KENYONGOSHI akakwataa muntu ooso​—mpa na bafubi b’Efile Mukulu. Mufundji a misambo bafundjile shi ‘bamonanga mpombo ilekeene.’ (Misambo 94:19) Na Yesu bakwile shi mu mafuku a ku nfudiilo bantu abakapete “biongwa bya muwa [mu nshalelo]” bikumbeene kwibakalakasha bwa kufubila Yehowa. (Luuka 21:34, Kilombeeno kipya 2014) Kadi obe namu? Okwete kupusha shi, maladi, myanda ya makuta, sunga ya mu kifuko, ngikunemeene su? Mmushindo kinyi ulombeene Yehowa nkukwasha bwa kwiyikambila?

Tatwi balombeene kukambila twinyongoshi mu’twe banabeene nya. Mpoolo mutumibwa bafundjile shi: “Abetufinakasha mpese yooso, . . . twi mu mpombo . . . ; mbeetuponeshe.” Kadi bakwile dingi shi: ‘Tambetusoose nya, . . . tatwi bafudiile nya, . . . ta mbetwipe.’ Nkinyi akitukwasha bwa kunyingiila? Tukwete kupeta “bukome bushii bwakupwandjikisha”​—bukome abwitupa Efile Mukulu sha-bukome booso, Yehowa.​—2 Beena-Kodinto 4:7-9.

Banda kunangusheena biboodi mupete “bukome bushii bwakupwandjikisha” mu mafuku apwe kukila. Okyotentekyesha mushindo ubaadi ungi mwisambo ukukankamikye bwa kusangeela kifulo kya bulamate kya Yehowa? Lukumino loobe mu milayilo ya Yehowa lukwete kunyisha kutama nsaa y’okwete kulungula bangi pabitale lukulupilo lwa mu Mpaladiiso? Nsaa y’atutwele mu bisangilo bya beena Kidishitu, na p’atwikankamishena mu lukumino na bangi, atupete bukome bwa kunyingiila twinyongoshi twa mu nshalelo na kupete butaale bwa mu binangu, byabya twi balombeene kufubila Yehowa na muloo.

Binyibinyi, we mulombeene kwipusha bu abakukaka kwi myanda i bungi musango umune. Bu kileshesho, Yehowa etutekye shi tutuule Bufumu bwaye pa mbalo ya kumpala na tushaale balame biubishi bya myanda ya mu kikudi. (Mateo 6:33; Luuka 13:24) Kadi, we kupusha naminyi su bopete kubingwabingwa, maladi, sunga myanda i bukopo mu kifuko ayikukutshishwa bukome bwa mbidi? Sunga shi su mudimo oobe wa masa aukwata nsaa na bukome bwa kwibunga na beena kakongye? Su ofumankana na ino myanda yooso​—aku namu we na nsaa na bukome bipela bya kwiyipudisha—​we mulombeene kupusha shi myanda ngikunemeene ngofu. Pangi we mupwe kwiyipusha su Yehowa kwete nkuteka shi okite myanda yosh’obesha.

Yehowa etupushiishaa. T’etutekaa myanda yatusha koobesha nya. Na ashinguula shi, abitungu kipindji kikata bwa kupetuula bukome bwa ku mbidi mpa na bwa mu binangu.​—Misambo 103:13, 14.

Banda kupwandikisha mushindo ubaadi Yehowa mukitshine mutemuki Eliya myanda. Nsaa ibaadi Eliya mubofule na moo wamukwata, aye nkusukila mu kabaaka. Yehowa basashiile mutemuki aaye na kumwalusha ku mudimo waye su? Nya. Yehowa batumine mwikeyilu misango ibidi, bwa kubuusha Eliya na kalolo kooso aye kumupa kyakudya. Sunga mbyabya, mafuku 40 kumongo, Eliya baadi’nka  kyenyongola na kupusha moo. Yehowa baadi dingi mukite kinyi bwa kumukwasha? Kya kumpala, Yehowa baadi muleshe shi mmukumbeene kumukalwila. Akupu, baadi mukankamikye Eliya na “eyi ditaale na dikye.” Kumongo, Yehowa bamulungwile shi, kubaadi binunu bya balangwidi abaadi bashale na lulamato kwi Efile Mukulu. Ndjo Eliya nkwalukiila mu mudimo waye wa butemuki na katshintshi. (1 Banfumu 19:1-19, NWT) Elango kinyi dyatupete? P’abaadi twinyongoshi tukambile Eliya, Yehowa baadi mumukitshiine myanda na lwishinko na lusa looso. Yehowa ta mmwalulukye nya. Anka mu wawa mushindo umune kwete kwitukalwila bikile.

Nsaa y’onangusheena pabitale kyoodi mulombeene kupa Yehowa, ekilombashe. Tokumanga kupwandjikisha kyoodi mulombeene kukita lelo uno na kiboodi mukite kala. Twate kileshesho: Juwere talekyele kukita kalashishi munda mwa myeshi i bungi sunga bipwa ta mmulombeene kubanguula kwikakita nka musango umune nya. Anka, aata kitshibilo kya kwikitshisha ku kapelakapela bwashi apete bukome na anyingye. Beena Kidishitu be nka ba Juwere. Bakwete kulonga na kitshibilo kampanda mu binangu. (1 Beena-Kodinto 9:24-27) Bwakinyi twe mulombeene kwata kitshibilo kya kubanga mwanda umune wa mu kikudi na kwikilombasha binobino? Bu kileshesho, we mulombeene kwata kitshibilo kya kutwelanga mu bisangilo bya kakongye. Teka Yehowa bukwashi bwa kulombasha kyakya kitshibilo. Nsaa y’okyende na kupetuula bukome bwa mu kikudi, okyebe ‘kutompa na wemwene Yehowa byadi buwa.’ (Misambo 34:8, EEM) Tentekyesha shi kyooso kyokitshi bwa kuleesha kifulo kyoobe bwa Yehowa​—sunga kyekala bupeela bwi naminyi—​kii na muulo ku meeso kwaye.​—Luuka 21:1-4.

Nkipaso kinyi kibaadi Yehowa mupe June bukome bwa kwalukiila kwadi? June aleesha bino: “Naadi mutungunukye na kuteka Yehowa, namutekanga bukwashi. Kunyima mukashi-a-mwana’nde nkundungula pabitale kikongeno kibaadi akikyebe kukitshika mu kibundji kyetu. Ami nkwata kitshibilo kya kwimutwela mund’efuku dimune. Muloo kinyi unaadi nao wa kwimoneena na mwilo wa Yehowa! Kyakya kikongeno kibaadi kwinyi kunyingishibwa kunaadi natengyela. Binobino nkwete kufubila Yehowa dingi na muloo ooso. Nshalelo ande balongama ngofu kukila byanyikalanga kumpala. Nashinguula shi abitungu nyikale munkatshi mwa bakwetu balume na bakashi na kukumiina bukwashi bwabo. Ne na lutumbu lukata paami kumona shi kukyakwikalanga nsaa yashi nalukiila.”