1, 2. Nkinyi akitungu shi tushinguule pabitale Satana na ba demo?

NSHALELO mu ndumbulwilo mupya a Yehowa, akekala buwa bukile. Nfudilo a byoso atukashaala muyile by’akumina. Kadi bwa binobino twi bashale mu nsenga i ku matalwa a Satana na ba demo baye. (2 Beena-Kodinda 4:4) Sunga mbyabya, tatwi balombene kwibamona, anka be kwanka na be na bukome.

² Mu uno shapitre, atwisambila byatudya kushaala peepi na Yehowa na kwikalwila kwi Satana. Yehowa mmwitulee shi etukwasha. Kadi abitungu tushinguule mayele aafubaa nao Satana na ba demo bwa kwitudimba na kwitulwisha.

3. Dyabulu akyebe kwitukita kinyi?

³ Satana ambaa shi, bantu abalangwilaa Yehowa penda bwa kupeta myabi na shi, twi kupela kumufubila su twapeta nkalakashi. (Badika Yoobo 2:4, 5.) Nsaa ikale muntu alesha lukalo lwa kulonga pabitale Yehowa, Satana na ba demo bakwete kutala, na abatompo kumwimika. Be na nsungu nsaa i muntu elambula kwi Yehowa na kubatshishibwa. Bible apwandjikisha Diabulu na “ntambwe akuumbu, akiimbi muntu adia kudya.” (1 Mpyeele 5:8, Kilombeeno kipya 2014)  Satana akumiina kulwisha kipwano kyetu na Yehowa.—Misambo 7:1, 2; 2 Timote 3:12.

4, 5. (a) Nkinyi kishi kilombene kukita Satana? (b) “Kubindwila Kafilefile” akupatuula kinyi?

⁴ Kadi tatwi balombene kitshiina Satana na ba demo baye nya. Yehowa mumwelele mikalo ku byadi mulombene kwitukita. Yehowa mmulee shi “kibumbu kikata”.kibumbu kikata” kya bena Kidishitu akikapanda ku “mpombo ikata.” (Kibafumbwilwe 7:9, 14) Takwi kintu su nkimune kilombene Diabulu kukita bwa kukutshishwa kulombana  kwa wawa mwanda nya, mwanda Yehowa kwete kukalwila mwilo Waye.

⁵ Su twashala balamate kwi Yehowa, Satana tebya kutshiba kipwano kyetu Naye nya. Eyi dy’Efile Mukulu aditushinkamiisha shi: “Yehowa e nenu anka panudi naye.” (2 Myanda 15:2; badika 1 Beena-Kodinda 10:13.) Bantu bebungi basha lulamato ba kala bu Abele, Enoke, Nowa, Sara, na Moyiise, abadi babindwile Diabulu p’abo kushaala balamate kwi Yehowa. (Beena-Ebelu 11:4-40) Natwe namu twikukita nka byabya. Eyi dy’Efile Mukulu aditulaa shi: “Bindwilai Kafilefile, ê namu akenusûku kula.”—Shake 4:7, EEM.

6. Satana etulwisha naminyi?

⁶ Sunga shi, Satana auku shi Yehowa mmumwelele mikalo ku kyoso kyadya kwitukita, kwete kutungunuka na kukita mwaye moso bwa kubofusha kipwano kyetu n’Efile Mukulu. Lelo uno, Kafilefile kakwete kwitulwisha mu mishindo ilekene, kwete kufubisha mayele aye afubishaa takudi bipwa binunu. Mmayele kinyi afubishaa?

7. Bwakinyi Satana kwete kulwisha bafubi ba Yehowa?

⁷ Yowano mutumibwa bafundjile shi: “Nsenga yoso yishima ngishaale muushi a matalwa a ntoomboshi.” (1 Yowano 5:19 Kilombeeno Kipya 2014) Satana nyi kwete kukunkusha ino nsenga itombokye na akumiina kukunkusha mpa na bafubi ba Yehowa. (Mika 4:1; Yowano 15:19; Kibafumbwilwe 12:12, 17) Diabulu auku shi kubamushadila penda mafuku apeela, byabya, kwete kukita mwaye moso bwa kutakula oso a kwatudi bwa kupela kukookyela Efile Mukulu. Ingi nsaa Satana  afubishaa bitompwanga abimweka na meso, ingi namu afubisha bitompwanga bifwame.

8. Nkinyi akitungu shi mwina Kidishitu oso aukye?

⁸ Atubadika mu mukanda wa Beena-Efeso 6:12, shi: “Tukwete kulwa na . . . bikudi bibi bi mwiyilu.” Mwina Kidishitu oso kwete kulwa ngoshi na Diabulu na ba demo. Abitungu tuukye shi, boso abelambula kwi Yehowa be mu ino ngoshi. Mu mukanda ubaadi mufundile bena Efeso, Mpoolo mutumibwa batekyele bena Kidishitu misusa isatu bwa ‘kwimana pe poo.’—Beena-Efeso 6:11, 13, 14.

9. Satana na ba demo abakimbaa kwitukita kinyi?

⁹ Satana na ba demo abakimbaa bya kwitudimba mu bipaso bilekene. Su tubakambila kitompwanga kimune kya Satata, byabya tabilesha shi tamulombene kwitudimba na kingi nya. Sata akimbaa pe kubofula kwetu na kukimba muteo ulombene kwitukwata. Kadi tabitungu etukwate nya, mwanda Bible kwete kwitulongyesha pabitale miteo ya Diabulu. (2 Beena-Kodinda 2:11; tala Mayi a ku nfudilo 31.) Umune wa ku yaya miteo, nyi malenganyi.

10. (a) Malenganyi nkinyi? (b) Yehowa eamonaa naminyi?

¹⁰ Malenganyi ngatale bintu abitwesha muntu mu kipwano na ba demo, bu lubuko, butshi, kulwaa muntu na kukimba kwisamba na bafwe. Bible etulungula shi ‘mmushikwe’ malenganyi na tatwibalombene kumulangwila pamune na myanda ya malenganyi nya. (Miiya Ikituulwe 18:10-12; Kibangilo 21:8) Abitungu bena Kidishitu basukye mishindo yoso ya malenganyi.—Beena-Looma 12:9.

11. Kukimba kuuka bukome bwa bikudi bi bubi kwi kwitufikisha ku kinyi?

 ¹¹ Satana auku shi, su akaka muntu mu kufubisha bukome bwa bikudi bi bubi, mbibofule bwadya kumukaka ku malenganyi. Mushindo oso wa malenganyi ngulombene kulwisha kipwano kyetu na Yehowa.

12. Satana kwete kulwisha binangu byetu naminyi?

¹² Satana kwete kukimba kubulakasha binangu bya bantu. Atwesha mpaka mwishimba dya muntu ku kapelakapela, mpa na byakamufisha mu kumona “bubi bu buwa, buwa namu bu bubi.” (Yeeshaya 5:20) Diabulu ndjo kwete kukwatshishena binangu bya shi, malango a mu Bible taebuwa na shi twi kwikala na muloo su twakutwa kutumikila miiya y’Efile Mukulu.

13. Mbikunyi bibaadi Satana mutompe kutwesha mpanka mu mashimba?

¹³ Kutwesha mpaka mwishimba nyi muteo ukata wa Satana. Mmufubishe uno muteo kubanga kala. Mu lupango lwa Edene, batweshele mpaka mwishimba dya Eve pa kumwipusha shi: “Eyendo! Efile Mukulu mmwinulungule shi: tanudyanga bikuba bya mitshi yooso ii mu lupango?” (Kibangilo 3:1) Kunyima, mu kipungo kya Yoobo, Satana bepwishe Yehowa kumpala kwa ba mwikeyilu shi: “Yoobo atshiinaa Efile Mukulu bisumanga su?” (Yoobo 1:9) Kunyima kwa Yesu kubatshishibwa, Sata bamutompele pa kwamba shi: “Su we mwan’Efile Mukulu, tuma eyi bwa shi ano mabwe aalulukye mikate.”—Mateo 4:3.

14. Satana adimbaa bantu naminyi bwa shi bamone shi malenganyi tae masaku?

¹⁴ Lelo uno, Diabulu kwete kutungunuka na kutwesha mpaka mu mashimba. Kwete kulesha ingi  mishindo ya malengayi bu ishi bubi, bwa kubulakasha bantu bamone shi malenganyi ta ngakambe bubi nya. Mpa nka na bangi bena Kidishitu mbadimbikwe na aa masaku. (2 Beena-Kodinda 11:3) Byabya, nkinyi akitungu shi tukite bwatudya kwikalwila? Mbikunyi byatudya kwikala bashinkamishe shi tatukwete kudimbikwa na miteo ya Satana? Tutaluule myanda ibidi yatudi balombene kudimbikwa: kukisha kwa kapapi na kwibukisha.

15. Kukisha kwetu kwa kapapi nkulombene kwitutwesha mu myanda ya ba demo naminyi?

¹⁵ Lelo uno, ma filme ebungi, ma video, myanda yabalesha ku televisio, maasha a ku ordinatere, na ma site a internet, abileshaa nka myanda ya ba demo, na malengyi. Bebungi abamonaa bino bintu bu kukisha kapapi kushii bubi, tabauku masaku abekimbila pa kuleka ba demo mu muwa wabo. Muntu mmulombene kutwela mu myanda ya malenganyi kukiila ku bintu bu ma horoscope, lubuko lwa mmasa, ma karte, na ma boule de cristal sunga lumweno lwa kubuka nalo. Satana afwamishaa masaku na kukimba kulesha shi byabya bintu mbya kukaanya, abisankishaa bantu. Muntu e kunangushena shi kubandjila bintu bya ba demo sunga bya malenganyi takwi bubi mwanda kubandjila ta nkwibikita nya. Bwakinyi kunangushena byabya kwi masaku?—1 Beena-Kodinda 10:12.

16. Bwakinyi abitungu tusumbule kukisha kapapi na bintu bi na myanda ya ba demo?

¹⁶ Satana na ba demo ta mbalombene kumona binangu byetu. Kadi mbalombene kuuka nkalo na binangu byetu pabamono myanda yatusangula bwetu na bwa kifuko  kyetu, mpa na kukisha kwa kapapi. Su twasangula ma filme, mizike, mikanda ayakwila myanda ya manga, lubuko, myanda ya ba demo, butshi, ma vampire, sunga bingi bintu bi byabya, Satana na ba demo be kuuka shi twi nabyo lukalo. Be kukimba bya kwitutwesha ngofu mu myanda ya ba demo.—Badika Beena-Ngalatea 6:7.

17. Mbikunyi bilombene Satana kufubisha lukalo lwetu lwa kwikala na mbidi bukome bwa kwitudimba?

¹⁷ Satana mmulombene dingi kufubisha lukalo lwetu lwa kwikala na mbidi bukome bwa kwitudimba. Lelo uno, bantu bebungi bakwete kukumba. Muntu e kwikala mutompe mishindo i bungi ya kwibukisha kadi kushi  kupanda. (Maako 5:25, 26) Pangi takii na lukulupilo’nyi na akumiina kutompa mishindo yoso ya kwibukisha. Kadi bu byatudi bena Kidishitu, abitungu twikale badimukye bwa kupela kusangula mishindo ya kwibukisha i na myanda ya malenganyi.—Yeeshaya 1:13.

18. Mbipaso kinyi bya kwibukisha bilombene mwina Kidishitu kusuuka?

¹⁸ Mu Isaleele a kala, bangi bantu abaadi abafubisha ‘malenganyi.’ Yehowa bebalungwile shi: “Paanuwola maasa, neeshikiila ku meeso; nwi balombene kufiimisha nteko yeenu, ntaneyitemesha’mi.” (Yeeshaya 1:15) Banda kunangushena—Yehowa tatemesha sunga nteko yabo! Tatukumiina kukita kintu sunga nkimune kilombene kulwisha kipwano kyetu na Yehowa na kilombene kukita bwa shi apele kwitukwasha, bikishekishe nsaa yatukumbu. (Misambo 41:3) Byabya abitungu tushingule kalolo su kipaso kyatukumiina kwibukisha kii mu kwipushena na myanda ya ba demo sunga ya malenganyi. (Mateo 6:13) Su byekala shi kii mu kwipushena na myanda ya ba demo, abitungu twikisuukye!—Tala Mayi a ku nfudilo 32.

19. Kafilefile akatshinyishaa bantu naminyi?

¹⁹ Nsaa i bangi bantu abanangushena shi Kafilefile na ba demo ta mbantu ba binyibinyi, bangi namu abauku shi be kwanka pa mwanda wa myanda yabadi bafumankane nayo. Bantu bebungi abatshinaa bikudi bibi na mbeyikashe ku bupika bwa bipikwa bya bikudi bibi. Bangi namu abakwatshishaa bantu moo wa ba demo pa kwibalondela myanda i bubi yabakitshinaa bantu. Kebungi, bantu abasankilaa yaya myanda na kwiyilungula bangi. Yaaya myanda yoso ayikwatshishaa bantu moo wa Kafilefile.

20. Mbikunyi byatudi balombene kupalakasha madimi a Satana?

 ²⁰ Banda kunangushena—Satana akumiina shi bantu bekale abamutshinyi. (2 Bena-Tesalonika 2:9, 10) Aye nsha madimi, auku bya kutakula binangu bya bantu abakumiina myanda ya malenganyi na kwibakuminyisha myanda ya madimi. Baba bantu abende na kulungula bangi myanda yabamba shi mbamone na kupusha. Nsaa y’abende na kwiyambuula, abakishakisha mu ngakwilo. T’atukumina kukwatshishena Satana bwa shi akwatshishe bantu moo p’atwe kwibalungula yaya myanda.—Yowano 8:44; 2 Timote 2:16.

21. Pamutwe pa kwisamba myanda ya ba demo, myanda kinyi ayitungu twisambe?

²¹ Su umune a ku bafubi ba Yehowa baadi mutwelakane mu myanda ya ba demo, takumanga kwiyilondela bangi bwa kukisha kapapi nya. Bafubi ba Yehowa ta mbalombene kutshina kintu kyoso kyabadi balombene kukita kwi Satana na ba demo. Kadi, abitungu bakulupile mwi Yesu na mu bukome bwabadi bamupe kwi Yehowa. (Beena-Ebelu 12:2) Yesu tabaadi alondela balongi baye myanda ya ba demo bwa kukisha kapapi nya. Badi ashimika kasele pa mukandu wa Bufumu na “myanda ya kukaanya y’Efile Mukulu.”—Bikitshino 2:11; Luka 8:1; Beena-Looma 1:11, 12.

22. We mwate kitshibilo kya kukita kinyi?

²² Tolubanga shi, kepatshila ka Satana nka kulwisha kipwano kyetu na Yehowa. Kwete kufubisha bitompwanga bya mishindo yoso bwa kwikilwisha. Kadi atuuku mayele a Diabulu oso na twi na kitshibilo kya kukambila myanda yoso itale ba demo. Tatukumiina ‘kulekyela Kafilefile mbalo su ngipeela’ bwa kubofusha kitshibilo kyetu. (Badika Beena-Efeso 4:27.) Eyendo, su twakambila Diabulu, atupanda ku miteo yaye na kwikala mu bulami bwa Yehowa.—Beena-Efeso 6:11.