DILONGYESHA 2
Efile Mukulu nnanyi?
1. Bwakinyi abitungu tulangwile Efile Mukulu?
Efile Mukulw’eyendo nyi Mupangi a bintu byooso. Te na mbangilo sunga nfudiilo nya. (Misambo 90:2) Aye nyi Nsulo a mukandu wibuwa wi mu Bible. (1 Timotee 1:11) Bu bi Efile Mukulu mwitupe muwa, abitungu tumulangwile nkapenda aye.—Badika Bifumbulwe 4:11.
2. Efile Mukulu e naminyi?
Takwi muntu su ngumune tabamwene Efile Mukulu mwanda nyi Nkikudi, nyi kwamba shi mukile bipangwa byooso bi na muwa pa nsenga na bi na mbidi ayimweneka. (Yowano 1:18; 4:24) Sunga mbyabya, twi balombeene kushinguula bumuntu bwaye patutala bintu byadi mukite. Bu kileshesho, bikuba na bilongo bya mishindo ilekene abitulesha kifulo kyaye na binangu byaaye. Bukata bw’eyilu na nsenga abwitulesha bukome bwaye.—Badika Beena-Looma 1:20.
Twi bakumbeene kulonga ingi myanda itale bumuntu bw’Efile Mukulu patubadika Bible. Bu kileshesho, Bible etulesha akikuminaa Efile Mukulu na kyasha kuminaa, mushindo washalaa na bantu, na mushindo wakitshinaa bantu myanda, na mushindo wakitaa su bantu abakitshi myanda ibuwa sunga ibubi.—Badika Misambo 103:7-10.
3. Efile Mukulu e n’eshina su?
Yesu bambile shi: “Yaay’etu e mwiyilu, eshina dyoobe dyende ntumbo.” (Mateo 6:9) Sunga byabidi shi abamwitanyina mu myasu ibungi, Efile Mukulu e n’eshina nkapenda dimune. Mwidimi dyooso, abeditanyina mu mishindo ilekeene. Mu Kisongye abeditanyinaa bu “Yehowa.” Kadi bangi bantu abamwitanyinaa bu “Yawe.” Bible amba pabitale Efile Mukulu shi: “Obe e n’eshina shi Yehowa, Obe bupenka boobe we Sha kwiyilu-kula pa nsenga ishima.” (Misambo 83:18, NW) Mukanda wa Bifumbulwe 19:6 awamba shi “Aleluuya,” abipatuula shi tumbishayi Yah sunga Yehowa.
Eshina dy’Efile Mukulu mbedikaashe mu ma Bible ebungi, pa mbalo yadyo beela myasu bu Mwanana sunga penda bu Efile Mukulu. Kadi pababafundile Bible, eshina dy’Efile Mukulu dibaadi mwanka misango ikile 7 000. Yesu baukishe eshina dy’Efile Mukulu pabaadi alongyesha bantu mwanda w’Efile Mukulu.—Badika Yowano 17:26.
Tala video Efile Mukulu e n’eshina su?
4. Yehowa etatshishaa bwetu su?
Nka bu uno nsha mwana e na kifulo, Efile Mukulu kwete kukita bwashi twikale na muloo wa looso
Kupalakana kwa makyenga mu nsenga ishima akulesha shi Yehowa Efile Mukulu takwete kwitatshisha bwetu su? Bangi abamba shi etutuminaa makyenga bwa kwitutompa, kadi byabya ta mby’eyendo nya.—Badika Jaake 1:13.
Efile Mukulu mupe bantu bulungantu bwa kusangula kibuwa na kibubi. Kwikala na bulungantu bwa kwisangwila kufubila Efile Mukulu ta kwitusangasha su? (Yooshwa 24:15) Kadi bantu bebungi bakwete kusangula kukitshina bangi myanda ibubi, nyi bwakinyi makyenga ngakile bungi. Yehowa enyongola pa kumona myanda ya kukutwa kululama.—Badika Kibangilo 6:5, 6.
Yehowa nyi Efile Mukulu etatshishaa bwetu. Akyebe shi twikale na muloo. Kubashaala mafuku apeela bwashi akaashe makyenga ooso na kubutula booso bakwete kwiafwisha. Kumpala kwa byabya, auku bwakinyi mubande kulekyela makyenga munda mwa mafuku. Mu Dilongyesha dya 8, atukyebe kulonga bwakinyi mutadiile makyenga.—Badika 2 Mpyeele 2:9; 3:7, 13.
5. Mushindo kinyi watudi balombeene kwifubwila pepi n’Efile Mukulu?
Yehowa etutekye bwatudya kwifubwila pepi naaye mu luteko. Mutuule binangu byaaye kwi ooso a kwatudi. (Misambo 65:2; 145:18) Akuminaa kwitufwila lusa. Auku mushindo watukwete kwitatshisha bwa kumusangasha, sunga byekala shi tatukwete kobesha ingi nsaa. Sunga byatudi bantu bashi bapwidikye, twi bakumbeene kwikala na kipwano kibuuwa n’Efile Mukulu.—Badika Misambo 103:12-14; Jaake 4:8.
Bu bi Yehowa mwitupe muwa, abitungu tumufule kukila mushindo watudi bafule ungi muntu ooso. (Maako 12:30) Su okwete kulonga myanda itale Efile Mukulu na kukita byooso byakutekye bwa kulesha shi we mumufule, wefubwila pepi naye dingi kukila.—Badika 1 Timotee 2:4; 1 Yowano 5:3.
