Abrahame baadi mulongyeshe mwan’aye Isaake bwa kufula na kukulupila mu milayilo yooso ya Yehowa. Kadi pabafikile Isaake mu bipwa 25 Yehowa batekyele Abrahame bwa kukita kintu kibaadya kumwikeela bukopo bwa kulombasha. Bamulungwile bwa kukita kinyi?

Efile Mukulu baadi mulungule Abrahame shi: ‘Ata mwana oobe mulume umune eeleka, omundambule bu mulambu wa kushiikwa pa mwengye wa Mooriya.’ Abrahame tabaadi auku bwakinyi Yehowa bamutekyele bwa kukita byabya nya. Anka baadi mukookyele Yehowa.

Ku namashika pa kafito, Abrahame nkwata Isaake na bafubi baaye babidi abo nkwenda dya ku mwengye wa Mooriya. Abaadi balombeene kumona yaya myengye ku bula kunyima kwa mafuku asatu. Abrahame nkulugula bafubi baaye bwabadya kwibatengyela paabende na Isaake mu kutuusha mulambu. Abrahame nkupa Isaake kiita kya nteete, Abrahame nabeene nkukwata lupete. Isaake nkwipusha nshaye shi: A ‘nyema atukalambula e kunyi?’ Abrahame nkumwaluula shi: Mwan’ande, ‘Yehowa etupa anka.’

Pababafikile ku mwengye, abaadi bebakye kilambwilo. Akupu Abrahame nkwanya Isaake myooshi ku maboko, aye nkumuladisha pa kilambwilo.

Abrahame nkwata lupete. Mwikeyilu a Yehowa nkumwitamina musango umune mwiyilu na kumulungula shi: ‘Abrahame! Totapanga nsongwalume nya! Binobino nauku shi otshiinyi Efile Mukulu, mwanda bokumiina kulambula mwana  oobe eeleka.’ Akupu Abrahame nkwibwesha meeso, aye nkumona mukooko ulume ukwatshikye nsengwa mu ntabi ya mutshi. Aye nkwangula bukidi Isaake myooshi na kulambula mukooko pamutwe pa Isaake.

Kubanga’nka dyadya efuku, Yehowa nkwitanyina Abrahame bu kuuku aaye. Ouku bwakinyi? Mwanda Abrahame baadi akitshi kyoso kibaadi akikumiina Yehowa mpa na pashibaadi apusha bwakinyi Yehowa amutekye bwa kukita byabya.

Yehowa nkulungula dingi Abrahame mulayilo waye shi: ‘Nakyebe nkusampa, na kufiimisha bana boobe sunga lutandwa loobe.’ Bino abilesha shi Yehowa baadi na kya kwelela bantu booso bebuwa myabi kukiila ku kifuko kya Abrahame.