1-3. (a) Nkinyi akitulongyesha mukanda wa Nkindji 13:20? (b) Bwakinyi abitungu shi tusangule ba kuuku betu kalolo?

TOBOMWENE mwana tooka byatala baledi baye? Sunga tabangile kwakula, alamiinaa bintu byamono na byapusha. Pende na kukula, abanga kwambula baledi baye. Tabitukanyisha pa kumona shi, bantu bakulu namu be kubanga kunangushena na kukita myanda nka bu bantu babatembaa nabo.

² Mu mukanda wa Nkindji 13:20 atubadika shi: “Su otemba na basha binangu, obe namu okekala n’abyo.” Pano “kutemba na,” akulesha kukisha nsaa pamune na yawa muntu. Bino ta mbimeene penda pa kwikala pepi naye nya. Ungi muntu atalulaa myanda ya mu Bible bambile shi, kutemba na muntu kampanda akulesha kumufula na kwipusha bu’be e pepi naye. Bantu batutembaa nabo be kwikala na bukitshishi bukata kwatudi, bikishekishe su twi pepi nabo ngofu.

³ Ba kuuku betu be kwikala na bukitshishi bwi buwa sunga bwi bubi kwatudi. Mukanda wa Nkindji 13:20 autungunuka shi: “Anka, su otemba na  balôtakane, okamono malwa.” Mu kina Ebelu, ‘kutemba’ na muntu kampanda akulesha “kwikala pepi” na yawa muntu, nyi nkwamba shi, kudya naaye bu kuuku. (Nkindji 22:24; Bansushi 14:20) Ba kuuku bafule Efile Mukulu, abetunyingisha bwa kushaala na lulamato kwadi. Bwatudya kuuka bya kusangula ba kuuku betu na binangu, tutaluuleyi bantu abakuminaa Yehowa shi bekale ba kuuku baaye.

4. Bwakinyi kwikala kuuku a Efile Mukulu nkinemo kikata? Na bwakinyi Yehowa baadi mwitamine Abrahame shi, ‘kuuku ande’?

⁴ Yehowa Nfumu a Eyilu na nsenga, mmwitupe bulungantu bwa kwikala ba kuuku baaye. Uno nyi mwabi ukata. Yehowa asangulaa ba kuuku baaye kalolo. Asangulaa baaba bamufule na be na lukumino mwadi. Banda kutentekyesha Abrahame. Baadi mwilumbuule bwa kukitshina Efile Mukulu kintu kampanda. Misusa i bungi, Abrahame balesheshe shi e na lulamato na kukookyela. Baadi mpa na mukumine kulambula mwan’aye Isaake. Abrahame baadi na lukumino shi: “Sunga Isaake afwa Efile Mukulu amusaangula.” (Beena-Ebelu 11:17-19; Kibangilo 22:1, 2, 9-13) Abrahame baadi na lulamato mpa na kukookyela, na Yehowa namu nkumwitamina shi, ‘kuuku ande.’—Yeeshaya 41:8; Shaake 2:21-23.

5. Yehowa apusha naminyi pabitale baaba be na lulamato kwadi?

⁵ Yehowa ataa ba kuuku baye na muulo ukata. Ba kuuku baye abetatshishaa bwa kwikala na lulamato kwadi kukila kwi kingi kintu kyoso. (Badika 2 Samwele 22:26.) Be na lulamato na abamukookyela mwanda mbamufule. Bible amba shi Efile Mukulu nyi  “nkuku a balulame” baaba abamukookyela. (Nkindji 3:32) Yehowa ayitamina ba kuuku baye bwabadya kushala mu “nshibo” yaaye. Ebetekye bwabadya kumulangwila na kumuteka efuku dyoso.—Misambo 15:1-5.

6. Twi kulesha shi twi bafule Yesu naminyi?

⁶ Yesu bambile shi: “Su muntu e nami kifulo, alame bishima byande, Yaaya akekala nê kifulo.” (Yowano 14:23) Byabya bwa kwikala ba kuuku ba Yehowa, abitungu dingi tufule Yesu na kukita myanda yaadi mwitulongyeshe. Bu kileshesho, atukokyelaa eyi dya Yesu dya kulungula mukandu wibuwa na kwikasha bantu bu balongi. (Mateo 28:19, 20; Yowano 14:15, 21) Pa mwanda twi bafule Yesu, ‘atulondo mu matabula aaye.’ (1 Mpyeele 2:21, EEM) Yehowa asangalaa nsaa y’etumono atwitatshisha bwa kwambula Mwan’aye mu ngakwilo na mu bikitshino byetu.

7. Bwakinyi abitungu tutaluule su ba kuuku betu mba kuuku ba Yehowa?

⁷ Ba kuuku ba Yehowa be na lulamato, kululama, na kukookyela, mbafule dingi Mwan’aye. Atusangulaa ba kuuku be byabya bu abibasangulaa Yehowa su? Su ba kuuku bobe abambula Yesu na mbepaane mu kulongyesha bangi pabitale Bufumu bw’Efile Mukulu, be nkukwasha bwa kwikala muntu e buwa na kushaala na lulamato kwi Yehowa.

8. Nkinyi akikusankisha ku bu loole bwa Luuta na Naomi?

⁸ Mu Bible mwi bileshesho bi bungi bya bantu babaadi badye bukuuku bu kileshesho, bu loole bwa ba Luuta na nyinaaye mweno, Naomi . Bano bakashi, abaadi ba mu maumbo elekene, na Naomi baadi  mukulu a Luuta ngofu. Anka abekeele ba loole ba p’eshimba mwanda, boso bwabo abaadi bafule Yehowa. Naomi pabatshile kitshibilo kya kukatuka mu Moabe bwa kwaluka mu Isalele, “Luuta bamulameete.” Balungwile Naomi shi: “Mwilo oobe awikala mwilo wande n’Efile oobe, Efile ande.” (Luuta 1:14, 16) Luuta baadi na kalolo kwi Naomi. Pababafikile mu Isaleele, Luuta bafubile ngofu bwa kukwasha loole aaye. Naomi baadi mufule Luuta ngofu na aye nkumupa malango ebuwa. Luuta baadi mumupushiishe, pa wawa mwanda, abo boso abapetele myabi i bungi.—Luuta 3:6.

9. Nkinyi akikukanyisha pabitale bu kuuku bwa Daavide na Yonatane?

⁹ Daavide na Yonatane nkingi kileshesho kya ba kuuku be buwa abaadi boso na lulamato kwi Yehowa. Yonatane baadi mukulu a Daavide na bipwa 30 na baadi mu mulongo wa kabidi bwa kwikala nfumu a Isalele. (1 Samwele 17:33; 31:2; 2 Samwele 5:4) Kadi, pabapushishe shi Yehowa mmusangule Daavide bwadya kwikala nfumu, tabapushishe mukao sunga kukimba kwipikena naye nya. Anka, Yonatane baadi mukite mwaye moso bwa kukwatshishena Daavide. Kileshesho, pabadi Daavide mu masaku, Yonatane baadi ‘mumukankamikye bwadya kukulupila mwi Yehowa.’ Baadi mpa na mutuule muwa waye mu masaku bwa kupaasha Daavide. (1 Samwele 23:16, 17, EEM) Daavide namu baadi kuuku sha lulamato. Baadi mulee bwa kukwasha kifuko kya Yonatane, aye nkulombasha mulayilo waye sunga kunyima kwa lufu lwa Yonatane.—1 Samwele 18:1; 20:15-17, 30-34; 2 Samwele 9:1-7.

10. Kileshesho kya bu kuuku bwa bano beena Ebelu basatu kibakulongyesha kinyi?

 ¹⁰ Shadrake, Meshake, na Abedenego nyi mba kuuku basatu beena Ebelu bababadi bende nabo mu dingi eumbo pababadi bana bakinga. Ku yaya mbalo i kula na bifuko byabo, abaadi bekwashene bwa shi bashaale na lulamato kwi Yehowa. Kunyima, abo abapu kukula, lukumino lwabo lubaadi lotompibwe pabaadi Nfumu Nabukodonosore mwibelele mwiya wa kulangwila nkishi a òòlo. Shadrake, Meshake, na Abedenego abapelele kulangwila yawa nkishi abo nkulungula nfumu shi: “Tatufubila b’efile boobe t’atulangwila nkishi a òolo oodi mwimikye.” Pabaadi lukumiino lwabo lutompibwe, bano ba kuuku basatu abashadile na lulamato kwi Efile Mukulu.—Ndanyele 1:1-17; 3:12, 16-28.

11. Atuuku naminyi shi Mpoolo na Timote babaadi ba kuuku be buwa?

¹¹ Pabaadi Mpoolo mutumibwa mufumankane na Timote, bamwene shi Timote mmufule Yehowa na kwete kwitatshisha bwa kakongye. Nyi Mpoolo nkumulongyesha bwa shi aukye bya kukwasha bakwetu balume na bakashi ba mu ma mbalo elekene. (Bikitshino 16:1-8; 17:10-14) Timote baadi mufube ngofu, abyo nkutakula Mpoolo mu kwakula shi: ‘Mmwipane pamune nami ku mufubo wa mukandu wibuwa.’ Mpoolo baadi muukye shi Timote ‘akekalakasha binyibinyi’ bwa bakwetu balume na bakashi. Bu bibabaadi bafubile Yehowa pamune ngofu, Mpoolo na Timote abekeele ba kuuku be buwa.—Beena-Fidipe 2:20-22; 1 Beena-Kodinda 4:17.

12, 13. (a) Bwakinyi abitungu tusangule ba kuuku kalolo sunga mu kakongye? (b) Bwakinyi Mpoolo mutumibwa baadi mutuushe dino elango di mu 1 Beena-Kodinda 15:33?

¹² Mu kakongye twi kulongyela kwi bakwetu balume na bakashi na kukwasha bangi bwabadya kushaala na lulamato. (Badika Beena-Looma 1:11, 12.) Anka, sunga mu kakongye, abitungu twikale badimukye pabitale muntu atusangula bwa kwikala kuuku etu. Twi na bakwetu balume na bakashi batukile mu ma mbalo elekene. Bangi mbapya mu kakongye, bangi  namu tabadi bipwa bi bungi na kufubila Yehowa. Bwa shi kipwano kya muntu na Yehowa kitame abyataa mafuku e bungi, anka abikalaa mutshi aupu mafuku ebungi bwa kupa bikuba. Nyi bwakinyi abitungu twileshene lwishinko na kifulo na twikale atusangula ba kuuku betu na binangu.—Beena-Looma 14:1; 15:1; Beena-Ebelu 5:12–6:3.

¹³ Ingi nsaa kwi kutuuka mwanda ukata mu kakongye, na abitungu twikale badimukye ngofu. Bi kwikala shi mukwetu mulume sunga mukashi, kwete kukita myanda yabadi baleshe mu Bible shi i bubi. Sunga shi, ungi muntu kwete kwidiladilanga mu kipaso kilombene kulwisha kakongye. Bino tabitukanyisha nya, mwanda mpa na mu siekele a kumpala, myanda ibaadi ayituuku misusa i bungi mu kakongye. Anka, Mpoolo mutumibwa baadi mudimushe baaba beena Kidishitu shi: “Tanwidimbanga. Ba kuuku be bubi abalwishaa bwikashi bwibuwa.” (1 Beena-Kodinda 15:12, 33) Mpoolo dingi baadi mudimushe Timote pabitale muntu adya kusangula bu kuuku. Abitungu tukite nka byabya.—Badika 2 Timote 2:20-22.

14. Mushindo watusangula ba kuuku betu ngutale kipwano kyetu na Yehowa naminyi?

¹⁴ Abitungu tukalwile kipwano kyetu na Yehowa. Akyo nyi nkintu ki na muulo ukata kyatudi nakyo. Nyi bwakinyi atupelaa kwikala ba kuuku ba bantu balombene kubofusha lukumino lwetu na kulwisha kyakya kipwano. Anka abikalaa butongo bwabadi basabikye mu nfinyo ta mbulombene kuula na mema, tatwi balombene kudya bu kuuku na bantu be bubi na kukulupila shi abikala bibofule bwatudya kukita myanda ibuwa. Abitungu tusangule ba kuuku betu  kalolo.—1 Beena-Kodinda 5:6; 2 Beena-Tesalonika 3:6, 7, 14.

15. We kukita kinyi bwa kupeta ba kuuku be buwa mu kakongye?

¹⁵ Mu kakongye twi kusangana bantu bafule Yehowa. Nyi balombene kwikala ba kuuku betu. (Misambo 133:1) Tokimbanga ba kuuku penda ba mulongo oobe nya. Tentekyesha shi Yonatane baadi mukulu a Daavide kula, na Luuta baadi mukinga ngofu kwi Naomi. Abitungu tulonde elango di mu Bible adyamba shi: “Shitulayi mashimba enu.” (2 Beena-Kodinda 6:13; badika 1 Mpyeele 2:17.) Na nsaa yokwete kwambula Yehowa, bangi namu abekala na lukalo lwa kudya nobe bu kuuku.

16, 17. Su muntu a mu kakongye etulwishisha, nkinyi kyatushi balombene kukita?

¹⁶ Mu kifuko kyoso, mwi bantu belekene, be na mweneno na mushindo wa kukita myanda wilekene. Bi nka byabya dingi mu kakongye. Kuno kwilekena nyi mwanda wa muloo, na twi kulonga bi bungi kwi bangi. Ingi nsaa bilumbu bi kukita shi twikutwene na bakwetu na kwibafitshila munda. Ingi nsaa twi kutapika ku mashimba. (Nkindji 12:18) Twi kutadiila bino bilumbu bwashi bitubofushe sunga kukatuka mu kakongye su?

¹⁷ Nya. Sunga muntu kampanda etulwishisha, tatwi balombene kukatuka mu kakongye nya. Yehowa ta nnaye betufitshisha munda nya. Mmwitupe muwa na bingi bintu byoso. Aye nyi atudya kufula na kulamata. (Kibafumbwilwe 4:11) Kakongye nkyabuntu kya kwi Yehowa akitukwasha bwa kulama lukumino lwetu bwashi lushale lunyingye. (Beena-Ebelu 13:17)  Tatwi balombene kusumbula kya buntu kyadi mwitupe mwanda mbetulwishishe kwi muntu kampanda nya.—Badika Misambo 119:165.

18. (a) Nkinyi kilombene kwitukwasha bwa kwikala mu kipwano na bakwetu balume na bakashi? (b) Bwakinyi abitungu shi tufwile bangi lusa?

¹⁸ Twi bafule bakwetu balume na bakashi na atukuminaa kwikala bi buwa nabo. Yehowa tatekaa muntu bwashi ekale mupwidikye nya, n’atwe namu tatwi balombene kwibikita. (Nkindji 17:9; 1 Mpyeele 4:8) Atwe boso atukitaa bubi, kadi kifulo akitukwasha bwa kutungununa na ‘kwifwilena lusa ku muntu na muntu.’ (Beena-Kolose 3:13) Kifulo akitukwasha bwa kupela kwata ka mwanda kapela bu kilumbu kikile bukata. Eyendo shi, su muntu betufitshisha munda, bi kwikala bukopo bwa kuleka kunangushena ku byanka. Mbibofule bwa shi tukwate nsungu na kufitshila yawa muntu munda. Kadi bino bi kwitwinyongosha na kunyisha kwitwikasha be bubi. Aku namu, nsaa yatufwila muntu betulwishisha lusa, twi kupeta butaale bwa mu binangu, buumune mu kakongye, na kikile byoso, kwikala mu kipwano ki buwa na Yehowa.—Mateo 6:14, 15; Luka 17:3, 4; Beena-Looma 14:19.

19. Nsaa kinyi ayitungu shi tutshibe kipwano na muntu mu kakongye?

¹⁹ Mu kifuko ki buwa, muntu oso akitaa byashi bangi bekale na muloo. Banda kwela binangu, su umune atomboka, bantu boso mu kifuko batompa ku mukwasha misusa ibungi, kadi takumiina kupusha. E kwata kitshibilo kya kukatuka ku nshibo sunga shi nfumu a kifuko e kumutuusha mu nshibo. Mwanda wi byabya  wi kukitshika mu kakongye. Muntu e kuyididila na kukita myanda ishayisankisha Yehowa na ayilwisha kakongye. E kupela elango na kulesha mu bikitshino byaye shi takumiina dingi kwikala mwina kakongye. E kwata kitshibilo kya kwituukila mu kakongye, sunga shi be kumutuusha mwanka. Su bino byakitshika, Bible alesha patooka shi ‘tulekye kwipushena’ na yawa muntu. (Badika 1 Beena-Kodinda 5:11-13; 2 Yowano 9-11) Bi kwikala bukopo su yawa muntu nkuuku eetu sunga mwina kifuko netu. Kadi mu mwanda wi bino, lulamato lwetu kwi Yehowa abitungu lwikale lunyingye kukila lwatudi nalo kwi muntu kampanda ese.—Tala Mayi a ku nfudilo 8.

20, 21. (a) Mpàngo ya kutuusha muntu mu kakongye ayilesha kifulo naminyi? (b) Bwakinyi bi na muulo bwa shi tusangule ba kuuku betu na binangu?

²⁰ Kutuusha kwa muntu mu kakongye nyi mpàngo ya kifulo ya Yehowa. Ayikalwila kakongye kwi baaba bashabatumikila miiya ya Yehowa. (1 Beena-Kodinda 5:7; Beena-Ebelu 12:15, 16) Ayitukwasha bwa kulesha kifulo bw’eshina dya Yehowa, miiya yaaye ikata, na Yehowa nabeene. (1 Mpyeele 1:15, 16) Na, mpàngo ya kutusha muntu mu kakongye ayilesha kifulo kwi yawa batushibwa mu kakongye. Dino dinyoka dikata adimukwasha bwa kwiuka shi byakitanga bi bubi na, ashintulukye. Be bungi babaadi batushibwe mu kakongye, kunyima mbalukile kwi Yehowa na mbebakuukile kalolo mu kakongye.—Beena-Ebelu 12:11.

²¹ Mu mishindo yoso, ba kuuku betu be kwikala na bukitshishi kwatudi. Nyi bwakinyi bi na muulo twibasangule na binangu. Su twi bafule baaba babadi bafule kwi Yehowa, atwikala munkatshi mwa bantu balombene kwitukwasha bwa kushaala balamate kwadi bwa loso.