DILONGIESHA 05
Bible mmukandu w’Efile Mukulu kuatudi
Yehowa muitupe kia buntu kikile buwa nyi Bible e na tu mikanda tupela 66. Kadi we mulombene kuiyipusha’shi: ‘Bible mufikie kunyi? Mmukanda wa nanyi?’ Bia kupeta ngalulo ku ino nkonko, tubande kuisambila bifikie mukandu w’Efile Mukulu wi mu Bible kuatudi.
1. Su bantu nyi babafundile Bible, mbikunyi biadi mukanda w’Efile Mukulu?
Bible babamufundile kui bantu 40 munda mua bipua bifikie ku 1 600 kubanga mu kipua kia 1513 K.B.B. mpa na pangi ku kipua kia 98 B.B. Na babadi bamufunde kui bantu ba mishindo ilekenelekene. Sunga mbiabia, bioso bibabafundile mbipushene. Bino bi kukitshika naminyi? Muanda Bible mmukanda aufiki kui Efile Mukulu. (Badika 1 Bena-Tesalonika 2:13.) Bantu babamufundile, tababafundile binangu biabo nya. Anka, “nku bukome bwa kikudi kiselele kubekeele bantu balungule myanda ayifiki kwi Efile Mukulu.” a (2 Mpyeele 1:21) Efile Mukulu bafubiishe kikudi kiaye kiselele, bua kuyokiela sunga kutakula bantu buabadia kufunda binangu biaye.—2 Timote 3:16.
2. Nanyi mulombene kupeta bukuashi bua Bible?
“Bantu ba maumbo oso na bisamba bioso na dimi yoso mpa na miilo yoso” mbalombene kupeta bukuashi bua mukandu wibuwa wi mu Bible. (Badika Kibafumbwilwe 14:6, EEM.) Yehowa mukite muaye moso bua’shi Bible ekale mu ndimi ibungi kukila ingi mikanda yoso. Pepi bantu boso mbalombene kubadika Bible. Bino mbia binyi muanda mbalombene kupeta Bible sunga bekala mbalo kinyi sunga bakula ludimi kinyi.
3. Yehowa badi mukaluile Bible naminyi?
Bible babamufundile ku bintu bibadi abiluila bukidi, bu misokia na papyrus. Anka, bantu babadi bafule Bible, abadi bamutentule bamufunduula ku masa na kalolo koso. Sunga biekala’shi bantu babadi na matalua babatompele kushimisha Bible, anka bangi babatudile mpa na muwa wabo mu masaku bua kumukaluila. Yehowa ta mulekiele muntu sunga kintu kampanda buakidia kuitukutshishua kuisamba naye. Bible akula’shi: “Eyi dy’Efile Mukulu etu adikala kwanka bwa loso.”—Yeeshaya 40:8.
TUKIMBUULE BOSO
Tukimbuule kalolo pabitale bibadi Efile Mukulu muyokielue bantu bua kufunda Bible, bibadi mumukaluile na bibadi mukite bua’shi ekale kui bantu boso.
4. Bible nabene alesha bamutushishe
Tala VIDEO. Akupu badika 2 Timote 3:16, akupu dingi nuisambile ino nkonko ailondo.
-
Su bantu nyi babafundile Bible, buakinyi abamuitanyina bu Eyi di’Efifle Mukulu?
-
Mu kobe kumona, tui balombene kukumina’shi Efile Mukulu badi muate binangu biaye ebiela mui bantu bua kufunda Bible?
Mufundi e kufunda mukanda kadi mukandu wi muanka aufiki kui muntu bamulungula bua kuiufunda. Bi mumune, bantu babafundile Bible kadi mukandu wi muanka aufiki kui Efile Mukulu
5. Bible mmupande ku buluishi
Su Bible mmukanda aufiki kui Efile Mukulu, tui na kia kukulupila’shi amukaluila. Kubanga kala, bantu be na matalua abatompele kushimisha Bible. [kukita bia’shi Bible tekalanga kuanka] Bakata ba bipuilo babatompele kumufuamisha. Anka sunga mbya kubadi kubinguabingua na kukimba kuipaa bantu, bebungi babadi bakumine kutula muwa wabo mu masaku bua kukaluila Bible. Bua kuuka bibungi pabitale umune a ku baba bantu tala VIDEO, akupu nuisambile ino nkonko ailondo.
-
Bu bibouku’shi bantu bebungi babadi batule muwa wabo mu masaku bua kukaluila Bible, bibanyinsha nkupa lukalo lua kumubadika su? Buakinyi?
Badika Misambo 119:97, akupu nuisambile luno lukonko alulondo:
-
Nkinyi kibadi kitakule bantu bebungi bua kutuula muwa wabo mu masaku bua kualuula na kuabila Bible?
6. Bible e kuanka bua bantu boso
Bible mmukanda wabadi baluule ngofu na kuabila kukila ingi mikanda yoso. Badika Bikitshino 10:34, 35, akupu nuisambile ino nkonko ailondo:
-
Buakinyi Efile Mukulu akumina’shi baluule Bible Eyi diaye na kumuabila bantu bebungi?
-
Nkinyi akikusankishaa pabitale Bible?
Bantu pepi
100%
mu nsenga ishima
be na Bible mu ludimi luabapusha
E kuanka mu
ndimi ikile pa
3 000
mushima sunga kipindi
5 000 000 000
Mbungi buatupuandikisha bua ma Bible abadi batushe mu nsenga ishima
kukila ingi mikanda yoso
BANGI ABAMBA’SHI: “Bible muikale penda mukanda wa kala ubabafundile kui bantu.”
-
Obe namu wamba naminyi?
-
Mbishinkamisho kinyi abilesha’shi Bible nyi Eyi di’Efile Mukulu?
MU KIKOSO
Bible nyi Eyi di’Efile Mukulu na Efile Mukulu bakitshine muaye moso bua’shi bantu boso bekale naye.
Kuambuula
-
Kuakula’shi Efile Mukulu badi muyokielue bantu bua kufunda Bible abilesha kinyi?
-
Nkinyi akikukanyisha pabitale bibapandile Bible, kumualula na kumuabila?
-
Opusha naminyi pa kuuka bibadi Efile Mukulu muitatshishe bua kuisamba nobe?
TALUULA DINGI
Longa bibungi pabitale Bible—kubanga ku mifungofungo ya kala mpa na biabadi bamualule binobino.
Tala bibadi Bible mupande ku mianda ikata isatu.
“Bible baadi mupande naminyi?” (Kitenta kya Mulami No. 4 2016)
Tala bibadi bantu batule muwa wabo mu masaku bua kualula Bible.
Babadi batentule Bible na kumualula misango ibungi. We kushinkamisha naminyi’shi mukandu w’Efile Mukulu wi muanka ta ngushintulukie?
“Myanda i mu Bible mbeyishintuule sunga kwiyilwisha?” (Muisambo wi mu Internete)
a Nka bu biatukebimono mu Dilongiesha dia 07, kikudi kiselele nyi mbukome bu’Efile Mukulu bua kita nabo mifubo.
Tala dingi
NKONKO YABAKAMBAA KWELA
Kulonga kwa Bible akukitshikaa naminyi?
Tala myaluulo ya nkonko itale programe etu a kulonga kwa Bible.
