Miiya y’Efile Mukulu ngimene pa mayi a kulonda. Ano mayi a kulonda ngemene mu bya binyibinyi bya mbangilo bya mu Bible. Aetukwasha bwa kupusha bi binangu by’Efile Mukulu na byapushaa pabitale myanda. Akwete dingi kwitukwasha bwa kwata bitshibilo bi buwa mu nshalelo eetu na kukita myanda ilulame. Aetukwashaa bikishekishe mu myanda yabashi bakambe kwakwila mu miiya y’Efile Mukulu.

▸ Shapitre 1, kikoso 8

Kukookyela Yehowa akulesha, kukumiina kukita kyakya ky’etutekye shi tukite. Yehowa akumiina shi tumukookyele mwanda twibamufule. (1 Yowano 5:3) Su twibafule na kukulupila mwi Efile Mukulu, atutumikila malango aaye mu myanda yoso. Atumukookyela mpa na mu nshalelo e bukopo. Bi buwa tukookyele Yehowa, mwanda kwete kwitulongyesha bya kwikala na nshalelo e buwa binobino, na dingi mmwitulee shi aketwelela myabi i bungi mu mafuku aafiki.—Yeeshaya 48:17.

▸ Shapitre 1, kikoso 10

Yehowa mmupe muntu oso bulungantu, sunga ngobesha ya kwisangwila. Ta mwitupangye bu ba robot nya. (Miiya Ikituulwe 30:19; Yoshwa 24:15) Twi kufubisha bulungantu bwetu bwa kusangula myanda i buwa. Kadi su twakutwa kudimuka, twikukutwa kwata bitshibilo bi buwa. Kwikala na bulungantu akulesha shi abitungu atwe banabene twate kitshibilo su atukumiina kwikala na lulamato kwi Yehowa na kulesha shi twibamufule binyibinyi.

▸ Shapitre 1, kikoso 12

Yehowa mmwele miiya itale mwikelo wi buwa, sunga bukunkushi, pabitale mwikelo na bikitshino byetu. Twi kwiyilonga mu Bible na kumona byayidi ilombene kwitukwasha bwa kwikala na nshalelo e buwa. (Nkindji 6:16-19; 1 Beena-Kodinda 6:9-11) Ino miiya ayitukwasha bwa kuuka  byabamonaa myanda i bubi na i buwa kwi Efile Mukulu. Dingi ayitukwasha bwa kuuka bya kwikala na kifulo, bya kwata bitshibilo na binangu, na kwikala na kalolo kwi bangi. Sunga shi mu uno ndumbulwilo bantu tabakwete kwata miiya itale mwikelo wi buwa na muulo, miiya ya Yehowa ta ngishintulukye. (Miiya Ikituulwe 32:4-6; Malaki 3:6) Su tweyilonda ayitukalwila ku masaku a ku mbidi na a mu binangu.

▸ Shapitre 1, kikoso 17

Kondo k’eshimba nyi ngobesha ya ku butandwa ya kushinguula ki buwa na ki bubi. Yehowa mmupe oso a kwatudi kondo k’eshimba. (Beena-Looma 2:14, 15) Bwa shi kondo k’eshimba ketu kafube kalolo, abitungu twikalongyeshe muyile miiya itale mwikelo wi buwa ya Yehowa. Paapa, aketukwasha bwa kwata bitshibilo abisankisha Efile Mukulu. (1 Mpyeele 3:16) Kondo ketu k’eshimba ke kwitudimusha nsaa yatukyebe kwata kitshibilo ki bubi, sunga shi ke kukita bya shi twinyongole ngofu kunyima kw’atwe kukita mulwisho kampanda. Kondo ketu k’eshimba ke kubofula, kadi na bukwashi bwa Yehowa, ke kunyinga dingi. Kondo k’eshimba ke buwa, aketupa butaale bwa mbinangu na kinemo.

▸ Shapitre 2, kikoso 3

Kutshina Efile Mukulu akulesha, kumufula na kumunemeka byatusha kukita kintu kilombene kumwinyongosha. Kutshina Efile Mukulu akwitukwasha bwa kukita myanda i buwa na kupela kukita myanda i bubi. (Misambo 111:10) Akwitutakula bwa kutemesha byoso abitulungula Yehowa kalolo. Akwitukwasha bwa kulombasha mitshipo yetu kwadi mwanda tukwete kumunemeka ngofu. Kutshina kw’Efile Mukulu kwi na bukitshishi mu ngyelo eetu a binangu, mu kipaso kyatukitshina bangi myanda, na ku bitshibilo byatwata efuku dyoso.

▸ Shapitre 2, kikoso 9

Kwilanga kwishimba nkutale dingi nkwinyongola kwa muntu mwanda wa mulwisho ubakitshi. Baaba bafule Yehowa abenyongolaa bikata  nsaa yabatundula shi, abakitshi mwanda kampanda ubatupilwa ku miiya yaye. Su twakita mulwisho kampanda, abitungu tutekye Yehowa na kumwisendela bwa shi etufwile lusa ku bukwashi bwa mulambu wa nkuulo wa Yesu. (Mateo 26:28; 1 Yowano 2:1, 2) Nsaa yatwilanga kwishimba mu binyibinyi na kuleka kukita myanda i bubi, twibalombene kushinkamisha shi Yehowa etufwila lusa. Paapa, tabitungu twikale nka atwitopeka bwa mulwisho upwe kukila. (Misambo 103:10-14; 1 Yowano 1:9; 3:19-22) Abitungu tukite mwetu moso, bwatudya kulongyela ku bilubilo byetu, tukatushe binangu byoso bi bubi, bwa shi twikale na nshalelo mwipushene na miiya ya Yehowa.

▸ Shapitre 2, kikoso 18

Su muntu mukite mulwisho ukata apela kwilanga na kulonda miiya ya Yehowa, te bya kushala mu kakongye. Abitungu kumutuusha. Su muntu batuushibwa mu kakongye, tatwikala naye dingi mu kipwano sunga kwisamba naye nya. (1 Beena-Kodinda 5:11; 2 Yowano 9-11) Mpàngo ya kutuusha muntu mu kakongye, ayikalwila eshina dya Yehowa na kakongye. (1 Beena-Kodinda 5:6) Kutuusha muntu mu kakongye nyi dinyoka dilombene kukwasha muntu bwa kwalukila kwi Yehowa.—Luka 15:17.

▸ Shapitre 3, kikoso 19

Yehowa mmwitufule na akumiina kwitukwasha. Nyi bwakinyi kwete kwitupa bukunkushi na malango ku bukwashi bwa Bible na bwa bantu bamufule. Bu byatudi bantu bakutwe kupwidika, twi na lukalo lukata lwa buno bukwashi. (Yeelemiya 17:9) Su twatemesha baaba babakwete kufubisha kwi Yehowa bwa kwitukunkusha, atulesha shi tukwete kumunemeka na shi atukumiina kumukookyela.—Beena-Ebelu 13:7.

▸ Shapitre 4, kikoso 2

Bu byatudi bantu bakutwe kupwidika, mbibofule bwatudya kwitatula. Kadi Yehowa akumiina shi twikale na kwiyisha. Byabya, atubangaa kulonga bya kwiyisha nsaa yatwipwandikisha na Yehowa na kumona shi twibashadile ngofu kwadi. (Yoobo 38:1-4) Kingi kintu ki na muulo ukata akilesha kwiyisha nyi nkuuka bya kunangushena ngofu pabitale bangi na kwibakitshina myanda i buwa kushi kutala penda nkalo yetu. Kwitatula akutakulaa bangi mu kwimona bu be na muulo ukata kukila bangi. Muntu e na kwiyisha etaluulaa kyadi binyibinyi na kutundula pe kunyinga na kubofula kwaye. Tapushaa bufu bwa kukumiina bilubilo byaye, kuteka lusa na kukumiina binangu byabamupa na malango nya. Muntu sha kwiyisha akulupilaa mwi Yehowa na kulonda bukunkushi bwaye.—1 Mpyeele 5:5.

▸ Shapitre 4, kikoso 4

Bukunkushi nyi matalwa a kutumina bangi mayi na kwata bitshibilo. Yehowa ndjo e na matalwa e kunundu kwa boso mwiyilu na pa nsenga. Bu byadi mupangye bintu byoso, aye nyi e na bukome bukile byoso mwiyilu na pa nsenga. Afubishaa matalwa aaye misusa yoso bwa kukwasha bangi. Yehowa mmupe bangi bantu bushito bwa kwitupasukila. Bu kileshesho, baledi, bakulu ba mu kakongye, dingi mbulamatadi e na matalwa kampanda, nyi bwakinyi akumiina shi twikale atwibakookyela. (Beena-Looma 13:1-5; 1 Timote 5:17) Kadi su miiya ya bantu ayikyebe kutabuka miiya y’Efile Mukulu, atukookyela Efile Mukulu pe kukookyela bantu. (Bikitshino 5:29) Nsaa yatukumiina kukookyela baaba babadi bape matalwa kwi Yehowa, atulesha shi tukwete kunemeka bitshibilo byaye.

▸ Shapitre 4, kikoso 7

Yehowa afubishaa bakulu, bakwetu balume abauku myanda i bungi, bwa kupasukila kakongye. (Miiya Ikituulwe 1:13; Bikitshino 20:28) Bano bakwetu balume abetukwasha bwa kulama kipwano kyetu na Yehowa ki  bukopo na kumulangwila mu butaale na mu kipaso ki buwa. (1 Beena-Kodinda 14:33, 40) Bwa shi kikudi kisangule muntu bu mukulu, abitungu abande kulombasha myanda itekibwe mu Bible. (1 Timotee 3:1-7; Tito 1:5-9; 1 Mpyeele 5:2, 3) Twi bakumiine na tukwete kukwatshishena ndumbulwilo a Yehowa, byabya abitungu twikale atukookyela bakulu.—Misambo 138:6; Beena-Ebelu 13:17.

▸ Shapitre 4, kikoso 8

Yehowa mmupe baledi bushito bwa kupasukila bana babo na ba mu nshibo mwabo. Anka, Bible alesha shi nfumu a kifuko nyi mulume. Su nshebana te penka, nyinabana nyi nfumu a kifuko. Mashito a nfumu a kifuko ngatale bidibwa, bilamba, na nshibo. Bi na muulo bwa shi ate mpàngo ya kukwasha kifuko kyaye bwakidya kulangwila Yehowa. Bu kileshesho, abitungu ekale mushinkamishe shi bakwete kutwela mu bisangilo, kwenda mu bulungudi, na kulonga Bible pamune. Dingi nfumu a kifuko ataa bitshibilo. Etatshishaa bwa kwambula Yesu pa kwikala na kalolo na nkatshinkatshi, kushi kwikala na kikiso sunga kutapa bangi ku mashimba. Bino abikwasha bwa kutwesha muloo, bwa shi muntu oso ekale mu kukalwilwa na anyingishe kipwano kyaye na Yehowa.

▸ Shapitre 4, kikoso 12

Kasaka ka Bakunkushi-Bakulu nyi kasaka ka bantu be na lukulupilo lwa kwenda mwiyilu babakwete kufubisha kwi Efile Mukulu bwa kukunkusha mufubo wa bafubi baye. Mu siekle a kumpala, Yehowa baadi mufubishe Kasaka ka Bakunkushi-Bakulu bwa kukunkusha kakongye ka bena Kidishitu ba kumpala, mu lulangwilo lwabo na mudimo wa bulungudi. (Bikitshino 15:2) Lelo uno, bakwetu balume abafubu mu Kasaka ka Bakunkushi-Bakulu, bakwete kukunkusha na kukalwila mwilo w’Efile Mukulu. Nsaa yabata bitshibilo, abakulupilaa mu bukunkushi bwa Mwiyi dy’Efile Mukulu na mu kikudi kyaye. Yesu baadi mwitamine kano kasaka ka bedibwe mwimu shi “Mpika a kishima na mupatulukye.”—Mateo 24:45-47.

▸ Shapitre 4, kikoso 15

Ingi nsaa, mbalombene kuteka mukwetu mukashi bwa kukita mudimo kampanda wabakitaa kwi bakwetu balume. Nsaa y’akitshi uno mudimo, mmulombene kulesha kanemo bwa mpàngo ya Yehowa pa kuputa ku mutwe. Kadi ta mu myanda yoso amutungu shi apute ku mutwe nya. Bu kileshesho, su mukwetu mukashi e mu bulungudi na mulume aaye sunga ungi mukwetu mubatshishibwe, mmulombene kuputa ku mutwe.—1 Beena-Kodinda 11:11-15.

▸ Shapitre 4, kikoso 17

Kupela kutwelakana mu myanda ya politike, akulesha kupele kulamata ku lupese kampanda mu myanda ya politike. (Yowano 17:16) Bafubi ba Yehowa abakwatshishenaa Bufumu bwaye. Tatutwelakanaa mu myanda ya pa nsenga, nka bu bibaadi Yesu.

Yehowa mmwitutekye bwa ‘kukookyela bamfumu be na matalwa.’ (Tite 3:1, 2; Beena-Looma 13:1-7) Kadi mwiya w’Efile Mukulu awamba shi, tabitungu kwipaa muntu. Byabya, kondo k’eshimba ka mwina Kidishitu ta nkalombene kumutadiila shi, ende mu kulwa ngoshi. Su mwina Kidishitu apeta mudimo ukyebe kwipushena na wa busalayi, abitungu ataluule kalolo su kondo kaye k’eshimba nkalombene kumutakula bwa shi eufube.

Atulangwilaa penda Yehowa, mwanda aye ndjo Mupangi eetu. Sunga shi atuleshaa kanemo bwa ebendela, tatwibalombene kwiditshibila mpala sunga kuyimba loono lw’eumbo nya. (Yeeshaya 43:11; Ndanyele 3:1-30; 1 Beena-Kodinda 10:14) Dingi, mufubi a Yehowa ataa kitshibilo kya kupela kwela tukanda aye nabene. Mwanda, bafubi ba Yehowa mbapwe kusangula Bufumu bwaye.—Mateo 22:21; Yowano 15:19; 18:36.

▸ Shapitre 5, kikoso 2

Uno ndumbulwilo kwete kukwatshishena binangu bya Satana. Bino binangu mbipalakane mwi bantu boso bashi bafule sunga kwambula Yehowa na bash’abatumikila miiya yaye. (1 Yowano 5:19) Byabya binangu na bikitshino  byabo abilesha kikudi kya pa nsenga. (Beena-Efeso 2:2) Bafubi ba Yehowa abauku kalolo shi kyakya kikudi ta nkilombene kwibakambila nya. (Beena-Efeso 6:10-18) Anka twi bafule mashinda a Yehowa na tukwete kwitatshisha bwa kunangushena bu’ye.

▸ Shapitre 5, kikoso 7

Kusumbula lukumiino nyi nkulwisha bya binyibinyi bya mu Bible. Bantu Basumbule lukumiino, mbantu batombokyele Yehowa na Yesu abadi basangule bwa kwikala Nfumu mu Bufumu bw’Efile Mukulu, na abakakaa bangi bwa shi bebalonde. (Beena-Looma 1:25) Abakumiinaa kutwesha mpaka mu mashimba a balangwidi ba Yehowa. Bangi bantu ba mu kakongye ka bena Kidishitu ba kumpala, abafikile bu bantu basumbule lukumiino, lelo uno namu mbilombene kukitshika. (2 Beena-Tesalonika 2:3) Bano balamate kwi Yehowa, tabakumiinaa sunga nkapela kwikala mu kipwano na bantu basumbule lukumiino nya. Tabitungu tutadiile bangi bantu sunga lukalo lwetu lwa kuuka myanda bitutakule mu kubadika, sunga kutemesha myanda ya bantu basumbule lukumiino. Atukumiina kulamata kwi Yehowa na kumulangwila nka penda aye.

▸ Shapitre 5, kikoso 9

Mu mwiya wa Moyise, bena Isalele abaadi batekye Yehowa bwa shi ebalekyele milwisho yabo. Abaadi abatwala milambu ya ntete, mwimu, na nyema ku ntempelo. Bino bibaadi abibatentekyesha shi Yehowa baadi akukumiina kwibafwila lusa ku milwisho yabo, ya muntu pa bupenka sunga ya mwilo ushima mu kibungi. Kunyima, Yesu bafikile atuusha muwa waye bwa kushimisha milwisho yetu, byabya, yaya milambu tayikii dingi na muulo nya. Yesu baadi mutuushe mulambu upwidikye “mususa umune bwa loso.”—Beena-Ebelu 10:1, 4, 10.

▸ Shapitre 7, kikoso 6

Mu mwiya wa Moyiise, abapele bantu matalwa a kudya nyema. Abaadi abebatekye dingi bwa kulambula milambu ya nyema. (Beena-Levi 1:5, 6)  Kadi Yehowa baadi mukandikye bafubi baye shi tabakyengyeshanga nyema nya. (Nkindji 12:10) Mwanda, mu Mwiiya mwi mayi a kulonda aapelesha kukyengyesha nyema. Abaadi belele beena Isalele mwiiya wa kupasukila nyema yabo.—Miiya Ikituulwe 22:6, 7.

▸ Shapitre 7, kikoso 6

Tuntu tupela twa mu mase. Mase ngakitshibwe na bipindji bikata binanka—byabetamina bu globile monga, globile tooka, plakete, na plasma. Bino bipindji bikata be kwibitshibuula mu tubipindji tupela twabetamina bu tuntu tupela twa mu mase. *

Bena Kidishitu abapelaa kwibela mase sunga kimune kya ku bipindji bikata binanka bya mase. Kadi mbalombene kukumina tuntu tupela twa mu mase su? Bible tamwakwile wawa mwanda nya. Anka, abitungu mwina Kidishitu oso, aate kitshibilo muyile abimulesha kondo kaye k’eshimba kalongyeshibwe kalolo na Bible.

Bangi bena Kidishitu abapelaa tuntu toso tupela twa mu mase. Mwanda abamba shi Mwiya ubaadi Yehowa mwelele bena Isalele ubaadi autekye bwa kukatusha mase oso a nyema na ‘kwiasukumuna mu Nsenga.’—Miiya Ikituulwe 12:22-24.

Bangi namu be kukumiina tungi tuntu tupela twa mu mase. Kondo kabo k’eshimba takebatopeka nya. Mwanda abamba shi tuntu tupela twa mu mase tatulesha muwa wa kipangwa kwabadi baate mase nya.

Nsaa ywata bitshibilo pabitale tuntu tupela twa mu mase, taluula ino nkonko:

• Nauku shi kupela tuntu toso tupela twa mu mase, akulesha shi napele ingi mishindo ya kwibukisha ayipasha mukumbo sunga ayimika kutuka kwa mase?

•   Mbikunyi byandya kupatulwila munganga bwakinyi tankumina tuntu tupela twa mu mase?

Mishindo ya kwibukisha. Bu byatudi bena Kidishitu, tatupaa bantu mase, sunga kulama mase eetu mbalo kampanda kumpala kwa shi baketubale. Kadi, kwi ingi mishindo ya kwibukisha yabafubishaa mase a muntu nabene. Abitungu mwina Kidishitu oso ate kitshibilo aye nabene pabitale kipaso kyabafubu na mase aaye nsaa yabamubaala, yabamupimi sunga ingi mishindo ya kubukibwa. Mu yaya mishindo ya kubukibwa, abatushaa mase oso a muntu pasha munda mwa nsaa bungi kampanda.—Bwa kuuka ingi myanda, tala Kitenta kya mulami, kya 15/10/2000, masaki 30-31 mu nfwalanse.

Bu kileshesho, kwi kipaso kya kwibukisha kyabetamina bu hémodilution, su tababaala muntu, ababandaa kukatusha ndambo ya mase aaye, na abele bintu bya kufwimisha mase pa mbalo ya mase ababakatusha. Kunyima, kwa’bo kumubaala, abamwalusha anka dingi.

Kingi kipaso, nkya kusangula mase oso abatuuku. Mu kino kipaso kya kubuka, abataa mase oso ekele atukye nsaa yababaalanga muntu, abeasuula na kumwalusha anka nsaa yabamubaala sunga kapindji kapela kunyima.

 Doktere ese e kufubisha ino mishindo ya kwibukisha mu bipaso bilekene. Byabya, kumpala kwa kukumiina kipaso kyoso kya kubaadibwa, kya kwipimisha sunga kya kwibukisha, abitungu mwina Kidishitu ashingule kalolo byabakyebe kufuba na mase aaye.

Nsaa ywata bitshibilo pabitale mishindo ya kwibukisha yabafubisha mase oobe, taluula ino nkonko:

• Su ndambo ya mase ande yatuuka, akupu yaleka kutuka, konde kande k’eshimba ke kukumiina shi ntungunukye na kumona aa mase bu ande na kulungula bantu shi tabakumanga ‘kwiapongoola mu nsenga”?—Miiya Ikituulwe 12:23, 24.

• Su nakumiina mushindo wa kwibukisha wabata mase ande, bealuule na kwiangalusha dingi, kondo kande k’eshimba kalongyeshibwe na Bible ke kuntopeka su?

• Nauku shi, kupela mishindo yoso ya kwibukisha yabafubisha mase ande akulesha shi, tankumiina kipimo kya mase, kwiakisha mu kyamo, sunga kufubisha kyamo kyabakashaa nakyo mase mwishimba na kwialusha kunyima kwa’bo kubaala?

Kumpala kwa kwata kitshibilo pabitale tuntu tupela twa mu mase, na ingi mishindo ya kwibukisha yabafubisha mase, abitungu tutekye bukunkushi kwi Yehowa na tukimbuule. (Shake 1:5, 6) Kunyima, abitungu tufubishe kondo ketu k’eshimba kalongyeshibwe na Bible bwa kwata kishibilo. T’abitungu  shi twipushe bangi kibabadya kukita su bekala na mwanda bi wetu, sunga kwibatadila shi betwatshile kitshibilo.—Beena-Looma 14:12; Beena-Ngalatea 6:5.

▸ Shapitre 7, kikoso 11

Kwikala be selele mu binangu akulesha shi, mwikelo wetu na bikitshino byetu bi selele ku meso kw’Efile Mukulu. Kwikala selele mbinangu nkutale myanda yatunangushena, yatwakula, na yatukitshi. Yehowa mwitwelele mwiya wa kusuuka kukita myanda i butete mu kipaso kyayo kyoso. (Nkindji 1:10; 3:1) Abitungu twate kitshibilo kya kulonda miiya ya Yehowa pabitale kwikala selele sunga patudi kumpala kwa mwanda ulombene kwitutompa bwa kukita kintu ki bubi. Abitungu tutekye Efile Mukulu kushi kukooka bwa shi, etukwashe tulame binangu byetu bi selele, na twikale na kitshibilo kya kusuuka bitompwanga bya kukita myanda i butete.—1 Beena-Kodinda 6:9, 10, 18; Beena-Efeso 5:5.

▸ Shapitre 8, kikoso 11

Mwikelo wi bubi ngutale kwakula sunga kukita myanda mu mushindo autupilwa ngofu miiya y’Efile Mukulu, na abilesha mwikelo wi bufu. Muntu akitshi byabya alesha’shi tanemeka miiya y’Efile Mukulu. Su muntu ekala na mwikelo wi butete, bakulu mbalombene kukita komite a kusambisha bwa kutaluula wawa mwanda. Myanda i butete ngitale mishindo ilekene ya kukita bubi. Muyiile bukata bwa mwanda, ingi myanda itale mwikelo wi butete, be kwiyikitshina komite a kusambisha mu kakongye bwa kwiyitaluula.—Beena-Ngalatea 5:19-21; Beena-Efeso 4:19; bwa kuuka ingi myanda, tala “Nkonko ya bantu ababadikaa” mu Kitenta kya Mulami kya mu 15/07/2006, mu Fwalanse.

▸ Shapitre 9, kikoso 7; Shapitre 12, kikoso 10

Yehowa bapangile kwifikena pepi bwa shi ba mulume na mukashi beleshene kifulo mu kipaso ki selele. Anka nsaa i muntu afinafina bipindji byaye bya mbidi bya buufu, sunga kwibifubisha bi bubi bwa kwisangasha, kwete kwibifubisha mu mushindo ushii wi selele. Kino kyubishi ki kulwisha kipwano kya muntu na Yehowa. Ki kwibweshela muntu nkalo i bubi na kumutakula mu kwikala na mweneno e bubi pabitale kwifike pepi. (Beena-Kolose 3:5) Muntu e na kino kyubishi ki butete na apusha shi te na bya kwikileka, akite mwaye moso bwa kwikileka. (Misambo 86:5; 1 Yowano 3:20) Su we na luno lukalakashi, teka Yehowa n’eshimba dyobe dyoso, bwa shi akukwashe. Shikwa bintu bu pornografi, bilombene nkutakula mu kwikala na binangu bi butete. Esambe na muledi obe mwina Kidishitu sunga kuuku obe munyingye mu kikudi anemekaa miiya ya Yehowa. (Nkindji 1:8, 9; 1 Beena-Tesalonika 5:14; Tite 2:3-5) Uuka shi, Yehowa kwete kumona na kwata na muulo kwitatshisha kobe bwa kwikala na mwikelo wi selele—Misambo 51:17; Yeeshaya 1:18.

▸ Shapitre 9, kikoso 9

Yehowa mukite dibaka penda bwa mulume umune na mukashi umune. Kala mu Isalele, Efile Mukulu badi mutadile balume bwa shi bebakile bakashi bebungi, anka bino tabibadi mu mpàngo yaye ya ku kibangilo nya. Lelo uno, Yehowa takumina shi bafubi baye bebakile bakashi bebungi nya. Abitungu mulume ekale penda na mukashi umune mukashi namu na penda mulume umune.—Mateo 19:9; 1 Timote 3:2.

▸ Shapitre 10, kikoso 12

Mpàngo ya Yehowa ngya shi mulume na mukashi bashale pamune mafuku a muwa wabo oso. (Kibangilo 2:24; Malaki 2:15, 16; Mateo 19:3-6; 1 Beena-Kodinda 7:39) Mmupe bantu matalwa a kutshiba dibaka nka su umune a kwabadi batambuka lusandji. Yaaya nsaa, Yehowa mupe yawa shi mukite mulwisho matalwa a kwata kitshibilo kya kutshiba dibaka su bakumiina.—Mateo 19:9.

 Ingi nsaa, bangi bena Kidishitu mbate kitshibilo kya kwilekena na bena dibaka nabo sunga pakushii muntu mutambukye lusandji. (1 Beena-Kodinda 7:11) Myanda ikumbene kufwisha muntu mu kwilekena na mwina dibaka naye ngino.

• Kupela kulombasha nkalo ya ba mu nshibo pa bukopo: Mulume apele kupa ba mu kifuko kyaye bintu bya ku mbidi, mu kipaso kya shi, kifuko akishala kushi ekuta sunga bidibwa.—1 Timote 5:8.

• Kukyengyesha ku mbidi: Pe mwina dibaka akyengyesha mwina dibaka naaye ku mbidi mu mushindo autulu muwa waye mu masaku.—Beena-Ngalatea 5:19-21.

• Kulwisha kipwano kya mwina dibaka na Yehowa: Mulume sunga mukashi apele shi mwina dibaka naye tafubilanga Yehowa.—Bikitshino 5:29.

▸ Shapitre 11, kikoso 19

Atwe boso atwikalaa na lukalo lwa shi betutumbule na kwitunyingisha. (Nkindji 12:25; 16:24) Twi balombene kwinyingishena na kwikankamishena na bishima bi buwa abilesha kifulo. Byabya bishima mbilombene kukwasha bakwetu balume na bakashi, bwabadya kunyingiila na kufubila Yehowa sunga bekala mu nkalakashi. (Nkindji 12:18; Beena-Fidipe 2:1-4) Su muntu mmubofule kwishimba, abitungu tumutemeshe na kanemo koso na kwitatshisha bwa kwitula pa mbalo yaye. Bino mbikumbene kwitukwasha bwa kuuka kyatudya kwakula sunga kukita bwa kumukwasha. (Shake 1:19) Ikala na kitshibilo kya kuuka bakwenu balume na bakashi kalolo bwa shi omone bya kushinguula kalolo kyabadi nakyo lukalo. Akupu we mukumbene kwibakwasha bwa kukulupila ku Nsulo ya kunyingishibwa koso na kukankamikibwa, kwabadi balombene kupeta kikiisho.—2 Beena-Kodinda 1:3, 4; 1 Beena-Tesalonika 5:11.

▸ Shapitre 12, kikoso 16

Mu Bible ta mwi miiya itale bya kukita musangelo wa dibaka nya. Bipikwa bya bantu na myanda yabatekye ku mbulamatadi mbilekene muyile ma mbalo ashale bantu. (Kibangilo 24:67; Mateo 1:24; 25:10;  Luka 14:8) Kipindji ki na muulo ukata mu myanda ya dibaka, nyi mmutshipo aukitshi ba mulume na mukashi kumpala kwa Yehowa. Bantu bebungi abeyibakishena, abakumiinaa shi bena kifuko na ba kuuku babo bekale panka nsaa yabele mitshipo yabo na abakumiinaa shi mukulu ebakitshine mwisambo. Mulume na mukashi nyi be na bushito bwa kukitshisha musangelo sunga kupela. (Luka 14:28; Yowano 2:1-11) Su bantu abeyibakishena bakumiina kukitshisha musangelo w’eyibakishi dyabo, abitungu bekale bashinkamishe shi musangelo wabo autumbisha Yehowa. (Kibangilo 2:18-24; Mateo 19:5, 6) Mayi a kulonda a mu Bible ngalombene kwibakwasha bwa kwata bitshibilo bi buwa. (1 Yowano 2:16, 17) Su bakumiina kupa bantu maalwa ku musangelo wabo, abitungu bashinkamishe shi, bantu babadi batuule bwa kwiabila, bakwete kwiafubisha kalolo. (Nkindji 20:1; Beena-Efeso 5:18) Su bakumiina kwela mizike sunga kukisha kapapi, abitungu bashinkamishe shi byabya byoso abitumbisha Yehowa. Ba mulume na mukashi bena Kidishitu, abitungu batule binangu ku kipwano kyabo n’Efile Mukulu na ku kipwano kyabo’bo banabene, kushi penda kwifuku dyabo dya kwiyibakishena.—Nkindji 18:22; bwa kuuka ingi myanda, badika Kitenta kya Mulami kya 15/10/2006, masaki 18-31, mu Fwalanse.

▸ Shapitre 13, kikoso 18

Atukumiinaa kwata bitshibilo bi buwa bimene pa mayi a kulonda e mwiyi dy’Efile Mukulu. Bu kileshesho, be kwitamina mwina Kidishitu kwi mulume sunga mukashi aye shii Temwe a Yehowa, bwabadya kudya pamune na kifuko kyaye ku musangelo wa mu uno ndumbulwilo. Su nnobe abadi betamine, we kukita kinyi? Su kondo kobe k’eshimba kakutakula bwa kwenda, abitungu opatulwile mukashi sunga mulume oobe shi, su akukakitshika bipikwa bya ba mpangano ntankatwelakana mu byanka nya. Abitungu dingi otaluule kalolo su kwenda kwanka nkulombene kukokosha bangi.—1 Beena-Kodinda 8:9; 10:23, 24.

Su mukata obe a mudimo akupa kado mu mafuku a musangelo kampanda, we kwikapela su? We kukumiina sunga kupela. Kitshibilo kyobe kya kukumiina sunga kupela, nkitale mweneno e naye mukata oobe a mudimo bwa kaka kado. Kwete kwikamona bu kipindji kya ku wawa musangelo su, akumiina penda nkutumbula? Su bonangushena kalolo  ku ino myanda na ku ingi, we kwata kitshibilo kya kwikakumiina sunga kwikapela.

Ungi mwanda nguno, muntu e nkupa kado mu mafuku a musangelo kampanda, na akulungula’shi: “Nauku shi tokitaa uno musangelo, kadi nakumiina nkupa kado.” Pangi yawa muntu akulesha penda kalolo. Kadi, okwete kumona shi e na binangu bya kutompa lukumiino lobe, sunga kukimba nkutweshakasha mu wawa musangelo? Kunyima kwa kutaluula byabya, obe nabene nyi a kwata kitshibilo kya kukumiina sunga kupela kaka kado. Mu bitshibilo byetu byoso, twi na lukalo lwa kwikala na kondo k’eshimba ke buwa na kwikala na lulamato kwi Yehowa.—Bikitshino 23:1.

▸ Shapitre 13, kikoso 22

Ke bungi, nsaa yatupudisha bilumbu kushi kunyengakana na mu kufukama, ta mbilombene kutama nya. (Mateo 5:23-26) Bwa bena Kidishitu boso, kintu kya kumpala nyi nkutumbisha Yehowa na kulama buumune mu kakongye.—Yowano 13:34, 35; 1 Beena-Kodinda 13:4, 5.

Su bena Kidishitu be na bilumbu munkatshi mwabo bitale myanda ya busunga, abitungu bebipudishe kushii kwifundena ku mbulamatadi. Mu mukanda wa 1 Beena-Kodinda 6:1-8 mwi elango dibaadi Mpoolo mutumibwa mutuushe pabitale bilumbu pankatshi pa bena Kidishitu. Kutwala mukwetu ku tumiladi, kwi kwambishisha Yehowa na kakongye. Mu Mateo 18:15-17, mbaleshe matabula asatu aatungu mwina Kidishitu kulonda, bwa kupudisha myanda ikata bu pabadi bamudimbiile sunga kumwiba. (1) Be kubanda kupudisha kilumbu bubidi bwabo. (2)Su tambobeshe kwikipudisha, be kuteka mwina kakongye umune sunga babidi banyingye mu kikudi bwa shi bebakwashe. (3)Akupu, su bi na muulo, be kulungula bakulu bwabadya kwikipudisha. Su mwanda taudi byabya, bakulu abafubisha mayi a kulonda a mu Bible, bwa kukwasha baba be na kilumbu bwa shi bekipudishe mu kufukama. Su bantu be mu wawa mwanda, tabakumiina kulonda miiya ya mu Bible, bi buwa bakulu beupudishe mu komite a kusambisha.

 Kwi ingi myanda ayitungu kwenda ku mbulamatadi, bu kutshiba dibaka, kupeta matalwa a kushala na bana, makuta a kupa mukashi sunga mulume kunyima kwa kutshiba dibaka, makuta a asiranse, bwa shi eshina dyobe dikale ku mukanda wa bantu babafutu makuta su kompanyi bapono sunga bwa kupeta bupyanyi. Su mwina Kidishitu enda ku mbulamatadi bwa kupudisha mwanda wi byabya mu kufukama koso, tamutupilwe elango dya Mpoolo nya.

Su mwina Kidishitu akitshina ungi mwina Kidishitu kibeshi, bu kulala naye pa bukopo, kulwisha mwana mukinga, kulwa naye ngoshi, kumwiba kintu kikata, sunga kwipaa muntu, su yawa mwina Kidishitu enda na kilumbu ku mbulamatadi, tamutupilwe elango dya Mpoolo nya.

▸ Shapitre 14, kikoso 14

Kubanga mu lupango lwa Edene, Satana kwete nka kukimba bya kudimba bantu. (Kibangilo 3:1-6; Kibafumbwilwe 12:9) Auku shi su balwisha binangu byetu, e kwitutakula mu kukita myanda i bubi. (2 Beena-Kodinda 4:4; Shaake 1:14, 15) Afubu na myanda ya politike, bipwilo, busunga, kukisha kwa kapapi, kulonga tulasa, na bingi bintu bibungi bwa kukwatshishena binangu byaye na kwibikasha bu bi buwa.—Yowano 14:30; 1 Yowano 5:19.

Satana auku’shi, takii dingi na nsaa i bungi ya kudimba bantu nya. Nyi bwakinyi kwete kukita mwaye moso bwa kupambusha bantu bebungi. Akumiinaa kupambusha bikishekishe bafubi ba Yehowa. (Kibafumbwilwe 12:12) Su tatwi badimukye, Diabulu e kulwisha binangu byetu ku kapelakapela. (1 Beena-Kodinda 10:12) Kileshesho, Yehowa akumiina’shi dibaka diyishe mafuku e bungi. (Mateo 19:5, 6, 9) Kadi bantu bebungi lelo uno abamonaa eyibakishi nka bu kipwano kya kapindji kapela kilombene kutshibika kushi lutato. Mu ma filme na ku ma télévision abakwatshishenaa byabya binangu. Tabitungu tutadile mweneno a uno ndumbulwilo pabitale eyibakishi bwa shi ekale na bukitshishi kwatudi nya.

Ungi mushindo ukwete kwitudimba Satana, nkutwesha binangu bya kukita nka kyatukumiina. (2 Timote 3:4) Su tatwi badimukye, twi kukutwa  kunemeka baba babadi bape matalwa kwi Yehowa. Kileshesho, mukwetu mulume e kubanga kupela kukookyela bukunkushi bwa bakulu mu kakongye. (Beena-Ebelu 12:5) Sunga’shi mukwetu mukashi e kubanga kupela kukookyela mpàngo ya Yehowa pabitale nfumu a kifuko.—1 Beena-Kodinda 11:3.

Abitungu twikale na kitshibilo kya kupela kutadila Diabulu bwa shi akunkushe binangu byetu. Kadi, atukumiina kwambula mweneno a Yehowa na kwikala ‘atwele binangu ku myanda ya mwiyilu.’—Beena-Kolose 3:2; 2 Beena-Kodinda 2:11.

▸ Shapitre 16, kikoso 9

Atwe boso atukumiinaa kwikala na mbidi bukome na kukimba mushindo wi buwa wa kwibukisha nsaa yatushatupusha biya. (Yeeshaya 38:21; Maako 5:25, 26; Luka 10:34) Lelo uno, kwi mishindo i bungi ya kwibukisha mupunda ba doktere. Nsaa yatwata kitshibilo pabitale mushindo wa kwibukisha, bi buwa tulonde mayi a kulonda a mu Bible. Atuuku shi, nka penda Bufumu bw’Efile Mukulu nyi abukakatusha mikumbo bwa loso. Tabitungu tutule binangu byetu penda ku bukome bwa mbidi na kulenguula lulangwilo lwetu lwa Yehowa.—Yeeshaya 33:24; 1 Timote 4:16.

Abitungu tusuukye bipaso byoso bya kwibukisha abimweka bu bi na myanda ya ba demo. (Miiya Ikituulwe 18:10-12; Yeeshaya 1:13) Byabya kumpala kwa kukumiina mushindo kampanda wa kwibukisha sunga bwanga kampanda, abitungu tutalule kalolo bwa kuuka binyi byaudi na binangu byaukwatshishena. (Nkindji 14:15) Tatukumanga kuluba’shi Satana akumiina kwitudimba bwa kwitutwesha mu myanda ya ba demo. Su atupwandikisha shi mushindo wabakyebe kwitubuka ngwipushene na myanda ya ba demo, bi buwa twiupele.—1 Mpyeele 5:8.

▸ Shapitre 16, kikoso 18