Bufumu bwa beena Aasiriya bubapwile kumuna bufumu bwa bisamba ekumi bwa beena Isaleele. Senakeribe nfumu a beena Aasiriya baadi akimbi kumuna bufumu bwa bisamba bibidi bya Yuuda. Babangile kukwata bibundji bya Yuuda kimune ku kimune. Kadi Yeelusaleme nyi kibundji kibaadi mukumiine bikata. Anka Senakeribe tabaukanga shi Yehowa kwete kukalwila Yeelusaleme.

Esekiya nfumu a Yuuda nkufuta Senakeribe nfwalanga ibungi bwadya kuleka penda Yeelusaleme. Sunga byekala shi Senakeribe batshile nfwalanga, baadi’nka atumu basalayi baaye bwa kukwata Yeelusaleme. Beena kibundji ababangile kupusha moo, mwanda beena Aasiriya abaadi abefubwila peepi nabo. Esekiya nkwibalungula shi: ‘Tanutshinanga. Beena Aasiriya be bukome, anka Yehowa eetwikasha na bukome bwibakile.’

Senakeribe nkutuma Rabishake bu mukyendji waye ku Yeelusaleme, bwa kusaabuula mwilo. Rabishake nkwimana paasha pa kibundji aye nkubanga kwela musaase shi: ‘Yehowa ta mulombeene kwinukwasha. Tanulekanga Esekiya bwadya kwinudimba. Takwi efile e kwinupaasha kwatudi nya.’

Esekiya bayipwishe Yehowa kya kukita. Yehowa nkumwalula shi: ‘Tanutshinanga abyamba Rabishake. Mwanda Senakeribe t’aata Yeelusaleme nya.’ Akupu Esekiya bapetele mikanda ayifiki kwi Senakeribe. Ibaadi ayakula shi: ‘Katuka ku bufumu. Yehowa t’akupaasha nya.’ Esekiya belele luteko shi: ‘Yehowa, etupaashe namu bwa shi bantu booso baukye shi nka pend’obe nyi Efile Mukulu a binyibinyi.’ Yehowa nkumulungula shi: ‘Nfumu a beena Aasiriya t’atwele mu Yeeluseleme nya. Nakalwila lupata lwande.’

Senakeribe bamwene shi akyebe kwata Yeelusaleme. Kadi mu bufuku bumune, Yehowa batumine mwikeyilu mbalo ibaadi basalayi paasha  pa lupata. Yawa mwikeyilu nkwipaa basalayi 185000! Nfumu Senakeribe nkushimisha basalayi baaye. Tabaadi na kya kukita nya, aye nkwalukiila ku nshibo na buufu. Yehowa nkukalwila Esekiya na Yeelusaleme nka bu bibaadi mwibilee. Su boodya kwikala mu Yeelusaleme aa mafuku, boodya kukulupila mwi Yehowa su?