? (b) Nkinyi kyatukamono mu shapitre alondoe?

²³ Bipwa bibungi kumpala kwa 1914, kasaka ka beena Kidishitu ba binyibinyi kabaadi kashinguule’shi kino akiikala kipwa kikata mu butemuki bwa mu Bible. Myanda ikitshikye kubanga mu 1914 ngishinkamishe’shi ta mbadimbe nya. Yesu babangile kumunana bu Nfumu mu kyakya kipwa. (Misambo 110:2) Mafuku apeela kunyima, abasumbwile Satana pa nsenga na binobino “kubamushadila mafuku apeela.” (Kibafumbwilwe 12:12) Mu shapitre alondo, atukamono bitundwilo abilesha’shi twi mu aa mafuku. Atukamono’nyi shi, kubashaala mafuku apeela bwashi Bufumu bw’Efile Mukulu bukite kikyebe ky’eshimba dyaye pa nsenga.​—Tala Kikumbashilo 22.