Kwi baaba bafule Yehowa Efile Mukulu na Eyi dyaye Bible:

Yesu bakwile shi: “Anukawuku bya binyibinyi, na byabya binyibinyi abikenwikasha bantu balungantu.” (Yowano 8:32) Banda kunangushena bibopushishe nsaa iboukile bya binyibinyi bya mu Bible bwa musango wa kumpala! Bibaadi bikusankishe pa kuuka shi, mu uno ndumbulwilo muule na madimi, twi balombene kulonga bya binyibinyi.—2Timote 3:1.

Yehowa Efile Mukulu akumiina shi, tuukye bya binyibinyi. Dingi, bu byatudi bafule bantu, atukumiina kwibalungula byanka. Kadi kufubila Efile Mukulu akutekye myanda ibungi. Abitungu tukite mwetu moso, bwa kwikala na nshalelo a bena Kidishitu, mwanda atunemekaa miya ya Yehowa ngofu. Yesu balesheshe kipaso ki na muulo kyatudya kulesha Efile Mukulu shi twibamufule. Bambile shi: “Anwe balame mayi ande, anwikala mu kifulo kyande, bu byandi mu kifulo kya Nshaami , pa kulama mayi aaye.”—Yowano 15:10.

Yesu badi mufule Nshaye binyibinyi, na baadi akitshi kyoso kibaadi akimutekye Nshaye. Su twambula Yesu mu nshalelo etu, Yehowa etufulu na atwikala na muloo wa binyibinyi. Yesu bambile shi: “Su anuwuku yino mianda, nwi baasha muloo su anwiyikitshi.”—Yowano 13:17.

Atukulupila shi, uno mukanda aukukwasha bwa kwikala na nshalelo mwipushene na bya binyibinyi bya mu Bible, bwa shi ofikye kuuku a Efile Mukulu. Atutekye bwashi kifulo kyobe bw’Efile Mukulu kitame na shi welame “mu kifulo ky’Efile Mukulu . . . na kutengyelanga muwa wa looso.”—Yunda 21.