1, 2. (a) Pabitale kukokyela kwa basha bufumu, ndukalakasho kinyi lwatupetaa? (b) Nkonko kinyi yatukyebe kutaluula?

TOBOPWILE kumona abikitaa mwana mukinga su abamutumu bwashi akite kintu kyashi mukumine kukita su? Pangi we kumona mpa na ku lukyebo lwaye kwikakena kwi mwishimba dyaaye nka bu muntu e pa mashinda abidi. Bapusha kibamba nshaye, na auku shi e na kya kukokyela bufumu bwa baledi baaye. Kadi pabitale uno mwanda, takumina kukokyela nya. Uno mwanda wa uno mwana awitufwila atwe booso.

² Kukokyela kwa baaba basha bufumu ta nkwitubofwile nsaa yooso nya. Ingi nsaa abikwikelaa bukopo bwa kunemeka baaba be na bufumu kampanda kumpala koobe su? Su mbyabya, uka shi twe bupenka nya. Twi mu kipungo ki bantu bebungi tabakwete kukokyela basha bufumu nya. Kadi, Bible etulungula shi twi na kya kunemeka baaba be na bufumu kumpala kwetu. (Myeele 24:21) Na dingi, twi na kya kunemeka baaba basha bufumu su atukyebe kwilama mu kifulo ky’Efile Mukulu. Sunga mbyabya, uno mwanda autusha ingi nkonko bu ino ayilondo: Bwakinyi tambibofule bwa kukokyela basha bufumu? Bwakinyi Yehowa etutekye bwa kukokyela basha bufumu, na nkinyi kilombeene kwitukwasha bwa kwibikita? Na dingi shi mmushindo kinyi watudi balombeene kulesha shi atunemeka basha bufumu?

3, 4. Milwisho na ku kukutwa kwa kupwidika kubaadi kubangye naminyi, na bwakinyi kwikala kwetu kwa bu basha milwisho kukwete kukita bwashi bitwikeele bukopo bwa kukokyela basha bufumu?

³ Tubande kumona mu kikoso myanda ibidi ikumbeene kukita bwashi tabikalanga bibofule bwa kukokyela basha bufumu.  Wa kumpala, twi bantu bashi bapwidikye; wa kabidi baaba basha bufumu mbantu bashi bapwidikye nka byatudi’twe. Milwisho na kukutwa kwa kupwidika kwa bantu kubabangile kala, mu lupango lwa Edene pabaadi Adame na Eeva batombokyele bufumu bw’Efile Mukulu. Byabya twi kwamba shi milwisho ibabangile na kutombokyela kwa bufumu. Kubanga paapa, binangu byetu bi nka mu kutombokyela bufumu.​—Kibangilo 2:15-17; 3:1-7; Misambo 51:7; Beena-Looma 5:12.

⁴ Bu byatudi beena milwisho, bebungi ba kwatudi mbakumbeene kwikala na kwitatula na kwimona; byabya kwiyisha nyi eyikashi dimune dishii kwi bantu bebungi ayitungu shi tukite mwetu mooso bwa kwikala nayo efuku dyooso. Sunga kunyima kwa kufubila Efile Mukulu na kululama kooso munda mwa bipwa, twi balombeene kubanga kwitatula na kulesha mutwe wi bukopo. Bu kileshesho, tubande kwisamba pabitale Koree baadi mukyengye ngofu pamune na mwilo wa Yehowa. Kadi, baadi na lukalo lwa kupeta bungi bufumu, aye nkubanga kutombokyela Moyiise, muntu baadi mwiyishe bikata kukila bantu booso ba aa mafuku. (Mbadiko 12:3; 16:1-3) Tubande dingi kwisamba pabitale Nfumu Ozyase. Pa mwanda wa kwitatula baadi mulambula mulambu ubaadi autungu shi nkapenda ba tshite-mwakwidi beulambule. (2 Myanda 26:16-21) Bano bantu abaadi banyokibwe ngofu bwa kwakwa kutomboka kwabo. Kadi, kileshesho kyabo kibubi akitudimusha lelo uno. Abitungu tulwe ngoshi bwa kusumbula kwitatula mwanda ako nyi akukitshi bwashi bitwikeele bukopo bwa kukokyela basha bufumu.

5. Mushindo kinyi wi bantu bashi bapwidikye mbatumikye na bufumu bwabo bibubi?

⁵ Ku lungi lupese, bantu bashi bapwidikye basha bufumu mbakite myanda itume bantu bwashi tabekalanga abakokyela basha bufumu. Bebungi mbakite myanda ibubi bu kwipayishena, na kukishakisha kukyengyesha bantu mu mushindo wabebamunu. Nyi kwamba shi patutalula myanda ya bantu ba kala atumono mushindo wi bantu bakyengyeshe beenabo na bufumu bwabo bwibubi. (Badika Mulungudi 8:9.) Bu kileshesho, Saule baadi muntu ebuwa, sha kwiyisha pabaadi Yehowa mumusangule bwashi ekale nfumu. Anka, aye nkupona ku kateo ka kwitatula na kiutu; paapa aye nkubanga kupombesha Daavide,  muntu mululame. (1 Samwele 9:20, 21; 10:20-22; 18:7-11) Kunyima Daavide nkufika umune a ku banfumu bebuwa mu Isaleele, kadi balwishishe bufumu bwaye pabaadi mwibe mukashi a Uriya mwina Hiite na kutuma muntu mululame mu milongo ya kumpala ya ngoshi bwashi bakamwipe. (2 Samwele 11:1-17) Oolo, kukutwa kwa kupwidika kukwete kukita bwashi tabikalanga bibofule kwi bantu bwa kutumika na bufumu bwabo kalolo. Na dingi su basha bufumu tabanemeka Yehowa, mbakumbeene kukita bubi kukila. Kunyima kwa kwisamba pabitale mushindo ubaadi bakata ba kipwilo kya Katolike batuushe kubingwabingwa kwa bantu kubaadi kupalakane nsenga ishima, muntu umune a mbulamatadi a mu Grande-Bretagne bafundile shi: “Nsaa ibungi bufumu abulwishaa bantu, bufumu bukile bukata abulwishaa dingi kukila.” Kunyima kwa kwisambila pabitale mushindo wi bantu abatumika na bufumu bwabo bibubi, tubande kwalula luno lungi lukonko: Bwakinyi abitungu shi tukokyele basha bufumu?

6, 7. (a) Kifulo kyetu bwa Yehowa akitutumu mu kukita kinyi, na bwakinyi? (b) Kwiyisha akutekye kwikala na binangu kinyi, na mushindo kinyi watudi balombeene kulesha shi twibeyishe?

⁶ Kintu kya kumpala akitutakula mu kukokyela basha bufumu nyi nkifulo​—kifulo kyetu bwa Yehowa, bwa muntu netu, na bwetu atwe banabeene. Mwanda twibafule Yehowa kukila muntu ooso, atukyebe kusangasha eshimba dyaye. (Badika Myeele 27:11; Maako 12:29, 30.) Atuuku shi pano pa nsenga kubanga pa kutomboka kwa mu lupango lwa Edene abaadi beele mpaka pabitale bufumu bwaaye, matalwa aaye a kukunkusha eyilu na nsenga. Atuuku dingi shi bantu bebungi be ku lupese lwa Satana na mbasumbule bufumu bwa Yehowa. Twi na muloo wa kwikala ku lupese lwa Yehowa. Patubadika mayi a kinemo e mu Bifumbulwe 4:11, ano mayi aetukumu ku mashimba. Byabya abimweneka patooka kwatudi shi Yehowa ndjo mulombeene kwikala Nfumu a eyilu na nsenga! Atushinguula kalolo bi bufumu bwa Yehowa, atwibukumina mu nshalelo etu a kwifuku n’efuku.

 ⁷ Kuno kunemeka kwa bufumu ta nkufudiile penda mu kukokyela nya. Atukokyela Yehowa bukidibukidi mwanda twibamufule. Kadi, ingi nsaa kukokyela nkukumbeene kwikala bukopo. Mu yaaya nsaa, nka bu yaawa mwana atwisambilanga mu mayi a ku mbangilo, abitungu kwiyisha. Atutentekyesha shi Yesu baadi mwiyishe bwa kukokyela Nshaaye mpa na nsaa ibabidi bukopo bwa kwibikita. Balungwile Nshaaye shi: “Ta nkyankyebe kya kukumbana, mpenda kyookyebe’be.”​—Luuka 22:42.

8. (a) Lelo uno misango ibungi bwa kunemeka bufumu bwa Yehowa abitungu kinyi, na nkinyi akilesha abipusha Yehowa pabitale uno mwanda? (b) Nkinyi kikumbeene kwitukwasha bwa kupusha pabetulanga sunga kwitunyoka? (Tala kashibo “ Teemesha elango, kumiina bulambukishi.”)

⁸ Ky’eyendo, Yehowa tesambaa na ooso a kwatudi lelo uno nya; esambaa netu ku bukwashi bwa Eyi dyaaye na bwa bafubi baaye abalesha mpala yaaye pa nsenga. Byabya, misango ibungi, atulesha shi atunemeka bufumu bwa Yehowa su atunemeka baaba baadi mutuule kunundu kwetu. Abitungu tunemekye bakwetu balume baasha bufumu babadi batadiile kwi Yehowa bwa kutungunuka na kwitukunkusha. Su tubatombokyela baaba bantu​—bu kileshesho, kupela kulonda pabetupa malango sunga kwitunyoka muyiile Bifundwe—​yaaya nsaa nyi Yehowa atulwishisha. Pabaadi beena Isaleele basaabuule na kutombokyela Moyiise, Yehowa bamwene byabya shi abaadi bebikite kwadi.​—Mbadiko 14:26, 27.

9. Bwakinyi kifulo kyetu bwa bantu netu akikyebe kwitutuma bwashi tunemekye bufumu? Tuusha kileshesho.

⁹ Kingi kintu akitutumaa mu kunemeka bufumu nyi nkifulo bwa bantu neetu. Bwakinyi? Oolo, banda kupwandikisha shi we musalayi mu kibumbu kya basalayi. Bwa kutshokola ngoshi, mpa na bwashi anwe booso nupande, abitungu shi ooso a kwanudi atumikye kalolo pamune na benaye, akokyele na kunemeka baaba bakwete kukunkusha kisaka. Su bolwisha yawa ndumbulwilo p’obe kutomboka, otuulu muwa wa basalayi nobe mu masaku. Eyendo shi basalayi ba bantu lelo uno bakwete kwipa bantu bebungi. Kadi, Yehowa e na bibumbu bya basalayi abikitaa bibuwa. Misango ibungi Bible etanyina Yehowa bu “Efile a bibumbu bya basalayi.” (Beena-Looma 9:29, Kilombeno kipya 2009) Aye mMukunkushi a kibumbu kikata kya bipangwa  bya mu kikudi bi bukome. Ingi nsaa, Yehowa apwandikishaa bafubi baaye be pano pa nsenga na kibumbu kya basalayi. (Misambo 68:12; Ezekyele 37:1-10) Su tubatombokyela bantu babadi bape bufumu munkatshi mwetu kwi Yehowa, tatwi bu bantu abatuulu muwa wa bakwetu beena Kidishitu mu masaku su? Su mwina Kidishitu batombokyela bakulu, bangi beena kakongye mbalombeene kukyenga nabo namu. (1 Beena-Kodinto 12:14, 25, 26) Su mwana batomboka mu kifuko, kifuko kishima nkilombeene kukyenga namu. Byabya atulesha shi twi bafule bantu netu su atunemeka na kukokyela basha bufumu.

10, 11. Bwakinyi kukimba kwa buwa bwetu akwitutumu mu kukokyela basha bufumu?

¹⁰ Atunemeka dingi bufumu mwanda kukita byabya mbwa buwa bwetu. Apetutekye Yehowa bwashi tunemekye bufumu, nsaa ibungi aleshaa myabi yatupete su tubebikitshi. Bu kileshesho, alungula baana shi bakokyele bebatande bwashi bayishe na muwa na bekale na nshalelo ebuwa. (Miiya Ikituulwe 5:16; Beena-Efeeze 6:2, 3) Etulungula shi tunemekye bakulu ba kakongye mwanda su tatwi bebikite atulwisha kipwano kyetu  na Yehowa. (Beena-Ebreeyi 13:7, 17) Na dingi etulungula bwashi tunemekye bakata ba mbulamatadi bwa kwikalwila.​—Beena-Looma 13:4.

¹¹ Kuuka bwakinyi Yehowa etutekye bwashi tukokyele akwitukwasha bwashi tobeshe kunemeka bufumu. Binobino tubande kutala mushindo watudi balombeene kunemeka bufumu mu kifuko, mu kakongye na bakata ba mbulamatadi.

12. Yehowa mupe mulume sunga nsha baana mudimo kinyi mu kifuko, na mmulombeene kwiulombasha naminyi?

¹² Yehowa ndjo mukite kifuko. Bu byadi’ye nyi Efile shii a myanda ipatakane, mulumbuule kifuko bwashi kikale akitambuka kalolo. (1 Beena-Kodinto 14:33) Mupe mulume sunga nsha baana bufumu bwa kwikala bu mukunkushi a kifuko. Mulume anemekaa Nfumwaye, Yesu Kidishitu, nsaa yakwete kulonda kileshesho kya mushindo ubaadi Yesu alesha bufumu bwaye kwi kakongye. (Beena-Efeeze 5:23) Byabya mulume tabitungu’shi akutwe kulombasha bushito bwaye nya kadi ebutwale n’eshimba dinyingye, kushii kukitshisha ba mu nshibo yaaye myanda pa bukopo, anka ebaleshe kifulo, na binangu bibuwa, na kalolo. Mulume auku shi bufumu bwaye bwi na nfudiilo​—tabwi kunundu kwa bufumu bwa Yehowa nya.

13. Mukashi sunga nyina baana mulombeene kulombasha mudimo waaye mu kifuko kyaaye mu mushindo ausangasha Yehowa naminyi?

¹³ Abitungu mukashi ekale na mudimo wa kukwasha mulume aaye. Aye naamu  mbamupe bufumu mu kifuko, mwanda Bible akula pabitale “elango dya nyinoobe.” (Myeele 1:8) Binyibinyi, bufumu bwaye bwi kuushi kwa mulum’aaye. Mukashi mwina Kidishitu anemekaa bufumu bwa mulum’aaye nsaa yamukwasha bwa kulombasha mudimo waaye wa bu nfumu a kifuko. Tamwateya na muulo upeela nya, kumutakula mu kukita kintu kampanda ki bubi, sunga kukimba kukunkusha kifuko pa mbalo yaaye. Kadi, amukokyela na kumukwasha. Su kitshibilo kya mulume takimusangasha, mulombeene kulesha binangu byaaye na kanemo kooso, kadi ekale a mukokyela. Su mulume aaye ta mwina Kidishitu, mukashi mmulombeene kwikala mu nkalakasho, sunga mbyabya mwikelo waaye wa kukokyela ngulombeene kutakula mulume mu kukimba Yehowa.​—Badika 1 Mpyeele 3:1.

14. Baana mbalombeene kusangasha Yehowa na baledi baabo naminyi?

¹⁴ Baana abasangashaa eshimba dya Yehowa nsaa yabakokyela nshaabo na nyinaabo. Abapa baledi baabo muloo na kinemo. (Myeele 10:1) Mu kifuko ki muledi umune, baana abalondaa uno mwiya wa kukokyela baledi, bashinguule shi baledi  baabo mbalombeene kwikala na lukalo lukata lwa bukwashi bwabo na kanemo kaabo. Mu bifuko mwi bantu booso abalombasha mudimo wabadi bebape kwi Efile Mukulu, amwikalaa kufukama na muloo ukata. Bino abitumbisha Yehowa Efile Mukulu, nsulo a bifuko.​—Beena-Efeeze 3:14, 15.

15. (a) Mushindo kinyi watudi balombeeene kulesha shi tukwete kunemeka bufumu bwa Yehowa mu kakongye? (b) Miiya kinyi ilombeene kwitukwasha bwa kukokyela baaba abetukunkusha? (Tala kashibo “ Kookyelaayi bakunkushi beenu.”)

¹⁵ Yehowa mutuule Mwan’aaye bu Nfumu a kakongye ka beena Kidishitu. (Beena-Kolose 1:13) Yesu naamu, mutuule “mpika a kishima na mupatulukye” bwa kukwasha bantu b’Efile Mukulu be pa nsenga. (Mateo 24:45-47) Kasaka ka Bakunkushi-Bakulu ka Batemwe ba Yehowa akafubu bu “mpika a kishima na mupatulukye.” Anka bu byabibaadi mu tukongye twa beena Kidishitu mu mafuku a batumibwa, bakulu bakwete kupeta lelo uno malongyesha na malango aafiki kwi Kasaka ka Bakunkushi-Bakulu, ngalombeene kufika mususa umune kwabadi sunga kukiila kwi bantu abalesha mpala ya kaaka kasaka, kileshesho bu bakunkushi ba bifunda. Nsaa yatunemeka bufumu bwa bakulu beena Kidishitu, atulesha shi tukwete kukokyela Yehowa.​—Badika 1 Beena-Tesalonika 5:12; Beena-Ebreeyi 13:17.

16. Mushindo kinyi wabasangulaa bakulu ku bukwashi bwa kikudi kiselele?

¹⁶ Bakulu na bafubi ba midimo ta mbapwidikye nya. Be na bilema, nka byatudi’twe nabyo. Anka, bakulu nyi mbya buntu, byabadi bape kakongye bwa kwikakwasha kekale kanyingye mu kikudi. (Beena-Efeeze 4:8) Bakulu mbebasangule ku bukwashi bwa kikudi kiselele. (Bikitshino 20:28) Mu mushindo kinyi? Bwa kwibasangula abitungu bano balombashe myanda itekibwe i mu Mwiyi dy’Efile Mukulu difundibwe ku bukwashi bwa kikudi kyaaye kiselele. (1 Timotee 3:1-7, 12; Tite 1:5-9) Na dingi, bakulu abasangula mukwetu mulume bwashi afikye mukulu abelaa nteko n’eshimba dimune bwa kuteka bukwashi bwa kikudi kiselele kya Yehowa.

17. Bwakinyi mukwetu mukashi mmulombeene kufwala kitambaala nsaa yakitshi mudimo ulombeene bakulu na bafubi mu kakongye?

 ¹⁷ Mu kakongye, nkulombeene kwikala nsaa ishii bakulu na bafubi ba midimo tabe mwanka bwa kukita midimo yooso yabadi bebape, bu kukunkusha bisangilo bya mudimo wa kulungula mukandu wibuwa wa Bufumu. Mu yaaya nsaa, bangi bakwetu balume bapwe kubatshishibwa mbalombeene kukita ino midimo. Su tabe mwanka, bakwetu bakashi beena Kidishitu be na mwikeelo wibuwa mbalombeene kukita yaaya midimo. Byabya, nsaa i mukashi akitshi uno mudimo wabadi bape balume bapwe kubatshishibwa, abitungu afwale kitambaala. * (1 Beena-Kodinto 11:3-10) Uno mwiya taulesha shi bakashi ta mbakutwe kinemo nya. Kadi, awibapa mushindo wa kulesha kanemo ku mushindo wabadi batuule bufumu kwi Yehowa, kubanga mu kifuko mpa na mu kakongye.

18, 19. (a) Mushindo kinyi oodi mulombeene kupatuula mwiya wi mu Beena-Looma 13:1-7? (b) Mushindo kinyi watudi balombeene kulesha kanemo kwi banfumu ba mbulamatadi?

¹⁸ Beena Kidishitu ba binyibinyi abalondaa uno mwiya wi mu Beena-Looma 13:1-7. (Badika.) Nsaa yobadika mu ano maverse, okyebe kusangana shi “banfumu bee na matalwa” babalesha mwanka nyi mbanfumu ba mbulamatadi. Bu bi Yehowa mutadiile bano banfumu bwashi bekale kwanka, bakwete kukita mudimo wibuwa, bakwete kukunkusha bwa kutuula kululama mu myanda kampanda. Atulesha kanemo kwi bano banfumu nsaa yatudi na mwikelo aulesha kukokyela ku miiya yaabo. Atukitshi mwetu mooso bwa kufuta bitadi byooso byabetutungu, kulombasha mikanda yooso yabetutekye kwi mbulamatadi, na kukokyela kumwiya ooso wabetwelela pabitale, kifuko kyetu, busunga, sunga bintu byatudi nabyo. Byabya, tatwi balombeene kukokyela banfumu ba mbulamatadi su abetutekye bwa kwipaa miiya y’Efile Mukulu. Anka atwalula bu bibalulwile batumibwa bakala shi: “Bii buuwa tukokyele Efile Mukulu pee kukookyela bantu.”​—Bikitshino 5:28, 29;  tala kashibo “ Abitungu nnemekye bufumu bwa nnanyi?”

¹⁹ Atulesha dingi kanemo kwi banfumu ba mbulamatadi mu mushindo watushaala na bangi. Kwi nsaa yatudi balombeene kwikala kumpala kwa bakata ba mbulamatadi. Mpoolo baadi musambe kumpala kwa Nfumu Erode Agripa na Mukunkushi Festuse. Bano bantu abaadi na bilema bikata, kadi Mpoolo baadi mwisambe nabo na kanemo kooso. (Bikitshino 26:2, 25) Atulondo kileshesho kya Mpoolo, patudi kumpala kwa nfumu mukata sunga kwa mpulushi. Mu kalasa, bansongwalume na bansongwakashi beena Kidishitu abakitaa mwabo mooso bwa kulesha kanemo ke bino kwi balongyeshi baabo, bakata ba kalasa na bantu abakitshi ingi midimo ya mu kalasa. Eyendo, tatwi balombeene kwimena penda mu kunemeka baaba abakumina myanda yatwi balongyesha; atulesha dingi kanemo kwi baaba basha bakuminaa Batemwe ba Yehowa. Binyibinyi, ta mbooso bashi beena Kidishitu abamonaa shi twi na kanemo nya.​—Badika Beena-Looma 12:17, 18; 1 Mpyeele 3:15.

20, 21. Myabi kinyi yatupete nsaa yatunemeka bufumu mu mushindo ulombane?

²⁰ Abitungu tunemekye bantu n’eshimba dimune. Mpoolo mutumibwa bafundjile shi: “Nemekai bantu boso.” (1 Mpyeele 2:17, Kilombeno kipya) Bantu mbalombeene kukanya ngofu nsaa yabamono shi atwi banemeka n’eshimba dimune. Tentekyesha’shi dino eyikashi tadi kwi bantu booso nya. Byabya, kulesha kanemo nyi mushindo umune aulesha shi atulondo mwiya wa Yesu awamba shi: “Etaata dyeenu diileshe kwi bantu bwashi paabamono bikitshiino byeenu biibuuwa batumbishe Nsheenu ee mwiyilu.”​—Mateo 5:16.

²¹ Mu uno ndumbulwilo e mu mufito, bantu baasha mashimba afukame bakwete kukakibwa n’etaata dya mu kikudi. Byabya, mushindo watunemeka bufumu mu kifuko, mu kakongye, na kwi banfumu ba mbula-matadi, ngulombeene kukaka binangu bya bangi na kwibatakula mu kutambuka n’etu mwishinda dy’etaata. Wawa mmwanda wa muloo ukata! Sunga bantu ta mbakakiibwe kwi Efile Mukulu, abitungu tushinguule shi Yehowa asangalaa pamono atunemeka bantu, na kukita byabya akwitukwasha bwa kwilama mu kifulo kyaaye. Ta kwi bwedi bukile bwabwa nya.