Mayi a nfudiilo
“Ambulayi baaba abakapiana kiakia kibalayilwe, pa lukumiino na lwishinko lwabo.”—BEENA-EBELU 6:12, Kilombeeno kipya 2014.
1, 2. Bwakinyi abitungu’shi tunyingishe lukumiino lwetu kubanga binobino? Tuusha kileshesho.
LUKUMIINO. Nyi nkishima akileesha eyikashi dibuwa. Anka, nsaa yatumono sunga yatupusha kino kishima, abitungu tunangusheene ku kingi kishima akilesha : “Bukidi bukidi!” Kya kumpala, su ta twi na lukumiino, abitungu twilukimbe bukidi bukidi. Na dingi su twi na lukumiino, abitungu twilulame na kwilutamisha. Bwakinyi?
2 Banda kunangusheena’shi otambuka mu kabaaka. Su we na lukalo lwa kupeta meema. Saa yopete ndambo ipeela, abitungu weyilame mu mutaala. Na dingi abitungu owushe kintu kyoobe kya meema bwa’shi amone bya nkufisha kwende. Lelo uno, twi mu kabaaka ka mu kikudi, mu ndumbulwilo mukutwe lukumiino lwa binyibinyi—nka bu meema—akwete kwenda na kukama na lupunga, su twe mwialame na kwela angi aapu. Abitungu tukite bukidi bukidi; nka bu byatushii balombeene kwikala na muwa su tatwi na meema, ngi bi kipwano kyeetu na Yehowa namu ta nkilombeene kwikala kwanka su ta twi na lukumiino.—Lom. 1:17.
3. Yehowa mmwitupe kinyi bwatudya kwibaka lukumiino lwetu, na mmyanda kinyi ibidi ayitungu’shi tulamiine?
3 Yehowa auku’shi abikyebe tukimbe lukumiino bukidi bukidi, na auku’shi bi bukopo kupeta lukumiino na kwilulama mu ano mafuku atudi. Nyi bwakinyi mmwitupe bileshesho bya bantu batudya kwambula. Yehowa baadi muyookyele Mpoolo mutumiibwa bwadya kufunda’shi: ‘Ambulayi baaba abakapiana kiakia kibalayilwe, pa lukumiino na lwishinko lwabo.’ (Eb. 6:12, Kilombeeno kipya 2014) Na dingi ndumbulwilo a Yehowa kwete kwitukankamika bwa kukita mwetu mooso bwa’shi twambule bileshesho bya balume na bakashi baasha lukumiino, bu bano babatulongo mu uno mukanda. Binobino abitungu tukite kinyi? Abitungu tulamiine ino myanda ibidi: (1) Tutungunukye na kunyingisha lukumiino lwetu; (2) tulame lukulupilo lwetu kalolo.
4. Satana mmuleeshe’shi mmushikwe lukumiino naminyi, kadi bwakinyi ta twi balombeene kumutshina?
4 Tungunuka na kunyingisha lukumiino loobe. Satana mmwishikwanyi mukata a lukumiino lwetu. Ba nfumu ba pa nsenga mbekashe uno ndumulwilo nka bu kabaaka akakamisha lukumiino. E na bukome kwitukila. Bino mbilombeene kwitutshinyisha’shi ta twi bya kutamisha lukumiino lwetu su? Nya! Yehowa nkuuku mukata a baaba booso abakimbi bya kwikala na lukumiino lushimate. Etushinkamiisha’shi bu byadi ku lupese lwetu, twi bya kushinamina Diabulu na kumubinga kula neetu! (Shak. 4:7) Atumushinamina p’atwe kwata nsaa efuku dyooso ya kutamisha na kunyingisha lukumiino lwetu. Mushindo kinyi?
5. Balume na bakashi baasha lukumiino ba mu Bible abaadi bapete lukumiino naminyi? Patuula.
5 Nka bu byatudi bebimone mu uno mukanda, balume na bakashi baasha lukumiino babadi baleeshe mu Bible tababaadi batandjikwe na lukumiino nya. Nshaleelo aabo aleesha kalolo’shi lukumiino lubaadi lufikye ku kikudi kiselele kya Yehowa. (Nga. 5:22, 23) Babatekyele bukwashi, na Yehowa namu baadi muyididiile na kunyingisha lukumiino lwabo. Twibambuleyi, tatulubanga’shi Yehowa apeyaa baaba booso abamutekye kikudi kyaaye na kalolo kooso na abetatshisha bwa kwikala na nshaleelo mwipusheene na nteko yaabo. (Luka 11:13) Kwi ingi myanda ayitungu’shi tukite su?
6. Bwa’shi tuukye bibungi mu kulonga kwetu kwa myanda ya mu Bible abitungu tukite kinyi?
6 Mu uno mukanda, twibesambile nka penda bileshesho bipeela bya bantu babaadi baleeshe lukumiino. Kadi kwi bangi bantu bebungi! (Badika Beena-Ebelu 11:32.) Kwi myanda ibungi yatudi balombeene kulongyela kwi muntu ooso baadi na lukumiino abadi besambile mu Bible kukatusha bano be mu uno mukanda. Abitungu twikale atukitshi luteko na kulumbuula mashimba eetu nsaa yatubadika na kulonga myanda ya bano bantu. Su tubekala atubadika kinundu-nundu myanda ya bantu basha lukumiino i mu Bible, lukumiino lwetu talukanyingi nya. Bwa’shi tuukye myanda ibungi mu kubadika kwetu, abitungu twate nsaa ya kukimba myanda ikata bu nshaleelo na mbalo ibaadi ikudile yawa muntu a mu Bible. Su tubauku’shi baaba balume na bakashi baasha lukumiino bakutwe kupwidika ‘babaadi bantu nka bu’twe,’ atukanyiisha kumona bileshesho byabo bu bya binyibinyi. (Shak. 5:17) Atuketuulu pa mbalo yaabo na kunangusheena bibaabadi abapusha pabaabadi bapete makyenga na myanda ibukopo ifwaneene na yeetu.
7-9. (a) Bangi bantu baasha lulamato ba mu Bible babadya kupusha naminyi pabitale kulangwila Yehowa bu byatumulangwila lelo uno? (b) Bwakinyi abitungu’shi tunyingishe lukumiino lwetu ku bikitshino?
7 Twi kunyingisha dingi lukumiino lwetu kukidila ku bikitshino byetu. Kya kumpala, “lukumiino lushii [na] bikitshiino ndufwe.” (Shak. 2:26) Banda kupwandjikisha muloo ubaadi ulombeene kupusha bantu batudi besambile, su Yehowa baadya kwibapa mudimo wadi mwitupe lelo uno!
8 Kileshesho, Abrahame badya kupusha naminyi su pamutwe pa kulangwila Yehowa bupenka pa bilambwilo bya mabwe atentekyesheene, amulangwila munkatshi mwa ndumbulwilo na kisaka kya balangwidi naaye mu Nshibo ya Bufumu ibuwa; na kutwela mu bikongeeno bikata, mwabakwete kupatuula kantu pa kantu milayilo yooso ibaadi mumone penda “ku bula”? (Badika Beena-Ebelu 11:13.) Na dingi, Eliya badya kupusha naminyi su pamutwe pa kwipaa batemuki ba Baale na kufubila Yehowa mu bufumu bwa nfumu mubi na musumbule lukumiino, babadya kumulungula’shi wekala walukiila mu kutala bantu bwa kwibalungula mukandu wa kwibakankamika na wa lukulupilo? Mu binyibini bano bantu baasha lukumiino babadya kwikala na muloo wa kulangwila Yehowa bu byatukitshi lelo uno.
9 Byabya tutungunukyeyi na kunyingisha lukumiino lwetu kukidila ku bikitshino. Su tubakitshi byabya, atukalondo bileshesho bya bantu baasha lukumiino be mu Eyi diyookyelwe dy’Efile Mukulu. Nka bu byabadi bebileeshe ku mbangilo, atukepusha bu’twe be peepi nabo na bu bakuuku betu. Yaya nsaa, kipwano kyetu akikekala kya binyibinyi.
10. Mmasanka kinyi atukapete mu Mpaladiiso?
10 Bamba lukulupilo loobe kalolo. Bantu baasha lukumiino abapetaa bukome nsaa yooso mu milayilo y’Efile Mukulu. Obe namu? Bu kileshesho, banda kwela meshi muloo okapusha pokafumankana na bafubi ba Yehowa abakapete dingi muwa nsaa ya “kusanguka kwa balulame.” (Badika Bikitshino 24:15.) Nkonko kinyi yokumiina nkebeela?
11, 12. Mu nsenga ipya, konko kinyi yoodi mulombeene kwipusha (a) Abele? (b) Nowa? (c) Abrahame? (d) Luuta? (e) Abigaile? (f) Eshitele?
11 Nsaa yokafumankana na Abele, okasankila kumwipusha bibaadi baledi baaye su? Sunga kumwipusha’shi: “Boodi wesamba na ba Kerubime babaadi abalama lupango lwa Edene? Babaadi bakwaluule su?” Pabitale Nowa, we nkamwipusha’shi: “Boodi opusha moo wa ba Nefilime su? Mmushindo kinyi uboodi mulame nyema yooso ibaadi mu bwato?” Su bofumankana na Abrahame, we kumwipusha’shi: “Boodi mwimoneene na Seme su? Nnaanyi baadi mukulongyeshe bwa kuuka Yehowa?” Bibaadi bikwelele bukopo bwa kukatuka mu Ure Su?
12 Mu mushindo umune, banda kutala ingi nkonko yodi mulombeene kwipusha bakashi basha lukumino abakasanguka bu: “Luuta, we kumwipusha’shi: Nkinyi kibaadi kikutakule bwa kufika mulangwidi a Yehowa?” “Abigaile: bwakinyi botshinyine kulungula Nabale pabitale biboodi mukwashe Daavide?” “Eshitele: Nkinyi kibenukitshikidile obe na Mardoshe kunyima kwa ino myanda i mu Bible?”
13. (a) Nkonko kinyi ilombeene nkwipusha bantu abakasanguka? (b) Opusha naminyi p’obe kuuka’shi okafumankana na bantu ba kala baasha lukumiino?
13 Byabya, bano bantu booso mbalombeene kwikala namu na nkonko ibungi ya kwitwela. Atukekala na muloo wibungi wa kwibalungula pabitale myanda ayikitshika mu ano mafuku a ku nfudiilo na mushindo ukwete Yehowa kwelela bafubi baaye myabi mu ano mafuku e bukopo! Kushii mpaka, abakekala na muloo wibungi wa kupusha bibaadi Yehowa mulombashe milayilo yaaye yooso. Mu nsenga ipya, tatukekala dingi na lukalakashi lwa kutentekyesha bafubi b’Efile Mukulu be mu Bible nya. Abakekala neetu pamune mu Mpaladiiso! Nyi bwakinyi tutungunukyeyi na kwikitshisha bwa kumona bano bantu bu bantu ba binyibinyi. Tuyididiileyi na kwambula lukumiino lwabo. Twikaleyi na muloo wa kufubila Yehowa mbwipi mwabo bu bakuuku beetu ba p’eshimba bwa ikalaika!
