1. Nkinyi akitungu shi tukite bwa kusankisha Efile Mukulu?

BWA kwikala mu kipwano kibuwa n’Efile Mukulu, tabitungu twikale mu kipwilo kya madimi nya. Abitungu twikale mu kipwilo kya binyibinyi. Lelo uno midiyo ya bantu mu nsenga ishima bakwete kutwela mu kipwilo kya binyibinyi.

2. Nkunyi koodi mukumbeene kusangana ba Temwe ba Yehowa, na abafubaa mudimo kinyi?

² Nka bu bibatemukile Bible, balangwidi ba binyibinyi mbakite “kibumbu kikata kya bantu” abatuukila mu “maumbo ooso, bisamba, miilo na ndjimi yooso.” (Kibafumbwilwe 7:9) Midiyo ya ba Temwe ba Yehowa be mu maumbo 235, bakwete kukwasha bangi bantu na kisumi bwa kulonga mashinda a Yehowa, na kulonda miiya yaaye.

3. Ba Temwe ba Yehowa abalangwilaa nka penda nanyi, na ndangwilo kinyi yabashabakitaa?

³ Ba Temwe ba Yehowa abauuku shi nka penda Yehowa ngi a kulangwila. Tabakunaminaa ma nkishi sunga bifwanyi bya mu bipwilo. (1 Yowano 5:21) Tabalangwilaa bafwe pa kwenda mu kulala ku maalo sunga kukita bingi bipikwa abikwatshishena nkumiino ya bipwilo bya madimi na ‘ndambukisho ya ba demo.’ (1 Timote 4:1) Anka bakwete kunyingisha baba be na maalo pa kwibapatulwila milayilo y’Efile Mukulu, ayamba shi, akwikala lusangukilo lwa bafwe bwabadya kwikala na muwa mu mpaladiso pa nsenga.—Yowano 5:28, 29; Bikitshino 24:15.

4. Bafubi b’Efile Mukulu be na mweneno kinyi pabitale kupaka manga?

⁴ Ba Temwe tabakumiinaa myanda ya manga, bu ndoshi, sunga butshi, abauku shi bino bintu byoso abifiki kwi Diabulu. Tabakulupilaa shi manga e kwibakalwila nya, mbakulupile penda mwi Yehowa.—Nkindji 18:10.

5. Mu mushindo kinyi wi ba Temwe ba Yehowa ta mba “pa nsenga”?

⁵ Yesu bakwile shi balongi baye tabekala ba “pa nsenga.” (Yowano 17:16) Yesu bapelele kutwelakana mu myanda ya politike ya mu mafuku aaye. (Yowano 6:15) Mu mushindo umune, ba Temwe tabatwelakana mu myanda ya politike, ya bisamba, na ya kwabuula ba mpeta na balanda ya mu ino nsenga. Anka abafutaa bitadi na kukokyela miiya ya mwiumbo dyabadi bashale.—Yowano 15:19; Beena-Looma 13:1, 7.

6. Bafubi b’Efile Mukulu abalondaa mayi kinyi pabitale dibaka na kutshiba kwa dibaka?

⁶ Pa mwanda wa kukokyela kwabo ku bukunkushi bwa mbulamatadi, ba Temwe abafundishaa dibaka dyabo ku mikanda ya mbulamatadi. (Tite 3:1) Abakokyela bukunkushi bw’Efile Mukulu, na tabebakilaa bakashi bebungi. (1 Timote 3:2) Dingi, bu byabatumikila mayi a mu Bible mu nshalelo abo, bafubi b’Efile Mukulu tabakambaa kutshiba malunda aabo nya.

7. Ba Temwe abelesheena kifulo naminyi?

⁷ Ba Temwe mbefulene. Kino kifulo, pamune na kifulo kyabadi nakyo bw’Efile Mukulu, akibabungaa mu kipwano kya binyibinyi, sunga bekala ba mu bisamba na maumbo elekene. Nsaa ayituku masaku sunga nsaa yakudi lukalo lwa bukwashi, ba Temwe abendaa luntuluntu mu kukwasha bakwabo. Ba Temwe abaleshaa kifulo mu nshalelo abo.—Yowano 13:35.

8. Bafubi b’Efile Mukulu mbashikwe myanda kinyi?

⁸ Bafubi ba Yehowa abetatshishaa bwa kwikala na kululama mu nshalelo abo. Mbashikwe kwiba, kudimba, kukita myanda ibutete, kukolwa, na kudimba mu myanda ya busunga. Balume tabakupilaa bakashi babo nya. Kumpala kwa kufika bu ba Temwe, bangi babaadi abakitshi ino myanda, anka ku bukwashi bwa Yehowa mbalekye. Abaadi ‘batoshibwe’ ku meso kw’Efile Mukulu.—1 Beena-Kodinda 6:9-11.

9. Ungi mukanda awakula naminyi pabitale bipwilo bya bikudi bya mu Afrike?

⁹ Eyendo shi, bipwilo bibungi abiambaa shi bi na bya binyibinyi. Mbilombene kukita myanda kampanda bwa kulesha bantu shi bi na bya binyibinyi. Kileshesho, pabitale bipwilo abiamba bu bya bikudi mu Afrike, ungi mukanda awamba shi: “Mudimo wa nganga mbeupyanyikishe na [bisaka bipya bya bwina Kidishitu]. . . . Abeamba bu abauku kutemuka myanda i kumpala na kukita bilengyeleshi. Batemuki babo abatushaa bimonwa na kupatuula bilotwa. Be na mema asampibwe, mwimu wa kishila, buto, ma bujii na kabanda bwa kubuka na kukalwila mikumbo.”

10, 11. Bwakinyi byabya byabamba lelo uno shi mbilengyeleshi, tabilesha shi kipwilo mbekikumiine kwi Efile Mukulu?

¹⁰ Bena bino bipwilo abapwandikisha shi kukita bilengyeleshi akulesha shi kipwilo kyabo mbekikumiine kwi Efile Mukulu. Anka, ta mbyabya byabapwandikisha shi mbilengyeleshi, abilesha shi Yehowa mmukumiine kipwilo kampanda nya. Satana apeyaa bangi balangwidi ba mu bipwilo bya madimi bukome bwa kukita ‘myanda ya kukanya.’ (2 Beena-Tesalonika 2:9) Dingi, Bible batemukile shi, kya buntu kya kukita bilengyeleshi akifiki kwi Efile Mukulu, bu kileshesho kutemuka, kwakula mu ndimi, na kiukilo kya pa bwakyo, “akikashimina”—1 Beena-Kodinda 13:8.

¹¹ Yesu bambile’shi: “Ta mbaaba booso abangamba’shi: ‘Fumu, Fumu, abakatweele mu bufumu bw’eulu; anka yawa akitshi kikyebe ki’eshimba dia Shami e mwiulu. Be bungi banandungule mwifuku diadia’shi: Fumu, Fumu, atwe tatwi batemukye mwishina diobe su, na tatwi babingye bikudi bibi mwishina diobe su, na tatwi bakite bipaso bi bungi mwishina diobe su? Na peeni paapa nankebalungula patooka’shi: kashaa ntanaadi mwinuwukye nya; katukayi kwandji, anwe bakitshi ba bubi.!’”—Mateo 7:21-23, Kilombeno kipya 2014.

12. Mba nanyi abakatwele mu Bufumu bwa mwiyilu?

¹² Mba nanyi, abakatwele mu Bufumu bwa mwiyilu? Nyi mbaba abakitshi kikyebe ky’eshimba dya Yehowa.

13. Efile Mukulu mmupe bafubi baye mudimo kinyi lelo uno, na mba nanyi bakwete kwiukita?

¹³ Efile Mukulu e na mpango kinyi bwa bantu baye lelo? Yesu bambile’shi: “Na uno mukandu wi buwa wa Bufumu aukalungulwa pa nsenga yoso yishaadibwe, bwa kulesha bukamonyi kwi maumbo ooso.” (Mateo 24:14, Kilombeno kipya 2014) Uno nyi mudimo wabakwete kukita kwi ba Temwe ba Yehowa na kisumi kyoso.

14. Bufumu bw’Efile Mukulu nkinyi, na mba nanyi abakamunu mwanka?

¹⁴ “Pa nsenga yoso yishaadibwe,” ba Temwe ba Yehowa bakwete kulungula mukandu wa Bufumu bw’Efile Mukulu, abamba shi nyi mbulamatadi a mwiyilu akamunana pa nsenga ishima mu kululama. Abalongyesha shi Yehowa mmutule Yesu Kidishitu bu Nfumu a bwabwa Bufumu, pamune na bantu 144000 basangulwe munkatshi mwa bantu bwa kumunana naaye.—Ndanyele 7:14, 18; Kibafumbwilwe 14:1, 4.

15. Bufumu bw’Efile Mukulu abukabutula kinyi?

¹⁵ Ba Temwe abafubaa na Bible bwa kulesha bantu shi, Bufumu bw’Efile Mukulu abukabutula ndumbulwilo a Satana. Bipwilo bya madimi abakebibutula na malongyesha abyo ashaanemeka Efile Mukulu, kadi aatumbisha Dyabulu! (Kibafumbwilwe 18:8) Abakabutula dingi mbulamatadi ya bana ba bantu itombokyele Efile Mukulu!—Ndanyele 2:44.

16. Yesu Kidishitu akamunu bantu kinyi, na abakashaala kunyi?

¹⁶ Dingi, ba Temwe ba Yehowa abalungulaa bantu shi Yesu Kidishitu akafwisha myabi kwi baba boso abakitshi akikyebe Efile Mukulu. Abo nyi bakamunu pa nsenga. Bible mulee shi: “Apaasha mulanda eele musaase kwadi, naa bee mu mpombo bashii naa pa kwimeena. Apushiisha mulanda na mubofule lusa; apaashe muuwa wa balanda.”—Misambo 72:12, 13.

17. Mpenda bantu kinyi bakwete kulungula Bufumu bw’Efile Mukulu?

¹⁷ Takwi kingi kisaka kya bantu abakitshi akikyebe Efile Mukulu pa kulungula mukandu wibuwa wa Bufumu. Anka penda ba Temwe ba Yehowa nyi bakwete kuukisha Bufumu bw’Efile Mukulu mu nsenga ishima.