Lukalo lwa Yehowa ndwa’shi be na dibaka booso bashaale balamate ku mutshipo wabo wa dibaka. Nsaa ibadi mutuule mukashi na mulume pamune, Yehowa bambile shi: ‘Mulume . . . alamate kwi mukashi aaye, abo booso abakekala mbidi imune.’ Kunyima kwa mafuku, Yesu Kidishitu baadi mwambuule byabya bishima na aye nkukumbasha shi: “Byabya, muntu taabuulanga kyakya kibungiibwe n’Efile Mukulu!” (Kibangilo 2:24; Mateo 19:3-6) Byabya mweneno a Yehowa na Yesu pabitale dibaka nga’shi nkipwano kya bantu babidi akitshibika nka su umune a kwabadi baafu. (1 Beena-Kodinto 7:39) Bu bi dibaka nkipwano kiselele, kutshiba kwa dibaka ta mwanda wa kwata na miseku nya. Byabya, Yehowa mushikwe kutshiba kwa dibaka mu mushindo ushii wipushene na Bifundwe.​—Malakii 2:15, 16.

Muyiile Bifundwe mwanda kinyi ulombeene kutakula muntu bwashi atshibe dibaka? Yehowa mushikwe lusandji na  lukyebanokyebano. (Kibangilo 39:9; 2 Samwele 11:26, 27; Misambo 51:4) Byabya, ateyaa kukita kwa lukyebanokyebano bu mwanda ukile bubi ulombeene kutwala muntu mu kutshiba kwa dibaka. (Bwa kuuka akilesha kukita lusandji, tala Shapitre 9, paragrafe 7, mbalo yabadi baleshe akipatuula lusandji.) Yehowa mupe mwina dibaka bulungantu bwa kwata kitshibilo kya kushaala sunga kutshiba dibaka na mulume sunga mukashi aaye baatambuka lusandji. (Mateo 19:9) Kadi, su mwina dibaka umune baata kitshibilo kya kutshiba dibaka mwanda mwina dibaka naaye baatambuka lusandji, Yehowa ta mmushikwe kutshiba kwa dibaka mu wawa mushindo nya. Na dingi beena kakongye ka beena Kidishitu ta mbalombeene kumutakula bwashi atshibe dibaka nya. Byabya ingi nsaa nkulombeene kwikala myanda ayitekye shi, mwina dibaka ashaale na mulume sunga mukashi aaye baatambuka lusandji, bikishekishe su yawa belanga n’eshimba dyaaye dyooso. Anka, booso abalondo abyamba Bifundwe pabitale kutshiba kwa dibaka be na kya kwiatshila kitshibilo abo ba nabeene kya kukumiina kyooso kilombeene kufika kunyima kwa kutshiba dibaka.​—Beena-Galate 6:5.

Pa mwanda wa ingi nkalakasho ikile bukopo, bangi beena Kidishitu mbaate kitshibilo kya kwilekena na mwina dibaka nabo sunga kutshiba dibaka aku naamu ta mutambukye lusandji. Pabitale uno mwanda, Bible alesha shi yawa belekena na mwina dibaka naaye “ashaale bukupi, su bakutwa byabya alombane na mulunda aaye.” (1 Beena-Kodinto 7:11, Kilombeno kipya) Yawa mwina Kidishitu te na bulungantu bwadya kwiyibakishena na ungi muntu nya. (Mateo 5:32) Tu bande kutaluula ingi myanda ipeela yabadi bamone kwi bangi bu ilombeene kwibatakula bwabadya kwilekeena na mwina dibaka nabo.

Pe mulume apele kulombasha nkalo ya ba mu nshibo yaaye. Kifuko nkilombeene kwikala na bulanda, akikutwa bintu bi na muulo mu nshalelo aabo, pamwanda mulume takumiina kwibakimbila byanka, sunga mbyadi na mushindo wa kwibikimba. Bible alesha shi: “Su muntu taabàmba . . . baadi nabo mu nshibo yaaye, byaabya mmutune lukumiino; nyi mmubi mukile shii-na-lukumiino.” (1 Timotee 5:8) Su yawa muntu apela kushintuluka, mukashi mulombeene kwata kitshibilo kya kwilekena na mulume aaye bwa kwikalwila na bwa kukalwila baana baaye. Eyendo’shi abitungu bakulu mu kakongye balondeshe mwanda kalolo nsaa yabebalungula shi mulume mwina Kidishitu kwete kupela kulombasha  nkalo ya kifuko kyaaye. Muntu mulombeene kutushibwa mu kakongye su apela kulombasha nkalo ya ba mu kifuko kyaaye.

Pe mwina dibaka kwete kukupila mwinaye nsaa yooso. Mwina dibaka shy’etombo mukumbeene kwikala akupila mwinaye mu mushindo autuulu muwa waye mu masaku. Su mmwina Kidishitu, bakulu ba kakongye mbalombeene kutaluula mwanda waye kalolo. Muntu e na kiubishi kya kukwata nsungu bukibukidi na akupishena nsaa yooso mbalombeene kumutuusha mu kakongye.​—Beena-Galate 5:19-21.

Pe muntu atuulu kipwano kya mwina dibaka naye na Yehowa nu masaku. Mwina dibaka mulombeene kwikala akitshi mwaye mooso bwa kukutshisha mwinaye kwenda mu lulangwilo lwa binyibinyi sunga shi mulombeene kumutakula bwashi atupilwe miiya y’Efile Mukulu mu mushindo kampanda. Pabitale uno mwanda, mwina dibaka kwete kukyengyeshibwa mu uno mushindo mulombeene kwata kitshibilo kya kwilekena na mwina dibaka naaye bwa “kukookyela Efile Mukulu pee kukookyela bantu.”​—Bikitshino 5:29.

Mu byooso, nshaleelo ibukopo bu ino yatubakatuka mu kutaluula, muntu su ngumune ta mulombeene kutakula mwina dibaka bwa kwilekena na mwinaye sunga kushaala naye nya. Sunga bi beena Kidishitu naaye na bakulu mu kakongye mbalombeene kumupa malango aatuukila mu Bible, ta mbalombeene kuuka myanda yooso ikwete kukidika pankatshi pa mulume na mukashi nya. Anka penda Yehowa ndjo mulombeene kwiyimona. Eyendo, mukashi mwina Kidishitu ta mulombeene kutumbisha Efile Mukulu su kwete kukishakisha p’akula pabitale nkalakasho yabadi nayo mu nshibo bwa kukimba shi belekeene na mulume aaye nya. Yehowa auku myanda yooso ilombeene kutakula muntu mu kwilekena na mwina dibaka naaye, sunga akimba kwiyifwamisha. Anka, “byooso bi mwasa ku meso kwaye. Aye ngi atudi na kya kulubwila byooso.” (Beena-Ebreeyi 4:13) Anka su lwalwa lukalakasho alutungunuka na kwikala kwanka, muntu su ngumune ta mulombeene kutopeka mwina Kidishitu baata kitshibilo kya kwilekeena na mwina dibaka naaye nya. Mu byooso abitungu tuwukye shi, “booso bwetu atukayimuka kumpala kwa tuumilaadi tw’Efile Mukulu.”​—Beena-Looma 14:10-12.