Kubaadi butaale mu Isaleele munda mwa mafuku ooso abaadi Salomone alangwila Yehowa. Anka Salomone baadi mwibakile bakashi bebungi ba mu angi maumbo, abaadi abalangwila ma nkishi. Ku kapeela kapeela, Salomone baadi mushintulukye, abanga kulangwila naye namu ma nkishi. Yehowa baadi mufiite munda. Aye nkumulungula shi: ‘Isaleele akatshibuulwa ku kifuko kyobe, akeabuula mu bipindji bibidi. Kipindji kikata nakekipa umune a ku bafubi boobe, anka kifuko kyobe akimunana kapindji kapeela.’

Yehowa baadi mupatuule kitshibilo kyaye mu ungi mushinido. Umune a ku bafubi ba Solomone Yeroboame, baadi ende mwishinda, aye nkufumankana na mutemuki Abiya. Abiya nkusaana nkandjo aaye mu tupese 12, aye nkulungula Yeroboame shi: ‘Yehowa akakatusha bufumu bwa Isaleele mu kifuko kya Salomone na kwibwabuula pabidi. Ata bipindji ekumi, mwanda nnobe akekala nfumu mu bisamba ekumi.’ Nfumu Salomone pabaadi mupushe uno mwanda, bakimbile bya kwipaa Yeroboame! Yeroboame nkusuuka, nkwenda mu Ejiipitu. Salomone bafwile, kadi mwana aaye Roboame nkumupyaana bu nfumu. Akupu Yeroboame nkupusha shi bibaadi na muulo bwadya kwalukiila mu Isaleele.

 Bakulu ba mu Isaleele abaadi balungule Roboame shi: ‘Su okunkusha bantu bibuwa, abakukookyela.’ Kadi ba kuuku baaye ba nsongwalume nkumulungula shi: ‘Abitungu kwikala n’eyiso dibukopo kwi mwilo! Ebafubishe bibukopo!’ Roboame nkukookyela elango dya ba kuuku baaye. Baadi na bukyelo kwi mwilo, ao nkumutombokyela. Abaatuudile Yeroboame bu nfumu a bisamba ekumi, abaadi abebwiuku bu bufumu bwa Isaleele. Bino bingi bisamba bibidi abaadi abebiwuku bu bufumu bwa Yuda, bibaadi bishaale na lulamato kwi Roboame. Bisamba 12 bya Isaleele bibaadi biabuule.

Yeroboame tabaadi akumiina shi mwilo waye ukalangwile ku Yelusaleeme kubaadi bufumu bwa Roboame nya. Weuku shi mbwakinyi? Yeroboame baadi atshinyi shi tala mwilo waye wamupela bwa kukwatshisheena Roboame. Bakitshiine twana twa ngombe twa oolo tubidi alungula mwilo shi: ‘Yelusaleeme ee kula kukile. Nwi kulangwila pano.’ Mwilo nkubanga kulangwila twatwa twana twa ngombe abo nkuyilwankana dingi Yehowa.