KIPINDJI 4
Kwitopeka—“Ontooshe ku milwisho yande”
“Mudimo wande upya ngulumbuule nshalelo eetu a mu kifuko, kadi ubaadi ukanfishe ku myanda yooso ishii buwa bwa mwina Kidishitu. Ami nkubanga kutwelelakana mu ma fete ashii a beena Kidishitu, kutwelakana mu myanda ya politike, mpa na kutwela mu kingi kipwilo. Sunga mbinaadi Temwe a Yehowa, naadi mukutwe kufuba munda mwa bipwa 40. Muyiile bungi bwa mafuku abakidile, nyi bungi bwa mafuku bwandji mwende kula na lusa lwa Yehowa. Ami nkupusha shi ntshi mulombeene kwifwila ami nabeene lusa. Kunyima kwa byooso, ami nkushinguula bya binyibinyi kumpala kwa kupona mwishinda di bubi.”—Martha.
KWITOPEKA nkulombeene kwikala bu kiita ki bushito. Nfumu Daavide bafundjile shi: “Milwisho ibankidi mutwe, ibannêmêna’nka bu kîta kinkile bushito.” (Misambo 38:5, EEM) Bangi beena Kidishitu abaadi bakalakashwe ngofu na twinyongoshi, abaadi abamono shi Yehowa ta mulombeene kwibafwila lusa. (2 Beena-Kodinto 2:7) Yaaya nangunangu ngya binyibinyi su? Sunga byekala shi tobokitshine milwisho ikata, we kwenda kula na Yehowa mu kipaso kya shii mulombeene nkufwila lusa? Ta mbyabya nya!
“Fikayi tulumbuule myanda”
Yehowa te bya kusumbusheena bakitshi ba milwisho abelanga nya. Bwa kwakula kalolo, ebayitanyina kwadi! Mu lukindji lwa mwana mushimine, Yesu apwandjikisha Yehowa na nshe-bana sha kifulo e na mwana bapele kushaala mu kifuko kyabo na bende mu kukita abimutumu eshimba dyaye. Kunyima, yawa mwana baata kitshibilo kya kwalukiila kwabo ku nshibo. “Pa baadi [mwana] kii ku bula, nshaye bamumwene, aye nkumupusha lusa; baayiile lubilo mu kumukukila aye nkumukama kiipa.” (Luuka 15:11-20) Okumiina kwifubwila peepi na Yehowa kadi okwete kwipusha bu “kii ku bula” naye su? Anka bi nshe-bana e mu kileshesho kya Yesu, Yehowa akupusha lusa lukata. E na lukalo lukata lwa nkukuukila.
Kadi we kukita kinyi su omono shi milwisho yoobe ngikile bukata sunga bungi bi byashi Yehowa akutwa nkufwila lusa? Banda kutaluula lwitamino lwa Yehowa lwi mu Yeeshaya 1:18, (NWT) Yehowa amba shi: “Fikayi tulumbuule myanda sunga milwisho yenu yekala imongye pididii bu nkula, ayikatooko’nka soo bu butongo.” Oolo, sunga milwisho ayimweka bu ishii ilombeene kukatuka nka bu nkula mulamate ku kilamba kitooka, ta ngilombeene kukambila Yehowa bwa kwiyishimisha nya.
Yehowa t’akumina shi otungunukye na kukyenga na kondo k’eshimba akakutopeka nya. Byabya, mbikunyi bilombeene lusa lw’Efile Mukulu na kondo k’eshimba katookye nkupa kufukama? Tala matabula abakitshine Nfumu Daavide. Dya kumpala, bambile shi: “Naakasokwela Yehowa kutupakana kwande.” (Misambo 32:5) Tentekyesha shi, Yehowa mmupwe nkwitanyina bwashi wefubwile kwadi mu luteko “nulumbuule” naye myanda. Kumiina lwalwa lwitanyino. Sokwela Yehowa milwisho yoobe na omulungule byopusha mwishimba dyobe. Kukidila ku myanda ibaadi mumone, Daavide batekyele Yehowa na lukumiino looso shi: “Ntumpe ku kilema kyande. . . . Toosumbusheenaa eshimba diinyongole na disaasukye.”—Misambo 51:2, 17.
Etabula dyakabidi, Daavide bapetele bukwashi bw’Efile Mukulu kukidila kwi mutemuki Natane baadi mufubi a Yehowa. (2 Samwele 12:13) Lelo uno, Yehowa mmutuule bakulu mu tukongye, na ebalongyesha bwabadya kukwasha bantu abelanga ku milwisho yaabo bwashi baalushe kipwano naye. Nsaa ywefubwila kwi bakulu, abakyebe kutumika na Bifundwe na kwela luteko bwa kutaadisha eshimba dyobe adikutopeka bwashi opande mu kikudi.—Jaake 5:14-16.
Yehowa akumiina shi opushe muloo aufiki mu kwikala na kondo k’eshimba katookye
“Sha-mwabi mmuntu sha-kito [kilubilo] kilekyeelwe”
Kushii mpaka, we mulombeene kupusha shi, kusokwela Yehowa Efile Mukulu milwisho yoobe na kwisesela kwi bakulu abikyebe nkwikeela bukopo. Mpa na Daavide namu bapushishe byabya. Ingi nsaa ‘baadi muumiine’ kushi kusokola milwisho yaaye. (Misambo 32:3) Anka kunyima, baadi musangeele myabi ibaapetele pa kusokola milwisho yaaye na kulumbuula kilubilo kyaaye.
Mwabi ukata ubaadi nawo Daavide nkupetuula dimo muloo waye. Bafundjile shi: “Shaa-mwabi mmuntu sha-kito [kilubilo] kilekyeelwe, na mulwisho waye ubwikidibwe.” (Misambo 32:1) Batekyele dingi shi: “Yehowa, bûla ku kanwa kwande byandja kulungula bantu bi ntumbo yobe.” (Misambo 51:17, EEM) Bu bibaabadi bamukwashe bwashi eshimba t’adimutopekanga dimo, na bibaadi na lutumbu bwa lusa lwa Yehowa, eshimba dya Daavide dibamutakwile mu kulungula bangi pabitale Yehowa.
Yehowa akumiina shi opushe muloo aufiki mu kwikala na kondo k’eshimba katookye. Na akyebe shi, olungule bangi myanda yaaye na mpàngo yaaye, kushi kwibikita n’eshimba adikutopeka, kadi mu binyibinyi na muloo wibungi. (Misambo 65:1-4) Tentekyesha lwitamino lwaye “bwashi milwisho yeenu ipashibwe. Byabya ngi abifiki kipungo kya kupuwa akinupa Yehowa.”—Bikitshino 3:19.
Uno ndjo mwanda ubaadi ufikile Marta, akula shi: “Mwan’ande mulume baadi mutungunukye na kuntumina ma jurnale a Kitenta kya Mulami na Réveillez-vous! Ku kapeela kapeela, naadi mwalukiile dimo kwi Yehowa. Lukalakasho lukile bukata lunaadi mupete pabitale kwalukiila nyi nkuteka lusa bwa milwisho yande yooso. Anka ku nfudiilo, naadi mwifubwile kwi Efile Mukulu mu luteko na kumuteka bwashi anfwile lusa. Ta mbibofule bwa kukumiina shi, naadi mushimine munda mwa bipwa 40 kumpala kw’ami kwalukiila kwi Yehowa nya. Nashinkamisha shi, sunga kunyima kwa bipwa bi bungi muntu mmulombeene kufubila Efile Mukulu dingi na kwalukiila mu kifulo kyaye.”
Tala dingi
EFUBWILE PEPI NA YEHOWA
Efile Mukulu ‘akumiinaa kulekyela milwisho’
Su Efile Mukulu atentekyeshaa myanda yooso, mushindo kinyi wadi mulombeene kulekyela milwisho na kwiyiluba?
