1, 2. Yehowa mwitupe kyabuntu kinyi kikile buwa?

YEHOWA mmupe muntu oso kya buntu kikile buwa. Nkya buntu kya muwa. (Kibangilo 1:27) Akumina shi twikale na nshalelo e buwa. Nyi bwakinyi mwitupe mayi a kulonda aetulongyesha byatudya kwata bitshibilo bi buwa. Abitungu tufube na ano mayi a kulonda bwa shi etukwashe tuwukye bya “kwabuula” kyakya “ki buwa na ki bubi.” (Beena-Ebelu 5:14) P’atukitshi byabya, atupa Yehowa mushindo wa kwitulongyesha bya kunangushena kalolo. Patudi na nshalelo akunkushibwa na miiya y’Efile Mukulu, na p’atumono byayilongamisha nshalelo etu, atushinguula byayidi na muulo.

² Nshalelo e kwikala na nkalakashi. Akutukaa myanda yabashii besambile kwi mwiya wa mu Bible. Bu kileshesho, twi kwikala na lukalo lwa kwata kitshibilo pabitale kwibukisha akutekye shi betwele mase. Mushindo kinyi watudya kwata kitshibilo akisangasha Yehowa? Mu Bible mwi mayi a kulonda aetulongyesha mweneno a Yehowa pabitale muwa na mase. Su twapusha ano mayi kalolo, atwata bitshibilo na binangu na kulama kondo k’eshimba ke buwa.  (Nkindji 2:6-11) Tubande kutaluula, amune a ku aa mayi a kulonda.

3, 4. (a) Efile Mukulu balesheshe mweneno aye pabitale mase naminyi? (b) Mase aalesha kinyi?

³ Bible etulongyesha shi mase nga kishila, mwanda aalesha muwa. Na muwa wi na muulo ukata kwi Yehowa. Kunyima kwa Kayine kwipaa mukwabo, Yehowa bamulungwile shi: “Mase a mukwenu abeele musaase kwandi.” (Kibangilo 4:10) Mase a Abele abadi aalesha muwa waaye; Kayine pabayipayile Abele, batshibile muwa waye.

⁴ Kunyima kwa Mpeshi a kabutu mu mafuku a Nowa, Efile Mukulu balungwile bantu shi mbalombene kudya mwita. Anka bapatulwile kalolo shi: “Tanudyanga mbidi na muuwa wayo nyi nkwamba shi—mase—ayo.” (Kibangilo 9:4) Uno mwiya ubadi utale ba ku musuku wa Nowa boso, mpa n’atwe. Ku meso kwa Yehowa, mase aalesha muwa. Na abitungu twikale atumono mase mu wawa mushindo umune.—Misambo 36:9.

5, 6. Miiya ya Moyiise ibadi ileshe mweneno a Yehowa pabitale muwa na mase naminyi?

⁵ Mu miya ibabadi bape Moyiise kwi Yehowa, Bambile shi: “Su muntu . . . adya mase, namwalulukila, bwa kumukaasha mu mwilo. Mwanda muwa wa kipangibwe kyoso wi mu mase.”—Beena-Leevi 17:10, 11.

⁶ Miiya ya Moyiise ibadi ayilesha shi su muntu bayipaa nyema bwadya kudya, abitungu apongoole mase aaye paashi. Bino bibadi abilesha shi muwa wa nyema ubalukila kwi Mupangi awo, Yehowa. (Miiya Ikitulwe 12:16; Esekyele 18:4) Anka Yehowa tabadi mutekye shi  bena Isalele bafinune tu mase toso twi mu misamba ya nyema nya. Bu bibabadi abakitshi mwabo moso bwa kupongola mase, abadi balombene kudya mwita na kondo k’eshimba kash’akebatopeka. Pa kunemeka mase a nyema, abadi abalesha kanemo kwi Yehowa, Mutushe muwa. Mwiya ubadi autekye dingi bena Isalele bwabadya kulambula nyema bwa kubwikila milwisho.—Tala Mayi a ku nfudilo 19 na 20.

7. Daavide badi muleshe shi anemaka mase naminyi?

⁷ Twi kumona muulo wa mase ku bibakitshine Daavide pabadi alu ngoshi na bena Filistina. Bantu ba Daavide pababamwene shi bapusha nyota, babatudile muwa wabo mu masaku, abo nkwenda ku mbalo ya beshikwanyi bwa nkamutapila mema. Kadi pababafikile nao kwi Daavide, bapelele kwiatoma na “eapongôla mu nsenga bu mulambu kwi Yehowa.” Daavide nkwakula’shi: ‘Yehowa, ntshi mulombene kutoma ano mema, mwanda e bu mase a bano bantu batulanga muwa wabo mu masaku p’abo kwenda mukwiakimba.’ Daavide badi auku muulo wi nao muwa na mase ku meso kw’Efile Mukulu.—2 Samwele 23:15-17.

8, 9. Mbikunyi abitungu bena Kidishitu bamone mase lelo uno?

⁸ Kubanga mu mafuku a bena Kidishitu ba kumpala, mwilo w’Efile Mukulu taubadi aulambula dingi nyema. Anka abadi na lukalo lwa kwikala na mweneno e buwa pabitale mase. “Kwilama ku . . . mase” kubadi umune wa ku ndambo ya Miiya ibadi Yehowa mutekye’shi bena Kidishitu balame. Bino bibadi na muulo nka bi kupela kutambuka lusandji na kulangwila ma nkishi.—Bikitshino 15:28, 29.

⁹ Bi nka byabya na lelo. Atwe bena Kidishitu, atuuku’shi Yehowa mmwikale nsulo ya muwa na’shi muwa  ooso ngutukile kwadi. Atuuku dingi shi mase nga kishila na aalesha muwa. Byabya abitungu tutaluule mayi a kulonda a mu Bible p’atwata kitshibilo pabitale kwibukisha koso akutekye kufubisha mase.

10, 11. (a) Ba Temwe ba Yehowa abamonaa kwela kwa muntu mase, byabikala mase oso sunga bipindji bikata binanka bikite mase naminyi? (b) Nkitshibilo kinyi akitungu shi mwina Kidishitu eatshile?

¹⁰ Ba Temwe ba Yehowa abauku shi “kwilama ku . . . mase” ta nkwimene penda pa kwiadya na kwiatoma nya. Akulesha kupela kwedibwa mase, kupela kwiapa bangi na kupela kulama mase eetu mbalo kampanda bwa kwitwalusha anka. Akulesha dingi kupela kukumiina bintu binanka bikata bikite mase—globile monga, globile tooka, plakete, na plasma.

¹¹ Bino bintu binanka be kwibyabula mu tungi tupindji tupelatupela, twabetamina bu tuntu tupela twa mu mase. Abitungu mwina Kidishitu oso eatshile kitshibilo kya kukumina sunga kupela twatwa tuntu tupela twa mu mase. Bino mbitale mpa na kufubisha mase a muntu nabene kwi ba munganga. Abitungu muntu oso aate kitshibilo pabitale byabakyebe kufubisha mase aaye pabamubaala, pabamupimi sunga mu kingi kipaso kya kwibukisha.—Tala mayi a ku nfudilo 21.

12. (a) Bwakinyi bitshibilo byatwata muyile kondo ketu k’eshimba bi na muulo kwi Yehowa? (b) Mushindo kinyi watudi balombene kwata bitshibilo bi buwa pabitale mayele akwibutshisha?

¹² Yehowa atalaa bitshibilo byatwata mu myanda itale kondo ketu k’eshimba su? Oolo. Yehowa atalaa bi binangu byetu na bikitshino byetu. (Badika Nkindji 17:3; 24:12.) Bu byabidi byabya, nsaa yatwata kitshibilo pabitale kwibutshisha, abitungu tutekye bukunkushi  bwa Yehowa na kukimbuula myanda itale kwibukisha. Kunyima, tufube na kondo ketu k’eshimba kalongyeshibwe na Bible bwa kwata bitshibilo. T’abitungu shi twipushe bangi betulungule kyabadi balombene kukita su bekala na mwanda bi wetu sunga kwibatadila bwa shi bakunkushe bitshibilo byetu. Mwina Kidishitu oso “e na kya kwisemwina bushito bwaye aye nabene.”—Beena-Ngalatea 6:5; Beena-Looma 14:12.

13. Miiya na mayi a kulonda a Yehowa aetulongyesha kinyi pabitale mase?

¹³ Kyoso akitutekye Yehowa bwa kukita mbwa buwa bwetu na akilesha kifulo kyaye kwatudi. (Misambo 19:7-11) Anka tatumukookyela nka penda mwanda miiya yaaye i kwanka bwa buwa bwetu nya. Atumukookyela mwanda twi bamufule. Kifulo kyetu bwa Yehowa akitutakula mu kupela kwedibwa mase. (Bikitshino 15:20) Bino dingi abikalwila mbidi yetu. Bantu be bungi lelo uno abauku masaku aatukila mu kwedibwa kwa mase, na ba doktere be bungi abashingula shi kubala muntu kushii kumwela mase kwi buwa bwa mbidi yaaye. Abimweneka patoka shi mashinda a Yehowa nga binangu na nga kifulo.—Badika Yeshaya 55:9; Yowano 14:21, 23.

14, 15. (a) Yehowa bapeele mwilo waye miiya kinyi bwa kwibakalwila? (b) Twi kutumikila mayi a kulonda e mu ino miiya naminyi?

¹⁴ Miiya y’Efile Mukulu ayikalaa kwanka bwa buwa bwa bantu baye. Yehowa badi mupe Isalele a kala miiya bwa kwibakalwila ku masaku akata. Kileshesho, ungi mwiya ubadi awamba shi, abitungu sha nshibo ebakye ka lupòopo kunundu kwa nshibo yaaye bwa shi  tala muntu apona asakuka. (Miiya ikituulwe 22:8) Ungi mwiya ubadi utale nyema. Su muntu ekala na ngombe mutombokye, badi na bushito bwa kumulama bwa shi talwanga na muntu sunga kumwipaa. (Efilu 21:28, 29) Su mwina Isalele ta mukookyele ino miiya, kilema kibadya kwikala kyaye su muntu afwa.

¹⁵ Mu ino miiya atumono shi muwa wi na muulo ku meso kwa Yehowa. Kuuka kwa uno mwanda kwi na bukitshishi kinyi kwatudi? Atulesha shi atunemeka muwa mu mushindo watulama nshibo sunga motoka wetu, na mushindo watutambusha motoka, na bitshibilo byatwata pabitale kukisha kwetu kwa kapapi. Bangi bantu, bikishekishe ba nsongwa, abamonaa shi takwi kintu ki bubi kilombene kwibafwila, nyi bwakinyi abetulu mu masaku abalengula kilombene kukitshika kumongo. Anka Yehowa takumina shi twikale byabya nya. Akumina shi twate muwa wetu na wa bangi na muulo.—Mulungudi 11:9, 10.

16. Yehowa amonaa kukatusha kw’eyimi naminyi?

¹⁶ Muwa wa muntu oso wi na muulo ku meso kwa Yehowa. Mpa na wa mwana e mwiyimi. Mu miiya ya Moyiise, su muntu asakula mukashi sh’eyimi, aye sunga mwana e munda, Yehowa badi ata yawa muntu bu e na kishiyo kya mase. Bino bibadi abilesha shi, sunga bibakitshika mu masaku, kubatuku lufu lwa muntu abitungu kwipaa yawa muntu bayipayishena. (Badika Efilu 21:22, 23.) Kumpala kw’Efile Mukulu, kwipaa mwana tooka, nkwipaa muntu mushima. Su bowuku bino, onangusheena naminyi pabitale byapushaa bwa kukatusha kw’eyimi? Sunga byapushaa pamono midiyo ya bantu bakwete kukatusha mayimi ku kipwa kyoso na kwipaa bana batooka?

17. Nkinyi kilombene kukankamika mwana mukashi badi mukatushe eyimi kumpala kwa kuuka bi mweneno a Yehowa?

 ¹⁷ Mwana mukashi e kumona naminyi su badi mukatushe eyimi kumpala kwa kulonga bi mweneno a Yehowa pabitale kukatusha eyimi? Abitungu ashinkamishe’shi Yehowa mulombene kumufwila lusa bwa uno mwanda ukata ku bukwashi bwa mulambu wa Yesu ‘Kidishitu.’ (Luka 5:32; Beena-Efeso 1:7) Su mwana mukashi badi mukite wawa mulwisho kumpala, tatungunukanga na kwitopeka nya, su mmupwe kutonda wanka n’eshimba dyoso. “Yehowa sha-lusa na kalolo. . . Bikale kutunduka nguba-kula naa kutwela-nguba, ngi byadi mutule kutupakana kwetu kula.”—Misambo 103:8-14.

18. Bwakinyi abitungu tukite mwetu moso bwa kukatusha binangu bya mushikwa mwatudi?

¹⁸ Kunemeka kya buntu ky’Efile Mukulu kya muwa akubangilaa mwishimba dyeetu. Nkutale byatupusha bwa bangi. Yowano mutumibwa bafundjile shi: “Yawa oso mushikwe mukwabo nyi ayipanaa.” (1 Yowano 3:15, Kilombeno kipya 2014) Kushi’twe kuuka, kupela kukumina mungi muntu kwi kutama kwafika mushikwa. Mushikwa wi kufwisha muntu mu kukutwa kunemeka bangi, kwibadimbiila, sunga kukumina shi bafwe. Yehowa auku mushindo watupusha bwa bangi bantu. (Beena-Leevi 19:16; Miiya Ikituulwe 19:18-21; Mateo 5:22) Su twatundula shi twi bashikwe muntu, abitungu tukite mwetu moso bwa kukatusha byabya binangu.—Shake 1:14, 15; 4:1-3.

19. Mweneno a Yehowa pabitale etombo e kwikala na bukitshishi kwatudi mushindo kinyi?

¹⁹ Kwi ungi mushindo watudi balombene kulesha  shi atwata muwa na muulo. Mu mukanda wa Misambo 11:5, atulongo shi: Yehowa “mmwishikwene naa sh’etombo.” Su twakumina kukisha kapapi mu mushindo aulesha etombo, abilesha shi twi bafule etombo. Ta twi balombene kutwesha bishima by’etombo, binangu by’etombo na bifwatulo by’etombo mu mitwe yetu nya. Pamutwe pa byabya, abitungu twimutweshe binangu bya butaale.—Badika Beena-Fidipe 4:8, 9.

20-22. (a) Yehowa e na mweneno kinyi pabitale ndumbulwilo a Satana? (b) Bantu b’Efile be kulesha naminyi shi “ta mba pa nsenga”?

²⁰ Ndumbulwilo a Satana tanemekaa muwa nya, na Yehowa amumonaa shi e na mase a bantu, nyi nkwamba shi ayipayishenaa. Munda mwa bipwa nkama, mafumu a politike ngepee bantu midiyo mpa na bafubi b’Efile Mukulu. Mu Bible, ino mbulamatadi mbeyifunde shi ii bubi na bu nyema a bukyelo. (Ndanyele 8:3, 4, 20-22; Kibafumbwilwe 13:1, 2, 7, 8) Lelo uno, busunga bwa ma mputu nyi busunga bukata. Bantu bakwete kupeta makasa e bungi mu kudisha kwa ma mputu aepaa bantu. Eyendo, “nsenga yoso ishima ngishale mushi a matalwa a ntomboshi.”—1 Yowano 5:19, Kilombeno kipya 2014.

²¹ Anka bena Kidishitu ba binyibinyi “ta mba pa nsenga.” Bafubi ba Yehowa tabatwelakanaa mu myanda ya politike na ya ngoshi. Bu byabashabayipayishenaa, tabakwatshishenaa ndumbulwilo su ngumune ayipaa bantu nya. (Yowano 15:19; 17:16) Nsaa y’ababingabinga bena Kidishitu, abo t’abalulaa n’etombo nya. Yesu balongyeshe shi abitungu tufule mpa na beshikwanyi netu.—Mateo 5:44; Beena-Looma 12:17-21.

 ²² Dingi, bipwilo bikwete kwipayisha midiyo ya bantu. Bible p’akula pabitale abilone Mukata, nsangilo a bipwilo bya madimi, alesha shi: “Mukolwe mase a batemuki na a bee selele na a booso babadi bapongoole mase aabo pa nsenga.” Bopusha bwakinyi Yehowa etutumina eyi dya shi: “Tukayi munkatshi mwaye, mwiilo wande”? Balangwidi ba Yehowa ta be mu kipwilo kya madimi nya.—Kibafumbwilwe 17:6; 18:2, 4, 24.

23. Nkinyi akitungu kukita bwa ‘kutuuka’ mu Babilone Mukata?

²³ Bwa “kutuuka” mu Babilone Mukata abitekye kulesha patooka shi tatwi dingi mu kipwilo kya madimi. Bu kileshesho, twi balombene kukita mwetu moso bwa kuuka shi eshina dyetu mbedishime mu mulongo wa mashina a beena kipwilo. Anka kwi bingi abitungu kukita. Abitungu dingi tushikwe na kuleka myanda i bubi yabakitaa mu kipwilo kya madimi. Kipwilo kya madimi kikwete kutadiila na kunyingisha kukita kwa myanda i butete, myanda ya politike, na lwabi. (Badika Misambo 97:10; Kibafumbwilwe 18:7, 9, 11-17) Mwenda bipwa, nkufwe bantu bakile bungi.

24, 25. Kuuka Yehowa nkulombene kwitupa kufukama na kondo k’eshimba ke buwa mushindo kinyi?

²⁴ Kumpala kwa kuuka Yehowa, boso bwetu tubadi bakwatshishene ndumbulwilo a Satana mu mishindo ilekene. Anka binobino tubapu kushintuluka. Twi bakumiine mulambu wa nkuulo atwe nkulambula muwa wetu kwi Efile Mukulu. Twi mu “mafuku a kwikisha . . . Kumpala kwa Yehowa.” Twi mu kufukama, twi na kondo k’eshimba ke buwa, na atuuku shi tukwete kusangasha Efile Mukulu.—Bikitshino 3:19, Kilombeno kipya 2014; Yeshaya 1:18.

²⁵ Sunga byekala shi tubadi mu ndumbulwilo kampanda  shanemekaa muwa, Yehowa mukumbene kwitufwila lusa ku bukwashi bwa mulambu wa nkuulo. Atusangela muwa, kyabuntu kitupe Yehowa. Atulesha shi atwiusangela pa kukita mwetu moso bwa kukwasha bangi bwabadya kulonga myanda itale Yehowa, bakatukye mu ndumbulwilo a Satana, na bekale mu kipwano ki buwa n’Efile Mukulu.—2 Beena-Kodinda 6:1, 2.

26-28. (a) Yehowa badi mupe Esekyele mudimo kinyi wi pa bwao? (b) Yehowa etutekye bwa kukita kinyi lelo uno?

²⁶ Mu Isalele a kala, Yehowa balungwile mutemuki Esekyele bwa shi adimushe bantu shi, Yeelusaleme abutudibwa binobino na kwibalongyesha kyabadya kukita bwa kupanda. Su Esekyele tabadi mwibadimushe, mase abo abadya kwikala ku mutwe waye. (Esekyele 33:7-9) Esekyele balesheshe shi ataa muwa na mulo pa kukita mwaye moso bwa kulungula wawa mukandu wi na muulo.

²⁷ Yehowa mwitupe mudimo wa kudimusha bantu shi ndumbulwilo a Satana abutudibwa binobino na kwibakwasha baukye Yehowa na bapande bwa kwikala mu nsenga ipya. (Yeeshaya 61:2; Mateo 24:14) Abitungu tukite mwetu moso bwa kuukisha bangi uno mukandu. Atukulupila kwakula bibambile Mpoolo shi: “Nemwisuule ku mase a bantu booso; mwanda tshi mulame mwanda su ngumune pa kwinulungula mpango y’Efile Mukulu.”—Bikitshino 20:26, 27, Kilombeno kipya 2014.

²⁸ Kwi ingi myanda ya mu nshalelo etu ayitekye shi twikale selele. Tubandeyi kutalula ingi ya ku yanka mu shapitre alondo.