Opwandikisha shi bi bukopo kukita myanda ibuwa su?— Bantu bebungi abapwandjikisha byabya. Bible etulungula shi ungi nsongwalume abetanyina bu Yosyase baadi na mufubo ukile bukopo. Kadi baadi na bakuuku bebuwa abaadi abamukwasha. Tubande kutaluula myanda itale Yosyase na bakuuku baaye.

Nshaaye na Yosyase nyi Aamone, nfumu a beena Yuuda. Aamone baadi muntu ebubi bukile na baadi alangwila ma nkishi. Nsaa ibafwile nshaaye na Yosyase, Yosyase bafikile nfumu a Yuuda. Kadi, baadi nka penda na bipwa mwanda! Opwandjikisha shi baadi muntu ebubi bu nshaaye su?— Nya, tabaadi byabya nya!

Nsaa ibaadi kii mwana mukinga, Yosyase baadi mukumiine kukokyela Yehowa. Ndjo aye nkwata kitshibilo kya kusangula bakuuku anka penda munkatshi mwa bantu bafule Yehowa. Na baaba bakuuku abaadi bakwashe Yosyase bwa kukita myanda ibuwa. Mbananyi abaadi bakuuku ba Yosyase?

 Umune a ku bakuuku baaye nyi Sofonii. Sofonii baadi mutemuki baadi adimusha beena Yuuda pabitale myanda ibubi ibaadi ilombeene kwibafwila su balangwila ma nkishi. Yosyase baadi ateemesha Sofonii na baadi alangwila Yehowa, tabaadi alangwila ma nkishi nya.

Ungi a ku bakuuku ba Yosyase baadi Yeelemiya. Abaadi beena mulongo na abaadi abetembesheena bu bibabadi abakulu pamune. Abaadi bakuuku bebuwa, nsaa ibafwile Yosyase, Yeelemiya nkufunda loono lwa pa bwalo pabitale mushindo ubaadi eedidi Yosyase. Yeelemiya na Yosyase abaadi bekwasheene bwa kukita myanda ibuwa na kukokyela Yehowa.

Kileshesho kya Yosyase akikulongyesha kinyi?— Pakibaadi Yosyase mwana mukinga, baadi akumiina kukita myanda ibuwa. Baadi auku shi mmulombeene kwikala kuuku a bantu bafule Yehowa. Abitungu osangule bakuuku bebuwa bafule Yehowa na balombeene nkukwasha bwa kukita myanda ibuwa!