DILONGYESHA 6
Ndukulupilo kinyi lwatudi nalo bwa bafwe?
1. Mukandu kinyi wibuwa utale bafwe?
Pabafikile Yesu ku Betanii, kibundji ki pepi na Yelusaleme, kuuku aye Laazare baadi mufwe takubaadi kukile mafuku ananka. Yesu bayile ku mashama na Maata na Mariya, bataata ba Laazare. Musango umune, bantu abaudile paapa. Banda kupwandikisha muloo ubaadi nawo Maata na Mariya pabaadi Yesu mubuushe Laazare ku bafwe!—Badika Yowano 11:21-24, 38-44.
Maata baadi auku mukandu wibuwa utale bafwe. Baadi auku shi Yehowa akyebe kusangusha bafwe bwashi bekale na muwa pa nsenga.—Badika Yoobo 14:14, 15.
2. Muntu su baafu ekalaa naminyi?
Efile Mukulu balungwile Adame shi: “We lufuufi byabya waluka ku lufuufi.”—KIBANGILO 3:19.
Bantu mbapangibwe ku lufufi. (Kibangilo 2:7; 3:19) Tatwi bikudi bi mu mbidi ya bantu nya. Twi bipangwa bi na mbidi ya bu muntu, byabya takwi kintu su nkimune akishalaa na muwa apafu mbidi nya. Su muntu bafu, boongo bwaye namu abufu, na binangu byaye abishimina. Nyi bwakinyi, Laazare tabaadi mubwele shi baadi mumone kintu kampanda pabaadi mufwe mwanda muntu mufwe taukaa kintu su nkimune nya.—Badika Misambo 146:4; Mulungudi 9:5, 6, 10.
Efile Mukulu akyengyeshaa bantu mu kaalo kunyima kwa lufu su? Bu abilesha Bible shi bafwe tabauku kintu su nkimune, lulambukisho lwa inferno ndulambukisho lwa madimi na lukwete kudimbiila Efile Mukulu. Efile Mukulu mushikwe kukyengyesha kwa bantu mu kaalo.—Badika Yeelemiya 7:31.
Tala video Muntu su baafu enda kunyi?
3. Bafwe mbakumbeene kwisamba n’etu su?
Bafwe ta mbakumbeene kwakula sunga kupusha nya. (Misambo 115:17) Kadi ingi miikeyilu i bubi, ngikumbeene kwisamba na bantu na kudimba bushi nyi mbantu bafwe abesamba. (2 Mpyeele 2:4) Yehowa mukandikye kwisamba na bafwe.—Badika Miiya Ikituulwe 18:10, 11.
4. Mbantu kinyi abakasanguka?
Midiyo ya bantu be mu nyembo abakasanguka. Mpa na bangi bashibaadi baukye Efile Mukulu na babaadi bakite myanda ibubi akasanguka.—Badika Misambo 37:9; Bikitshino 24:15.
Bantu abakasanguka abakapete mushindo wa kuuka bya binyibinyi pabitale Efile Mukulu na kutuula lukumino mwi Yesu na kumukokyela. (Bifumbulwe 20:11-13) Baaba abakasanguka na kukita myanda ibuwa mbakumbeene kupeta muwa wa looso pa nsenga.—Badika Yowano 5:28, 29.
5. Kusanguka kwa bantu akwitulongyesha kinyi pabitale Yehowa?
Efile Mukulu mwitupe lukulupilo lwa kusanguka pabaadi mutume Mwana aaye bwashi etufwile. Byabya kusanguka kwa bantu akwitulesha kifulo kya Yehowa na kalolo kaaye kakile. Apakasanguka bantu, mmuntu kinyi oodi na lukalo lwa kumona?—Badika Yowano 3:16; Beena-Looma 6:23.
