Yehowa baadi mulungule Moyiise shi: ‘Kaamina kwandji ku mwengye. Bwa shi nkupe mabwe a mayi na miiya byandji mufunde.’ Moyiise nkukaamina ku mwengye, aye nkushaala kwanka munda mwa mafuku 40. Pabaadi kwakwa, Yehowa bafundjile Miiya ekumi ku mabwe abidi eyipa Moyiise.

Kunyima kwa mafuku, beena Isaleele abamwene shi Moyiise baapu kwibasuuka. Abo nkulungula Aarone shi: ‘Atukimbi muntu a kwitukunkusha. Etukitshiine efile!’ Aarone nkwakula shi: ‘Katushaayi tudibu na bikano bya oòlò nwibintwadile.’ Aye nkwibisungulusha, nkukita nkishi a mwana a ngombe. Beena Isaleele nkwakula shi: ‘Uno mwana a ngombe nyi Efile eetu mwitutuushe mu Ejiipitu!’ Abo nkubanga kulangwila mwana a ngombe na kumutentekyesha. Abakitshiine biibubi su? Oolo, mwanda abapwile kulaa bwa kulangwila nka penda Yehowa. Kadi binobino abakutwa kulombasha wawa mulayilo.

 Yehowa bamwene bibaabadi bakite, aye nkulungula Moyiise shi: ‘Alaala kwi mwilo. Abakutwa kunkookyela p’abo kulangwila efile a madimi.’ Moyiise nkuyika ku mwengye mutwale mwabwe abidi a Miiya.

Pabaadi Moyiise mwifubwile peepi nabo, bapushile bantu abayimbi. Aye nkwibamona abashi na kukunamina mwana a ngombe. Moyiise nkufiita munda bikata. Aye nkusumbula mabwe abidi a Miiya mu nsenga, awo nkutanyika tupesetupese. Moyiise nkulwisha yawa nkishi. Akupu, aye nkwipusha Aarone shi: ‘Nkinyi kibakukitshi uno mwilo boodya kwibatadiila shi bakite uno mwanda wi bino?’ Aarone kwakula shi: ‘Tokambanga kufiita munda. Owuku’be nabeene bi uno mwilo. Abakimbanga efile, ami nkwata byamo byabo bya oolo, ne byela mu kaalo, abyo nkutuusha uno mwana a ngombe!’ Aarone tabaadya kukita byabya nya. Moyiise nkwalukiila ku mwengye bwa kuteka Yehowa bwa shi afwile mwilo waye lusa.

Yehowa nkufwila baaba booso babaadi bakumiine kumukookyela lusa. Boomono bwakinyi bibaadi na muulo bwa beena Isaleele kulonda bukunkushi bwa Moyiise su?