1, 2. (a) Abitungu tulonde bukunkushi bwa nnanyi? (b) Mu uno shapitre atutaluula nkonko kinyi?

POBODI okii mukinga, pangi kubaadi nsaa ibaabadi abakutekye kwi baledi bobe bwa kukita kintu kampanda kyoshibodi okumiina kukita. Bodi mufule baledi bobe na kuuka shi abitungu webakookyele. Anka, pangi tobodi okumiina kwibakookyela nsaa yoso nya.

² Atuuku shi Yehowa, Nshetu mmwitufule. Etupasukilaa na kukita bya shi twikale na kyoso kyatudi nakyo lukalo bwa kusangela muwa. Etupaa bukunkushi bwa shi tobeshe nshalelo. Ingi nsaa afubaa na bantu bwa kwitupa bwanka. Abitungu tunemekye matalwa a Yehowa. (Nkindji 24:21) Kadi bwakinyi ingi nsaa bi bukopo bwa kukumina bukunkushi? Bwakinyi Yehowa etutekye bwa kulonda bukunkushi? Twi kulesha naminyi shi atunemeka matalwa aaye?—Tala Mayi a ku nfudilo 9.

3, 4. Bantu mbafikye mu kukutwa kupwidika naminyi? Bwakinyi ta mbibofule bwa shi tukumine bukunkushi bwa bangi?

³ Atwe bantu ingi nsaa atwikalaa, na binangu byetombo. Bibabangile nka kasha Adame na Eeve bakita  mulwisho. Sunga mbibabadi bapangibwe bu bantu bapwidikye, abatombokyele bufumu bw’Efile Mukulu. Kubanga nka paapa, bantu boso mbatandjikwe bakutwe kupwidika. Kukutwa kwa kupwidika nkimune kya ku bintu abitukutshisha kukumiina bukunkushi bwa Yehowa na bwa bantu. Kingi kintu nkya shi, bantu babafubisha kwi Yehowa bwa kwitupa bukunku shi mbakutwe kupwidika.—Kibangilo 2:15-17; 3:1-7; Misambo 51:5; Beena-Looma 5:12.

⁴ Pa mwanda twi bakutwe kupwidika, atukimbaa kwitatula. Kwitatula akwitukutshisha kukumiina bukunkushi. Kileshesho, kala mu Isaleele, Yehowa basangwile Moyiise bwadya kukunkusha mwilo waye. Ungi mwana mulume abetamina bu Kora, baadi mufubile Yehowa munda mwa bipwa bibungi, babangile kwitatula, aye nkukutwa kunemeka Moyiise. Moyiise baadi akunkusha mwilo w’Efile Mukulu, kadi tabaadi na kwitatula nya. Kadi mbamutemune bu muntu sha kwiyisha kukila bangi boso mu aa mafuku. Anka Kora tabaadi akumiina bukunkushi bwa Moyiise nya. Baadi mpa na mukuminyishe kisaka kya bantu bwa shi bekale ku lupese lwaaye na batombokyele Moyiise. Nkinyi kibaadi kifikile Kora na ba ntomboshi? Abebayipayile. (Mbadiko 12:3; 16:1-3; 31-35) Mu Bible mwi bileshesho bibungi abitulongyesha shi, kwitatula kwi masaku.—2 Myanda 26:16-21; tala Mayi a ku nfudilo 10.

5. Bangi bantu abaadi bafube bibubi na bufumu bwabo naminyii?

⁵ Pangi tobopushishe abamba shi: “Bufumu abudimbanaa.” Kubanga kala, bantu be bungi mbafube bibubi na bufumu bwabo. (Badika Mulungudi 8:9.) Bu kileshesho, Saule baadi muntu mwiyishe nsaa ibaadi Yehowa mumusangule bu nfumu a Isaleele. Anka baadi  mutadiile kwitatula na kyutu abitama mwishimba dyaye, abyo nkumutakula mu kubingabinga Daavide muntu shibaadi musole mwanda. (1 Samwele 9:20, 21; 10:20-22; 18:7-11) Mafuku kunyima, Daavide bekele nfumu, na baadi umune a ku ba nfumu bakile buwa mu Isalele. Anka, ungi mususa mpa na Daavide baadi mufube bibubi na bufumu bwaye. Baadi mutambukye na Betesheba, mukashi a muntu abetamina bu Uriya, aye nkukimba bya kufwamisha mulwisho waaye pa kutuma Uriya bwashi akafwile ku ngoshi.—2 Samwele 11:1-17.

6, 7. (a) Kifulo kyetu bwa Yehowa akitutakula mu kukita kinyi? (b) Nkinyi kilombene kwitukwasha bwa kukookyela sunga nsaa yabidi bukopo?

⁶ Atunemekaa bukunkushi abufiki kwi Yehowa mwanda twibamufule. Pa mwanda twi bafule Yehowa kukila muntu sunga kintu kyoso, atukumina kumusankisha. (Badika Nkindji 27:11; Mako 12:29, 30.) Kubanga nka mafuku abaadi mulume na mukashi ba kumpala bashale mu lupango lwa Edene, mpa na lelo uno, Satana akuminaa shi bantu bapele kukookyela bufumu bwa Yehowa. Diabulu e na lukalo lwa kwitutakula mu kwela binangu shi Yehowa te na matalwa a kwitulungula kya kukita nya. Anka atuuku shi kwete kudimba. Atukumina ano mayi aamba shi: “Yehowa Efile etu, we mulombeene kupeta ntumbo, kinemo na bukome, mwanda obe ngi bapangile bintu byooso.”—Kibafumbwilwe 4:11.

⁷ Pobodi okii mukinga, pangi abakulongyeshe bwa kukookyela baledi bobe sunga nsaa yoshopusha bya kwibakookyela. Bi mumune, bu byatudi bafubi ba Yehowa, ingi nsaa bi kwitwelela bukopo bwa kukookyela.  Anka twi bafule Yehowa na atumunemekaa, nyi bwakinyi atukitshi mwetu moso bwa kumukookyela. Yesu mwitulekyele kileshesho ki buwa. Baadi mukookyele Yehowa mpa na nsaa yabishibaadi bibofule sunga yashibaadi na mushindo wa kwibikita. Nyi pa mwanda kinyi balungwile Nshaye shi: “Ta nkyankyebe kya kukumbana mpenda kyokyebe’be.”—Luka 22:42; tala Mayi a ku nfudilo 11.

8. Yehowa kwete kwitukunkusha mu ingi mishindo kinyi? (Tala kashibo akamba shi “ Teemesha elango.”)

⁸ Lelo uno, Yehowa kwete kwitukunkusha mu mishindo ilekene. Kileshesho, mmwitupe, Bible. Mmwitupe dingi bakulu mu kakongye. Atulesha shi atunemeka matalwa a Yehowa nsaa yatunemeka bano baadi mutule bwa kwitukunkusha. Su twapela bukwashi bwabo, abikala nka bu’twe abapele Yehowa. Pabapelele bena Isalele kupushiisha Moyiise, Yehowa baadi mwiwate bu mwanda ukata. Bamwene shi abamupele.—Mbadiko 14:26, 27; tala Mayi a ku nfudilo 12.

9. Mbikunyi bilombene kifulo kwitutakula mu kulonda bukunkushi?

⁹ Nsaa yatunemeka baaba be na matalwa, abilesha shi twi bafule bakwetu balume na bakashi. Banda kunangushena. Nsaa ayifiki masaku aatukila ku bipangwa, kisaka kya bantu abafiki mu kukwasha abafubaa pamune bwa kupaasha bantu bebungi. Bwashi kyakya kisaka kyobeshe, abitungu kwikale muntu mwikilumbuule na abitungu oso a kwabadi alonde bukunkushi bwabatuusha. Mbilombene kukitshika naminyi su umune a kwabadi abepula bukunkushi na akita mwakumiina? Sunga ekala na binangu bibuwa, kupela kwaye kwa kukookyela, kwi kufwishila kisaka kyoso nkalakashi, pangi kwi kwibafwishila masaku akata. Bi mumune, su twapela  kulonda bukunkushi bwa Yehowa na bwa baaba baadi mupe matalwa, bangi be kukyenga. Kadi su twakookyela Yehowa, atulesha shi twi bafule bakwetu na shi atunemeka mpàngo ya Yehowa.—1 Beena-Kodinda 12:14, 25, 26.

10, 11. Myanda kinyi yatukyebe kutaluula?

¹⁰ Kyoso akitutekye Yehowa mbwa buwa bwetu. Patulesha kanemo kwi baba be na matalwa mu kifuko, mu kakongye, na patudi kumpala kwa bakata ba mbulamatadi, atupete muloo.—Miiya Ikituulwe 5:16; Beena-Looma 13:4; Beena-Efeso 6:2, 3; Beena-Ebelu 13:17.

¹¹ Kuuka bwakinyi Yehowa atekye shi tunemekye bangi, akwitutakula mu kwibanemeka. Tubandeyi kutaluula byatudi balombene kulesha kanemo mu ino nshalelo isatu.

12. Mulume e kulesha naminyi shi kwete kunemeka matalwa?

¹² Yehowa bapangile kifuko, aye nkupa mwina kifuko oso waye mudimo. Nsaa i mwina kifuko oso apusha kyabamutekye kwi Yehowa, mpàngo ya kifuko ayitambuka kalolo na kifuko kyoso akipete myabi. (1 Beena-Kodinda 14:33) Yehowa mmutuule mulume bu nfumu a kifuko. Bino abilesha shi, Yehowa atekye shi mulume alombashe nkalo ya kifuko, akunkushe mukashi na bana baye mu kipaso ki buwa. Byabya, mulume e na kitungo kwi Yehowa muyiile byapasukila kifuko kyaye. Mulume mwina Kidishitu ekalaa na kalolo na kifulo na akitshinaa kifuko kyaye myanda nka byabakitshinaa kakongye kwi Yesu. Nsaa ayikitshi mulume bino, alesha shi anemeka Yehowa.—Beena-Efeso 5:23; tala Mayi a ku nfudilo 13.

13. Mukashi e kulesha naminyi shi kwete kunemeka Matalwa?

 ¹³ Mukashi mwina Kidishitu namu e na mudimo ukata wa kinemo. Akwatshishena mulume aaye nsaa y’etatshisha bwa kwikala nfumu a kifuko e buwa. Aye na mulume aaye, be na bushito bwa kukusha bana baabo. Umune wa ku mishindo y’alongyeshaa bana baye bwa shi bekale na kanemo, mpaadi aye nabeene bu kileshesho. (Nkindji 1:8) Anemeka mulume aaye na kukwatshishena bitshibilo byaye. Sunga nsaa yashakumina binangu byaye mu ingi myanda, alesha mulume aaye bi mweneno aaye na kanemo koso. Su mukwetu mukashi mbamwibakile kwi mulume shii Temwe a Yehowa, e na lukalakashi lukata. Kadi su atungunuka na kumufula na kumunemeka, pangi dingi efuku mulume aaye e kukumiina kuuka Yehowa na kumulangwila.—Badika 1 Mpyeele 3:1.

14. Mbikunyi bilombene bana kulesha shi abanemeka matalwa?

¹⁴ Bana be na muulo ku meso kwa Yehowa, na be na lukalo lukata lwa kukalwilwa na kukunkushibwa kalolo. Nsaa i bana abanemeka baledi baabo, baledi abekala na muloo. Ungi mwanda wi na muulo ukata, mu kukookyela kwabo abalesha kanemo kwi Yehowa na kumusankisha. (Nkindji 10:1) Mu bifuko bibungi, bana bakwete kukushibwa na penda muledi umune. Bino bi kwikala bukopo kwi bana mpa na kwi muledi. Anka nsaa i bana abakokyela na kukwatshishena nshabo sunga nyinabo, nshalelo ekala a muloo mu kifuko. Sunga mbyabya, takwi kifuko kipwidikye nya. Anka kifuko kyoso ki kwikala na muloo su bena kifuko boso bakwete kulonda bukunkushi bwa Yehowa. Bino abitumbisha Yehowa, Mupangi a bifuko byoso.—Beena-Efeso 3:14, 15.

15. Twi kulesha naminyi shi atunemeka be na matalwa mu kakongye?

¹⁵ Yehowa kwete kwitukunkusha ku bukwashi bwa kakongye ka bena Kidishitu, na mmutuule Yesu bu nfumu aako. (Beena-Kolose 1:18) Yesu namu mmupe “mpika a kishima na mupatulukye” mudimo wa kudiisha mwilo w’Efile Mukulu pa nsenga. (Mateo 24:45-47) Lelo uno, “mpika a kishima na mupatulukye” nyi nkasaka ka Bakunkushi-Bakulu. Kasaka ka Bakunkushi-Bakulu kakwete kwitupa byabya byatudi nabyo lukalo pa nsaa ilombane, bwa shi tulame lukumino lwetu lunyingye. Bakulu, bafubi ba midimo, na bakunkushi ba bifunda, bakwete kukwasha tukongye mu nsenga ishima na bakwete kupeta bukunkushi abufiki kwi Kasaka ka Bakunkushi-Bakulu. Bano bakwetu boso be na mudimo wa kwitukwasha. Abayimuka ku meso kwa Yehowa muyiile byabakitshi mudimo bwabo. Byabya nsaa yatunemeka bano bakwetu balume, atunemeka Yehowa.—Badika 1 Beena-Tesalonika 5:12; Beena-Ebelu 13:17; tala Mayi a ku nfudilo 14.

16. Bwakinyi twi kwamba shi bakulu na bafubi ba midimo abebasangulaa kwi kikudi ki selele?

¹⁶ Bakulu na bafubi ba midimo, bakwete kukwasha kakongye bwashi kekale na lulamato mpa na buumune. Eyendo shi, mbakutwe kupwidika nka byatudi. Byabya, abebasangulaa naminyi? Bano bakwetu ababandaa kulombasha myanda itekibwe i mu Bible. (1 Timote 3:1-7, 12; Tite 1:5-9) Yehowa baadi mufube na kikudi ki selele bwa kukwasha bafundji ba Bible bwabadya kupatuula ino myanda itekibwe. Bakulu abelaa nteko kwi Yehowa bwa shi ebape kikudi ki selele nsaa yabesamba bwa kusangula muntu bu mukulu sunga mufubi a  midimo. Mbinyibinyi shi, tukongye twi ku bukunkushi bwa Yesu na Yehowa. (Bikitshino 20:28) Bantu babadi batuule bwa kwitukwasha na kwitupasukila nyi mbya buntu by’Efile Mukulu.—Beena-Efeso 4:8.

17. Bwa kulesha kanemo, nkinyi kilombene kukita mukwetu mukashi ingi nsaa?

¹⁷ Ingi nsaa, kwi kukutshikwa mukulu sunga mufubi a midimo bwa kukita mudimo kampanda mu kakongye. Bangi bakwetu balume babatshishibwe be kukwasha, kadi su ta kwi su ngumune, mukwetu mukashi e kukita ino midimo yabakitaa kwi bakwetu balume babatshishibwe. Yaaya nsaa, afwale kintu kya kubwikila ku mutwe, pangi kitambala sunga kifulu. (1 Beena-Kodinda 11:3-10) Paapa, alesha shi kwete kunemeka mpàngo ya Yehowa, mu kifuko na mu kakongye.—Tala Mayi a ku nfudilo 15.

18, 19. (a) Mukanda wa Beena-Looma 13:1-7 awitulongyesha kinyi? (b) Mbikunyi byatudya kulesha kanemo kwi bakata ba mbulamatadi?

¹⁸ Lelo uno Yehowa mmutadiile mbulamatadi bwa shi ikale na matalwa kampanda, na abitungu twiyinemekye. Bakata ba mbulamatadi abalumbuula maumbo, mbalo yatudi bashaale bwashi myanda ikidikye kalolo na kupa bantu bukwashi bwabadi nabo lukalo. Beena Kidishitu abakookyelaa elango adisanganyibwa mu Beena-Looma 13:1-7. (Badika.) Atunemeka “ba nfumu be na matalwa” na kukookyela miiya y’eumbo na ya mbalo yatudi bashaale. Ino miiya i kwikala itale kifuko kyetu, myanda ya makuta, sunga bintu byetu. Kileshesho, atufutaa bitadi na kwiukisha mbulamatadi myanda yetutekye. Kadi, twi kukita kinyi su bakata ba  mbulamatadi betuteka shi tukite kintu kampanda kikutwene na miiya y’Efile Mukulu? Mpyeele mutumibwa bambile shi: “Bibuwa kukookyela Efile Mukulu pe kukookyela bantu.”—Bikitshino 5:28, 29.

¹⁹ Nsaa yatwisamba na bakata ba mbulamatadi, bu ba nsushi sunga ba mpulushi, abitungu twikale na kanemo. Ba nsongwa bena Kidishitu, be na kya kunemeka balongyeshi babo sunga bangi bena mudimo ba ku kalasa. Ku mudimo, abitungu tunemekye mukata etu, sunga bangi bena mudimo netu tabamunemeka. P’atukitshi byabya, atwambula Mpoolo mutumibwa, baadi anemeka bakata ba mbulamatadi sunga nsaa yabibaadi bukopo kwibikita. (Bikitshino 26:2, 25) Sunga bangi t’abetukitshina myanda ibuwa, twikale nka atwibanemeka—Badika Beena-Looma 12:17, 18; 1 Mpyeele 3:15.

20, 21. Mbipeta kinyi bibuwa bilombene kutuuka nsaa yatunemeka bangi?

²⁰ Mu nsenga ishima bantu tabakwete kwinemekyeshena nya. Anka, bafubi ba Yehowa tabe byabya nya. Twi na kitshibilo kya kunemeka muntu ese. Atulondo elango dya Mpyeele mutumibwa bambile shi: “Nemekai bantu booso.” (1 Mpyeele 2:17) P’atunemeka bangi, abebimono. Yesu etulungula shi: “Etaata dyenu diileeshe kwi bantu, bwashi p’abamono bikitshino byenu bibuwa batumbishe Nshenu e mwiyilu.”—Mateo 5:16.

²¹ P’atulesha kanemo mu kifuko, mu kakongye, na mu ingi nshalelo, kileshesho kyetu ki buwa ki kutakula bangi bwa kulonga myanda ibungi itale Yehowa. Na nsaa y’atunemeka bangi, atunemeka dingi Yehowa. Bino abisankisha Yehowa na kumulesha shi twibamufule.