Bubi bubabangile pa nsenga pabaadi Satana mwakule madimi a kumpala. Ku mbangilo Satana baadi mwikeyilu mupwidikye, kadi “tamushimatshiile mu binyibinyi.” (Yowano 8:44) Baadi mupete malaka aashi bantu bamulangwile; aku namu nkapenda Efile Mukulu nyi mupwandikiile kulangwila. Satana badimbile mukashi a kwibedi, Eeva, na bamukuminyishe bwa kumukokyela pamutwe pa kukokyela Efile Mukulu. Adame namu balondele mukashi aaye, aye nkukutwa kukokyela Efile Mukulu. Kitshibilo kya Adame kya kupela kukokyela Efile Mukulu nkitufwishile makyenga na lufu.​—Badika Kibangilo 3:1-6, 19.

Pabaadi mupe Eeva mayele a kupela kukokyela Efile Mukulu, Satana bebatakwile mu kutombokyela matalwa a Yehowa a kwikala nfumu sunga mbalo yaye ya bu Sha-kwiyilu kula. Bantu bebungi mbalonde Satana, pabakwete kupela kukumina shi Efile Mukulu nyi Nfumu aabo. Byabya, Satana mufikye bu “nfumu a . . . nsenga.”​—Badika Yowano 14:30; 1 Yowano 5:19.

Bintu byooso bibakitshine Efile Mukulu mbipwidikye. Bantu na miikeyilu babaabadi bapangye kwi Efile Mukulu babaadi na mushindo wa kumukokyela mu byooso. (Miiya Ikituulwe 32:4, 5) Efile Mukulu baadi mwitupangye na bulungantu bwa kusangula kukita myanda ibuwa sunga ibubi. Bwabwa bulungangu abwitupa mushindo wa kulesha shi twi bafule Efile Mukulu.​—Badika Jaake 1:13-15; 1 Yowano 5:3.

Munda mwa mafuku, Yehowa mutadiile shi batombokyele matalwa aye a kwikala nfumu. Bwakinyi? Bwa kulesha shi takwi bungi bufumu bukumbeene kukwasha bantu. (Mulungudi 7:29; 8:9) Myanda ikitshikye  munda mwa bipwa 6 000 bishale ayitulesha byanka kalolo. Mafumu ba bana ba bantu ta ngobeshe kupudisha ngoshi, kwipayishena, kukutwa kwa kululama, sunga mikumbo nya.​—Badika Yeelemiya 10:23; Beena-Looma 9:17.

Kadi Bufumu bw’Efile Mukulu tabwi bu bwa bantu nya; abo abukyebe kutwadila bantu myanda ibuwa. (Yeeshaya 48:17, 18) Kubashala mafuku apela bwashi Yehowa abutule mafumu ooso a bantu. Nkapenda bantu abasangula kukunkushibwa n’Efile Mukulu nyi abakekala na muwa pa nsenga.​—Yeeshaya 11:9. Badika Danyele 2:44.

Tala video Bwakinyi Efile Mukulu mmutadiile makyenga?

Satana bambile shi muntu su ngumune tamulombeene kufubila Yehowa penda bwa kifulo ky’eyendo nya. Okumina kulesha shi badimbile su? Olo! Lwishinko lw’Efile Mukulu alwitupa mushindo wa kulesha su atukyebe kukunkushibwa n’Efile Mukulu sunga kukunkushibwa na bantu. Atulesha lupese lwatudi mu nshalelo etu.​—Badika Yoobo 1:8-12; Myeele 27:11.

Twi bakumbeene kusangula Efile Mukulu bu Nfumu etu su atulongo pabitale lulangwilo lw’eyendo na atumulangwila muyiile abyamba Eyi dy’Efile Mukulu, Bible. (Yowano 4:23) Twi kupela kukunkushibwa na Satana su atupele kutwela mu myanda ya politike na mu ngoshi, bu bibakitshine Yesu.​—Badika Yowano 17:14.

Satana e na bukome bwa kukita bwashi bantu bamone myanda i butete na ya masaku bu ibuwa. Su atupele yaya myanda, bangi bakuuku beetu sunga bakwetu ba mu kifuko mbakumbeene kwitusepa sunga kubanga kwitutosha. (1 Mpyeele 4:3, 4) Byabya abitungu twate kitshibilo. Twi kukimba bakuuku munkatshi mwa bantu bafule Yehowa su? Twi kukokyela miiya yaaye ayilesha kifulo na binangu su? Su tubakitshi byabya, atulesha shi Satana baadi mudimbe pabambile shi su muntu e mu nkalakasho tamukumbeene kukokyela Efile Mukulu.​—Badika 1 Beena-Kodinto 6:9, 10; 15:33.

Kifulo ky’Efile Mukulu bwa bantu akitushinkamisha shi bubi na makyenga abikapu. Baaba abalesha shi be na lukumino mu uno mwanda abakekala na muwa wa looso.​—Badika Yowano 3:16.