Kunyima kwa Daavide kwipaa Golyate, Nfumu Saule bamutudile bu nfumu a kilwilo kyaye. Daavide baadi mutshokole ngoshi misango ibungi, aye nkwenda nkumo. Pabaadi Daavide mwalukile mu kulwa ngoshi, bana bakashi abafikile na kusha na kuyimba na kwakula shi: ‘Saule mwipee binunu, Daavide namu nkama ya binunu!’ Saule baadi mukwatshile Daavide kyutu abanga kukimba bya kumwipaa.

Daavide baadi ayimbi na lunseese kalolo. Dingi efuku pabaadi ayimbila Saule, Nfumu belele Daavide mulumbu. Anka Daavide baadi mwepe, ao nkukashimata ku mudimba. Kubanga’nka paapa, Saule bakimbile bipaso bibungi bwa kwipaa Daavide. Daavide basuukile aye nkafwama mu kabaaka.

Saule baatshile kilwilo kya bantu 3000 bwa kukimba Daavide. Saule batwelele mu lubwebwe mubaadi Daavide na bantu baaye bafwame. Bantu ba Daavide nkumulungula  shi: ‘Nyi efuku dilombeene shi oipaa Saule dino.’ Daavide nkwenda bipeelabipeela kwi Saule, aye nkutshiba lwembe lwa kikotshi kya nfumu. Saule tabaadi muukye nya. Akupu, Daavide bapushiishe bibubi shi tamuleeshe kanemo kwi nfumu mwediibwe mwimu a Yehowa nya. Daavide tabaadi mutadiile bantu baaye bwabadya kulwa na Saule nya. Baadi mpa na mwitanyine Saule, amulungula shi baadya kumwipaa pa kwikeele mushindo. Saule baadi mushintuule binangu byaye pabitale Daavide su?

Nya. Baadi’nka akimbi kwipaa Daavide. Dingi efuku bufuku, Daavide na mwipwa aaye Abishai abatwelele bipeela bipeela pa mbalo ibaadi Saule. Mpanka na Abenere mulami a Saule baadi mulaale. Abishai nkwamba shi: ‘Mmwabi wetu uno! Ntadiile mwipee.’ Daavide nkumwaluula shi: ‘Yehowa nabeene amwipaa. Ata nkapenda mulumbu waye na kasupa kaye ka meema twende.’

Daavide nkukaamina pa bwipi na mwengye bwa kwilamina mbalo ibaadi Saule. Beelele musaase shi: ‘Abenere, bwakinyi twe mulame nfumu oobe? Mulumbu wa Saule na kasupa kaaye ka meema bikunyi?’ Saule batundwile eyi dya Daavide aye nkwakula shi: ‘Bodya kungipaa, anka twe mungipee nya. Neuku shi nnobe ayikala nfumu mu Isaleele.’ Saule baadi mwalukye ku nshibo yaaye. Ta mbeena kifuko kyoso kya Saule babaadi bashikwe Daavide nya.