Ta kwi bintu bilombeene kwitutapa ku mashimba kukila byatupushaa nsaa i mukwetu a mu kifuko sunga kuuku etu batushibwa mu kakongye mwanda wa kukutwa kwaye kwa kwilanga ku milwisho yaaye. Mushindo watukokyela ku mayi a mu Bible pabitale uno mwanda aulesha bukata bwa kifulo kyatudi nakyo bw’Efile Mukulu na mushindo watukwete kulesha kululama kwetu ku meso kwaye pabitale uno mwanda. * Banda kutala ingi nkonko itale uno mwanda.

Mushindo kinyi autungu shi tushaale na muntu abadi batuushe mu kakongye? Bible amba shi: “Tanwikalanga kipwano na muntu eetemuna bu mukwenu mu Kidishitu, su beekala sha lukyebanokyebano sunga sha malaka, sunga mulangwidi a mankishi, sunga nkanyi a mulomo, sunga nkodi a maalwa, sunga ngifi. Muntu e byabya tanwibapwandjikile sunga kudya n’e, ooo.” (1 Beena-Kodinto 5:11, Kilombeno kipya) Pabitale muntu ooso “shabombeela mu lulambukiisho lwa Kidishitu,” atubadika shi: “Tanumutambulanga ku mashibo enu sunga nkumwimuna ooo. Mwanda yawa amwimuna bebungila n’e mu myanda ibubi yakitshi.” (2 Yowano 9-11, Kilombeno kipya) Tatwi balombeene kwibunga naaye bwa kwisamba n’e myanda itale lulangwilo lwetu sunga ingi myanda ya mu nshalelo nya. Kitenta kya Mulami kya mwifuku dya 15/12/1981 mwisaki 23 mu fwalanse, kibaadi kileeshe shi: “Mwisambo aubangaa penda na kwimuna muntu na ngukumbeene kufwisha bantu mu kwikwatena bukuuku. Twi bakumbeene kwela lutaba lwi byabya na muntu mutushibwe mu kakongye su?”

Abitungu kupela kukita naaye kintu kyooso su? Oolo, atupele bwa myanda ibungi. Wa kumpala, abilesha kululama kwetu ku meso kw’Efile Mukulu na ku Eyi dyaaye. Atukokyelaa kwi Yehowa mu nsaa yabidi bitubofwile mpa na nsaa ayitungu shi tupete nkalakasho mwanda wa kukokyela kwetu. Kifulo kyatudi nakyo bw’Efile Mukulu akitutakula bwa kukokyela miiya yaaye yooso, kwiyata bu ilulame na ya kifulo na kukumina shi miiya yaaye ayitwala muloo wi bungi. (Yeeshaya 48:17; 1 Yowano 5:3) Wa kabidi, kupela kwibunga na muntu shi mwilangye kwishimba a kwitukalwila atwe banabeene mpa na kukalwila bangi mu kakongye bwashi tala balwishibwa mu  binangu mpa na mu kikudi na kulwisha nkumo ya kakongye. (1 Beena-Kodinto 5:6, 7) Wa kasatu, kunemeka kwetu kwa mayi na miiya ya mu Bible nkulombeene kukwasha yawa muntu abadi batuushe mu kakongye. Su atukokyela kitshibilo kyabadi baate kwi bakulu mu komite a kusambisha bantu, pangi twi balombeene kukuma eshimba dya yawa muntu mukite mulwisho mupele kuteemesha nsaa ikeele bakulu abetatshisha bwa kumukwasha. Kutshiba kipwano na bantu baadi mufule nkukumbeene kumukwasha bwadya ‘kwalusha binangu,’ na kumona bukata bwa mulwisho waye, na kukita myanda ayitungu bwa kwalukiila kwi Yehowa.​—Luuka 15:17.

Su muntu mutushibwe mu kakongye nyi mukwetu a mu kifuko? Yaaya nsaa, kipwano kya bwina kifuko nkilombeene kwikala bu kitompwanga kikata pabitale kululama. Mushindo kinyi autungu kushaala na mwina kifuko netu mutushibwe mu kakongye? Pano tatwi balombeene kwisambila pabitale myanda yooso nya, kadi tubande kutaluula myanda ibidi i na muulo ukata.

Ingi nsaa, yawa mwina kifuko netu abadi batuushe mu kakongye mulombeene kwikala kii mushale mu nshibo imune netu. Bu bi kutushibwa kwaye kwa mu kakongye takutshibi kifuko, atutungunuka na kukita naaye myanda yabakitaa mu kifuko kwifuku n’efuku. Anka, pa mwanda wa mulwisho waye, yawa muntu musangule kutshiba kipwano kyaaye na beena kifuko naaye mu myanda ya mu kikudi. Byabya su atukumina kulesha kululama kwetu kwi Yehowa tatwi bakumbeene kwibunga na mwina kifuko netu mutushibwe mu kakongye bwa kukita myanda itale lulangwilo lwetu bw’Efile Mukulu nya. Bu kileshesho, su mwina kifuko netu mutushibwe mu kakongye e panka, ta mukumbeene kwibunga netu bwa kulonga Bible mu kifuko nya. Byabya, su mwina kifuko mutushibwe mu kakongye ki mwana mukinga, baledi baaye mbalombeene kutungunuka na kumulongyesha mpa na kumupa malango. Na dingi, baledi basha kifulo mbalombeene kwata mpàngo ya kulonga Bible na mwan’aabo. *​—Myeele 6:20-22; 29:17.

Ingi nsaa mbilombeene kwikala shi, mwina kifuko mutushibwe mu kakongye ta mushaale mbalo imune na kifuko nya. Sunga abitungu kwimonena naaye munda mwa nsaa ipeela bwa kutala ingi  myanda i na muulo mu kifuko, kwakwa kwimonena tabitungu shi kwikale kwa nsaa yooso nya. Beena Kidishitu be mu kifuko kimune naaye ta mbalombeene kukimba kwibingisha pabitale akibatakula bwa kwikala abemonena na yawa muntu shi mushaale nabo mbalo imune. Anka, bu byabadi balulame ku meso kwa Yehowa na kwa ndumbulwilo aaye abakumiina kulamata ku abyamba Bifundwe pabitale kutuusha kwa muntu mu kakongye. Nshalelo abo a bu bantu balulame mulombeene kukuma eshimba dya muntu mutushibwe mu kakongye na kumukwasha bwashi apushe muulo wi nawo dinyoka dyabadi bamupe. *​—Beena-Ebreeyi 12:11.