Kwi bakwetu balume na bakashi ba kifulo:

Mu nimero eetu a Kitenta kya Mulami kya bantu booso kya mu 1/1/2008 mubabangile kutuuka mwisambo upya wi na mutwe wa mwanda awamba’shi: “Ambulayi lukumiino lwabo.” Kubanga nka paapa, tubaadi na muloo wa kubadika mwisambo umune wa ku yaaya miisambo kunyima kwa myeshi yooso isatu!

Bantu abaadi ababadika wawa mwisambo abaadi bakule naminyi? Kunyima kwa kubadika mwisambo awakwila mwanda wa Maata, ungi muntu bafundjile bino: “Nasepele ngofu panaadi mwiubadikye mwanda naadi nka bu’ye​—nsaa yooso nakuminaa kupeta benyi kadi naadi nayilwankana kubanda kuleka kufuba bwa’shi tubande kushaala na kutentekyesha nabo.” Ungi nsogwakashi baadi mwakule bino pabitale bibaadi mubale mu mwisambo wa Eshitele: “Twi balombeene kwata kitshibilo kampanda pabitale bilamba na nfwadilo. Abitungu kufwala kalolo, kadi t’abitungu kukishakisha nya.” Akumbasha dingi bino: “Yehowa atalaa kyakya kyatudi munda.” Na mwisambo ubaadi awakwila Mpyeele mutumibwa ubaadi utakule ungi mukwetu mukashi bwa’shi aakule bino: “Naadi mwiyine ngofu mu mwisambo. Bibaadi nka bu’mi baadi panka! Naadi munangusheene ngofu bwa kupusha kyakya kyabashii baleeshe musango umune mu maverse.”

Bano bakwetu​—mpa na bangi namu abaadi baleeshe lutumbu lwabo bwa ino miisambo​—abashinkamisha kibaadi Mpoolo mutumibwa mufunde’shi: “Bintu bioso bibaabadi bafunde kala babebifundjile bwa kwitulambukisha.” (Lom. 15:4, Kilombeeno kipya 2014) Ino myanda ibaabadi bafundjishe mu Bible kwi Yehowa ayitupa malango e na muulo. Ooso a kwatudi, sunga twekala bapwe kwisha sunga abatwele binobino mu bya binyibinyi, ino miisambo ngilombeene kwitukwasha.

Atukutekye boodya kubadika uno mukanda obe ky’eupete. Eulongyeyi mu Lulangwilo lwenu lwa mu kifuko, bana beenu abeusankila ngofu! Tokumanga kukisha efuku sunga ndimune su nukwete kwiulonga mu Kulonga kwa Bible mu kakongye! Ata nsaa ya kwiubadika kapeelakapeela. Tuma binangu byoobe kula; wepaane mu myanda yokwete kubala na binangu byobe byooso. Tompa kupusha bibaadi abipusha yawa muntu, na kumona kibaadi amono. Pwandjikisha bibaabadi bakite na bibyodya kukita namu pabitale wawa mwanda.

Twi na muloo wi kashaa wa kutuusha uno mukanda. Bakwetu balume na bakashi, atukulupila’shi awinusankisha ngofu, anwe mpa na bifuko byeenu byooso. Tambulayi myoyo yeetu ya kifulo.

Kasaka ka Bakunkushi-Bakulu ka Batemwe ba Yehowa